Приведен дилер на дрога во Неготино, запленети марихуана, хероин, кокаин


Неготино, 20 февруари, 2018 - 14:33 (META) 

Полициски екипи вчера извршиле претрес во домот на 41-годишниот А.Т. во Неготино каде пронашле и заплениле различни видови наркотици, соопшти денеска Министерството за внатрешни работи.

Како што информираат од Министерството, во домот на неготинецот биле пронајдени и одземени 1,5 килограми марихуана, 20 таблети екстази, 36 шишиња метадон, околу 10 грама кокаин, околу 110 грама хероин, една дигитална вага и 36.000 денари, за кои постои сомнение дека потекнуваат од продажба на дрога.

Осомничениот А.Т., како што се наведува во соопштението, дрогата ја продавал на лица од подрачјата на Неготино, Кавадарци, Демир Капија, Валандово и Струмица.

Тој е приведен и против него ќе биде поднесена кривична пријава за недозволено производство и пуштање во промет наркотични дроги и психотропни супстаници и ќе биде предаден на надлежен судија за понатамошна постапка.


Лажна дојава за поставена бомба во автомобил во Струга


Струга, 25 мај, 2016 - 14:54 (META) 

Полициската станица во Струга утрово во 9.30 часот добила пријава дека во автомобил, марка „нисан примера“, со бугарски национални ознаки била поставена експлозивна направа. По интервенцијата на полициските тимови за анти-тероризам било утврдено дека станува збор за лажна пријава.

– По добиената информација, полициски екипи ги презедоа сите безбедносни мерки за обезбедување на поширокиот простор каде беше паркирано патничкото возило, а потоа и преглед на истото – изјави портпаролот на СВР Охрид, Стефан Димоски.

Полициските тимови за анти-тероризам и службениците од полициската станица во Струга, извршиле детална проверка на возилото, паркирано на улицата „Ково Стефановски Риле“ и утврдиле дека во возилото нема експлозивна направа која може да предизвика општа опасност.