!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Изградбата на автопатиштата продолжува, Владата потпиша анекс-договор со „Синохидро“


Скопје, 3 октомври, 2017 - 14:35 (META) 

Вицепремиерот за економски прашања, Кочо Анѓушев, министерот за транспорт и врски, Горан Сугарески, вршителот на должност директор на Јавното претпријатие за државни патишта, Зоран Китанов, и претставникот на „Синохидро“ во Македонија, Фан Јанг, денеска го потпишаа анексот на договорот за изградба на автопатската делница Миладиновци – Свети Николе – Штип.

Потпишувањето на овој анекс-договор следува по донесениот закон за изменување и за дополнување на законот за реализација на инфраструктурни проекти за изградба на автопатиштата Миладиновци – Штип и на Кичево – Охрид, со кој рокот за завршување на автопатот Миладиновци – Штип наместо до први мај 2017 година се продолжува до 30 септември 2018 година.

– Автопатот Миладиновци – Штип, во согласност со претходниот договор, требаше да биде завршен до 1 мај 2017 година, но, за жал, не беше завршен во предвидениот рок. Наша цел е да се заврши оваа делница во легална процедура, Собранието ги донесе неопходните законски измени и дополнувања, а денеска го потпишавме и анекс-договорот со кој се продолжува изградбата на делницата Миладиновци – Свети Николе – Штип до 30 септември 2018 година, односно рокот за завршување на работите се пролонгира за 517 дена – изјави Анѓушев.

Потпишувањето на анекс-договорот помеѓу Владата и „Синохидро“ е во согласност со законските измени и дополнувања донесени од Собранието.


Македонија и БИХ потпишаа договор за заемно признавање на возачките дозволи


Скопје, 13 септември, 2017 - 14:42 (META) 

Владите на Македонија и на Босна и Херцеговина денеска потпишаа договор за заемно признавање на возачките дозволи помеѓу двете земји. Во име на Владата на Република Македонија, договорот го потпиша министерот за внатрешни работи, Оливер Спасовски, а во име на Советот на министри на Босна и Херцеговина, договорот го потпиша министерот за комуникации и транспорт, Исмир Јуско.

Спасовски по потпишувањето на договорот рече дека надлежните органи на двете држави реципрочно ги признаваат возачките дозволи на возачите кои како туристи или комерцијални возачи управуваат со возило на територијата на едната или другата држава.

– Граѓаните кои имаат регулирано престој во согласност со националното законодавство на двете држави, можат без да има потреба од полагање теоретски и практичен испит, да ја заменат својата возачка дозвола за возачка дозвола од истата категорија и поткатегорија на другата држава. При исполнување на ова свое право, граѓаните ќе треба да ја почитуваат административната процедура што ќе им го овозможи ова право – рече Спасовски.

Тој додаде дека во тек е процедурата за потпишување договор за признавање и за замена на возачки дозволи и со Косово, Турција, Обединетото Кралство на Велика Британија и Северна Ирска и со Сојузна Република Германија и дека тие ќе бидат приоритет на МВР затоа што има голем број македонски државјани што живеат и работат во тие земји.

Министерот за комуникации и транспорт на БИХ, Исмир Јуско, нагласи дека овој договор е потпишан меѓу две пријателски земји, кои и понатаму ќе ја унапредуваат соработката.


Германија: По години безуспешни преговори, Бугарија и Македонија најдоа решение


Берлин, 1 август, 2017 - 15:23 (META) 

„Денеска Бугарија и поранешната југословенска Република Македонија потпишаа историски договор за добрососедство во Скопје. Го поздравувам многу тоа што по многу години безуспешни преговори, се најде консензуално решение на отворените прашања. Со тоа двете држави испраќаат важен сигнал за успешна билатерална, но и регионална соработка на Балканот и за понатамошната евро-атлантска интеграција на ПЈР Македонија“, порача германскиот министер за надворешни работи, Зигмар Габриел, по повод потпишувањето на Договорот за добрососедство помеѓу Бугарија и Македонија.

Во изјавата што ја пренесе германското министерство за надворешни работи, Габриел посебно го нагласува фактот дека потписот на договорот се става помалку од два месеца од стапувањето на функција на новата македонска влада.

– Убеден сум дека новата влада во Скопје ќе продолжи да го спроведува овој вид конструктивна соработка консеквентно со сите соседи. Исто така, ги поздравувам напорите на новата влада, по долгогодишна стагнација, сега конечно да почне со итно потребните реформи за приближување кон ЕУ – вели шефот на германската дипломатија.


Потпишан Договорот со Бугарија – Борисов и Заев го опишаа како историски чекор


Скопје, 1 август, 2017 - 14:45 (META) 

Бугарија од денеска е уште поголем пријател на Македонија и наш сојузник во евроатланската перспектива, изјави премиерот Зоран Заев на заедничката прес-конференција со бугарскиот премиер Бојко Борисов, по потпишувањето на Договорот за добрососедство и за пријателство помеѓу Македонија и Бугарија.

– Потпишувањето на Договорот за добрососедство и за пријателство со Бугарија покажува дека таму каде што има политичка волја, прашањата ќе се решат. Македонија и Бугарија направија историски чекор напред и заедно го поставивме минатото како темел за иднината и отворивме пат за стабилност и за развој за двете држави. Овој договор е заемен успех и придонес кон политичка стабилизација и во државите и во регионот. Македонија и Бугарија покажаа одговорност кон своите граѓани. Нашето пријателство и добрососедтво се пример за тоа како сопирачката може да се претвори во мотор на соработка – изјави Заев.

Македонскиот премиер истакна дека договорот е и значајна порака до ЕУ и до НАТО дека земјите од регионот имаат политички раководства кои градат мостови поддржани од демократски граѓани.

Бугарскиот премер Бојко Борисов рече дека терминот заедничка историја е термин што дава перспективи и обединува, а не разделува.

– Ќе ја видите реакцијата во ЕУ, ќе биде позитивна, не знам дали е првпат, без посредници, без упатства од страна, да се дојде до сознанија дека дружбата и добрососедството се важни. Тоа ќе ја подигне конкурентноста, ќе нè направи силни, значителни и независни. Ние решивме да гледаме напред и убеден сум дека по 10 години резултатите од средбата ќе бидат видни за двете држави – изјави Борисов.

Заев како одговор на новинарско прашање рече дека претходната влада имала сериозен придонес во изработката на Договорот и тој заедно со Борисов ја повика ВМРО-ДПМНЕ да го поддржи Договорот. Борисов рече дека „една сабота работите биле многу блиску до потпишување договор меѓу владата на Никола Груевски и влада на ГЕРБ“ и за вечерва најави средба со лидерот на ВМРО-ДПМНЕ.

Прашан за отстапките што ги направиле двете држави за да дојдат до Договорот, Заев рече дека одлучиле да гледаат на чашата како да е полуполна, а не полупразна за да може земјите да одат напред.

На прашањето од бугарска новинарка каква порака се испраќа со денешната средба и со потпишувањето на договорите до ЕУ, Русија и до САД, Борисов рече дека Договорот не треба никого да плаши, оти е насочен само на градењето перспектива за двете држави. Тој рече дека ни Србија ни Бугарија не треба да се почувствуваат загрозени од договорот и ја пофали храброста на Заев да го потпише Договорот.

На новинарско прашање зошто одлучиле заеднички да го славата утрешниот празник, бидејќи не сме иста држава, Борисов рече дека празникот е заеднички и дека тој и Заев сакаат да се движат напред и да ги достигнат развиените европски земји.

– Зашто празниците се заеднички. Што треба да правиме, да се тепаме? Многу пати сме го правеле тоа и сите сме големи – Голема Бугарија, Голема Србија, Голема Албанија, Голема Македонија … И поради војните го доведовме Балканот да биде најсиромашно и најзаостанато место во Европа. Ние сакаме да одиме напред и да ги стигнеме Германија, Австрија, Франција… Тоа е празник кој и ние го сакаме. Извинете што го празнуваме – рече Борисов.


ВМРО-ДПМНЕ бара од МАНУ да се изјасни за договорот со Бугарија


Скопје, 5 јули, 2017 - 10:20 (META) 

Опозициската ВМРО-ДПМНЕ во редовното утринско соопштение ја повика Македонската академија на науките и уметностите (МАНУ) да се изјасни за договорот за добрососедство што, како што велат, премиерот Зоран Заев има намера да го потпише со Бугарија.

„МАНУ мора да излезе со став околу договорот кој Заев има намера да го склучи со Бугарија. Молкот на МАНУ за вакви суштински прашања отвора простор за нови напади и за нови омаловажувања. ВМРО-ДПМНЕ го повикува и Министерството за надворешни работи да реагира бидејќи станува збор за угледот на државата и на врвната научна институција“, стои во соопштението.

Од партијата повторно обвинија дека на помалку од еден месец од потпишувањето на договорот со Бугарија, „македонскиот народ нема никаква информација за тоа што содржи тој договор“.

„Македонскиот народ има право да знае какви отстапки направил Заев, бидејќи експертите од Бугарија протолкуваа дека со договорот се става крај на македонизмот, а сиот овој атак не само што не беше демантиран, туку беше премолчан од институциите предводени од СДС“, велат од ВМРО-ДПМНЕ.


Усвоена Римската декларација за иднината на ЕУ


Рим, 25 март, 2017 - 16:23 (META) 

Шефовите на државите и на владите на земјите членки на Европската Унија во Рим ја усвоија Декларацијата за иднината на Унијата во која се нагласува дека ЕУ ќе остане неподелена.

Освен тоа, во Декларацијата се вели дека ЕУ ќе напредува со различни брзини и сили во ист правец и дека ќе биде отворена за оние европски земји што ги почитуваат и вложуваат напори да ги уважат европските вредности.

Римската декларација е усвоена на 60-годишнината од потпишување на договорот за основање на Унијата во Рим. Новиот документ дава политички и програмски насоки за утврдување на идните неопходни промени.

Во Декларацијата се укажува дека ЕУ е соочена со невидени предизвици како на светската така и на домашната сцена, дека постојат регионални конфликти, тероризам, миграционен притисок, протекционизам и социјална и економска нееднаквост.

„Унијата ќе ја направиме посилна и отпорна низ уште поголемо единство и солидарност помеѓу нас и со почитување на заедничките права“, се вели во Декларацијата.

Лидерите на државите нагласија дека во следната деценија сакаат Унија која ќе биде безбедна, напредна, конкурентна, одржлива и социјално одговорна со волја и со способност да одигра клучна улога во светот и да се соочи со глобализацијата.


Десет политички партии се обврзаа да го сменат Законот за абортус


Скопје, 2 декември, 2016 - 13:56 (META) 

Платформата за родова еднаквост ги повика сите политички партии да се обврзат дека по изборите ќе го сменат Законот за прекинување на бременоста од 2013 година.

Декларацијата денеска ја потпишаа 10 политички партии: ВМРО – Народна партија, Демократска обнова на Македонија (ДОМ), Достоинство, Левица, Либерална партија(ЛП), Либерално-демократска партија (ЛДП), Нова социјалдемократска партија (НСДП), Обединети за Македонија, Партија за целосна еманципација на Ромите (ПЦЕР) и Социјалдемократски сојуз на Македонија (СДСМ).

Во декларацијата испратена до партиите се побара по парламентарните избори тие да се обврзат да направат измени на Законот за прекинување на бременоста, и тоа во одредбите што го ограничуваат пристапот до абортус на жените во здравствените институции и го загрозуваат правото на здравствената заштита и на репродуктивните права.

Исто така, партиите со потпишувањето се обврзаа на транспарентност и на партиципативност на сите заинтересирани страни, вклучително и на граѓанските организации, во процесите на донесување нова законска регулатива, при што ќе се следат препораките на Светската здравствена организација и обврските од националните и од меѓународните документи за човековите права.


Партиите го потпишаа Кодексот за фер и демократски избори


Скопје, 20 ноември, 2016 - 15:10 (META) 

Партиите денеска го потпишаа Кодексот за фер и демократски избори, во согласност со одредбите на Изборниот законик.

Претседателот на Државната изборна комисија, Александар Чичаковски, истакна дека изборите кои се фер, демократски и ги почитуваат принципите на демократијата и на доброто владеење, придонесуваат за демократски развој на општеството.

– Сите учесници во изборите со своите активности го поставуваат фундаментот на демократијата и придонесуваат за градењето на довербата во изборниот систем на Македонија – истакна Чичаковски.

Кодексот го потпишаа претседателот на ВМРО-ДПМНЕ, Никола Груевски, кој ја предводи коалицијата За подобра Македонија, лидерот на СДСМ, Зоран Заев, од здружената опозициска коалиција, во име на ДУИ потпиша Изет Меџити, Мендух Тачи од ДПА, Гзим Острени од коалицијата Алијанса за Албанците, Ивон Величковски од ЛП, Стојанче Ангелов од Достоинство во име на Коалицијата ВМРО за Македонија, Павле Трајанов од Демократскиот сојуз за Коалицијата за промени и правда – Трет блок, Билал Касами од Беса, Здравко Савески од Левица и Мухамед Халили од ПДП.

На потпишувањето на Кодексот присуствуваа и амбасадорите на САД, Германија, Франција, Велика Британија, како и заменик-амбасадорот на ЕУ и шефот на мисијата на ОБСЕ/ОДИХР.


Политичките партии денеска ќе потпишат Кодекс за фер и демократски избори


Скопје, 20 ноември, 2016 - 9:41 (META) 

Согласно одредбите на Изборниот законик, политичките партии учесници во изборите на 11 декември, денеска во 14 часот ќе потпишат Кодекс за фер и демократски избори во Државната изборна комисија (ДИК), која првпат го организира овој настан.

– За таа цел, ги повикуваме претседателите на политичките партии кои ги предводат коалициите учесници на изборите, како и претседателите на политичките партии кои самостојно учествуваат на изборите, со своето лично присуство и потпис да ја реафирмира заложбата на своите коалиции и партии за фер и демократски избори – се вели во соопштението на ДИК.

На настанот е поканет и дипломатскиот кор во Македонија.


Судовите се прогласија за ненадлежни за потписите на Талески од притвор


Битола, 16 септември, 2016 - 13:57 (META) 

Апелацискиот суд Скопје вели дека е ненадлежен да даде мислење за тоа дали битолскиот градоначалник, Владимир Талески, од куќен притвор може да потпишува службени документи. Ова стои во одговорот што од судот ѝ го испратиле на советничката во Општина Битола, од ВМРО-Народна партија, Габриела Илиевска, која побара мислења од судовите и од Собранието за работењето на Талески од дома.

„Во согласност со член 33 од Законот за судовите, апелациските судови се надлежни да решаваат по жалбите против одлуките на основните судови од своето подрачје, да решаваат за судир на надлежност меѓу судовите од прв степен од своето подрачје и да вршат други работи определени со закон. Имајќи ја предвид горенаведената законска одредба Апелацискиот суд Скопје не е надлежен да дава мислење во смисла на Вашето барање“, стои во одговорот на Апелација.

Илиевска за „Мета“ вели дека е зачудена од одговорот на судот и прашува како може судот што му ја изрекол мерката на Талески да не може даде мислење дали тој смее или не смее да ја раководи Општината од дома.

– Иако овој суд му ја изрече оваа мерка на лицето В.Т., не може да даде мислење дали тој смее или не смее да работи од дома. Што друго да се каже освен дека ако е вака како што пишуваат во дописот, зошто воопшто му ја изрекле оваа мерка ако не се надлежни. Сè додека институциите во Македонија се на став дека не се мешаат во сопствените работи, ќе имаме вакви, за жал, трагикомични ситуации, како со градоначалникот Владимир Талески, кој ја води Општината од дома, од куќен притвор – вели Илиевска, која барања за мислење испрати и до Специјалното јавно обвинителство, Основниот суд Скопје 1 и до Законодавно-правната комисија на Собранието на Република Македонија.

На прашање на „Мета“ дали Талески смее да потпишува службени документи и да комуницира со вработени во Општината додека е во притвор, од Основниот суд Скопје 1, кој му го одреди куќниот притвор на битолскиот градоначалник, кон крајот на август, ни одговорија дека на судот му е јасно што значи мерката куќен притвор, но дека не е надлежен да ги толкува законите и дека тоа го прави Собранието на Република Македонија.

Обвинителката на СЈО, Ленче Ристоска, вчера, одговарајќи на новинарско прашање, рече дека куќниот притвор на Телески истекува наскоро и дека СЈО ќе достави соодветен предлог до судот, за кој, како што рече, не сака да прејудицира каква ќе биде неговата содржина. Ристоска додаде дека имаат увид во документите што ги потпишува Талески.

– Имаме увид во целокупната документација, нашите истражители беа во Општина Битола и ги обезбедија сите потребни докази што ни се релевантни за наше понатамошно постапување – рече Ристоска.

Талески неодамна самиот изјави дека потпишува службени документи додека е во куќен притвор.

– За жал, многу пријатно се изненадија моите соработници затоа што СЈО уште еднаш дојде да провери дали градоначалникот потпишува. Се разбира дека потпишувам и освен мерката куќен притвор, јас немам ниту една друга забрана – рече Талески, по јавната седница во Апелацискиот суд во врска со неговата жалба на продолжувањето на куќниот притвор.

Талески и уште 22 лица, осомничени во случајот „Транспортер“ што го отвори СЈО, се товарат за злоупотреби и за малверзации со тендерите за превоз на ученици во Битола, тешки 360.000 евра.