!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Поројниот дожд поплави делови од Истанбул


Истанбул, 18 јули, 2017 - 17:44 (META) 

Поројните дождови предизвикаа поплава во Истанбул, јавуваат турските медиуми, наведувајќи дека сообраќајот во градот е целосно парализиран.

Весникот „Хуријет“ наведува дека жителите во приградските населби се евакуираат со чамци, додека луѓето што живеат во висококатници останале блокирани во своите домови.

Поплавени се и неколку станици на подземната железница, додека тунелот кој минува под Босфор привремено бил затворен за сообраќај.

Невремето почнало доцна синоќа, а турските медиуми наведуваат дека ваков пороен дожд не е забележан во Истанбул во последните 32 години.

Министерот за транспорт, Ахмет Арслан, ја опиша ситуацијата како катастрофална, но рече дека засега нема извештаи за жртви.


МНР: Македонските државјани во Ситонија се безбедни


Солун, 18 јули, 2017 - 15:25 (META) 

На дежурната телефонска линија во канцеларијата во Солун, досега се јавиле вкупно десет лица, а во Министерството за надворешни работи се јавилe три лица, главно родители кои барале известување за состојбата на нивните деца и роднини кои се на летување во Грција, по поплавите што го зафатија вториот крак Ситонија.

„Канцеларија во Солун доби барање за информација (по е-меил) за состојбата на македонски државјани во кампот Каламици, по што вечерта на 17 јули како и денеска, беше контактирана управата на кампот и беше потврдено дека ниту еден човечки живот не е загрозен. Во моментов, во кампот има електрично напојување, се прават напори да се добие и топла вода, додека патот е прооден. Паралелно, колегите од канцеларијата во Солун стапија во контакт со наши државјани во кампот и ги инфомираа за состојбата“, информираат од МНР.

Од Министерството додаваат дека грачките власти немаат евидентирано македонски државјани кои се повредени, исчезнати или се во опасност поради поплавите.

На вториот крак грчките власти прават напори да се санираат штетите и да се испумпа водата во Торони и во Порто Куфо, како места кои беа најсилно погодени од невремето.


На Ситонија се утврдуваат штетите од поплавите


Солун, 18 јули, 2017 - 11:21 (META) 

На Ситонија, вториот крак на грчкиот полуостров Халкидики, времето и денеска е студено и со силен ветер, иако на некои места има и сонце. Во некои места нема вода поради дефектите. Исто така, се стравува и од појава на зарази, поради тоа што во гратчето Торони, кое беше поплавено, канализацијата е решена со септички јами. Фотографиите од таму покажуваат заглавени автомобили, пропадната улица и поплавени куќи.

Подрачјето беше погодено од силно невреме вчера.

Во Неос Мармарас нема вода, а според некои туристи, се очекува дефектот да биде отстранет во текот на денот.

На првиот крак, Касандра, во Полихроно и во Ханиоти, од претпладнево е сончево, исто како во Неос Мармарас, но се стравува дека невремето Медуза со силни врнежи, грмежи и со силен ветер, кое вчера зафати голем дел од Грција, ќе продолжи и во наредните два дена.


ВМРО-ДПМНЕ Тетово: Заев ги заборави жителите на Порој


Тетово, 4 јули, 2017 - 15:05 (META) 

„Со секој поминат ден, граѓаните сè повеќе се уверуваат во несериозниот однос на Зоран Заев и на СДС. Еве, денеска се наоѓаме во селото Порој, каде што и по еден месец од поплавите што го погодија ова населено место, сè уште состојбата на патиштата и на мостовите не е нормализирана. И покрај ветувањата дека за една недела овие работи ќе се решат, чистењето е целосно запрено, а механизацијата е целосно повлечена“, обвини Александар Велјаноски од Општинскиот комитет на ВМРО-ДПМНЕ во Тетово.

Тој посочи и на проблемот со главниот мост на патот Тетово – Јажинце, за кој, како што рече, има потврда и од Дирекцијата за заштита и спасување дека е премногу оштетен и опасен за сообраќај.

– Ветувањата што ги даваше Заев и за санација на овој мост и за изградба на неколку други, како и сите други ветувања од страна на СДС, засега се само мртва буква на хартија. Ги повикуваме Зоран Заев и СДС наместо да продаваат демагодија и лажни ветувања, веднаш да се фатат за работа и да почнат да ги реализираат ветувањата што ги дадоа пред граѓаните – рече Велјаноски во Порој денеска.


Владата одлучи патот кај Порој да се исчисти, а земјоделците да се обесштетат


Скопје, 7 јуни, 2017 - 21:05 (META) 

На вечерашната трета владина седница на која се расправаше за штетите во поплавените подрачја во Порој, било истакнато дека Дирекцијата за заштита и спасување и Општината Тетово треба веднаш да почнат постапка за расчистување на наносот на регионалниот пат Тетово – Јажинце, а Владата препорачала да помогне и Армијата.

На патот имало нанос од песок и од земја од околу 70.000 кубни метри и било неопходно бргу да биде исчистен.

„Исто така, на седницата е информирано дека од поплавите во Тетовско, зафатени се 50 хектари земјоделски површини, пред сè овошни и градинарски насади и житни култури. Владата го задолжи Министерството за земјоделство, шумарство и за водостопанство да ја почне постапката на прибирање барања од земјоделците за надомест на штети, по што надлежни комисии ќе излезат на терен за увид на штетите и за утврдување на висината на средствата потребни за нивно обештетување“, се вели во соопштението на Владата.


Во поплавите во Колумбија загинаа 254 лица, а 200 се исчезнати


Мокоа, 2 април, 2017 - 16:30 (META) 

Во обилните дождови во градот Мокоа на југозападот на Колумбија, кои предизвикаа поплави и лизгање на земјиштето, загинаа 254 лица, 400 се повредени, а 200 се водат за исчезнати.

Дождовите предизвикаа излевање на неколку реки кои носеа карпи и камења. Повеќе од 1.100 војници и полицајци се повикани да им помогнат на загрозените луѓе.

– Ќе направиме сè што можеме за да им помогнеме – изјави колумбискиот претседател Хуан Мануел Сантос, кој допатува во Мокоа, каде што безбедноста им е загрозена на 345.000 жители.

Метеоролошките служби за денеска прогнозираат послаби дождови во оваа област.


Поплавите во Австралија со себе носат, крокодили, змии и ајкули


Квинсленд, 31 март, 2017 - 15:24 (META) 

Повеќе десетици илјади лица се евакуирани во Австралија поради поплавите, а властите ги предупредија жителите на опасност од крокодили и од змии во надојдените води.

Циклонот Деби, кој е од четврта категорија, во вторникот го погоди Квинсленд, на североистокот на Австралија.

Циклонот оттогаш премина во тропска бура и се движи кон југозападот на Австралија, Поројни дождови има и на брегот јужно од Квинсленд и во Сиднеј.

Поплавите најмногу го погодија Лизмор, град на брегот на сојузната држава Нов Јужен Велс. Откако спасувачите вчера објавија фотографија од огромна бела ајкула насукана во Квинсленд, властите ги предупредија жителите на опасност од заталкани крокодили и змии.

Во ударот на циклонот нема мртви, а во вторникот едно лице беше потешко повредено, откако врз него се урна ѕид.


Поплави и свлечишта во Перу усмртија 75 лица


Лима, 20 март, 2017 - 12:32 (META) 

Поројни дождови, поплави и свлечишта во Перу ги однесоа животите на 75 лица, соопштија локалните власти.
Перуанската цивилна заштита соопшти дека 75 лица настрадале, 625.000 лица се загрозени, додека 70.000 останале без покрив над глава.

Поради поројните дождови поплавен е системот за канализација во градовите долж Тихиот Океан, а властите почнале да преземаат мерки против комарци.

Владата ја испрати војската да ѝ помогне на полицијата во одржување на јавниот ред во повеќе од 800 градови, во кои е прогласена вонредна состојба.


Поплавите во Зимбабве усмртиле 246 лица


Хараре, 3 март, 2017 - 10:09 (META) 

Властите во Зимбаве денеска соопштија дека во поплавите од декември минатата година загинале 246 лица, а околу 2.000 луѓе останале без покрив над глава.

Јужноафриканската држава упати апел до меѓународните донатори за 100 милиони долари помош на загрозените од поплавите, кои однеле неколку мостови и патишта, по што повеќе заедници останале отсечени од остатокот од земјата.

Локалниот претставник Сејвијур Ксасукевере прогласи национална катастрофа и го објави бројот на загинатите. Тој рече дека 128 лица се повредени во поплавите.


УСАИД превенира урбани поплави во Делчево


Делчево, 16 февруари, 2017 - 13:30 (META) 

Мисијата на УСАИД во Делчево го одбележа завршувањето на мерката за намалување на ризикот од урбани поплави во Милково Брдо. Оваа мерка беше завршена како дел од учеството на општината во Проектот на УСАИД за општински стратегии за климатски промени, спроведен од „Милиеуконтакт Македонија“.

Од мисијата на УСАИД информираат дека пилот проектот вклучувал изградба на нова атмосферска канализација во урбаната населба Милково Брдо во Делчево, која ги собира и одведува атмосферските води подалеку од населеното место. Со оваа мерка, додаваат од УСАИД, се зголемил капацитетот на жителите на Делчево да се прилагодат на климатските предизвици и да се заштитат од потенцијалните штети од поплави.

-Во текот на изминатите четири години, работевме заедно со нашите партнери во Македонија на идентификување и ефективно управување со ризиците поврзани со промените на климата. Меѓу најопасните од овие ризици се оние поврзани со екстремни временски настани, вклучувајќи суши, топлотни бранови и силното – изјави директорот на мисијата на УСАИД, Џејмс Стајн.

Мисијата на УСАИД во пилот проектот придонела со 3.300.000 денари односно 58.930 долари, а Општина Делчево придонела со 1.734.792 денари односно 30.978 долари.