!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Тајфунот Доксури го погоди Виетнам, осум загинати


Ханој, 16 септември, 2017 - 19:28 (META) 

Разорниот тајфун Доксури го погоди средишниот дел на Виетнам, каде осум лица загинале, а четири се повредени, пренесува ХРТ.

На брегот на Виетнам ветерот дувал со брзина од 135 километри на час. Повеќе од еден милион луѓе останале без струја, а оштетени биле илјадници куќи. Властите предупредиле на опасност од поплави и лизгање на земјиштето.

Тајфунот Доксури е трето тропско невреме кое оваа година го зафаќа Виетнам. Минатата година тајфуните во оваа источноазиска држава усмртија 263 лица и предизвикаа материјални штети од речиси 1,75 милијарди долари, пет пати поголеми од оние во 2015 година.


Бројот на загинатите во поплавите во Италија достигна до седум лица


Рим, 12 септември, 2017 - 10:28 (META) 

Бројот на загинатите во поплавите во централно-италијанскиот град Ливорно достигна до седум лица по откривањето на телото на уште една жртва што претходно се водеше како исчезната. Телото на 34-годишна жена е пронајдено во понеделникот попладне, во двор на куќа во градот, прекриено со кал. Таа и нејзиниот сопруг излегле да гледаат што се случува со поплавата, но биле однесени од водата. Нејзиниот сопруг беше пронајден жив во неделата.

Сега уште едно лице се смета за исчезнато. Четворица од седумте жртви биле членови на едно семејство кои се удавиле во подрумски стан.

Поплави имаше и во делови од Рим, поради што некои метро-станици беа затворени. Потоа дождовната бура се премести на југ и предизвика поплави и во градот Салерно. Поплави имаше и на Сицилија, каде покрај силниот дожд, дуваше и силен ветер.


Во поплава во Италија најмалку петмина загинати


Рим, 10 септември, 2017 - 16:26 (META) 

Најмалку пет лица загинаа, а тројца се водат како исчезнати во бурата што денеска ја погоди Италија, а меѓу најпогодените се провинцијата Тоскана и градот Ливорно.

Четири лица од исто семејство се пронајдени мртви во поплавена куќа во Ливорно, каде за четири часа падна обилен дожд, претворајќи ги улиците во реки, кои носеа сè пред себе.

Италијански медиуми јавуваат дека загинале девојче, нејзините родители и нејзиниот дедо.

Петтото тело е пронајдено на подрачје разурнато од свлечиште, додека три лица се водат како исчезнати, соопштија пожарникарите.


Бројот на жртвите во Тексас се зголеми на 31 лице


Хјустон, 31 август, 2017 - 10:36 (META) 

Властите во Тексас соопштија дека бројот на жртвите на разорниот ураган Харви и на поплавите кои ги погодија Хјустон и околината се зголемил на најмалку 31 лице.

Властите на хјустонскиот округ Харис соопштија дека чекаат резултати од аутопсија на шест лица за да се утврди дали нивната смрт е последица на ураганот и на поплавите.

Повеќето смртни случаи се последица на давење. Властите соопштија дека надојдената вода во Јужен Тексас, 240 километри од Хјустон, превртела два резервоари за нафта, од кои се излеале околу 110.000 литри сурова нафта.

Во Хјустон денеска во ограничена мера почна да работи градскиот јавен превоз, а комуналните работници, кои вчера го собираа отпадот, од денеска би требало да почнат нормално да работат. Сепак, вработените во градските јавни служби нема да почнат со работа до следниот вторник.


Монсунските дождови и поплавите го парализираа Мумбај


Мумбај, 30 август, 2017 - 10:50 (META) 

Обилните монсунски дождови го парализираа финансискиот центар на Индија – Мумбај, каде улиците се претворени во реки, а нивото на водата достигнува висина од најмалку еден метар, јавуваат светските агенции.

Метеоролозите најавиле дека денеска се очекуваат уште врнежи од дожд, а локалните власти побарале сите училишта и факултети да бидат затворени на еден ден.

Мумбај вчера се соочи со обилни врнежи од дожд кои ја оштетија инфраструктурата во градот, предизвикаа прекин во железничкиот и во автобускиот сообраќај.

Летовите од аеродромот во Мубај се пренасочени на аеродромите во другите градови во Индија.

Мумбај секоја година се соочува со последици од монсуните, кои главно траат од јуни до септември.


Повеќе од 20 загинати во Хјустон, воведен полициски час поради кражби


Хјустон, 30 август, 2017 - 10:18 (META) 

Во Хјустон е прогласен полициски час додека градот се бори со последиците од ураганот Харви, кој кон крајот на минатата недела ја погоди американската сојузна држава Тексас.

Невремето донесе рекордни количества дожд, големи делови од градот се поплавени, многу домови се уништени, а повеќе од 20 лица ги загубиле животите, пренесува „Би-би-си“.

Градоначалникот на Хјустон, Силвестер Тарнер, изјавил дека полицискиот час морало да биде воведен за да се спречат кражби во домовите на евакуираните граѓани.

Полицискиот час ќе биде на сила од полноќ до 5 часот наутро по локално време. Тој нема да важи за волонтерите и за спасувачите.

Градските власти регистрирале случаи на кражби, вооружени грабежи и лица кои лажно се претставувале како полицајци.

Претседателот Доналд Трамп вчера го посети Тексас за да ги види на самото место шетите од ураганот Харви и изјави дека станува збор за невреме од „епски размери“.


Во поплавите на југот на Азија настрадаа 600 лица


Њу Делхи, 20 август, 2017 - 16:02 (META) 

Околу 600 лица настрадаа во поплавите на југот на Азија каде што акцијата за спасување се уште трае. Во поплавите и свлечиштата предизвикани од нив, биле погодени повеќе од еден милион луѓе.

Властите на Индија побарале помош од војската во две области кои се најгусто населени, а во кои загинаа 55 лица. Во индиската држава Утар Прадеш речиси 100.000 луѓе, од своите домови биле префрлени во засолништа.Индиската држава Бихар е најтешко погодена, каде што бројот на жртвите се зголеми на 153.

Најмалку 20 од 28 милиони жители на Непал се погодени од поплавите, а се проценува дека настрадале 123 лица.

Неколку милиони луѓе во Непал, Бангладеш и Индија се соочуваат со недостаток на храна и постои опасност од заразни болести поради загадената вода. Меѓународниот комитет на Црвениот крст повика на итна акција поради хуманитарната криза на југот на Азија.


Четиристотини загинати и 600 исчезнати во поплавите во Сиера Леоне


Фритаун, 18 август, 2017 - 12:39 (META) 

Поплавите во Сиера Леоне однесоа повеќе од 400 животи, а 600 лице се водат како исчезнати соопшти денеска Црвениот крст.

– Денеска броиме повеќе од 400 загинати, изјави во Женева Елхаџ Ал Си, претседател на здружението на Меѓународната федерација на Црвениот крст и Црвената полумесечина.

Властите повикаа да се евакуираат луѓето од планинските делови, каде се поради пукнатините е можна појава на лизгање на земјиштето.

Метеоролозите предвидуваат дека дождовите ќе продолжат и во следните денови.


Поплавите и одроните во Сиера Леоне усмртија повеќе од 300 лица


Фритаун, 14 август, 2017 - 17:13 (META) 

Бројот на загинатите во поплавите и во одроните што го погодија Фритаун, главниот град на Сиера Леоне се зголеми на 312, соопшти Црвениот крст.

Портпаролот на локалниот Црвен Крст, Патрик Масаки рече дека бројот на жртвите веројатно ќе се зголеми.

Синех Камара, кој работи во болничката мртовечница во Фритаун изјави дека телата на жртвите се насекаде по подот.

Националната телевизија на Сиера Леоне го прекина редовното емитување на програма за да пушти прилог како луѓето трагаат по затрупаните лица.

Властите соопштија дека припадниците на војската помагаат во спасувачките операции.

Истовремено, претседателот на Сиера Леоне, Виктор Фоха изјави дека најверојатно стотина лица загинале во одроните во предградијата во Фритаун.


Десетици загинати во поплавите и лизгање на земјиштето во Непал


Катманду, 13 август, 2017 - 13:05 (META) 

Најмалку 40 лица загинале во лизгање на земјиштето и поплавите предизвикани од монсунските дождови во Непал, соопштија властите на оваа земја, јавуваат светските агенции.

Во националниот парк Читван поради поплавите хотелите ги преместиле гостите на повисоките катови, а туристите сместени во еден од нив со слонови биле однесени до блискиот пат за да можат да стигнат до главниот град на земјата – Катманду.

На истокот на Непал бил затворен аеродромот во Биратнагару, кој бил еден метар под вода.

Оваа година во Непал како последица на монсунските дождови загинаа повеќе од 100 лица.