!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Во Скопје утре Марш на толеранција за лицата со попреченост


Скопје, 14 ноември, 2017 - 16:41 (META) 

Со конференција во Скопје на која ќе се дискутира за проблемите на лицата со попреченост, а потоа и со марш на толеранција, Хелсиншкиот комитет за човекови права поддржан од 25 организации утре ќе потсети на проблемите на луѓето што живеат со различна попреченост.

На конференцијата ќе бидат презентирани наодите од истражувањата и анализите за потребите  на овие лица во областите на социјална заштита, образование, здравствена заштита, вработување и квалитет на живот.

По конференцијата, ќе се одржи и марш на толеранцијата „Гледај со срцето, прифати ја различноста“, кој ќе почне во 15 часот од Музеј на Град Скопје, по што поворката преку улица Македонија ќе се упати во паркот „Жена борец“, каде ќе се говорат некои од учесниците во маршот.


Царовска: Пензиите ќе се усогласуваат двапати годишно, социјалната помош ќе се зголеми


Скопје, 20 јуни, 2017 - 12:00 (META) 

Министерката за труд и социјална политика, Мила Царовска, на средба во општинската организација на СДСМ во Центар, порача дека СДСМ како чинител на власта ќе најде начин да ги направи пензиите одржливи, како и двапати годишно тие да се усогласуваат со трошоците за живот.

Според Царовска, во план е социјалната помош да се зголеми, но тоа ќе се случи следната година.

– Во 2018 година најрано ќе се зголеми социјалната парична помош во согласност со линијата на сиромаштија. Социјалната помош за четиричлено домаќинство ќе треба да биде 12.000 денари, со тоа што тие што ќе примаат таков тип социјална парична помош, ќе треба да се активираат на пазар на труд и да работат – вели министерката.

Што се однесува до лицата со попреченост, кои од денеска ќе кампуваат пред Собранието, Царовска вели дека се предвидува решавање на дел од нивните барања.

– Тие нема да можеме сите наеднаш да ги решиме, но ние веќе имаме пет точки од нивните барања кои со итни промени на законот ќе ги надминеме. На пример, целиме кон тоа родителите на тие лица да имаат право на стартно работно време и по 26 години и да остваруваат додаток за туѓа нега без цензус од 21.000 денари – вели министерката.


Собирањето потписи за лицата со посебни потреби продолжува во другите градови


Штип, 24 април, 2017 - 14:15 (META) 

Денеска до пладне во Штип, 600 граѓани се потпишаа во книгите за собирање потписи за измена на закони и на подзаконски акти за соодветни права на децата со посебни потреби.

Претседателот на здружението „Сплотени срца“, Зоран Мијалков, кој е и татко на дете со посебни потреби, изјави дека очекува акцијата да се интензивира.

– Денеска и утре ќе се постават книги за потписи во сите градови и села. Им благодариме на граѓаните, кои масовно нè подржуваат секаде во земјава – рече Мијалков.

Претставниците на здруженијата што ги обединуваат лицата со посебни потреби очекуваат неделава да бидат повикани на средба со претставници на повеќе министерства.

Тие очекуваат да почнат со преговори за бараните законски измени, со кои ќе се олесни животот на лицата со посебни потреби и нивните семејства.

Овие здруженија бараат корекции во неколку закони или промена на формулацијата на одредбите, со кои правата на лицата со посебни промени и практично ќе можат да заживеат.


Акцијата за потписи за правата на децата со посебни потреби продолжува и денеска


Скопје, 23 април, 2017 - 13:38 (META) 

Акцијата за собирање потписи за иницијатива до Собранието за измена на закони и на подзаконски акти за соодветни права на децата со посебни потреби, денеска се одвива на плоштадот Македонија од 10 до 16 часот.
Досега се собрани нешто повеќе од 2.000 потписи, а требаат уште четирипати по толку за да се постигне цензусот од 10.000 потписи.

Родители и деца со посебни потреби три дена кампуваа во паркот Жена – борец, веднаш спроти Собранието, за, како што рекоа, сите пратеници да ги видат и да обрнат внимание на нивните проблеми.

 


Деца со посебни потреби и нивните родители ќе кампуваат и ќе протестираат пред Собранието


Штип, 18 април, 2017 - 17:06 (META) 

Додека пратениците „бистрат“ политика во Собранието на Република Македонија, надвор, во паркот Жена – борец, деца со посебни потреби и нивните родители в четврток ќе распнат шатори. Планираат да кампуваат три дена, за на политичарите да им покажат што сè им стои за решавање.

Родителите од здружението „Сплотени срца“ на денешната прес-конференција во Штип рекоа дека сакаат да бидат видливи за политичарите со нивните секојдневни проблеми. Потребата од квалитетна терапија и од испитувања, стручен кадар кој ќе им помогне во грижата за нивните деца, до сместувањето за повозрасната категорија на деца со посебни потреби, се само дел од проблемите кои не се соодветно решени.

Зоран Мијалков, претседател на ова здружение, вели дека не сака да му се даде политичка конотација на протестот бидејќи, според него, нивните проблеми немаат никаква врска со која било политичка партија. Мијалков вели  дека ги споила заедничката мака и се повикуваат на совеста на пратениците.

Шаторите ќе бидат поставени задутре, четврток, околу 9 часот, а потоа симболично во пет до дванаесет ќе одржат прес-конференција.

Родителите и децата со посебни потреби ќе кампуваат секој месец од 21. до 23., сè до исполнувањето на барањата.


Многу малку фирми вработуваат лица со посебни потреби, и покрај државните мерки


Скопје, 28 март, 2017 - 10:16 (META) 

Иако во изминатите години беа донесени низа позитивни мерки за вработување лица со посебни потреби, сепак многу е мал бројот на фирми што ги користат поволностите што ги нуди државата, а не ретко доаѓа и до ситуации во кои работодавците вработуваат лица со посебни потреби само за да ги искористат бенефициите кои следуваат од државата.

Ова го покажуваат резултатите од проектот „Градење капацитети на организации за помош на лица со посебни потреби во Македонија“, кој е поддржан од ЕУ, а спроведуван од Фондацијата за одржлив економски развој „Преда плус“, во соработка со Здружението на студенти и на младинци со хендикеп.

„Следејќи ги статистичките податоци за бројот на невработени лица со посебни потреби, за жал, може да заклучиме дека од година во година очигледен е порастот на бројот на лица со посебни потреби кои бараат работа, но не наидуваат на вработување од страна на домашните компании“, велат од „Преда плус“.

Споредено со мерките што ги практикуваат земјите членки на Европската Унија, Македонија воопшто не заостанува.

„Доколку се земат предвид сите позитивни поволности и мерки за да се намали бројот на невработени лица со посебни потреби, очигледна е потребата од зголемување на свесноста на домашните менаџери и компании за потребата од обезбедување работни места за лицата со хедикеп“, додаваат оттаму.


20 јавни институции немаат пристап за лицата со посебни потреби


Скопје, 27 март, 2017 - 9:55 (META) 

Од вкупно 77 во 20 јавни институции во Македонија нема овозможен пристап за лицата со посебни потреби до првиот кат, покажуваат податоците од проектот „Градење на капацитети на организации за помош на лица со посебни потреби во Македонија“ кој е финансиран од Европската Унија.

Додека пак, 64 јавни институции немаат овозможен пристап до вториот кат за лица кои се движат со помош на инвалидска количка.

– Архитектонска пристапност подразбира целосен пристапен влез и рампа, пространа површина во јавните установи за движење со количка, лифт за пристапност до вториот кат, овозможен паркинг простор, тактилни патеки и звучни семафори за лица со оштетување на видот, соодветно осветлување во јавните установи за лица со оштетен слух – велат од Фондација за одржлив економски развој „Преда плус“ која во соработка со Здружението на студенти и младинци со хендикеп (ЗСМХ) го имплементира проектот.

Оттаму повикуваат да се обезбеди непречен пристап и движење до и во градбата за лицата со посебни потреби во образовни институции, здравствени и државни установи, станбени објекти и спортски и културни установи.


Само 49 лица со хендикеп завршиле високо образование во 2015 година


Скопје, 24 март, 2017 - 10:59 (META) 

Во 2015 година, само 49 лица со хендикеп завршиле високо образование, петмина станале магистри, а не е забележан ниту еден случај на успешно завршени докторски студии. И покрај фактот дека школувањето во Македонија за лицата со прв и со втор степен на инвалидност е бесплатно и истото е покриено од буџетот, бројот на лица кои завршуваат соодветно образование е исклучително низок.

Ова истражување го спровело Фондацијата за одржлив економски развој „Преда плус“, во соработка со Здружението на студенти и младинци со хендикеп, во рамките на проектот „Градење капацитети на организации за помош на лица со посебни потреби во Македонија“, кој е поддржан од ЕУ.

„Законот за високо-образовниот процес на студентите со посебни потреби им овозможува низа поволности и олеснувања за студирање, како што се бесплатна партиципација, право на редовно студирање, користење на сите услуги утврдени според студентскиот стандард и многу други, но и покрај овие позитивни страни, сепак бројот на лица кои се образуваат е доста низок. Доказ дека можеме подобро се и позитивните практики што ги следат земјите членки на ЕУ кои подразбираат 100 отсто генерална обврска од земјите членки на ЕУ за прилагодување на училиштата и на образовните установи според потребите на лицата со посебни потреби. 94,7 отсто од земјите членки на Европска Унија имаат прилагодувања во согласност со специфичните барања на лицата со посебни потреби“, велат од „Преда плус“.


Изложба за лица со посебни потреби за да се подигне свесноста за овие граѓани


Скопје, 4 октомври, 2016 - 10:05 (META) 

Амбасадата на Шведска, во соработка со Шведскиот институт, вечерва, во 19 часот, ќе ги отвори изложбите „Пристапност“ и „Дизајн за достоинствен живот“ во Дом на АРМ.

– Со отворањето на изложбите, изложбениот простор и концертната сала на Домот на Армијата првпат стануваат пристапни за лицата со посебни потреби, бидејќи вечерва во употреба ќе биде ставена донираната пристапна рампа – соопштија од Амбасадата на Кралството Шведска.

На изложбата „Пристапност“ се прикажани фотопортрети на 14 Швеѓани со посебни потреби, снимени од фотографот Маркус Марчетиќ, како и портрети на 11 Македонци од фотографот Томислав Георгиев. Нивните приказни се раскажани од Рикард Лагерберг и од Небојша Илијевски.

Изложбата „Дизајн за достоинствен живот“, пак, содржи 22 иновативни решенија наменети да им го олеснат животот на лицата со посебни потреби и на нивните негуватели. Тие опфаќаат од екстралесни колички и пристапни рампи, преку ИТ-решенија и прилагодени друштвени игри, до специјално дизајнирани пакувања и прибор за јадење.

Изложбата може да се посети до 16 октомври.


Родители на деца со аутизам од Штип најавуваат кампување пред институциите


Скопје, 14 септември, 2016 - 16:57 (META) 

Единствениот вработен дефектолог во Центарот за аутизам во Штип пред два дена си дал отказ, а родителите на децата со аутизам не биле информирани за тоа. Тие денеска наидоа на затворена врата во Центарот за аутизам.

Родителите немаа информација зошто е затворен Центарот за аутизам, каде нивните деца ги поминуваат часовите додека тие се на работа. Но, како што изјавија, не е првпат центарот да биде затворен.

– Нема политика во нашите инсистирања да се направи нешто со центарот. На почетокот, кога се отвори, работеше логопед, но таа набргу отиде на боледување. Не ѝ се најде замена. Од понеделникот овде не работи единствениот дефектолог. Ова веќе не е центар за аутизам, бидејќи сега во него работат само домаќинка, педагог и медицинска сестра – изјави Зоран Мијалков, родител на дете со аутизам.

Родителите и роднините на децата со аутизам велат дека овој центар никогаш не профункционирал како што треба.

– Кај сите нас има разочарување. Каде ги сместија децата?! Ова е подрум. Нема ни игралиште, ниту двор, ни соодветна храна – реагира Васка Кавракова, баба на дете со аутизам.

Семејствата потсетија и на ветувањето дадено од политичарите на отворањето дека ќе обезбедат возило за превоз на децата. Разочарани, родителите најавуваат кампирање пред институциите.

Од Центарот за социјални работи соопштуваат дека од утре децата со аутизам ќе бидат редовно згрижени, откако е најдена замена за дефектологот што дал отказ. Оттаму соопштија дека центарот работел, но бил со затворени врати поради тоа што вработените не сакале да се снима внатре.