Уставен суд ќе одлучува за референдумот


Скопје, 19 септември, 2018 - 9:56 (META) 

На денешната седница Уставниот суд треба да се произнесе за иницијативите за референдумот што ги поднесоа „Левица“ и  Светскиот македонски конгрес, со кои се бара поништување на одлуката за референдумот и времено да бидат стопирани активностите поврзани со него.

Подносителите сметаат дека одлуката за референдумот не е во согласност со Уставот, Законот за референдум и, како и со воспоставените европски стандарди и добри референдумски практики утврдени од страна на Венецијанската комисија. Бараат Уставниот суд целосно да ја поништи одлуката за референдум, а доколку одлуката ја донесе по референдумот, тогаш да ги поништи резултатите.

Судот може да ја прифати или отфрли иницијативата, или пак, да прогласи за ненадлежен. Известител е судијката Елена Гошева и, како што се дознава неофицијално, таа во рефератот предлага Уставниот суд да поведе постапка за преиспитување на уставноста на одлуката и воведување времени мерки, што значи прекинување на сите подготовки за спроведување на референдумот, активностите на ДИК, на Владата, на Собранието и целата кампања.

Министерот за надворешни работи Никола Димитров вчера порача оти е голема одговорноста во овој момент, кое било тело, дури и Уставниот суд клучот да го земе од рацете на граѓаните.

На прес-конференцијата со германскиот колега Хајко Мас, рече дека на ниво на аргументи има две тези. Првата е дека ни треба посебен задолжителен референдум за стапување во сојуз со други држави. Таа уставна одредба, како што појасни, се однесува кога се пренесува суверенитет.

– Точно е дека за членство во ЕУ ќе имаме една таква работа, но тоа нема да се случи утре, ќе поминат неколку години – нагласи Димитров.

Тој смета дека одредбата се однесува главно на стапување во сојуз со други држави во смисла на федерација или конфедерација. Вели дека за НАТО, која е меѓународна владина организација, таа одредба не е релевантна.


Филипче: Министерството за здравство го поништи тендерот за набавка на реагенси


Скопје, 23 јули, 2018 - 11:01 (META) 

Министерот за здравство Венко Филипче денеска изјави дека на тендерот за набавка на тестови и реагенси за биохемиски, имунолошки, хематолошки, коагулациони и гасни анализи со отстапување на потребната опрема (анализатори) на бесплатно користење за потребите на Јавните здравствени установи, се јавил само еден економски оператор кој има недостатоци во поднесената документација.

– Интензивно работевме на евалуација на понудата од моментот на нејзиното отварање. Првичната евалуација укажува на недостатоци во поднесените документи од страна на економскиот оператор. Токму затоа Министерството за здравство донесе одлука дека тендерот треба да се поништи. Истовремено сметаме дека во овој случај и за овој тендер е некоректно да се склучи договор, иако Законот за јавни набавки дозволува да се склучи договор со една фирма понудувач – рече Филипче.

Тој ги  повикува компаниите кои работат во оваа сфера, да работат на намалување на цените на реагенсите и до 15-20 проценти колку што е пазарната вредност.

Од ВМРО-ДПМНЕ реагираа дека „десетици милиони евра се делат на фирма формирана пред четири месеци, која како прва зделка добива тригодишен монопол на лабораториските испитувања“.


Поништен конкурсот за откуп на класични композиции за 2017 година


Скопје, 29 март, 2018 - 16:54 (META) 

Министерството за култура соопшти дека конкурсот за откуп на класични композиции за 2017 година, објавен на 6 април минатата година, се поништува поради административни пропусти во неговото спроведување. Конкурсот ќе биде повторен.

Министерството ќе поведе соодветни дисциплински постапки за службите задолжени за спроведување на конкурсот, за да се утврди одговорноста за направените пропусти.

Според соопштението, објавените резултати на 18 јануари годинава на официјалната веб-страница не биле тоа, туку само предлози на комисијата, кои не биле одобрени од министерот.


ЛП: Законот за јазиците е неважечки


Скопје, 16 март, 2018 - 13:18 (META) 

Либерална партија (ЛП) смета дека Законот за употреба на јазиците е донесен вон процедура и дека не е важечки, образложувајќи дека ситуацијата е таква поради прекршувањето  на процедурата.

Од партијата велат дека откако претседателот на Република Македонија не го потпиша указот при првото изгласување, Собранието имало рок од 30 дена за да ги усвои амандманите и да го изгласа или да не го изгласа законот.

„По истекот на рокот, секаква процедура и активност врзана за текстот што бил оспорен од претседателот е надвор од нашиот правен систем. Со истекот на 30-те дена процедурата по тој закон престанува и тој натаму не може ниту да се разгледува, ниту да се гласа по него, бидејќи веќе е надвор од процедурата. Доколку Уставниот суд сака да го штити уставниот и правниот поредок на земјата, треба да констатира дека Законот за употреба на јазиците е донесен вон процедура и дека не е важечки“, порачува партијата.

ЛП смета дека постои потреба од изменување и дополнување Закон за употреба на јазиците, но по поништувањето од страна на Уставниот суд, „со смирени нерви, поголем степен на толеранција и широк консензус, Собранието треба да донесе нов закон кој ќе биде во согласност со процедурата и ќе ги одрази сите сугестии и предупредувања и од опозицијата, и од Венецијанската комисија, и од Советот на Европа, а ќе биде основа за компактно и одржливо, наместо поделено општество“.


Димовски ќе бара од Уставниот суд да го поништи Законот за јазиците


Скопје, 16 јануари, 2018 - 12:35 (META) 

Пратеникот Илија Димовски денеска најави дека ќе поднесе иницијатива до Уставниот суд за поништување на Законот за употреба на јазиците.

Тој преку својот фејсбук-профил апелераше до претседателот на државата, Ѓорге Иванов да не го потпишува указот за прогласување на законот, а до неговите колеги во Собранието да не гласаат за овој закон кога тој повторно ќе се врати на седница во законодавниот дом.

„Доколку и покрај укажувањата на целокупната јавност пратениците на СДСМ повторно одлучат да гласаат за овој закон, најавувам дека ќе поведам иницијатива пред Уставниот суд на Република Македонија за поништување на овој закон“, напиша Димовски на „Фејсбук“.

Според него Законот за употреба на јазиците или како што го нарекува „Законот за двојазичност“ е штетен, дезинтегрирачки, дискриминирачки и целосно неуставен документ.

„Овој закон е донесен како плод на партиски пазарења помеѓу партиите, а не како плод на суштинска, длабока и сеопфатна анализа на реалните потреби на нашите сограѓани од помалубројните етнички заедници (Албанците, но и сите други помали заедници). Процедурата за донесување на овој закон во Собранието на Република Македонија беше целосно неделовничка и спротивна на основните демократски стандарди. Овој закон е донесен на сила. Овој закон ја загрозува позицијата на македонскиот јазик во Република Македонија, но и ја загрозува унитарноста и иднината на нашата држава“, пишува Димовски.


ЛДП бара поништување на „скандалозниот“ договор за изградба на нов клинички центар


Скопје, 19 мај, 2017 - 19:26 (META) 

Никола Тодоров, Никола Груевски и Емил Димитриев денеска потпишаа и поддржаа скандалозен и бескруполозен договор за изградба на нов клинички центар во Скопје, свесно произведувајќи нови линии на поделба и беззаконие во Рeпублика Македонија, обвинуваат од Либерално-демократската партија (ЛДП).

Оттаму велат дека потпишувањето на ваков договор од страна на лице „кое не е ништо друго, освен пратеник во новиот собраниски состав“, е класично кршење на Уставот и на законите во државата.

„Прашуваме во кое својство Никола Тодоров потпишува милионски договори со поддршка на техничка Влада, која патем нема друга функција освен организирање избори. Или можеби провизиите се поважни од почитувањето на законите и владеењето на правото? ЛДП, како дел од новата влада, ќе го преиспита договорот и за истиот ќе има одговорност“, стои во соопштението на ЛДП.

Од партијата ги повикуваат надлежните институции да го поништат договорот, кој, како што велат од ЛДП, претставува преседан во секој поглед.

„И компаниите потписници на договорот би требало да знаат дека оваа техничка влада ниту имала, ниту има легитимитет да потпишува проекти, уште повеќе што се работи за изградба на клинички центар, кој е од голем национален интерес“, додаваат од ЛДП.


Поништени одлуките за изградба на панорамско тркало и на шпански скали


Скопје, 22 март, 2017 - 22:28 (META) 

Општина Центар денеска ги поништила одлуките за изградба на панорамско тркало, шпански скали и на катна гаража кај зградата Аутомакедонија, информираше директорот на „Паркинзи на Општина Центар“, Саша Богдановиќ.

– На просторот на Аутомакедонија нема да се гради спорната катна гаража, односно спречивме да се узурпира јавниот простор на жителите во овој дел на Центар. Тоа го носат измените на четирите детални урбанистички планови, кои Никола Груевски и ВМРО-ДПМНЕ сакаа да ги запрат со каменување на Општина Центар и со нарачаното насилство врз градоначалникот на општината, Андреј Жерновски, за што веќе има обвинение против експремерот Никола Груевски – рече Богдановиќ.

Тој на прес-конференција информираше дека денеска биле усвоени урбанистичките планови.

– Општинската инспекција има рок од седум дена од објавување на одлуката во Службен весник и во тој период е должна да достави предлог до градоначалникот Жерновски за поништување на издадените одобренија по поранешните детални урбанистички планови – додаде Богдановиќ.


Амбасадата на САД во Тирана им укина визи на судии и на обвинители поради корупција


Тирана, 27 јануари, 2017 - 10:04 (META) 

Амбасадата на САД во Тирана издаде соопштение во кое се вели дека ќе бидат повлечени неимигрантските визи за неколку албански судии и обвинители. Во соопштението се вели дека тие ја донеле оваа одлука откако утврдиле дека службениците не се квалификувани за визи.

„Амбасадата на САД ја презеде оваа акција пред претстојниот процес на проверка низ кој ќе се оцени дали одредени службени лица се поврзани со корупција, како и поради тоа што имаше флагрантна злоупотреба на службената виза од страна на висок обвинител и на неговиот брачен другар, што доведе до поништување на нивните визи. Амбасадата на САД сериозно ги зема предвид наводите за корупција и ќе продолжи да ги проверува визите на судските службеници и апликациите за виза со дополнителна контрола. Стејт департментот има широки овластувања да одбие или да повлече визи врз основа на информации кои укажуваат дека на носителот на виза може да не му биде дозволен влез во САД и ќе продолжи да го користи овој орган за да ги унапреди своите напори за борбата против корупцијата во Албанија“, се вели во соопштението на Амбасадата.


Уставниот суд образложи: Одложено распуштање на Собранието не е исто со одложено дејство на законите


Скопје, 1 јуни, 2016 - 10:35 (META) 

Уставниот суд официјално го објави образложението на одлуката за поништување на одлуките за одложено распуштање на Собранието од 18 јануари и 23 февруари, оваа година, која судот ја донесе во средата, минатата недела, по разгледувањето на иницијативата, поднесена од Демократската унија за интеграција (ДУИ).

Со одлуката на Уставните судии дефинитивно беа запрени сите активности околу предвремените парламентарни избори, кои беа закажани на 5 јуни.

Според Уставниот суд, одложеното распуштање на Собранието не може да се поистоветува или споредува со одложеното дејство на законите или други акти.

Во образложенито, исто така, се наведува дека „одлуката за распуштање на Собранието има карактер на пропис, бидејќи ваков вид на одлука има универзално дејство и посредно се однесува на сите граѓани кои на непосредни избори го даваат својот глас за одреден пратеник на Собранието, односно ним им го пренесуваат мандатот, но и суверенитетот за Собранието да решава, односно одлучува во нивно име, од каде произлегува дека оспорената одлука е подобна за уставно судска оцена“.

„Во Уставот на Република Македонија не е експлицитно уредено прашањето за одложното важење на Одлуката за распуштање на Собранието. Отсуството на конкретна регулатива за ваков случај не може да се толкува дека ваквото решение е допуштено со одлука на Собранието, како во случајов, а особено имајќи ја предвид сериозноста и можните последици. Со Уставот не е утврдено мандатот на пратениците во Собранието да продолжи во случај на распуштање на Собранието, ниту е предвидено во таков случај тие да продолжат со должноста. Според тоа не може да постои било какво одлагање на распуштање на Собранието, а со тоа и одложено губење на мандатот на пратениците. Спротивно на изнесеното, Собранието продолжи да работи во својот полн капацитет во периодот од 19 јануари 2016 година кога е донесена првата Одлука за самораспуштање со одложно дејство, па се до 07 април 2016 година кога Собранието фактички се самораспушти. Одложеното дејство на оспорената одлука, односно одложеното дејство на распуштањето на Собранието, како највисоко избрано претставничко тело на државата кое има законодавна надлежност, не може да се поистоветува или компарира со одложеното дејство на законите или други нормативни акти…Ваквата состојба доведува и до правна несигурност и повреда на владеењето на правото како темелна вредност на уставниот поредок утврдена во членот 8 став 1 алинеја 3 и членот 51 од Уставот, бидејќи Собранието на Република Македонија е должно да ги почитува Уставот и законите, што овде не е случај“, стои во образложениот на Уставниот суд.

Уставните судии во февруари разгледуваа иницијатива поднесена од пратеникот Павле Трајанов, со која исто така беше оспорено рапуштањето на Собранието, но тогаш, судот не ја прифати и се прогласи за ненадлежен по ова прашање.

Прифаќањето на иницијативата и носењето на времената мерка за замрзнување на сите активности околу изборите, што и претоходеа на конечната одлука на Уставниот суд, отвори можност за повторно свикување на Собранието, што спикерот Трајко Вељаноски го направи на 18 мај. На седницата пратениците едногласно го избришаа од Изборниот законик 5 јуни, како ден на кој треба да се одржат предвремените парламентарни избори. Нов датум за одржување на изборите не е предвиден.


Димитриев: Поништувањето на аболицијата за политичарите е можност за смирување на страстите


Скопје, 30 мај, 2016 - 15:57 (META) 

Со поништувањето на аболицијата за политичарите се отвора простор за смирување на страстите, изјави денеска премиерот, Емил Димитриев по координативниот работен состанок во Владата на тема „Акциски план за реализација на итните реформски приоритети“.

Според Димитриев, Иванов имал добри намери кога ја донел одлуката за аболиција, но поради политичкиот контекст, таа морало да биде повлечена.

– По носењето на аболицијата целиот предмет се стави во политички контекст при што главен акцент се даде на политичарите кои беа дел од овој акт. Со поништувањето на аболицијата за политичарите сметам дека има простор за смирување на страстите, а за останатите постои законско решение со кое по нивно барање може да биде повлечена аболицијата. Од функционален аспект не гледам проблем целосно да профункционира поништувањето на аболицијата и сметам дека втората одлука е добро правно осмислена за на некој начин секој да може да се откаже од аболицијата – изјави Димитриев.

Прашан за коментар за одложувањето на изборите, Димитриев вели дека сите обврски за спроведување на изборите и на 24 април и на 5 јуни биле исполнети и дека нивното одложување значи пролонгирање на кризата, што негативно се одразува на функционирањето на државата.

– Новата реалност во ситуацијата е да се посветиме силно на реализација на програмата на Владата, на реформите и на крупните проекти од различни области – инфраструктура, земјоделство, здравство и паралелно со тоа да течат политичките разговори меѓу политичките партии за да се утврди нов термин за одржување на избори – изјави премиерот Димитриев.