Албанија почна со остварување на заканите против онлајн медиумите


Тирана, 15 октомври, 2018 - 17:01 (META) 

Агенцијата за електронски и поштенски комуникации на Албанија (АКЕП) вчера им даде рок од три дена на вработените во 44 онлајн медиуми да извадат даночен број и да го објават на веб-страницата, што предизвика нов бран остри реакции од новинарската фела за притисок на власта врз медиумите. Наведените онлајн-медиуми се во најголем дел критичари на власта.

Голем дел од замерките дека станува збор за политичка пресметка содржат и обвинување тврдат дека новиот потег на регулаторната агенција е незаконски, и покрај тврдењето во известувањето од АКЕП дека тоа е „во согласност со законските и регулаторните рамки“.

Заострувањето го најави албанскиот премиер Еди Рама во средата, кога преку својот Твитер-профил порача дека „порталите“ треба да се „легализираат“ преку регистрација кај даночните власти, како дел од акцијата против „клеветата“. Рама рече дека сака да постигне „урбанизација на онлајн-џунглата“. Во друг твит тој порача дека сите портали ќе добијат тужби ако објавуваат лажни вести и парите што ќе треба да ги платат ќе се наменуваат за детски градинки.

На списокот на „повиканите“ е и „Reporter.al“, албанскиот партнер на БИРН, кој редовно објавуваше истражувачки стории за владина корупција. Наведен е и „Exit.al“, еден од опозициските портали, кој често пишува не само против владата, туку и против меѓународните организации  присутни во Албанија.


Албанија: Експлозија од анонимни портали полни со непроверени вести


Тирана, 24 септември, 2018 - 16:21 (META) 

Во Албанија во последниве години има поплава од онлајн медиуми. Многу од нив не се транспарентни и „произведуваат“ непроверени вести, јавува дописничката на „Мета“ од Тирана. Еден од овие медиуми е Pamfleti.net. Многу од вестите објавени на овој портал се всушност тврдења презентирани во форма на факти.

На пример, една од најчитаните вести на овој портал е веста со наслов „Ексклузивно: САД го уништува кланот Лала“.

Статијата е полна со наводи со кои се тврди дека поранешниот генерален обвинител Адриатик Лала низ целиот мандат работел за да ја заштити актуелната опозиција кога била на власт. Иако е факт дека поранешниот обвинител Лала, минатата година беше прогласен персона нон грата од страна на американскиот Стејт департмент, Лала сè уште не е обвинет.

Друга вест од овој медиум ја опфаќа минатонеделната посета на шефот на германската дипломатија, Хајко Мас на Тирана, со тврдењето дека министерот има листа на високи албански функционери кои ќе треба да бидат отпуштени. Сепак, не се обезбедени докази, туку толкување на некои дипломатски изјави.

Сите објавени вести се непотпишани. Кликнување на делот „за нас” не води никаде. Нивната страница на „Фејсбук“ има повеќе од 13.000 следбеници. Со кликнување на делот „за нас” на социјалната мрежа на овој медиум, стои пораката „Памфлети е медиумска платформа за анализа која се роди од потребата од трибина која не знае компромис, како моќен глас во недвосмислената борба против криминалот и политичка корупција во Албанија“.

Покрај тоа, во пораката се споменува дека „уредувачката политика не е водена од партии или идеологии, туку за да се открие и демаскира политичката и финансиската олигархија“.

Нема инфо за сопственоста на овој медиум, кој го финансира, или за вработените.


Трајчевски: Порталите нема потреба да се регулираат, туку само да се регистрираат


Скопје, 22 декември, 2017 - 16:15 (META) 

Невозможно е регулирање на интернет порталите, порача Зоран Трајчевски, директорот на Агенцијата за аудио и аудиовизуелни медиумски услуги (ААВМУ) на денешниот јавен состанок на кој ги презентираше активностите за четвртото тромесечје со фокус на медиумскиот мониторинг за локалните избори.

– Не станува збор за регулирање, туку најмногу за регистрирање и нотификација. Сметаме дека е невозможно да се спроведе регулирање на овој вид медиуми. Ние како Агенција имаме нарачано истражување во однос на овие нови медиуми за тоа каква е состојбата споредено со другите држави. Требаше да го плати Агенцијата преку јавна набавка меѓутоа добивме одобрение од Советот на Европа и тие ќе го спроведат во еден краток разумен период, можеби до крајот на првото тромесечје од идната година и тогаш ќе имаме објективно, непристрасно мислење од експерти коишто ќе ни понудат не решение, туку ќе ни дадат слика каква е состојбата на ова поле во другите држави – рече Трајчевски на четвртиот и последен јавен состанок за 2017 година на Aгенцијата.

Toј потсети дека и досега наведувале дека ААВМУ не може да спроведе изборен мониторинг на известувањето што го вршат порталите.

Темата за интернет порталите се актуелизираше вчера на дебатата „Утврдување на потребата за можни измени во Законот за медиуми“, која ја организираа Министерството за информатичко општество и администрација (МИОА) и министерот без ресор, задолжен за комуникации, отчетност и транспарентност, Роберт Поповски.
foom-logo-disklejmer

Текстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Манчевски: За законот за ААВМУ не ни се брза, а за законот за медиуми – апсолутно не се брза


Скопје, 22 ноември, 2017 - 13:14 (META) 

Ако за законот за ААВМУ не ни се брза, за законот за медиуми – апсолутно не ни се брза да го донесеме, изјави денеска министерот за информатичко општество и за администрација, Дамјан Манчевски, во паузата на 13. Kонференција „Е-општество“, организирана од Фондацијата за интернет и општество „Метаморфозис“.

– Законот за ААВМУ веќе три години се дебатира и нема да се брза, а во однос на закон за медиуми, пак, апсолутно не брзаме и ќе се договориме заедно со медиумите кога да ја почнеме дебатата – рече Манчевски.

Тој додаде дека интернет-медиумите се предмет на законот за медиуми, но дека Министерството само ќе отвори дебата во тој поглед.

– Нема да излеземе со конкретни предози. Веднаш по законот за ААВМУ, ќе отвориме дебата за законот за медиуми. Личен став ми е дека минимум што интернет-портал треба да декларира е кој му е главен уредник – истакна Манчевски.

Според него, Владата не смее да биде моторот на реформите во медиумската сфера.

– Иронично е да се каже Владата да биде мотор на реформи во медиумите. Тоа треба да бидат медиумските работници и самите медиуми. Нам, како Влада, единствена амбиција ни е да им обезбедиме простор, дебата и механизам. Ние сме алатка за спроведување на тоа што тие сметаат дека треба да се спроведе – изјави Манчевски.

Министерот рече дека Владата е тука за да чуе какви измени се потребни, но оти дебата треба да биде полезна и да не трае до недоглед бидејќи треба да се носат одлуки и решенија.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Манчевски: Владата нема да иницира регулирање на работата на порталите


Скопје, 14 ноември, 2017 - 15:52 (META) 

Министерот за информатичко општество и администрација, Дамјан Манчевски, денеска соопшти дека Владата нема да иницира промени во Законот за медиуми за да се регулира работата на порталите. Сепак, тој додаде дека остануваат отворени за сугестии за законот ако професионалните здруженија сметаат дека има потреба од тоа.

– Промените во Законот за медиуми, ако има потреба, треба да дојдат по барање од медиумските работници. Мислам дека ни треба консензус како општество ако треба да го отвориме ова прашање, истакна Манчевски, одговарајќи на новинарско прашање по средбата со претставникот за медиуми во ОБСЕ, Харлем Дизер.

Манчевски рече дека Македонија не само што има сериозен проблем со лажните вести, туку е и извор за глобални лажни вести.

– Работиме заедно и веќе разговарав со претставникот за медиуми на ОБСЕ, Харлем Дезир, но и со други наши помагачи како може ова прашање на глобално ниво да го адресираме. Ние како Македонија, како мала земја сме прилично голем играч во областа на лажните вести и во рамки на Глобалниот самит за Западен Балкан што ќе се одржи на пролет ќе има посебен панел само за ова – рече Манчевски, додавајќи дека на самитот ќе бидат поканети сите големи медиуми и меѓународни организации.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Анкета на ИРИ: Вести најмногу се гледаат на „Сител“, „Алсат-М“, ТВ 24, „Телма“ и на „Канал 5“


Скопје, 19 септември, 2017 - 16:46 (META) 

Големо мнозинство од македонските граѓани за политичките случувања во земјава се информираат преку телевизија, а најмалку преку радиото како медиуми, покажува последната анкета на Меѓународниот републикански институт (ИРИ), спроведена од 4 до 21 август оваа година.

Телевизијата како главен извор за политички вести ја посочиле 85 отсто од граѓаните, 39 проценти рекле дека за политичките случувања се информираат преку интернет и порталите, 27 отсто од пријателите, 6 0тсто преку печатените медиуми и по 4 отсто вестите ги добиваат преку радијата и политичките партии.

Според анкетата, најголем дел од граѓаните, односно 20 отсто од нив рекле дека политички вести гледаат на „Сител“, 16 отсто се изјасниле за „Алсат М“, трета е „Телевизија 24“ за која се одлучиле 13 отсто од испитаниците, 12 отсто гледаат политички вести на „Телма“, 11 отсто на „Канал 5“, 9 отсто на МТВ (на македонски јазик), 3 отсто на МТВ (на албански јазик) и по 1 отсто се изјасниле за „ТВ 21“, „Шења“и за „Алфа“. Девет отсто од испитаниците рекле дека не гледаат телевизија.

Инаку, забележлив е падот во процентот граѓани кои политичките случувања ги следат преку печатените медиуми, кој е двојно помал во споредба со резултатот од анкетата на ИРИ од ноември минатата година. Овој пад соодветствува со згаснувањето на дневните весници во издание на „Медиа принт Македонија“.

Истовремено, за 7 отсто е зголемен бројот на граѓани кои за политиката се информираат преку интернет, споредно со анкетата од ноември лани.


Порталите што утринава паднаа проработеа, „Унет“ детално ќе извести за проблемот


Скопје, 19 ноември, 2016 - 14:04 (META) 

Македонските портали што утринава беа недостапни поради проблеми на провајдерот „Унет“, повторно проработеа околу 13 часот.

Генералниот менаџер на „Унет“, Анета Пешева, за „Мета“ изјави дека в понеделник ќе излезат со детални информации за техничките причини поради кои настанале проблемите.

– Во текот на раните утрински часови македонскиот хостинг-провајдер „Унет клауд“ имаше технички проблеми со главните телекомуникациски линкови. За причините што го предизвикаа овој проблем ќе бидат известени нашите корисници, а ќе направиме сè што е во наша моќ ваквите ситуации во иднина да бидат превенирани – се вели во официјалното соопштение на компанијата „Унет“.

Пристапот  утринава беше оневозможен до веб-страниците на „Фокус“, „Нова ТВ“, „Либертас“, „СДК“, „Локално“, „Плусинфо“, „МКД“, како и на електронските изданија на дневните весници „Утрински весник“, „Дневник“ и „Вечер“.

Директорот на „Унет“, Антони Пешев, за „Мета“ категорично тврдеше дека не се работи за никаков хакерски напад туку за класичен технички проблем.


Порталите паднаа, „Унет“ тврди дека проблемот бил технички, а не хакерски напад


Скопје, 19 ноември, 2016 - 10:38 (META) 

Утринава голем дел од македонските портали паднаа, поради проблеми на провајдерот „Унет“, кој е техничка поддршка на овие медиуми.

Пристапот е оневозможен до веб-страниците на „фокус.мк“, „новатв.мк“, „либертас.мк“, „сдк.мк“, „локално.мк“, „плусинфо.мк“, „мкд.мк“ како и на електронските изданија на дневните весници „Утрински весник“, „Дневник“ и „Вечер“.

„Мета“ разговараше со неколкумина главни уредници на портали и веб-страници кои не информираа дека од утринава нивните медиуми не функционираат.

Главниот и одговорен уредник на „Плусинфо“, Бранко Героски вели дека од провајдерот му било кажано дека се работи за технички проблем.

– Ме информираа дека станува збор за технички проблем. Не можам да навлезам во позадината се додека не добијам повеќе прецизни информации. Само ми кажаа дека се работи на проблемот кој за кратко време треба да биде решен – изјави Героски.

Главниот уредник на „сдк.мк“, Горан Михајлоски рече дека не знае за што се работи и исто така добил информација дека станува збор за проблем со провајдерот.

Антони Пешев, директорот на „Унет“ кој ги опслужува сите овие медиуми за „Мета“  категорично тврди дека не се работи за никаков хакерски напад туку за класичен технички проблем.

– Проблемот се случил синоќа додека сообраќајот на порталите бил мал затоа и не се активирале заштитните механизми. Се работи за линковски проблем и некако не станува збор за сајбер-напад. Работиме на проблемот и се надеваме дека за кратко време ќе биде решен. Потенцирам дека не станува збор за никаков напад – изјави Пешев.


Грчките новинари најавија штрајк поради новиот закон за пензии


Атина, 25 октомври, 2016 - 12:06 (META) 

Грчките новинари денеска ќе стапат во петчасовен штрајк во знак на протест поради новиот закон за пензии, соопшти Здружението на новинари на дневните атински весници.

– Штрајковите ги опфаќаат сите новинари што работат во приватни, државни и во јавни медиуми, државни радија и на телевизискиот канал ЕРТ, Атинско-македонска новинска агенција АНА, во генералниот секретаријат за информирање за да се сочуваат правата – се наведува во соопштението.

Сите медиуми, портали и јавни здруженија на новинари ќе престанат со работа од 11 до 16 часот по локално време.

Додека трае штрајкот, новинарите ќе учествуваат на генерален состанок со претставниците на Фондот за социјално и здравствено осигурување, на кој ќе се разговара за новиот закон за пензии, според кои вработените во медиумите практично остануваат неосигурани.


Цензурирани албански портали и фејсбук-страници со антивладини содржини


Тирана, 18 октомври, 2016 - 21:02 (META) 

На една од најпознатите страници на „Фејсбук“ во Албанија, позната како „Лолита“, неодамна се појави објава во која се наведува дека неколку претходни објави, поврзани со државници и со бизнисмени, биле отстранети од „Фејсбук“, јавува дописникот на „Мета“ од Тирана.

ФБ-страницата „Лолита“ е отворена од тројца млади студенти кои засега сакаат да останат анонимни, а на неа се наоѓаат содржини со кои се осудува албанската владина пропаганда. Страницата засега има повеќе од 128.000 следбеници.

„Се чувствуваме како и вие, нашата земја, нашата татковина врши пропаганда и се обидува да ни ги испере мозоците, додека тие нè крадат. Поради тоа објавуваме војна против сите личности и институции што го кршат законот“, стои во објавата на „Лолита“ и се додава дека владата на Албанија се обидува да го подели народот за да може подобро да владее.

Авторите на страницата тврдат дека јавната администрација во Албанија добива наредби да ги пријавува нивните објави до „Фејсбук“. Во своја неодамнешна објава, „Лолита“ им се заблагодарува на своите поддржувачи за покажаната солидарност и истакна оти благодарение на тоа авторите на ФБ-страницата веќе не се плашат од заканите.

„Лолита“ има создадено резервна варијанта на страницата, доколку „Фејсбук“ одлучи да им ја укине поради големиот број негативни пријави.

Порталот „Хаштаг Албанија“, кој е еден од најпосетуваните во таа земја, за жал немаше среќа како „Лолита“, па веќе неколку дена е блокиран. Како што јавува дописникот на „Мета“, зад блокирањето на порталот стои италијанскиот новинар Карло Болино, кој исто така е сопственик на медиумот „Шќиптарја“ (shqiptarja.com).
Болино, наводно, поднел жалба до американската компанија што го одржува порталот „Хаштаг Албанија“ зашто страницата објавила негови фотографии без лиценца, но и лажни обвинувања против него.
Од „Хаштаг Албанија“ соопштија дека фотографиите од Болино се објавени со дозвола од тие што го фотографирале и оти обвинувањата на Болино не се издржани. Во однос на обвинувањата за објавување лажни информации на Болино, од „Хаштаг Албанија“ појаснуваат дека станувало збор за сатирични текстови.