!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Шпанската полиција во потрага по референдумските ливчиња во Каталонија


Барселона, 17 септември, 2017 - 15:27 (META) 

Шпанската полиција изминатите неколку дена пребарала повеќе печатници и простории, барајќи ги гласачките ливчиња, кутиите и промотивните материјали за референдумот за независност на Каталонија, кој шпанскиот уставен суд го забрани, пренесува ХРТ.

Со потрагата по гласачкиот материјал, шпанската централна влада се обидува да го спречи одржувањето на референдумот закажан за 1 октомври, а кој каталонската влада планира да го спроведе и покрај одлуката на судот.

Каталонскиот претседател Карлес Пучдемон, кој се соочува со судска постапка поради организирање на референдумот, рекол дека има повеќе од 6.000 гласачки кутии, но дека тие се наоѓаат на тајно место.

Државното обвинителство ја повикало каталонската полиција да го спречи одржувањето на гласањето, вклучително и заплена на гласачкиот материјал. Главниот секретар на синдикатот на каталонската полиција, Тони Кастехон, пак, изјавил дека тоа е како да се бара игла во стог сено, додавајќи дека во моментот не знаат ништо околу постоењето на гласичките ливчиња и кутии.

Каде се наоѓаат кутиите и како планираат да ги дистрибуираат на избирачките места, одбил да каже и портпаролот на каталонската влада.

Вчера повеќе од 700 од вкупно 948 градоначалници во Каталонија излегоа на улиците во Барселона да ја искажат својата поддршка за референдумот за незавиност, кој треба да се одржи за две недели.


Британската полиција трага по бомбашот одговорен за нападот во метро-станицата


Лондон, 16 септември, 2017 - 10:48 (META) 

Во тек е потрага по лицето одговорно за бомбашкиот напад што вчера се случи во метро-станицата Парсон грин во југозападниот дел на Лондон, во кој 29 лица беа повредени, јавува „Би-би-си“.

Полицијата соопштила дека трага по осомничените и дека стотици полицајци ги прегледуваат снимките од безбедносните камери од метро-страницата.

Заканата од терористички напад во Велика Британија е подигната на највисоко – критично ниво, што значи дека постои реална опасност од нов напад.

Милитантната група Исламска држава соопшти дека стои зад експлозијата на бомбата во метро-станицата што се случи вчера утро.

Помошник-комесарот на лондонската полиција, Марк Роули, изјавил дека ИД „рутински“ ја презела одговорноста за нападот, независно од тоа дали имала или не претходна врска со лицата вмешани во случајот.

Тој побарал од јавноста да остане будна, но додал дека луѓето не треба да бидат вознемирени.


Полицијата убила едно лице во потрагата по напаѓачот од Барселона


Барселона, 21 август, 2017 - 17:59 (META) 

Во потрагата по главниот осомничен за нападот во Барселона, шпанската полиција денеска убила едно лице во близина на Барселона, кое наводно носело појас со експлозив, пренесува „Би-би-си“, повикувајќи се на шпанските медиуми.

Пукањето се случило на пат во областа Субиратс, оддалечена околу 40 километри од Барселона, каде во четвртокот, минатата недела, во терористички напад беа убиени 13 лица, а 100 беа повредени.

Претходно, полицијата потврди дека трага по 22-годишниот Јунес Абујакуб, осомничен дека го возел комбито кое влета во маса луѓе на улицата Ла Рамбла во центарот на Барселона.

Дел од шпанските медиуми пишуваат дека убиениот маж е Абујакуб, но, од полицијата засега нема потврда на ваквите наводи.

Според весникот „Ел Мондо“, полицијата била алармирана, откако бил забележан маж кој одговарал на описот на Абујакуб, во близина бензинска станица.


Грујoвски и Бошковски ги нема, се чека МВР да се изјасни


Скопје, 27 јули, 2017 - 11:17 (META) 

Од вчеравечер полицијата трага по поранешниот началник на петата управа, Горан Грујовски, и по Никола Бошковски, исто така од тајната полициска служба, откако попладнето Врховен суд ги потврди притворите од 30 дена за двајцата. Досега тие не се пронајдени, иако неколкупати биле барани на нивните домашни адреси и на уште неколку локации каде би можеле да бидат. Засега нема сознанија дали илегално заминале од Македонија, информираат од МВР.

Официјално, се очекува МВР да се изјасни наскоро за потрагата по двајцата.

Горан Грујовски е поранешен началник на петтата управа во Управата за безбедност и контраразунавање и е обвинет во предметите на Специјалното јавно обвинителство „Тврдина“ и „Таргет“. Никола Бошковски беше вработен во УБК и тој е обвинет во истите предмети.

Полицијата синоќа го добила решението од Врховен суд за нивен притвор.


По 23 години МВР ја заврши најдолгата потрага по бегалец од затвор


Скопје, 25 мај, 2017 - 17:12 (META) 

Македонската полиција извести дека со екстрадицијата на македонскиот државјанин Д.М. од Италија во Македонија на крајот од минатиот месец, Секторот за меѓународна полициска соработка на МВР ја завршил најдолгата потрага по бегалец во историјата на македонската полиција, која траела цели 23 години еден месец и 14 дена.

Според соопштението на полицијата, на 12 јануари 1989 година Д.М. со соучесник извршиле брутално убиство на маж со секира, кого потоа го искасапиле. На 19 јуни 1989 година тогашниот Окружен Суд во Битола ги осудил Д.М. на 15 годишна а соучесникот на 12 годишна затворска казна за убиство.

На 14 март 1994 година Д.М., избегал додека бил на викенд отсуство од затворот „Идризово“. Следниот ден е распишана меѓународна потерница, како и меѓународната потрага, која траеше цели 21 година, 8 месеци и 12 денови, до неговото апсење во Италија на 27 ноември 2015 година.

По двегодишната екстрадициона постапка тој е спроведен во КПУ Идризово каде што треба да ја одлежи затворската казна изречена во 1989 година.


Ограбен трезорот на НЛБ во Скопје, вработен однел 2 милиони франци и 270.000 евра


Скопје, 11 април, 2017 - 10:36 (META) 

Вработен во НЛБ во Скопје од трезорот на банката вчера украл околу 2 милиони швајцарски франци и околу 270.000 евра. Случајот за „Мета“ го потврдија од Министерството за внатрешни работи (МВР).

Како што информираат оттаму, кражбата вчера во 16.58 часот ја пријавил директор во банката.

Според информациите на МВР, 40-годишниот Б.С. од Скопје, вработен во банката, ги зел парите од трезорот, ги ставил во ќесе и без да биде забележан од никого, заминал во непознат правец.

Од МВР велат дека трагаат по осомниченото лице, кое е во бегство.


На Табановце приведен Србин по кого трага кумановската полиција


Скопје, 8 јануари, 2017 - 13:14 (META) 

На граничниот премин Табановце вчера при обид за излез од земјава е приведен Ќ.З. од Прешево, Србија, кој е сторител на кривично дело телесна повреда, соопшти МВР.

Приведениот е откриен при пасошка контрола, кога е утврдено дека е предмет на потрага по телеграма од СВР Куманово поради основно сомнение дека нанел телесна повреда на друго лице.

Приведениот е предаден во полицијата во Куманово за понатамошна постапка.


Турција ги блокираше граничните премини со Бугарија


Анкара, 4 јануари, 2017 - 20:06 (META) 

Турција ги блокираше граничните премини со Бугарија поради стравување дека напаѓачот што изврши терористички напад во ноќниот клуб „Реина“ во Истанбул, би можел да избега преку Бугарија во Европа.

Турција на граничните премини распореди специјални сили за борба против тероризмот. Сите автомобили и патници се проверуваат, јавуваат бугарските медиуми.

Идентитетот на напаѓачот на ноќниот клуб „Реина“ во Истанбул е утврден, изјави денеска турскиот министер за надворешни работи, Мевлут Чавушоглу.

Напаѓачот кој уби 39 лица за време на дочекот на Нова година сè уште е во бегство, а Чавушоглу не сакаше да го открие неговото име.

Одговорноста за терористичкиот напад ја презеде Исламска држава.


Две лица загинаа при експлозија на бомба во Котор


Котор, 5 септември, 2016 - 19:12 (META) 

Две лица загинаа во експлозија на бомба во населбата Муо во Котор, Црна Гора, јавуваат црногорските медиуми.

Како што пишуваат медиумите, во експлозијата загинале двајца жители на Котор.

Агенцијата „Танјуг“ јавува дека експлозивната направа била фрлена околу 16.30 часот, пред една од куќите.

Според агенцијата, блокирани се сите улици во населбата, а во тек е потрага по осомничени лица.


Пронајдено тело на 12-годишно дете, а се трага по исчезнато 16-месечно девојче


Скопје, 9 август, 2016 - 10:18 (META) 

Расте бројот на загинати лица во големото невреме што во саботата доцна вечерта го погоди Скопје и околината. Вчеравечер, како што информираат од МВР за „Мета“, во населбата Ченто било пронајдено телото на 12-годишно момче, кое настрадало додека со неговиот дедо се движеле со трактор по обиколницата. Од МВР велат дека се трага и по 16-месечно девојче, кое вчера било пријавено за исчезнато.

Детето за исчезнато вчера околу 17 часот го пријавил таткото му. Според пријавата, момчето и неговиот дедо, кои се од селото Стајковци, во саботата околу 22 часот со трактор се движеле по обиколницата, кога на нив наишол голем воден бран, кој го превртел тракторот и го однел детето.

Неговиот дедо, успеал да се спаси, а мртвото тело на момченцето вчера околу 20.40 часот го нашол неговиот татко, во населбата Ченто, во близина на автобуската станица, последна 65-ка.

Вчера, околу 18 часот 18-годишниот Џ.Ф. пријавил дека во саботата вечерта додека со возило се движеле по обиколницата, што го управувал сега загинатиот Фуркан Фејзулаху, на нив наишол воден бран. Во возилото со нив била и 16-месечната ќерка на загинатиот Фејзулаху, на која и се губи секаква трага и надлежните трагаат по неа.

Како што информираат од МВР, по идентификувањето на 12-годишното дете, неговото тело по наредба на јавен обвинител било дадено на семејството за погреб. Обдукцијата на телото, според информациите, не била извршена.

Со последната регистрирана жртва досега бројот на загинати во невремето изнесува 22 лица, а по едно сè уште се трага.