!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев до Марковиќ: Приемот на Црна Гора во НАТО е силна мотивација за новата влада


Скопје, 6 јуни, 2017 - 13:14 (META) 

Премиерот Зоран Заев испрати честитка до премиерот на Црна Гора, Душко Марковиќ, за приемот на Црна Гора во Северноатлантската алијанса (НАТО).

„Овој сигнал на отворени врати на Алијансата е силна мотивација за новата влада на Република Македонија да продолжи да работи според демократските вредности и владеењето на правото, вложувајќи во потребната модернизација на Армијата според стандардите на НАТО, за во најкус можен рок да ја обезбеди атлантската иднина и на Република Македонија“, се вели во честитката на Заев.

Во честитката се додава дека примерот што го дава Црна Гора е порака дека ако има политичка волја и граѓанска свест за важноста на потребните реформски процеси, тогаш нивното исполнување се реализира со потребната динамика и тоа ги отвора перспективите и за луѓето и за државата.

„НАТО е, пред сè, сојуз на демократии и граѓаните на Македонија, на Црна Гора и на целиот регион имаат потреба да бидат дел од цивилизираниот свет што носи стабилност и безбедност“, се додава во честитката.


Хан на „Принстон“: Мораме да видиме политичка волја наместо политички игри


Њу Џерси, 21 април, 2017 - 17:00 (META) 

Наместо политички игри, мораме да видиме политичка волја и вистински реформи, не на хартија туку на терен, особено во клучните области како владеење на правото, конкуретноста и поврзувањето. Ова е пораката на еврокомесарот за проширување и за добрососедска политика, Јоханес Хан, до земјите од Западен Балкан, вклучително и до Македонија, што тој ја нагласува во својот говор на Универзитетот „Принстон“ во САД, на тема „Европа и кризите во нејзиното соседство“.

Хан вели дека работата на Еврпската Унија на Западен Балкан сè уште не е завршена и дека од витално значаење е задржувањето на веродостојна перспектива за членство на регионот во ЕУ, како сидро за стратешка стабилност и за реформи.

– Истовремено, проширувањето не е бесплатен ручек. Само локалните лидери може да ја завршат работата и да им ја испорачаат на своите граѓани. Ние мораме да видиме политичка волја наместо политички игри. Мораме да видиме вистински реформи, не на хартија туку на терен, особено во клучните области на владеење на правото, конкурентноста и на поврзувањето. Тоа може да го загрози бизнис-моделот на некои индивидуи, но стратешки не постои друга алтернатива. Нивните граѓани го знаат тоа – вели Хан.

Еврокомесарот нагласува дека доколку ЕУ стане колеблива на Балканот, некој друг може да влета во него, додавајќи дека тој некој, всушност, веќе се обидува да го направи тоа.

– Во таа смисла, проширувањето на ЕУ, со сите услови и критериуми, е најдобрата безбедносна политика што ЕУ некогаш ја имала. Само замислете каде ќе беше Полска, Балтикот или другите денеска ако не го искористевме временскиот прозорец во 1990-тите години – нагласува Хан.

Хан во својот говор зборува и за кризите во Источна Европа, Сирија и во Турција.

– Се плашам дека достигнавме до точка од која нема враќање со Анкара. Таму повеќе не може да работиме по старо, односно ние да се преправаме дека им веруваме на нивните заложби за членство во ЕУ, додека случувањата на терен го кажуваат спротивното, за жал – вели еврокомесарот за проширување и за добрососедска политика.