Полициите на Албанија и Црна Гора потврдија дека Груевски ги минал нивните граници


Скопје, 16 ноември, 2018 - 10:30 (META) 

Полициите и на Албанија и на Црна Гора вчеравечер се огласија со соопштенија по бројните написи во медиумите дека поранешниот македонски премиер Никола Груевски за Будимпешта заминал преку двете земји. Двете земји потврдија дека во неделата Груевски ги напуштил земјите. Со оглед на фактот дека од Подгорица и од Тиват тој ден немало летови за Будимпешта, најверојатно Груевски ја напуштил земјата по сувоземен или по морски пат, или пак летал за Будимпешта преку Белград.

Според Одделот за граници и миграции на Државната полиција на Албанија, „Н.Г. на 11.11.2018 во 19.11 часот ја напуштил територијата на Албанија преку граничниот премин „Хани Хоти“ и влегол во Црна гора како патник во возило со регистерски таблички CD1013A, сопственост на унгарската амбасада во Тирана“.

Дополнително, албанската полиција соопштува дека во времето на неговото преминување немала добиено потерница или белешка дека по Груевски се трага.

„Интерпол Скопје на 13 ноември 2018, во 19.35 до Интерпол Тирана испрати меѓународна потерница за ова лице“, соопшти Државната полиција на Албанија.

Управата за полиција на Црна Гора пак соопшти дека Груевски ја напуштил земјата истиот ден кога влегол, а полицијата во целост ги почитувала законските процедури.

„По повод написите објавени во медиумите, како и по интересирањето на медиумите за ова прашање, а кои се однесуваат на тоа дека поранешниот премиер на Македонија, Никола Груевски, влегол во Црна Гора на 11 ноември 2018 година, заради вистинито информирање ве известуваме за следното: Никола Груевски влегол во Црна Гора во наведениот ден и во истиот ден излегол од Црна Гора. Црногорската полиција во овој случај во целост ги почитувала законските процедури“, гласи соопштението на црногорската полиција.

За разлика од нивните колеги од Албанија, црногорската полиција не известува каде и во колку часот Груевски ја напуштил земјата.

Со оглед на фактот дека од аеродромите во Подгорица и во Тиват тој ден немало летови за Будимпешта, најверојатно Груевски ја напуштил земјата по сувоземен или по морски пат, или пак летал за Будимпешта преку Белград, Истанбул или Москва. Засега нема реакции од владите и министерствата за внатрешни работи на БиХ и Србија.


Спасовски: Груевски последен пат користел обезбедување во четвртокот


Скопје, 13 ноември, 2018 - 11:48 (META) 

Во четвртокот Никола Груевски последен пат го повикал  обезбедувањето кое му следува како поранешен премиер на земјата, рече денеска министерот за внатрешни работи Оливер Спасовски.

Тој појасни дека иако на Груевски му следува обезбедување, екипата доаѓа на повик, а не е постојано со него.

– Според изјавите на обезбедувањето, последен пат тие го обезбедувале на 8 ноември кога го однеле до дома околу 23 часот – објасни Спасовски.

Тој изјави и дека не се чувствува виновен за бегството на поранешниот премиер и не размислува за оставка. Смета дека за тоа е одговорна судската власт.

– Одговорноста барајте ја кај судиите кои не одредиле мерка притвор за човек кој е осомничен за повеќе кривични дела – рече Спасовски, појаснувајќи дека полицијата работи врз основа на судски наредби.


Заев: Очекувам дека Груевски нема да си дозволи да се трага по него


Скопје, 13 ноември, 2018 - 9:38 (META) 

Премиерот Зоран Заев вечерва изјави дека не очекува поранешниот премиер Никола Груевски, кој се бара со потерница, да си дозволи да бега.

-За акцијата немам сознанија, заради тоа што знам дека МВР од судот добило налог да распише потерница поради неможност да се најде осудено лице да му се даде упатен акт за отслужување на казна затвор. Јас очекувам дека господинот Груевски нема да си дозволи да има потраги по него или слично. Тоа е нормално, барем така тој зборуваше. Останатите информации ќе треба да ги барате од министерот Оливер Спасовски – рече Заев.


Распишана потерница по Груевски


Скопје, 12 ноември, 2018 - 17:34 (META) 

Откако неколку дена не можеше да го најде и да му врачи решение сам да се упати во затвор, Основниот суд побара од МВР да издаде потерница по екс премиерот Никола Груевски.

Од МВР соопштија дека „постапуваат по наредбата“, што би требало да значи дека издале наредба за приведување.

„Ве известуваме дека Основниот суд Скопје 1 издаде наредба за приведување на лицето за кое прашувате и на 12.11.2018 во 16.30 часот ја достави до СВР Скопје и побара издавање на потерница. Министерството за внатрешни работи веднаш откако му беше доставена, постапува по наредбата“ се вели во соопштението.

Груевски е правосилно осуден на двегодишна затворска казна во случајот „Тенк“ за незаконска набавка на луксузен „мерцедес“ кој против него го водеше Специјалното јавно обвинителство.


Кривична пријава за 28-годишен скопјанец за убиството на улицата Џон Кенеди


Скопје, 12 февруари, 2018 - 12:14 (META) 

СВР Скопје соопшти дека во соработка со Основното јавно обвинителство во Скопје, денеска поднел кривична пријава против О.А. (28) од Скопје, кого го сомничи дека е убиецот што на 20 декември лани на автобуска постојка спроти гимназијата „Цветан Димов“ на улицата Џон Кенеди го застрела со автоматска пушка 24-годишниот скопјанец Б.И., кој им подлегна на повредите.

Убиецот е во бегство и по него е распишана потерница.

Пред убиството, Б.И. бил договорен со тројца другари да се сретнат на автобуската постојка и откако се сретнале таму, по неколку минути на спротивната коловозна лента пред браварска работилница застанал црвен автомобил „југо“ од кое излегол О.А. со автоматска пушка во рацете. Потоа се стрчал кон групата и без никакво предупредување почнал да пука во правец на Б.И. кој од задобиените повреди паднал на земја крварејќи. Потоа убиецот влегол во „југото и заминал.

СВР Скопје информира дека во рамките на истрагата, неколку часа по убиството е пронајдено југото, а на 27 декември се извршени претреси во домот и други простории на О.А. и кај пет други лица од Скопје. Притоа се одземени два мобилни телефона, а тројца осомничени биле испитувани на детектор за лаги.


Распишана потерница преку Интерпол за петмина осомничени за 27 април


Скопје, 4 јануари, 2018 - 13:32 (META) 

Министерството за внатрешни работи преку канцеларијата на Интерпол во земјава, распиша меѓународна потерница за петмина осомничени за насилствата во Собранието од 27 април, минатата година, кои се во бегство.

Станува збор за Никола Митревски – Кољо, Александар Василевски – Нинџа, Младен Додевски, Дејан Давидовски и Митре Питроповски, кои досега се бараа само со домашна потерница.

Сите петмина, Основното јавно обвинителство за гонење на организиран криминал и корупција ги товари за кривичното дело терористичко загрозување на уставниот поредок и безбедноста на државата.

Кривичниот суд во Скопје кон средината на минатиот месец на петмината во отсуство им одреди мерка притвор од 30 дена, со што веднаш штом ќе станат достапни за органите на прогонот ќе бидат спроведени во истражен затвор.

Тие се дел од 36-те осомничени за кои ОЈО за гонење на организиран криминал и корупција на 28 ноември, минатата година отвори истрага за насилствата во Собранието.


Судот им одреди притвор на четворицата осомничени за 27 април кои се во бегство


Скопје, 25 декември, 2017 - 13:44 (META) 

Судија на претходна постапка при Основниот суд Скопје 1 им одредил мерка притвор на четворица осомничени за насилствата во Собранието од 27 април, оваа година, кои се во бегство и против нив треба да биде распишана потерница, соопшти судот.

„Судија на претходна постапка при Основниот суд Скопје 1 – Скопје, по добиено известување од надлежните органи дека лицата А.В., Н.М., М.Д. и Д.Д. опфатени со предлогот на ОЈО за гонење организиран криминал и корупција за определување мерка притвор, а во врска со настаните од 27 април во Собранието на Р.М., се недостапни на органите за прогон, донесе решенија со кои на сите им определи мерка притвор во траење од 30 дена по нивно пронаоѓање односно лишување од слобода, а поради постоење на причините предвидени во член 165 став 1 точки 1, 2 и 3 од Законот за кривична постапка“, стои во соопштението на Кривичниот суд.

Решенијата за притвор се испратени до Обвинителството, кое треба да донесе наредба за распишување на потерница по осомничените лица.

Обвинителството за гонење на организиран криминал и корупција кон крајот на ноември отвори истрага против вкупно 36 лица за насилствата од 27 април, од кои најголемиот дел се наоѓаат во притвор.

Меѓу притворените се и поранешниот министер за внатрешни работи и директорот на Бирото за јавна безбедност, Митко Чавков, водачите на протестите на „За заедничка Македонија“, Богдан Илиевски, Игор Дурловски и Борис Дамовски, како и шестмина пратеници од редовите на ВМРО-ДПМНЕ во Собранието.

Сите 36 осомничени се товарат за кривичното дело „терористичко загрозување на уставниот поредок и безбедноста на државата“, за кое е предвидена казна затвор од најмалку 10 години.


МВР има несоборливи докази дека Ф.С. е убиецот на Мартин Јанушев, изјави Спасовски


Скопје, 17 ноември, 2017 - 12:52 (META) 

Министерот за внатрешни работи, Оливер Спасовски, денеска соопшти дека МВР има „несоборливи докази“ дека лицето Ф.С. го извршил убиството на поранешниот фудбалер Мартин Јанушев, пред две недели во населбата Аеродром.

Спасовски рече дека против Ф.С. е поднесена кривична пријава и дека на сила стапуваат и други мерки, како што е распишување на меѓународна потерница за пронаоѓање и за апсење на лицето и целосно расчистување на случајот.

Министерот за внатрешни работи додаде дека имаат индиции за местото каде се наоѓа осомничениот.

Дваесет и осумгодипшниот Јанушев беше убиен на 3 ноември годинава, со неколку истрели од огнено оружје, пред влезот од неговата зграда на улицата Владимир Комаров, во близина на кафулето „Ред кафе“, во населбата Аеродром.


Уапсено лице кое се барало со потерница поради шверц на 20 килограми марихуана


Скопје, 17 ноември, 2017 - 9:59 (META) 

Полицијата вчера го уапсила 39-годишниот М.О., по кој била распишана потерница поради шверц на 20 килограми марихуана од Косово во Македонија, во март годинава, соопшти МВР.

По неколкумесечно бегство, осомничениот бил пронајден вчера и веднаш предаден на Основното јавно обвинителство за понатамошна постапка.

Тој и 65-годишниот Д.И., кој бил приведен при обидот за шверц на марихуната, се товарат за неовластено производство и пуштање во промет на наркотични дроги, психотропни супстанци и прекурсори.

Дрогата, според МВР, тие ја набавиле во Приштина кон крајот на март и сакале да ја прошверцуваат преку граничниот премин Долно Блаце. На преминот, М.О. пеш влегол во земјава, додека Д.И., според негови иструкции, требало да ја пренесе дрогата со автомобилот што го изнајмиле од агенција.

Но, царинските службеници на Долно Блаце извршиле детален преглед на возилото, во кое пронашле 42 пакувања марихуана со вкупна маса од околу 20 килограми.


Уапсен Игор Југ, еден од учесниците во насилствата од 27 април


Куманово, 21 септември, 2017 - 10:16 (META) 

Игор Југ, еден од учесниците во насилствата во Собранието од 27 април годинава, утрово е уапсен во стан во Куманово, потврдија од Министерството за внатрешни работи.

Оттаму информираат дека 47-годишниот Југ е уапсен по претходна наредба од Основното јавно обвинителство Скопје од 16 мај оваа година.

„На 21 септември 2017 година, од страна на овластени службени лица при Секторот за внатрешни работи Куманово по претходна наредба од 16 мај 2017 година на Основно јавно обвинителство Скопје во врска со настаните од 27 април 2017 година во Собранието на Република Македонија е приведено лицето И.Ј. (47) од Куманово поради основано сомневање за сторено кривично дело учество во толпа што ќе спречи службено лице во вршење на службено дејство“, стои во соопштението на МВР.

Југ се бараше со централна потерница распишана од Одделот за насилен криминал на СВР Скопје, поради основано сомневање за сторено кривично дело учество во толпа што ќе изврши кривично дело. Тој, како што додаваат од МВР се барал и со локална потерница од Надворешната канцеларија за криминалистички работи Бит-пазар поради разбојништво.

Инаку, Игор Југ е водач на здружението „Владо Черноземски“ од Куманово, кое беше дел од т.н. „Патриотски фронт“.

Југ на 27 април беше дел од групата која успеа да стигне до прес-салата во Собранието, каде во тие моменти беа пратениците од актуелната владејачка коалиција. Тој беше облечен во црна маичка со симболот на проусташката организација „Хрватски оружени сили“ (ХОС).