Светска банка со прогнозите ги урна желбите на Владата дека 2019 ќе биде економска година


Скопје, 11 јануари, 2019 - 11:05 (META) 

Пораст на домашниот бруто-производ (БДП) во Македонија од 2,9 отсто во 2019 година предвидува Светската банка во најновиот јануарски извештај, што е сигнал дека тешко ќе се остварат најавите на Владата дека годинава ќе биде економска година.

Во Светска банка очекуваат конечните податоци за 2018 година да покажат дека лани економскиот пораст во земјава изнесувал само 2,5 отсто. Од банката во 2020 година ни предвидуваат пораст од 3,2 отсто.

Проекциите на Светска банка се разликуваат од оние на Владата, која очекува пресметките за минатата година да покажат пораст од 2,8 отсто и предвидува порастот годинава да биде 3,2 отсто, а во 2020 година дури 4 отсто.

Според Светска банка, македонската економија ќе расте побавно од економиите во регионот. Највисок раст во регионот годинава ќе забележи Косово од 4,5 отсто. Во Албанија се очекува пораст од 3,6 отсто, во Србија 3,5 отсто, а Босна и Херцеговина 3,4 отсто. Пораст под три отсто како Македонија се очекува единствено во Црна Гора каде се проектира пораст на БДП од 2,8 отсто во 2019 година.


Владата размислува да го зголеми „минималецот“


Скопје, 3 јануари, 2019 - 16:09 (META) 

Владата размислува да го зголеми прагот на загарантирана минимална плата, рече денеска премиерот Зоран Заев одговарајќи на новинарско прашање, како ќе го постигнат ветениот просек на платата од 500 евра.

„Владата има намера за дополнително носење на одлука за растот на минималната плата за оваа година“, одговори накратко Заев.

Министерот за финансии Драган Тевдовски рече дека „главната борба на оваа влада е платите да растат“, бидејќи платата за најголем дел од граѓаните е единствениот приход.

„Притискаме платите да растат, но истовреме даваме и поддршка за отворање на нови работни места. Платата од 2013 до 2017 година имала пораст од 1,9 проценти, а лани таа се зголемила за 5,7 проценти“, рече Тевдовски.

Зборувајќи за очекувањата на економски план, премиерот најави дека оваа година ќе биде економска, во која ќе нема пречка за реализација на капиталните инвестиции како што се изградба на патишта, железницата и гасификација.

Сите проблеми од техничка природа како проектна документација и решавање на имотно-правни односи биле надминати и очекува интензивирање на изградбата на пругата.

За гасификацијата очекува дека општините ќе ја градат секундарната мрежа, преку концесии или кредити кои би ги земале преку Македонски енергетски ресурси (МЕР).

Тој додаде дека повеќе пари кај граѓаните останале и преку евтината тарифа на струја, ослободување од плаќање на радиодифузна такса, намалување на казните, камати од заостанати долгови.

За оваа година најави и намалување на невработеноста под 20 проценти.

Министерот Тевдовски очекува стапката на раст на платите да продолжи од 4,5 проценти и во приватниот и во јавниот сектор.

„Политичката стабилност, ЕУ-перспективите, враќањето на довербата на инвеститорите, растот на приватните инвестиции, надминување на проблемите со техничките документи, решавање на имотно-правни односи за реализација на проектите ни дава за право да проектираме економски раст од 3,2 проценти“, рече Тевдовски.


Банките уриваат рекорди во издавање станбени кредити


Скопје, 4 декември, 2018 - 9:56 (META) 

Станбеното кредитирање во изминатите неколку години e најбрзорастечкиот сегмент од кредитното портфолио на банките. Од Народната банка информираат дека годишните стапки на пораст на станбените кредити, кои се движат околу 15 отсто, се значително над просечниот пораст на вкупните кредити на домаќинства, каде годишната стапка на пораст е околу 10 отсто.

Според последните податоци, станбените кредити претставуваат 29,4 отсто од вкупните кредити на физички лица (за споредба, пред пет години, ова учество изнесуваше 24,8 отсто).

На нашето прашање дали има простор за понатамошен пораст на станбените кредити, со оглед на тоа што на пазарот има голем број непродадени станови, а истовремено има семејства кои сè уште не можат да си дозволат купување стан, од Народна банка велат дека треба да се има предвид дека банките при одлучувањето за своите кредитни политики се водат и од ризикот.

„Иако вообичаено станбените кредити се сметаат за помалку ризичен кредитен производ, сепак, и тие носат ризици за банките, поврзани со животниот циклус на овие производи, кој е прилично долг и со тоа создава поголема неизвесност за банките (и со тоа и поголем ризик) околу редовноста во сервисирањето на обврските од страна на клиентите, но и околу вредноста и наплатата на обезбедувањето“, велат од Народната банка.


Просечната месечна исплатена нето-плата во септември изнесува 24.355 денари


Скопје, 20 ноември, 2018 - 13:08 (META) 

Просечната месечна исплатена нето-плата во септември изнесува 24.355 денари, а бруто-платата 35. 794 денари, објави Државниот завод за статистика.

Порастот на септемвриската нето-плата во однос на истиот период лани е 4,8 процнети.

Ваквото зголемување се должи, пред сé, на зголемувањето на просечната месечна исплатена нето-плата по вработен во секторите рударство и вадење на камен 21,9 проценти, информации и комуникации 15,2 проценти и дејности на здравствена и социјална заштита 11,1 проценти.

Зголемување на просечната месечна исплатена нето-плата по вработен, во однос на претходниот месец, е забележано во секторите дејности на здравствена и социјална заштита 4 проценти, образование 2,4 проценти и Други услужни дејности 1,5 проценти.


Просечната плата во јуни 24.203 денари


Скопје, 21 август, 2018 - 13:18 (META) 

Просечната месечна исплатена нето-плата по вработен во Македонија во јуни 2018, изнесува 24.203 денари и бележи пораст во однос на јуни лани од 6,1 проценти, објави Државниот завод за статистика.

Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите рударство и вадење на камен за 20,4 отсто, информации и комуникации за 16,7 отсто и преработувачка индустрија за 14,7 отсто.

Намалување на просечната месечна исплатена нето-плата по вработен, во однос на претходниот месец, е забележано во секторите финансиски дејности и дејности на осигурување за 14 отсто, објекти за сместување и сервисни дејности со храна 11,3 отсто и снабдување со електрична енергија, гас, пареа и климатизација за три отсто.

Просечната месечна исплатена бруто-плата по вработен во јуни 2018 изнесува 35.530 денари.


Пораст од 8,9 отсто на бројот на вработени во индустријата за една година


Скопје, 29 јуни, 2018 - 15:29 (META) 

Во мај годинава во индустријата биле вработени 8,9 отсто повеќе луѓе отколку во истиот месец во 2017 година.

Според податоците на Државниот завод за статистика, бројот на работниците во секторот Рударство и вадење на камен во мај 2018 година, во однос на мај 2017 година, бележи пораст од 1,7%. Во секторот Преработувачка индустрија порастот во истиот период изнесувал 9,9%, а во секторот Снабдување со електрична енергија, гас, пареа и климатизација, опаднал за 0,2 отсто.

Во периодот јануари – мај годинава, пак, имало 7,5 отсто повеќе вработени во индустријата во однос на истиот период минатата година.


„Фајненс тинк“: Потребни се мерки за поттикнување на инвестициите и извозот


Скопје, 8 јуни, 2018 - 15:38 (META) 

Економскиот пораст од само 0,1 процент во првиот квартал од годинава се должи на тоа што лани економијата во целост била ставена во заден план, сметаат од Институтот за економски истражувања и политики „Фајненс тинк“.

Оттаму посочуваат дека, на позитивната страна, извозот продолжува да расте со слично темпо како и претходно, главно воден од активностите во економските зони, додека на негативната страна, падот кај бруто-инвестициите продолжува да биде значаен (-9 проценти), додека падот во градежништвото е рекорден досега (-37,2 проценти).

„Особено е загрижувачки што раст нема во првиот квартал годинава, дури и при многу ниска споредбена основа од 2017 година (кога растот изнесуваше 0 отсто)“, велат од таму.

Според „Фајненс тинк“, главните двигатели на отсуство на растот, се запирањето или забавувањето на важните инфракструктурни проекти и забавеноста во реализацијата на странските инвестиции.

„Дополнително загрижува растот на потрошувачката на домаќинствата (2,3 отсто), во услови на пораст на платата кај сегменти од населението кои се повеќе склони кон потрошувачка“, посочуваат од Институтот.

Од „Фајненс тинк“ сметаат дека, сега од кога било претходно е потребен владин фокус врз економијата и повторно зажувување на растот. Фокусот, како што наведуваат, мора да биде ставен врз тоа како да се креира нова вредност во економија, главно преку мерки за поттикнување на домашните и странските инвестиции и извозот.


Азески: Треба уште многу работа за да се остварат планираните економски проекции


Крива Паланка, 7 јуни, 2018 - 16:27 (META) 

Стари патишта, лоша инфраструктура без железничко поврзување и гасоводна мрежа која е едвај пет проценти искористена во просек, таква е сликата на Коридорот 8 на влезот од Бугарија кај Деве Баир, констатираше денеска претседателот на Стопанска комора на Македонија, Бранко Азески при работната посета на главната мерна станица на гасоводот на ГА-МА на влезната точка во месноста Жидилово, кај Крива Паланка.

Тој додаде дека инвестициите долж Коридорот 8, што ги поврзува Турција, Бугарија, Македонија и Албанија, треба да бидат едни од најприоритетните. Во вкупната патна инфраструктура на Коридорот 8 од вкупно 960 километри патна мрежа, низ Македонија поминуваат околу 315 километри.

„Имајќи го предвид фактот дека од планираните инвестициони активности на Владата за 2018 година, во  вкупна вредност од 268 милиони евра, дел се предвидени за изградба на експресен пат на Ранковце-Крива Паланка, а патниот правец Крива Паланка – Деве Баир, во план е да се гради со кредит од Европска банка за обнова и развој, како Комора сметаме дека државните институции треба активно да работат на целосно исполнување и реализирање на планот“, потенцира претседателот Азески.

Магистралниот гасовод влегува во Македонија кај Деве Баир на границата со Бугарија и се протега преку Крива Паланка, Кратово и Куманово до Скопје, во должина од 98,197 километри, разводна гасоводна мрежа.

„Преносниот гасоводен систем е проектиран за физички капацитет од 800 милиони нормални метри кубни природен гас годишно. Засега, со користење на само 5 отсто од капацитетот овој енергенс, иако економски најисплатлив, во Македонија сè уште претставува голем финансиски трошок за компаниите. Потребно е да се бараат алтернативни решенија и да се овозможи гасот да влегува и од други места, на пример, преку Грција“, посочи Азески.

Согласно состојбата констатирана на терен, Азески изјави дека преку својот претставник во Владата во следниот период активно ќе лобираат да се реализираат капиталните инвестиции, да се исполни планот на Владата за период 2017 – 2021 година, да се изградат експресниот пат Ранковце – Крива Паланка и автопатот Крива Паланка – Деве Баир кој е всушност и најфрекфентниот пат кон Бугарија.

„Бизнис секторот презема вакви чекори, бидејќи искуството на стопанството покажува дека се потребни и повеќе од 3 години за да се реализираат инвестициските активности кои се испорачуваат до Владата. Сепак, актуелните чекори што ги презема Владата на економски план се во еден дел усогласени со барањата на бинзис-секторот, преку планот за економски раст. Но на терен реализацијата на капиталните инвестици, процентот на раст на домашниот бруто-производ и останатите макроекономски показатели покажуваат дека треба уште многу да се работи за оставрување на планираните проекции“, рече тој.


Ангеловска-Бежоска: Поскапиот бензин нема да предизвика позначајна инфлација


Охрид, 6 јуни, 2018 - 16:04 (META) 

Поскапиот бензин нема да предизвика позначајни инфлаторни притисоци и стапката на инфлација во земјава годинава нема да биде повисока од два проценти, одговори на новинарско прашање гувернерката Анита Ангеловска – Бежоска, на конференцијата која се одржува во Охрид.

Народна банка го очекувала растот на цените на нафтата на светските берзи, а се прогнозира дека тој тренд ќе продолжи и оваа година.

– За нас како Централна банка растот на цената на нафтата е очекуван. Во фазата на макроекономските проекции ние ги следиме сите тековни движења, очекувањата на аналитичарите, така што цената не е за изненадување, уште повеќе што по неколку години пад на цената на нафтата минатата година покажа нагорен тренд, а очекувањата се тоа да продолжи и оваа година – вели Ангеловска –  Бежоска.

Според неа, сепак не е исклучено дека скапите горива ќе имаат секундарен ефект врз другите производи, па Народна банка треба да го измери тоа влијание.

– Сепак многу ќе зависи колку притисоците од тој ценовен ефект кај нафтата ќе се пренесе на останатите производи па оттаму евентуално да се види некој секундарен ефект. Имајќи ги предвид сите движења и очекувања со цените на нафата, нашата проекција за оваа година е двопроцентна инфлација што е во линија и со нашата поставена цел за одржување ниска и стабилна инфлација – вели Ангеловска – Бежоска.


Претпладне сончево, попладне со краткотраен пороен дожд


Скопје, 29 мај, 2018 - 9:11 (META) 

Времето претпладне ќе биде сончево со мала до умерена локална облачност, а попладне локално нестабилно со краткотраен пороен дожд и грмежи. Повеќе услови за нестабилност ќе има во западните и југозападните планински делови. Ќе дува слаб до умерен североисточен ветер.

Утринската температура ќе се движи од девет до 16, дневната од 26 до 32 Целзусови степени.

Во Скопје слично време, утринската температура ќе се спушти до 14, а дневната ќе се искачи до 30 Целзиусови степени.

Поизразена нестабилност, на повеќе места со пороен дожд и грмежи, ќе има од четврток до сабота кога локално се можни и поинтензивни процеси. До петок дневните температури ќе бидат во благ пораст.