!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Вајгл: Процесот „Жан Моне“ не е замена или продолжување на Договорот од Пржино


Скопје, 10 ноември, 2017 - 13:36 (META) 

Последната недела на јануари следната година, претставници на политичките партии, европратеници, експерти од ЕУ, заедно со еврокомесарот за проширување и добрососедска политика Јоханес Хан и претставници на францускиот Парламент и на француската влада, во Париз ќе го почнат процесот на меѓусебен дијалог за важни прашања насловен како „Жан Моне“, информираше денеска известувачот на Европскиот парламент за Македонија, европратеникот Иво Вајгл.

Тој потенцираше дека ова нема да значи замена или продолжување на „Договорот од Пржино“, кој ќе остане ист, ниту пак значи промена на препораките од експертот Рајнхард Прибе.

– „Жан Моне“ е можност за интеракција на европскиот со македонскиот парламент и ќе даде можност за отворена дебата, но без присутност на јавноста и медиумите. Охрабрен сум од атмосферата што ја имав на средбите во Скопје со координаторите на пратеничките групи, кај кои преовладува духот на соработка, меѓусебна почит и волја да се работи во интерес на граѓаните – рече Вајгл.

Тој потенцираше дека првата средба ќе биде во куќата на Жан Моне во Париз, која е симбол за интеграција, но другите средби ќе бидат или во Македонија или во други земји на ЕУ. Вајгл информираше дека, по иницијатива на претседателот на Собранието, Талат Џафери, првата тема ќе бидат процедурите во Собранието и етичкиот кодекс на претставниците во Парламентот, но ќе се зборува и за владеење на правото.

Европратеникот потенцираше дека процесот „Жан Моне“ не значи решавање на проблемите, туку дека тие ќе се решаваат во законодавниот дом на Македонија, кој е суверена институција.

Вајгл изрази надеж дека политичките партии ќе го имаат интересот на државата во прв план и дека ќе се вклучат во конструктивен дијалог во интерес на граѓаните.

Собранискиот спикер, Џафери, од друга страна, кратко рече дека овој процес треба да придонесе следниот извештај од Европската комисија да биде позитивен и да ги започне процесите на патот на македонската евроинтеграција.


ДИК ќе одлучува за прегласување на избирачко место во Чаир


Скопје, 6 ноември, 2017 - 15:06 (META) 

Државната изборна комисија (ДИК) на денешната седница, закажана за 16 часот, треба да го разгледа и да го усвои решението на Управниот суд за повторување на гласањето на избирачкото место 2901 во општина Чаир, од вториот круг на локалните избори, одржан на 29 октомври.

Инаку, повтореното гласање на ова избирачко место во Чаир може да влијае на конечниот резултат од изборите во оваа општина, односно да го одреди новиот градоначалник на општината.

Разликата во Чаир меѓу Висар Ганиу од ДУИ и Зекирија Ибраими од Беса во вториот круг од изборите беше 209 гласа, во прилог на Ганиу, а на избирачкото место 2901 разликата е 66 гласа. На ова избирачко место вкупно се запишани 719 гласачи.

Управниот суд претходно ги одби другите 15 тужби што политичките партии ги поднесоа по вториот круг од локалните избори. Најмногу тужби против одлуките на ДИК до судот поднесе Алијанса за Албанците – вкупно 11, четири поднесе Беса, а една тужба поднесе Народното движење за Македонија (НДМ).


Судот прифати една тужба на ВМРО-ДПМНЕ за Сарај, ДИК ќе каже дали ќе има прегласување


Скопје, 24 октомври, 2017 - 11:03 (META) 

Управниот суд уважи една жалба од 28-те поднесени тужби против приговорите одбиени од Државната изборна комисија (ДИК) за гласањето и за сумирањето на резултатите од првиот круг од локалните избори што се одржа на 15 октомври.

Управниот суд ги објави одлуките по сите тужби од партиите на својата веб-страница, според кои уважена е една тужба поднесена од коалицијата предводена од ВМРО-ДПМНЕ за поништување на гласање на избори за членови на Советот на Град Скопје, на гласачкото место 2461 во општина Сарај.

Сите други тужби Управниот суд ги одбил како неосновани.

Инаку, тужби до Управниот суд за одбиените приговори од ДИК поднесоа ВМРО-ДПМНЕ, вкупно 24, а по една – ТМРО, Левица и Алијанса за Албанците.

По добивање на одлуката од Управниот суд, ДИК треба да се изјасни дали прегласувањето во избирачкото место 2461 во Сарај ќе има влијание врз изборниот резултат и дали врз основа на тоа ќе има прегласување на ова избирачко место.

Одлуките на Управниот суд се конечни.

По тужбите на партиите одлучуваа пет судечки совети, секој составен од пет судии, избрани со жрепка. Управниот суд објави дел од одлуките во текот на вчерашниот ден, но поради проблеми со компјутерскиот систем, како што беше соопштено од судот, другите 12 одлуки беа објавени ноќеска.

Вториот круг од локланите избори за градоначалници во 35 општини ќе се оджри в недела, на 29 октомври.


ДИК го проби рокот за одлучување, досега решени само седум приговори


Скопје, 19 октомври, 2017 - 21:50 (META) 

Државната изборна комисија го проби рокот од 48 часа за разгледување и одлучување по приговорите од политичките партии за изборите, кое требаше да заврши вечерва во 19 часот.

Ова, во текот на седницата, која сè уште е во тек и на која има жестоки расправии меѓу членовите од СДСМ и од ВМРО-ДПМНЕ, го спомена и претседателот на Комисијата, Александар Чичаковски, како и членот на ДИК од СДСМ, Игор Милев.

Во моментов се пребројуваат ливчиња од гласачко место во Чаир за да се утврди дали се 406 или 409, во врска со приговорот од ВМРО-ДПМНЕ за поголем број ливчиња во гласачката кутија од бројот на запишани избирачи.

Претходно ДИК отфрли уште два приговори од ВМРО-ДПМНЕ за две избирачки места во Кривогашатни и за едно изборачко место во Аеродром. И во овие два приговори, како и во претходните, се повторуваше грешката со локацијата на избирачките места, односно наместо за избирачки места во општина Кривогаштани и во општина Аеродром беше наведена општина Прилеп.

Комисијата ќе чека да пристигне и општинска изборна комисија од Струга за да објасни зошто не е забележано дека на едно избирачко место гласал граѓанин што не бил во избирачкиот список и не се потпишал во него.

Од вкупно 43 приговори, ДИК на денешната седница досега успеа да разгледа само десет, сите од ВМРО-ДПМНЕ. Од нив отфрли седум, а постапката за трите приговори сè уште е во тек.

За разгледување остануваат уште 30 приговори на ВМРО-ДПМНЕ и по еден од ТМРО, Алијанса за Албанците и на Левица.


ААВМУ: Медиумите имале генерално еднаков третман на партиите во првиот изборен круг


Скопје, 19 октомври, 2017 - 17:35 (META) 

Програмските сервиси на државно ниво, опфатени со надзорот на Агенцијата за аудио и аудиовизуелни медиумски услуги (ААВМУ), во првиот круг од локалните избори „генерално обезбедиле еднакви услови за пристап до сите облици на изборно медиумско претставување“, соопшти денеска Агенцијата.

Голем дел од нив, се вели во соопштението, вложиле напори да организираат и дебатни соочувања на учесниците на изборите. Во овој контекст, од Агенцијата забележуваат дека дел од кандидатите учествувале во посебни информативни емисии кај едни медиуми, а не одговориле на поканите на други медиуми.

„Јавниот радиодифузен сервис и Собранискиот канал ги исполнија обврските да обезбедат бесплатно политичко претставување, кое учесниците во изборната кампања го искористија со различен интензитет. Карактеристично е што партиите на Албанците во Македонија не ја искористија можноста за бесплатно претставување“, стои во соопштението.

Во последните девет дена од изборната кампања (од 5 до 13 октомври), радиофузерите што емитуваат програма на македонски јазик, според ААВМУ, во вестите биле фокусирани на известување за кампањите на двете коалиции кои имаа најголем број потврдени листи со кандидати за градоначалници и за советници – едната предводена од СДСМ, а другата од ВМРО ДПМНЕ.

„Радиодифузерите што емитуваат програма и на албански и на македонски јазик имаа квантитативно подобро воедначен пристап во известувањето. И едните и другите, квалитативно настојуваа да обезбедат еднаков третман. Во овој извештаен период не беше констатирано прекршување на барањето за правично, избалансирано и непристрасно покривање на изборите“, стои во соопштението на ААВМУ.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


„Цивил“ бара политичките партии, кандидатите и институциите да ги почитуваат законите


Скопје, 14 октомври, 2017 - 11:45 (META) 

Невладината организација „Цивил“ упати барање до политичките партии да го почитуваат Изборниот законик, Уставот и законите на Република Македонија, да го почитуваат изборниот молк и да ги сопрат евентуалните планови, ако такви постојат, за изборен поткуп, притисоци и за манипулација на гласачите.

„Бараме од родителите и од наставниот кадар да ги почитуваат децата и да ги остават надвор од политиката. Секој обид да се наруши изборниот молк и да се прекршат законите поврзани со изборниот процес, веднаш да бидат сопрени и санкционирани. Не смее да има толеранција за каков и да е притисок, закана или корупција (купување гласови). Бараме од Државната изборна комисија и ја охрабруваме да ги искористи сите свои законски ингеренции до максимум за да спроведе законит, демократски, фер и слободен изборен процес. Ингеренциите на ДИК се највисоки од сите досегашни состави на оваа институција и таа се наоѓа на врвот на изборниот процес. ДИК не мора да чека приговори и жалби, туку може да дејствува според сопствени наоди и мислење“, велат од невладината.

„Цивил“ ги повика граѓаните да гласаат слободно, според сопственото убедување, а оние кои нема да се најдат на Избирачкиот список, тоа да го пријават. Невладината организација апелираше до медиумите да бидат непристрасни и професионални, да бидат на висина на својата задача и да манифестираат максимална професионална и морална одговорност.


Жбогар и евроамбасадорите повикаа на избори без заплашување и без насилство


Скопје, 13 октомври, 2017 - 11:25 (META) 

Делегацијата на ЕУ и на амбасадите на земјите членки на ЕУ денеска порачаа дека локалните избори на 15 и на 29 октомври се можност за граѓаните да ги изразат своите гледишта за правецот во кој нивните општини треба да се движат во иднина.

„ЕУ ги охрабрува политичките лидери, нивните партии како и релевантните чинители да го искористат изборниот процес за да ја потврдат и да ја покажат својата посветеност на демократските вредности и владеење на правото. Ги повикуваме политичките лидери и партиските членови да овозможат одржување на избори без заплашување и насилство“, стои во заедничката изјава.

Делегацијата на ЕУ и амбасадите потсетуваат на важноста да се направи јасна поделба меѓу државните и партиските активности и ресурси пред, за време на изборите и по нив.

„Ги повикуваме медиумите да им обезбедат на граѓаните разновидно и објективно информирање, кое им е потребно за да донесат информирана одлука на денот на изборите. Ја подвлекуваме важноста од меѓународни набљудувачи на изборите, особено на ОБСЕ/ОДИХР. Секој глас е важен. Ги повикуваме сите граѓани да го исполнат своето демократско право на глас и на тој начин да ја обликуваат иднината на своите општини“, се вели во изјавата.


Чичаковски: Партиите веднаш да престанат со инцидентите


Скопје, 3 октомври, 2017 - 13:23 (META) 

Претседателот на Државната изборна комисија (ДИК), Александар Чичаковски, денеска упати апел до политичките партии итно да престанат со инциденти и порача дека насилството во предизборниот период може да донесе само штета на кандидатите, на партиите, на изборниот процес и на државата.

Чичаковски во името на ДИК остро ги осуди сите досегашни инциденти во пресрет на локалните избори, закажани за 15 октомври. Инцидентите, нагласи претседателот на ДИК, го нарушуваат демократскиот амбиент и изборниот процес и треба веднаш да престанат.

– Насилството никогаш не е решение. Тоа не му помага никому и може само да донесе штета на кандидатите, на партијата, на изборниот процес, на државата. Уште еднаш апелираме итно да престанат сите негативни појави, апелираме на почитување на противкандидатите и за фер и демократски избори. Изборите се добиваат на 15 октомври со јасно изразена волја на граѓаните, со голема излезност и со индивидуално право на секој граѓанин да гласа за оние кандидати кои смета дека се најдобри, а не со насилство – изјави претседателот на ДИК.

Чичаковски потсети дека кандидатите за градоначалници и за советници, како и политичките партии, потпишаа кодекс за фер и демократски избори, со што се обврзаа дека ќе ги почитуваат принципите на демократијата и на доброто владеење и дека ќе придонесуваат за демократски развој на општеството.

– Секое насилство, инцидент, непочитување на политичките опоненти во изборниот процес, е спротивно на кодексот, на законите, правилата и на прописите на Република Македонија кои се релевантни за изборите – рече Чичаковски.

Тој, во име на ДИК, ги повика надележните институции да ги расветлат инцидентите и да ги казнат сторителите, а политичките партии да придонесат кон смирување на страстите.


Хојт Ји: За интеграцијата во НАТО и во ЕУ е клучно да се утврди кој прислушувал


Скопје, 3 октомври, 2017 - 11:08 (META) 

Многу е важно да се утврди одговорноста за нелегалното прислушување и за наводните владини злоупотреби во врска со него, бидејќи тоа ќе биде клучен чекор за Македонија да ги увери НАТО и Европската Унија, како и другите меѓународни партнери, дека е подготвена да се интегрира во тие организации. Ова го истакна заменикот помошник државен секретар на САД, Хојт Брајан Ји, во интервју за емисијата „360 степени“ на „Алсат-М“.

– Тоа е важно и за граѓаните на земјата да се уверат дека е воспоставено владеење на правото. Ги повикуваме сите политички партии, политички и владини лидери, членовите на Собранието, да сторат сè што можат да биде спроведена правдата, СЈО да ја добие потребната поддршка за да си ја заврши работата и да нема политички притисок врз обвинителите и судиите од инволвираните во утврдување на одговорноста. Тоа треба да се направи во разумен рок и да не се одолжува – вели Хојт Ји.

Според него, клучно за државата е да се направат потребните реформи во судството, кои треба да овозможат независно судство, ослободено од политички притисок.

– Тоа е важно за граѓаните, за интеграцијата во НАТО и во ЕУ, но и за привлекување странски инвеститори – нагласува Ји.

Во врска со односите власт – опозиција, тој вели дека Македонија не може да си дозволи луксуз на постојани одложувања и опструкции од партиите. Според Хојт Ји, на секоја демократија ѝ е потребна силна влада, но и силна опозиција која нема само да блокира предлози со кои не се согласува, туку и ќе нуди алтернативи.

Тој во интервјуто се осврна и на влијанието на Русија во регионот на Западен Балкан. Според него, Македонија треба да се спротивстави на руското влијание и на дезинформациите што пристигнуваат од Москва.

– Гледаме дека Русија се обидува да ја обесхрабри интеграцијата на земјите од Западен Балкан во НАТО и во ЕУ. Важно е Македонија да работи со нас, со ЕУ и со партнерите во регионот, да продолжи да се противи на малигните влијанија од кој било извор, да продолжи да ја зајакнува независноста на медиумите, важно е да има силни, професионални, независни медиуми кои ќе се спротивстават на дезинформациите од Русија или други извори – изјави Хојт Ји.


АВМУ: МРТ небалансирана, „Нова“ и „Алфа“ известувале навивачки


Скопје, 1 октомври, 2017 - 20:10 (META) 

Агенцијата за аудио и аудиовизуелни медиумски услуги го објави најновиот извештај од надзорот на медиумското известување, кој го опфаќа периодот пред почетокот на изборната кампања, односно 16 до 24 септември 2017 година. Во него се забележува дека некои телевизии не го спроведувале новинарскиот принцип за известување, туку се однесувале навивачки.

Во извештајот на АВМУ првин се забележува дека поради извештаите за учеството на Генералното собрание на ООН, како и извештаите за отчетите на одделни министерства, во тој период на анализата ја прават македонската влада меѓу најзастапените теми во централните изданија на радио и на телевизиските дневници. Втора по застапеност била парламентарната расправа во врска со предлог-законот за употребата на јазиците.

Потоа се посочуваат проблемите со непристрасното информирање.

„И во овој извештаен период, МРТ 1 не ја следеше одредбата од своите правила за медиумско покривање на локалните избори 2017, според која во вестите до почетокот на изборната кампања треба да обезбеди избалансираност во известувањето за активностите на политичките партии од власта и од опозицијата што се претставени во Собранието на Република Македонија“, се вели во најновиот извештај на АВМУ.

Сепак, како најголеми проблеми се посочени ТВ „Нова“ и ТВ „Алфа“, кои биле насочени главно кон информирање за активностите на најголемата опозициска партија, а се одбележува и сериозен прекршок на „Радио Слободна Македонија“.

„ТВ „Нова“ и ТВ „Алфа“, иако со помал обем од претходните извештајни периоди, останаа фокусирани на информациите за активностите, ставовите и за реакциите на најголемата опозициска партија. „Радио Слободна Македонија“ повторно ја репризираше емисијата „Земјо Македонска“, која изобилува со вулгарен и со непристоен речник, односно е во спротивност со професионалното начело за негување и за развој на хуманите и на моралните вредности на човекот и за заштита на приватноста и на достоинството на личноста“, се вели во новиот извештај на АВМУ.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ – Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка од „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.