Саемот на книга го посетиле 44.300 посетители


Скопје, 9 мај, 2018 - 12:13 (META) 

Саемот на книга 2018 завршува денеска, а манифестацијата до вчера ја посетиле 44.300 посетители, информираа организаторите. На 30. јубилејно издание се претставиле 70-на издавачки куќи од Македонија, Србија, Црна Гора, Косово, Албанија.

„Соработката со Министерството за култура, како покровител на манифестацијата, Владата, Град Скопје заедно со ЈСП, со воведувањето на двете вонредни линии специјално за најголемата културна манифестација, придонесоа, покрај промената на локацијата, овој Саем уште повеќе да го зацврсне неговото постоење. Ова е голем напредок кој резултираше со инзвонредна бројка од 44.300 посетители, а Саемот уште не е завршен“, изјави проект-менаџерот на Саемот на книгата, Сања Кондарко.

Во рамките на програмата на Промотивниот центар, се доделија наградите во организација на Македонската асоцијација на издавачи (МАИ), а се доделија и наградите од страна на Здружението на издавачите и книжарите на Македонија (ЗИКМ).


Димовски: Посетителите на опозициските пратеници се „кодошат“ кај работодавачите


Скопје, 2 мај, 2018 - 14:04 (META) 

Пратеникот на ВМРО-ДПМНЕ, Илија Димовски, на денешната 45-седница на Собранието побара збор да се обрати пред колегите пратеници, што по кратко дебатирање со претседателот на Собранието му беше дозволено. Но, наместо, како што се очекуваше, да зборува за обемниот дневен ред, како што пред него направи неговиот партиски колега Драган Данев, Димовски излезе со сериозни обвинувања за злоупотреби во Собранието.

Тој рече дека има сериозни сознанија дека гостите кои доаѓаат во Собранието на посета кај опозициските пратеници, а се вработени во државни институции, се „кодошат“ кај работодавачите, односно во институциите се препраќат списоците во кои се запишуваат луѓето што влегуваат во Собранието.

– Сакам само да ја информирам јавноста за една работа што се случува кога одредени граѓани остваруваат посета во канцеларии во Собранието и се задолжени да се пријават во пријавница. Има список – кој дошол на средба со Димовски, со Тунтев, со Гаши, со Села. Она што е фрапантно и зачудувачко е што имаме потврда од институции каде дел од тие луѓе работат дека таквиот список од Собранието се препраќа во тие институции кај што работат дел од луѓето кои дошле на средба со пратеници кои не се дел од владејачкото мнозинство. Под посебна анализа се гостите кај Села, Гаши, Никола Поповски, Антонио Милошоски, кај мене и кај други пратеници од опозиционата ВМРО-ДПМНЕ. Не барам да се преземе нешто, го знам наравот и причините, желбите и мотивите за ова. Мојата цел беше да ја информирам македонската јавност за тоа каков тоталитарен систем постои во ова Собрание – рече Димовски.

Притоа, Џафери му забележа на Димовски дека ја злоупотребува собраниската говорница за тема што не е предвидена со дневниот ред, предупредувајќи го доколку има какви било информации, да пријави до надлежните служби.


Поради Супер купот на УЕФА од денеска ќе има изменет сообраќаен режим


Скопје, 7 август, 2017 - 10:03 (META) 

Поради Супер купот на УЕФА од денеска ќе биде воведен посебен сообраќаен и пешачки режим за сообраќајниците во непосредна близина на стадионот.

Министерството за внатрешни работи соопшти дека од осум часот денеска до завршување на натпреварот, односно до 9 август, на потегот од крстосниците на улиците Аминта Трети (поранешна Ленинова) и Јордан Хаџи Константинов-Џинот ќе се пропуштаат исклучиво лица и возила кои имаат соодветна акредитација од организаторот на мечот, УЕФА.

На денот на натпреварот, зависно од интензитетот на сообраќајот, не е исклучена можноста од затворање за сообраќај и на булеварот Илинден на потегот од објектот на Владата до крстосницата со улицата Рузвелтова.

Градоначалникот на Град Скопје, Коце Трајановски, информираше дека Град Скопје е подготвен да ги пречека илјадниците навивачи од сите страни на светот за претстојниот натпревар меѓу двата најтрофејни клубови во Европа, „Реал Мадрид“ и „Манчестер јунајтед“.

За навивчите е подготвена т.н неутрална зона во согласност со стандардите на УЕФА, која ќе биде отворена во 11 часот.

– Во неутралната зона за обожаватели, сите ќе можат да играат фудбал, фудбалски тенис, да шутираат пенали, а и да си ги испробаат своите способности. Во оваа зона е предвидена богата музичка програма на познати македонски диџеи и музичари, кои ќе ги забавуваат посетителите на 7 и 8 август од 11 до 19 часот – рече Трајановски.

Тој додаде дека заедно со УЕФА и со ФФМ, на оваа локација ќе се постават и трите трофеи на УЕФА, трофејот на Лигата на шампионите, трофејот на Лига Европа и Супер купот.

Навивачите на „Реал Мадрид“ и на „Манчестер јунајтед“, пред самиот натпревар ќе се соберат на плоштадот „Филип Втори“ и пред платото на спомен-куќата на „Мајка Тереза“, од каде ќе тргнат кон националната арена „Филип Втори“.


Саемот за мебел почнува утре, ќе има 400 домашни и странски изложувачи


Скопјхе, 20 март, 2017 - 11:12 (META) 

Меѓународниот саем на мебел почнува утре и ќе трае до 26 март. На саемот ќе учествуваат 400 домашни и странски изложувачи, а се очекува да го посетат повеќе од 50.000 лица.

Во 11 хали ќе бидат претставени мебел и опрема за домаќинства, а една хала е наменета за машини и за репроматеријали за индустријата за производство на мебел.

Традиционално ќе се организира стручно оценување на пријавени експонати и ќе бидат доделени признанија на најдобрите учесници на саемот, во две категории, производители и трговци.

Има учесници од Србија, Хрватска, Грција, Италија, Босна и Херцеговина  и од Словенија.

Саемот ќе биде отворен од 10 до 20 часот, цената на влезницата е 100 денари, а за групни посети и за студенти чини 50 денари.


Во Охрид одбележан Денот на рибарите


Охрид, 20 јануари, 2017 - 17:40 (META) 

Денеска, на верскиот празник Св.Јован Крстител, традиционално беше одбележан Денот на рибарите во Охрид.

Оваа манифестација се одржува во месноста Сараиште, каде некогаш рибарите покажувале колку риба уловиле.

Според кажувањата на старите жители на градот, рибарите се капеле на овој ден за да ја покажат нивната приврзаност кон езерото.

За посетителите и за гостите беа подготвени неколку тони рибја чорба.


Денеска почнува „Еуро 2016“ во Франција


Париз, 10 јуни, 2016 - 10:25 (META) 

Со натпреварот меѓу репрезентациите на Франција и на Романија, денеска почнува Европското првенство во фудбал „Еуро 2016“, кое се одржува во Франција и ќе трае еден месец.

На првенството учествуваат 24 европски репрезентации, кои ќе играат на 10 стадиони во Франција, на кои се очекува посетеност од околу 2,5 милиони гледачи.

Организаторите на „Еуро 2016“ тврдат дека се преземени сите безбедносни мерки и дека нема простор за паника меѓу посетителите.

Повеќе од 90.000 полицајци, жандармерија и приватни агенти за безбедност ќе бидат распоредени на фудбалските стадиони, парковите и на местата на кои ќе се собираат поголем број луѓе.

Франција очекува околу 7 милиони луѓе – гости, туристи и навивачи за време на одржувањето на првенството.


Македонски компании се претставуваат на саем во Истанбул


Истанбул, 3 јуни, 2016 - 14:11 (META) 

Бизнис-делегација од 35 компании, членки на Стопанската комора на Северо-западна Македонија, престојува во Истанбул каде што делегатите ги претставуваат своите бизниси во рамките на третиот Саем за кинески производи (China Homelife), кој е посветен на компании заинтересирани за проширување на својот бизнис во други земји.

На овој саем се претставуваат повеќе од 700 изложувачи и 25.000 ексклузивни брендови со висок квалитет од Кина.

Секоја година саемот го посетуваат повеќе од 15.000 посетители од Турција и од регионот, а со тоа се создаваат можности за соработка со компании од Кина (увоз, извоз, дистрибутери итн).

За време на саемот претставниците на македонските компании ќе се сретнат со претставници на компаниите од Кина кои изразиле интерес за соработка.


Денеска почнува Саемот за мебел


Скопје, 22 март, 2016 - 9:54 (META) 

Меѓународниот саем за мебел ќе почне денеска и ќе трае до 27 март на Скопски саем. На саемот ќе учествуваат 400 странски и домашни изложувачи, кои ќе понудат 10.000 производи што ќе бидат изложени во 11 саемски хали.

На саемот ќе може да се најде опрема за домаќинства и за јавни објекти, репроматеријали и машини за индустријата за мебел.

Саемот за мебел се очекува да го посетат 50.000 посетители.


Саемот за градежништво почнува денеска


Скопје, 1 март, 2016 - 9:46 (META) 

Саемот на градежништво ќе почне денеска и ќе трае до 5 март. На Скопски саем ќе се нудат и продаваат производи и услуги за работа, одржување, модернизирање, реновирање и за опремување објекти и имоти.

Бројот на изложувачи и оваа година ја достигна бројката од 100 директни компании, респоредени во три саемски хали. Целта на годинешниот саем на градежништво е да го задржи овој динамичен пораст, а за изложувачите и за посетителите да претставува најдобра платформа од интерес во овој сектор.

Во рамките на Саемот на градежништво 2016, во „Метрополис арена“ по шести пат ќе се одржи и Саемот за недвижности и инвестиции „Риал експо“ (RealExpo), каде што ќе се претстават повеќе од 300 компании.


Саемот за градежништво ќе се одржи од 1 до 5 март


Скопје, 23 февруари, 2016 - 13:39 (META) 

Саемот на градежништво ќе се одржи од 1 до 5 март на Скопски саем, каде ќе се нудат и продаваат производи и услуги за работа, одржување, модернизирање, реновирање и за опремување објекти и имоти.

Бројот на изложувачи и оваа година ја достигна бројката од 100 директни компании, респоредени во три саемски хали. Целта на годинешниот саем на градежништво е да го задржи овој динамичен пораст, а за изложувачите и за посетителите да претставува најдобра платформа од интерес во овој сектор.

Во рамките на Саемот на градежништво 2016, во „Метрополис арена“ по шести пат ќе се одржи и Саемот за недвижности и инвестиции „Риал експо“ (RealExpo), каде што ќе се претстават повеќе од 300 компании.

Двата саеми се очекува да ги посетат 15.000 посетители.