Пратениците денеска повторно ќе гласаат за Договорот со Грција по ветото на Иванов


Скопје, 5 јули, 2018 - 9:44 (META) 

Собранието денеска во 11 часот ќе одржи пленарна седница на која единствена точка на дневен ред е законот за ратификација на Договорот со Грција кој на 17 јуни во Преспа го потпишаа македонскиот и грчкиот министер за надворешни работи, Никола Димитров и Никос Коѕиас.

Законот по втор пат се наоѓа пред пратениците откако претседателот Ѓорге Иванов одби да го потпише по првото гласање на 20 јуни кога беше изгласан со 69 гласа „за“.

Договорот денеска треба да биде изгласан со апсолутно мнозинство од вкупниот број на пратеници, а потоа тој повторно ќе биде доставен од претседателот кој според Уставот е обврзан да го потпише.

Претходно Иванов рече дека нема да го потпише указот за овој закон затоа што смета дека е противуставен, а озаконувањето на договорот со Грција според него е кривично дело.

Претседателот на Собранието, Талат Џафери, минатата недела на брифинг со новинари рече дека непотпишувањето на овој закон и законот за јазици е лоша пракса за која Собранието мора да најде решение и да ја прекине.


Џафери: Собранието мора да ја прекине лошата пракса на Иванов да не потпишува закони


Скопје, 29 јуни, 2018 - 13:50 (META) 

Доколку не го потпише и законот за ратификација на Договорот со Грција откако и по втор пат ќе биде изгласан со Собранието, претседателот на државата Ѓорге Иванов ќе воведе лоша пракса на мешање на надлежностите на властите односно преземање на надлежностите кои му припаѓаат на Собранието. Ова го истакна денеска претседателот на Собранието, Талат Џафери на брифинг со новинари.

– Апелирам до претседателот на државата да размисли во контекст на денешната одлука која што ја соопшти НАТО и во контекст на претстојниот самит на Алијансата во јули. Се надевам ќе разбере што значи овој историски момент за државата, а Собранието ќе ги спроведе своите надлежности. Собранието мора да најде начин да ја прекине оваа лоша практика која што беше и во случај со Законот за јазици. Собранието има надлежност да ја спроведе волјата на избраните пратеници, а сите институции се должни да го спроведат и почитуваат Уставот – потенцираше Џафери.

Тој рече дека ако Иванов не го потпише законот, ќе се употреби исто решение и за Договорот, но и за Законот за употреба на јазиците.

Едно од решенијата е тие да бидат испратени во Службен весник без потпис на претседателот Иванов.

Собранискиот спикер информираше дека најверојатно на 5 или 6 јули ќе се одржи седницата на која повторно ќе се гласа за ратификација на Договорот со Грција и додаде дека до крај на јули Собранието мора да донесе одлука за распишување на референдум.

– Доколку помине референдумот, роковите за уставните измени, доколку се оди по Деловникот, се четири месеци, но сепак тоа зависи од бројот на поднесени амандмани. Ако се почне со процедурата на почеток на октомври, може до Нова година да се заврши со измените на Уставот – вели Џафери.

Во однос на избирање на новите членови на Државната изборна комисија, Џафери рече дека рокот за доставување на предлози за кандидати истекува денеска и дека нивното именување може да биде на редовната седница на 17 јули или порано на вонредна седница доколку собраниската Комисија за избори и именувања излезе со состав на ДИК.


Иванов: 534.910 граѓани ми дадоа мандат да не го потпишам Договорот со Грција


Скопје, 26 јуни, 2018 - 9:38 (META) 

Врз основа на член 75 од Уставот, донесов одлука да не го потпишам Договорот со Грција, вели претседателот Ѓорге Иванов во писмото до Собранието, што беше денеска препратено до медиумите.

Тој набројува пет причини зошто нема да го потпише Договорот и потенцира дека во извршувањето на функцијата Претседател на Република Македонија секогаш постапува одговорно и дека своите права и должности ги врши врз основа и во рамките на Уставот, законите и интересите на Република Македонија.

Во образложението на одлуката тој вели дека нема мандат да го потпише Указот за прогласување на законот за ратификација на спогодбата.

-Еден од столбовите на мојата политика во изборната програма од 2014 година е дека „не прифаќам промена на Уставот со цел промена на уставното име. Не прифаќам идеи или предлози што би ги загрозиле македонскиот национален идентитет, посебноста на македонската нација, македонскиот јазик и македонскиот модел на соживот.“ На претседателските избори 534.910 граѓани гласаа за оваа моја изборна програма и ме избраа на функцијата Претседател на Република Македонија – вели Иванов.

Според него спогодбата излегува надвор од опфатот на резолуциите 817 (1993) и 845 (1993) на Советот за безбедност на Обединетите нации, затоа што во нив се зборува за „разлика околу името на државата„, а не за „разлики“ како што стои во спогодбата.

Иванов напоменува дека спогодбата нема уставен основ и не е ратификувана во согласност со Уставот и дека законот за ратификација на спогодбата не е во согласност со член 51, член 118 и член 119 од Уставот на Република Македонија.

-Спогодбата ја доведува Република Македонија во положба на потчинетост и зависност спрема друга држава, односно Република Грција. Според член 308 од Кривичниот законик, „Граѓанин кој ќе ја доведе Република Македонија во положба на потчинетост или зависност спрема некоја друга држава, ќе се казни со затвор од најмалку пет години“. Озаконувањето на оваа спогодба создава правни последици што се основа за кривично дело – додава Иванов.


Ципрас: Атмосферата на ручекот беше многу добра, речиси како на свадба


Скопје, 18 јуни, 2018 - 10:06 (META) 

Климата беше многу добра на ручекот со Заев, речиси како на свадба, бил коментарот на Алексис Ципрас за ручекот на двете владини делегации и на еврокомесарите Федерика Могерини и Јоханес Хан, како и претставничката на Генералниот секретар на ОН, Розмари ди Карло, што вчера се одржа во Отешево, веднаш по потпишувањето на Спогодбата за решавање на спорот меѓу Македонија и Грција, јавува дописничката на МИА од Атина.

Инаку, странските гости, кои заедно со претставниците на македонската влада од Псарадес пристигнаа со два глисера, беа пречекани во хотелот „Лејквју“ во Отешево со леб и сол. Како што извести ТВ „24“, на ручекот кој траеше вкупно околу два часа, на хотелската тераса се служеле рибина чорба од преспански крап, ѓомлезе, пинџур, свинско филе, бифтек, а за десерт е послужена баклава.


ВМРО-ДПМНЕ: Ова е капитулантски договор со кој Заев се гордее


Скопје, 17 јуни, 2018 - 12:01 (META) 

„Зоран Заев е најголемото оружjе што досега го имала грчката страна во преговорите за името. Зоран Заев со овој договор прави три големи работи кои создаваат неповратна штета. Со договорот се бирише името Македонија, се менува уставот, и се загрозува идентитетот Македонец и македонско“, се вели во соопштението на ВМРО-ДПМНЕ, по повод денешното потпишување на договорот.

Според опозицијата, , а со кој ќе се срамат стотици генерации во иднина.

„Македонија не заслужува да згасне на нечесен начин, поради скриени сомнителни интереси на Зоран Заев кој бесрамно распродава нешто што не е за продавање.Не се виновни претходните генерации што ние денес живееме во Македонија, тие се наша гордост, но ако се откажеме од нив ние ќе бидеме нивниот срам. ВМРО-ДПМНЕ се спротивставува на овој капитулантски договор. Ова е договор со кој во сто проценти се исполнуваат сите грчки барања. Со договорот Македонија се обезличува, се менува нејзиниот идентитет“, се вели во соопштението.

Во него се додава дека „Зоран Заев е единствениот политичар во Светот кој го сменил името на својата земја, и се откажал од идентитетот на својот народ.“

„ВМРО-ДПМНЕ ги повикува сите граѓани, незадоволни од капитулацијата на Зоран Заев, незадоволни од договорот кој го постигнал со Ципрас, незадоволни од економското цунами и пустош на владата на СДСМ да ни се приклучат во протесниот марш во Битола. Протестот ќе започне во 13:30 часот, собирното место е пред спортската сала во Битола, низ Широк Сокак се до плоштадот Гоце Делчев пред Домот на културата“, се вели во соопштението.

Ова е можност да се покаже подготвеност и несогласување со недржавничките и поразителни политики на оваа влада предводена од Заев која освен штета не направи ништо корисно за Република Македонија, велат од партијата.


Во Преспа потпишана спогодбата со Грција


Ресен, 17 јуни, 2018 - 11:19 (META) 

Шефовите на дипломатиите на Македонија и на Грција, Никола Димитров и Никос Коѕиас во селото Псарадес (Нивици) на грчкиот брег на Преспанското Езеро претпладнево ја потпишаа „Конечната спогодба за решавање на разликите опишани во Резолуциите 817  (1993) и 845 (1993) на Советот за безбедност на Обединетите Нации, за престанување на важноста на Привремената спогодба од 1995 г. и за воспоставување на стратешко партнерство меѓу страните“.

Документот предвидува ново име за Република Македонија, односно „Република Северна Македонија“, кое ќе се употребува ерга омнес, односно во секоја пригода и во земјава и надвор од неа. Oфицијалниот јазик на земјата е македонски, додека државјанството ќе биде „македонско/граѓанин на Република Северна Македонија“. Договорот го потпиша и посредникот на ОН, Метју Нимиц на денот на својот роденден.

Тој во оваа пригода рече дека, неговата посредничка улога завршува и дека останува двете земји да го одработат останатиот дел од договорот. Истакна дека, за решавање на овој децениски спор, кај четворицата политичари од македонска и грчка страна, имало лидерство, храброст и визија.

На церемонијата присуствуваа и шефицата на европската дипломатија Федерика Могерини, еврокомесарот за преговори за проширување Јоханес Хан и потсекретарката за политички прашања на Обединетите нации Розмари Ди Карло.

– Колку убав и величествен историски ден, нека ни е со среќа – рече Заев, кој во првиот дел од својот говор го спомена Аристотел, велејќи „човек што има волја, може и планини да помести“ што, како што нагласи, се случува денеска.

-Нема да можеш да постигнеш ништо без храброст и надежта е буден сон. Овие две мисли говорат дека кога има надеж и храброст можеш да поместиш планини. Со потпишувањето на овој договор навистина поместивме планини. Кога многумина се сомневаа, потврдивме дека е возможно. Ставаме крај на еден спор. Прашањето беше отворено три децении. Затоа јас и Ципрас и министрите за надворешни работи заедно со нашите претставници, тргнавме во потрага по решение и стигнавме до решение – рече Заев, посочувајќи оти од историјата треба да се учи, а не да се повторува нејзината содржина.

Грчкиот премиер, Алексис Ципрас рече дека „ако душата на секој народ е неговата историја, тогаш во нашиот договор се отсликани душите и на двата народи.“

– Напорно и неуморно стигнавме до заемно прифатлив договор, кој целосно ги почитува основните принципи и вредности на двете страни, договор кој денес ни дозволува да им се обратиме на граѓаните на двете земји, да ги погледнеме во очи и да ги повикаме да го прочитаат и да го поддржат без предрасуди – додаде Ципрас.

Тој при честитањето по потпишувањето на договорот, ја симна од врат својата вратоврска и му ја подари на својот грчки колега .

Денешниот настан продолжува со заеднички ручек на македонска територија, во Отешево.


Димитров, Коѕијас и Нимиц ќе го потпишат договорот денеска во Преспа


Скопје, 17 јуни, 2018 - 9:48 (META) 

Премиерот Зоран Заев, ја предводи делегацијата на Владата, на свечената цермонија на потпишувањето на конечниот договор за решавање на македонско-грчкиот спор за името и за стратегиско партнерство, што денеска, ќе се одржи на македонската и на грчката страна на Преспанско Езеро.

Премиерот Заев и македонската делегација, во чиј состав се замениците претседатели на владата, министерката за одбрана, Радмила Шекеринска, вицепремиерот задолжен за европски прашања, Бујар Османи, министерот за внатрешни работи, Оливер Спасовски, како и министерот за надворешни работи, Никола Димитров, денеска ќе пристигнат во Псарадес, на грчката страна, каде што ќе бидат пречекани од премиерот на Република Грција, Алексис Ципрас и од грчката владина делегација, и каде што министрите за надворешни работи на Македонија и на Грција, Никола Димитров и Никос Коѕијас ќе го потпишат договорот, заедно со медијаторот во преговорите, амбасадорот Метју Нимиц.

На делот од заедничкиот настан на свечената церемонија во Република Грција, свои обраќања ќе имаат премиерите Заев и Ципрас.

Според агендата на настанот, официјалната средба на двете делегации потоа ќе продолжи на македонската страна на Преспа, во Отешево, каде што двете делегации ќе имаат билатерален разговор и свечен ручек.

За време на целата церемонија, и во Грција и во Македонија, ќе присутсвуваат потсекретарката за политички прашања на Обединетите нации, Розмари Ди Карло, Високата претставничка за надворешни работи и безбедносна политика на Европската унија и Заменик-претседателка на Европската комисија, Федерика Могерини, и Комесарот за европска соседска политика и преговори за проширување на Европската унија, Јоханес Хан.


Договорот со Грција ќе се потпишува утре, денеска се гласа доверба на владата на Ципрас


Скопје, 16 јуни, 2018 - 12:27 (META) 

Во текот на утрешниот ден, недела, 17 јуни, во регионот на Преспа, на територија на Грција во засега непознат термин, ќе се одржи церемонијата на која, како што соопшти македонската влада, министерот за надворешни работи на Република Македонија, Никола Димитров и министерот за надворешни работи на  Грција, Никос Коѕиас ќе го потпишат договорот за  решавање на македонско – грчкиот спор за името. По потпишувањето на документот, кој го носи името „Конечна спогодба за решавање на разликите опишани во Резолуциите 817  (1993) и 845 (1993) на Советот за безбедност на Обединетите Нации, за престанување на важноста на Привремената спогодба од 1995 г. и за воспоставување на стратешко партнерство меѓу страните“,  на македонска територија ќе се одржи средба и ручек на претставниците на двете влади.

На утрешниот настан на кој ќе се потпише Спогодбата ќе присуствуваат премиерите на двете земји, Зоран Заев и Алексис Ципрас.

Владата го усвои овој договор на попладневната седница во четвртокот, а потоа ја симна тајноста и го објави на својот веб сајт.

Во грчкиот парламент, пак, денеска  пред 10 часот по локално време почна третиот дел по поднесеното барање од Нова демократија за гласање недоверба на Владата.  Главната тема на 16-часовната дискусија на пратениците вчера беше Конечната спогодба  со Македонија. Притоа пратеникот на ултра-десничарската партија „Златна зора“ Констанинос Барбарусис ја повика армијата да изврши воен удари поради „предавничката“ политика на владата на Ципрас.
Партијата „Златна зора“ ги осуди коментарите на нивниот пратеник и го исклучи од партијата. Исто така, на Златна зора и е забрането да учествува во продолжението на собраниската дебата.

Денеска покрај дискусијата, се очекува да се обратат лидерите на политичките партии и грчкиот премиер, а седницата ќе заврши со гласање недоверба.  Како што јави МИА, според досега изнесените ставови, не се очекуваат изненадувања. Пратениците на СИРИЗА и Независни Грци ќе гласаат против предлогот на Нова демократија, а Владата ќе добие доверба да продолжи да ја води Грција.

Грчките медиуми сензационално објавуваат дека во  текот на денешната расправа министерот за надворешни работи, Никос Коѕијас ќе презентира документи од грчкото МНР за преговорите со Македонија за името во минатото.
Договорот што ќе се потпише утре предвидува големи промени:

  • Двете страни ја потврдуваат постоечката граница меѓу нив како трајна меѓународна граница и ја потврдуваат својата желба за заемно пријателство, добрососедство и партнерство, како и решеноста да не преземаат и да не поддржуваат какви било непријателски чекори кон другата земја.
  • Официјалното име на Република Македонија ќе биде „Република Северна Македонија“, и тоа ќе се употребува ерга омнес. Скратеното име ќе биде „Северна Македонија“.
  • Државјанството ќе биде „македонско/граѓанин на Република Северна Македонија“.
  • Официјалниот јазик ќе биде „македонски јазик“, како што е признаено на Третата Конференција на ОН за стандардизација на географските имиња, одржана во Атина во 1977 година, но како јазик од групата на јужнословенските јазици и воопшто неповрзан со античката елинска цивилизација и култура.
  • Кодот за земјата на регистарските таблички на возилата на Втората страна ќе биде НМ или НМК. За сите други намени, кодот на земјата останува да биде МК и МКД, како што е официјално определено од Меѓународната организација на стандардизација (ИСО).
  • Придавката во однос на државата, нејзините службени органи и други јавни институции ќе биде „на Република Северна Македонија“ или „ на Северна Македонија“. Приватните лица и тела кои не се поврзани со државата и јавните институции и органи и не добиваат финансиска поддршка од државата за активности надвор од државата, можат да ги користат придавките изведени од зборот „Македонија“, но со јасна напомена дека тие придавки воопшто не се однесуваат на древна Македонија и на она што Грција го подразбира како македонски дел од своето историско наследство.
  • Македонија ќе го смени Уставот за да го промени името во Република Северна Македонија и да ги внесе погоре наведените промени.
  • Спогодбата подразбира македонското Собрание набргу да ја ратификува Спогодбата и за тоа да ја извести Грција, а потоа, според текстот, во Македонија може, но не мора, да се организира референдум.
  • Уставните промени преку амандмани мора да се направат до крајот на годинава. Откако тоа ќе се случи, Спогодбата треба да биде ратификувана и од грчкиот парламент.
  • Грција, откако ќе биде известена дека Македонија ја  ратификувала спогобата, ќе го извести Претседателот на Советот на Европската Унија дека дава поддршка за почеток на преговори за членство на Македонија, но под името Република Северна Македонија.
  • Истовремено, ќе го извести Генералниот секретар на НАТО дека дава поддршка НАТО да ѝ упати покана за пристапување на земјава под новото име, но конечната поддршка ќе зависи од исходот на референдумот, ако се организира, и од уставните измени, а ако референдумот го потврди новото име и амандманите на Уставот се додадени, Грција ќе го  ратификува Протоколот за пристапување на нашата држава под новото име во НАТО, а таа ратификација во грчкиот парламент ќе се направи паралелно со ратификацијата на Спогодбата што ќе се потпишува утре.

ОМД го повика Иванов да не го потпишува Законот за јазиците


Вашингтон, 12 јануари, 2018 - 9:48 (META) 

Обединетата македонска дијаспора во реакција до јавноста ги осуди пратениците кои вчера гласаа за усвојувањето на Законот за употреба на јазици и порача дека македонската заедница надвор од Македонија нема да го толерира редефинирањето на македонскиот национален идентитет, како и дека историјата ќе им суди на оние кои го изгласале законот.

„Овој закон, усвоен без демократски процес или вистинска јавна дебата, ќе ги чини македонските даночни обврзници милиони, и ќе го наруши Уставот на Република Македонија. Законот не е потврден од Венецијанската комисија на Советот на Европа и ја придвижува земјата на чекор понатаму да стане федерална држава, загрозувајќи го унитарниот територијален интегритет на Македонија. Нема историска основа или демографски причини за Македонија да има биетнички идентитет како Белгија“, се вели во соопштението од ОМД.

ОМД го повикува претседателот Ѓорге Иванов да не го потпишува законот, а САД и ЕУ веднаш да го осудат овој акт на Собранието. Од таму бараат Македонија итно да спроведе попис на населението, а опозицијата да престане да го бојкотира Собранието, да се врати на работа, претставувајќи ги интересите на нивните изборни единици.

Законот, според ОМД, е неуставен и служи за понатамошна поделба на Македонија по две етнички и религиозни линии.

„ОМД смета дека ниту едно малцинство во Македонија не треба да има преференцијален третман врз другите, а Македонија мора да престане да создава паралелни општества“, се додава во соопштението.


Ако Иванов не го потпише за седум дена, законот за јазиците ќе почека уште еден месец


Скопје, 11 јануари, 2018 - 19:31 (META) 

По денешното усвојување во Собранието, Законот за употреба на јазиците во следните седум дена е во рацете на претседателот на државата Ѓорге Иванов кој треба да го потпише указот за негово прогласување за да може законот да биде објавен во Службен весник и официјално да стапи на сила.

Надлежностите на претседателот на државата и роковите за попишување на указите за прогласување на законите се регулирани во Уставот, Деловникот на Собранието и во Законот за Собрание.

Според Законот за Собранието, претседателот на законодавниот дом, во случајов Талат Џафери уште денеска треба да го достави законот кај Иванов заради потпишување на указот.

Иванов, според истиот закон, има рок од седум дена да го потпише указот за негово прогласување.

Претседателот на државата има право да не го потпише законот, освен во случај кога е донесен со двотретинско мнозинство, за што треба писмено да го извести собранискиот спикер.

Во таков случај Собранието повторно го разгледува законот и доколку го усвои со мнозинство гласови од вкупниот број пратеници, претседателот на Републиката е должен да го потпише указот, стои во членот 75 од Уставот.

Постапката за повторно разгледување на законот е пропишана во Деловникот и во Законот за Собрание.

„Ако претседателот на Републиката одлучи да не го потпише указот за прогласување на законот, Собранието повторно го разгледува законот согласно со Деловникот, во рок од 30 дена од денот на донесувањето на законот. По повторното разгледување на законот, амандмани можат да се поднесуваат само во врска со укажувањето на претседателот на Републиката“, стои во ставовите 3 и 4 од членот 38 од Законот за Собрание, како и во членот 173 од Деловникот на Собранието.