!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Пијани битолчани се нафрлиле на полицајци


Битола, 14 март, 2017 - 15:25 (META) 

Двајца поприлично пијани битолчани ноќеска физички нападнале двајца полицајци, при што им нанеле телесни повреди, соопшти СВР Битола.

Случајот на своите колеги им го пријавила полицајка, ноќеска во 3.40 часот. Таа кажале дека десет минути претходно, додека со колега патролирале на булеварот Први мај, биле нападнати од С.И. (25) и од М.Р. (24), и двајцата од Битола. Напаѓачите имале поголемо количество алкохол во крвта, односно првиот имал 1,79 промили, а вториот 2,66 промили.

Напаѓачите првин почнале да им се закануваат на полицајците, а потоа и физички ги нападнале и им нанеле и повреди, што биле констатирано во Клиничка болница Битола.


Филмска потера од Битола до Прилеп, брканите на крајот избегале


Битола, 27 февруари, 2017 - 15:20 (META) 

Потера како во криминалистички филмови се случувала вчера рано утрото од Битола до Прилеп, каде автомобилот конечно застанал, но луѓето во него, сепак, ѝ избегале на полицијата.

Како што извести СВР Битола, сè почнало вчера околу 4.50 часот, на улицата 8 Септември во Битола, кога полицајци дале знак за сопирање на автомобил „даеву есперо“, но возачот забрзал и автомобилот се упатил кон магистралниот пат Битола – Прилеп. Битолските полицајци им јавиле на колегите во Прилеп да подготват блокада и тие го блокирале патот со службени автомобили кај раскрсницата за селото Ново Лагово. Но, автомобилот со бегалците ја пробил блокадата од возила, влегол во Прилеп, ја поминал пругата и застанал во нива.

Тројцата мажи што биле во автомобилот излегле и почнале да бегаат, при што еден полицаец фатил еден од нив, но бил нападнат од друг од бегалците, кој со остар предмет му нанел повреди на рацете. Покрај тоа, почнал и да го дави.

Фатениот тогаш избегал, а полицаецот го зграпчил напаѓачот, но и тој успеал да избега.

Полицијата вели дека трага по бегалците.


Во бомбашки напад на Синај, убиени пет полицајци


Скопје, 9 јануари, 2017 - 10:01 (META) 

Пет полицајци загинаа, а десетмина се повредени при напад врз контролен пункт во северниот дел на Синај, соопшти денеска египетската полиција.

Како што јавуваат египетските медиуми, меѓу повредените има и цивили.

Полицијата нагласи дека напаѓачите подметнале бомба во едно возило, а од експлозијата целосно се уништени три ката на контролната зграда.

Засега никој не ја презеде одговорноста за нападот.


660 полицајци на протест пред МВР побараа итно вработување


Скопје, 30 декември, 2016 - 17:10 (META) 

Вкупно 660 невработени полицајци, кои пред речиси три месеци успешно ја завршиле едногодишната обука, денеска излегоа на симболичен протест пред Министерството за внатрешни работи, на кој побараа да бидат вработени.

– По доставеното барање до Министерството за внатрешни работи и до други надлежни органи, јавно излеговме да побараме од нив да имаат предвид дека и по успешно завршената едногодишна обука во центарот за обука при МВР во Идризово и неколку месеци поминати дома во чекање, нашето прашање за вработување сè уште не е решено – рече Ѓоргија Коларовски.

Полицајците по завршувањето на обуката не беа вработени поради почетокот на изборниот процес, за време на кој не е дозволено вработување во државна служба.


Дваесет лица се повредени во две силни експлозии во Истанбул


Истанбул, 10 декември, 2016 - 22:14 (META) 

Две силни експлозии се случија вечерва во Истанбул, во близина на стадионот на клубот „Бешикташ“, јавуваат светските медиуми.

Според првичните информации, една од експлозиите се случила во трговски центар, а другата во близина на место каде што се наоѓал полициски автобус.

Потврдено е дека најмалку 20 лица се повредени, а полицијата го сопрела сообраќајот околу стадионот.

Турските медиуми наведуваат дека експлозијата била предизвикана од автомобил бомба, а мета на нападот бил автобусот со припадници на полицијата за разбивање демонстрации.

Експлозиите одекнале два часа по завршување на натпреварот помеѓу фудбалските клубови „Бешикташ“ и „Бурсаспор“.

Засега нема информации за загинати, а најверојатно најголем дел од повредените се полицајци.


Борисов предупреди дека е можен терористички напад по немирите во бегалскиот камп


Софија, 25 ноември, 2016 - 15:48 (META) 

Состојбата во бегалскиот камп во Харманли на југот на Бугарија се нормализира по безредијата и немирите, кои избувнаа вчера и продолжија во текот на ноќта. Повеќе од 400 мигранти се задржани во притвор поради вандалско однесување, а во нередите се повредени 24 полицајци, од кои најтешко настраданиот има скршеница на раката.

Од Министерството за внатрешни работи на Бугарија соопштија дека се формирани две предсудски постапки за лицата кои учествувале во нередите.

Бугарскиот премиер во оставка, Бојко Борисов, кој ноќеска за време на немирите пристигна во бегалскиот камп, соопшти дека против сите што учествувале во безредијата ќе бидат поднесени обвиненија.

Тој повика и предупреди да се внимава на повиците за напади и на она што се објавува на социјалните мрежи бидејќи вакви настани вообичаено се проследени со терористички напади.

„Обично, онаму каде што има зголемување на насилствата, секогаш има и терористички акт, секогаш се активираат ќелиите со спијачи… Мрежите на Исламска држава многу внимателно го следат „Фејсбук“ и она што излегува во медиумите. Таквите, кои се прават големи херои, треба да знаат дека со вакво поведение можат да изложат на ризик огромен дел од населението“, изјави премиерот во оставка.

Претседателката на Агенцијата за бегалци, Петја Прванова, истакна дека најверојатно постои поврзаност меѓу мигрантските протести во Бугарија со оние во камповите во другите европски земји.

„Кога се запали кампот во Кале (Франција), инциденти имаше и во Харманли, кога имаше инцидент во Германија, имаше и тука. Вчера се запали камп на островот Лезбос, сега и тука. Очигледно има врска меѓу овие настани“, изјави Прванова за БТВ.

Немирите во кампот во Харманли биле предизвикани главно од мигранти од Авганистан.

„Групи Авганистанци тепаа Сиријци, за да излезат да се бунтуваат“, изјави Борисов.

Според него, постои можност бунтот да е организиран од надвор. Како аргумент за ова, тој го посочи фактот дека самите мигранти преку мобилни телефони пуштале снимки на социјалните мрежи.

Во декември треба да почне екстрадицијата, односно враќањето назад во нивната земја, на мигрантите од Авганистан. Како што соопшти Борисов, веќе бил нарачан авион од Кабул, а летот е организиран од бугарските власти во координација со Европската агенција за гранична и крајбрежна заштита.

По нередите, кампот во Хармални е целосно оштетен. Нанесена е сериозна материјална штета, а според зборовите на Борисов, не е останат ниту еден здрав прозорец.

Во моментов во центарот во Хармални има околу 2.700 лица, кои се разделени и групирани според нивната националост за да не дојде до нови судири. Во кампот има околу 600 деца и од 400 до 500 жени, кои, како што соопшти Прванова, се сместени на безбедно.


Авганистанските талибанци убија осум полицајци


Кабул, 18 ноември, 2016 - 13:24 (META) 

Осум авганистански полицајци загинаа во напад на талибанците во провинцијата Фарах, изјави портпарол на локалните власти, Мухамед Насер Мехри.

Нападот се случил околу полноќ во округот Баква, на западот на Авганистан, кога врз полициски конвој е отворен оган.

Талибанските бунтовници го нападнале конвојот од различни страни, а нападот е запрен откако пристигнало засилување.

Портпаролот на талибанците, Кари Јусуф Ахмади, ја презеде одговорноста и додаде дека бунтовниците заплениле поголемо количество оружје и муниција.

Талибанците во изминатите месеци ги засилија нападите врз авганистанските безбедносни сили, подметнувајќи бомби на патиштата, изведувајќи самоубиствени бомбашки напади или напади од заседа врз воени или цивилни конвои.


Австриски полицајци на српско-македонската граница


Виена, 12 август, 2016 - 15:56 (META) 

Српскиот министер за внатрешни работи, Небојша Стефановиќ денеска во Виена соопшти дека со премиерот Александар Вучиќ и канцеларот на Австрија Кристијан Керн договориле дел од австриските војници да бидат распоредени на српско-македонската граница.

– Сакаме да ги спречиме илегалните преминувања и да испратиме јасен сигнал дека такви работи нема да дозволиме. Затоа и подлабоко на наша територија ќе продолжиме да се бориме против криумчарите. Побаравме помош и во вид на термовизуелни камери и сензори со кои би можеле подобро да го заштитиме нашиот граничен појас – рече Стефановиќ.

Тој рече дека мигрантската криза и спречувањето на илегалните минувања била тема на разговорите и со претставниците на австриското министерство за внатрешни работи, предводени од шефот на Сојузната криминалистичка служба, Франц Ланг.


Двајца полицајци нападнати со мачета во Белгија


Шарлероа, 6 август, 2016 - 17:59 (META) 

Двајца полициски службеници биле повредени откако напаѓач се нафрлил врз нив со мачета во белгискиот град Шарлероа, јавува „Би-би-си“.

Напаѓачот бил застрелан и ранет од полицијата, објави полицијата во Шарлероа на „Твитер“.

Тој, според информациите, извикувал „Алаху Акбар“ (Господ е голем, на Арапски) за време на нападот кој се случил пред главната полициска станица во градот.

Областа околу местото на нападот веднаш била запечатена од полицијата.


Сè помал интерес за професијата полицаец


Скопје, 4 август, 2016 - 15:47 (META) 

Вчера почна селекцијата на кандидатите што се пријавиле на огласот на Министерството за внатрешни работи за пополнување на своите редови со нови 600 полицајци. На конкурсот, кој беше распишан на 15 јули и траеше до 30 јули, се пријавија 3.972 кандидати.

kandidati za policajci 2

Ако се погледнат бројките на пријавени кандидати на конкурсите на МВР од претходните неколку години, впечатокот е дека се намалува интересот за оваа професија.

Имено, на огласот за прием на нови 300 полицајци во 2012 година, се пријавиле дури 7.597 кандидати.

На конкурсот една година подоцна, за нецели две недели се пријавиле 5.491 кандидат.

Лани, за место меѓу новите 600 полицајци, колку што се бараа на огласот, беа пријавени 2.622 кандидати.