!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Алтхаузер: Кризата трае долго и е длабока, очекуваме формирање функционална влада


Скопје, 27 април, 2017 - 12:52 (META) 

Меѓународната заедница очекува формирање функционална влада која ќе се посвети на спроведување на итните реформи за евроинтеграциите, истакна германската амбасадорка Кристине Алтхаузер на Меѓународната конференција „Добри практики за обука во земјите членки на ЕУ“, која се одржа во Секретаријатот за европски прашања.

– Кризата во Македонија трае долго и е длабока. Поминаа четири месеци од изборите, па сите, и меѓународната заедница очекуваат да се формира влада, но прво треба да се избере спикер во Собранието. Приоритет во процесот на пристапување кон ЕУ се реформите, кои треба интензивно да се спроведуваат, а за тоа е потребна функционална влада. Тоа е она што го чекаме – рече Алхаузер, одговарајќи на новинарско прашање.

Според вицепремиерот за евроинтеграции, Арбер Адеми, кризата трае предолго и од политичка прерасна во институционална криза.

– Очекуваме да се најде решение за кризата, бидејќи проектите и реформите мора да се реализираат. Политичката криза мора да се реши, а институциите да профункционираат оти нема друга алтернатива – рече Адеми.


СДСМ: Груевски мора да престане да им се одмаздува на граѓаните


Скопје, 27 април, 2017 - 9:45 (META) 

Демократските процеси мора да продолжат така како што е предвидено во Уставот, деловникот на Собранието и со законите, се вели во редовното утринско соопштение од СДСМ.

„Затоа Никола Груевски мора да престане да им се одмаздува на граѓаните и да ги вознемирува со непостоечки теми само затоа тоа што тие избраа нова власт во Македонија, а тој да замине во опозиција. На сите им е јасно дека постои програма на новата реформска влада, која ја гарантира унитарноста на државата, обезбедува квалитетен живот за граѓаните и во која не постои никаква промена на државните симболи“, стои во соопштението.

Од партијата наведуваат дека парламентарното мнозинство има обврска и должност да ги заштити граѓаните и државата и дека за секое евентуално попречување на мнозинската волја на граѓаните, ќе следува одговорност.


Жбогар: Најдобро е дијалогот на лидерите да биде во Собранието


Штип, 26 април, 2017 - 15:29 (META) 

Не е задача на дипломатите да кажат кои се излезите од сегашната ситуација во Македонија, тоа е задача за домашните политичари, рече евроамбасадорот Самуел Жбогар за време на посетата на Штип.

На прашање како ги коментира повиците за одржување лидерска средба, евроамбасадорот порача дека дијалогот меѓу партиите треба да се одвива во институциите.

– Сметам дека секогаш е добро лидерите да комуницираат, нормално е тие да имаат контакти. Парламентот заседава и сметам дека таму имаат многу шанси за да дискутираат за проблемите. Сепак, би истакнал дека за нормално функционирање на државата, важно е да постои дијалог во институциите и да се гради авторитетот на институциите. Собранието е една од тие институции, а дијалогот меѓу партиите треба да се одвива таму – рече Жбогар.


Хојт Ји барал средба со Иванов, но претседателот е презафатен


Скопје, 26 април, 2017 - 12:05 (META) 

Заменик-помошникот државен секретар за Европа и за Евроазија во Стејт департментот, Хојт Брајан Ји, в понеделник нема да се сретне со претседателот Ѓорге Иванов, потврдија за „Мета“ од кабинетот на претседателот.

„До кабинетот на Претседателот на Република Македонија беше упатено барање за средба со заменик-помошникот државен секретар за Европа и за Евроазија во Стејт департментот, Хојт Брајан Ји, но со оглед на претходно утврдените обврски на претседателот на Република Македонија, Ѓорге Иванов, нема можност за реализација на таква средба“, велат во кабинетот.

Посетата на Ји доаѓа речиси два месеци откако тој од Загреб го повика Иванов да ја ревидира одлуката за доделување на мандатот.

– Искрено се надеваме дека македонскиот претседател ќе им овозможи на пратениците што изразија желба за тоа и на партиите што тие ги претставуваат да формира влада што е можно поскоро, бидејќи на Македонија ѝ треба влада која ќе ги продолжи и ќе ги доврши почнатите процеси во рамки на претпристапниот процес на Европската Унија – изјави Ји во Загреб.

Ји в понеделник ќе се обиде да помогне во надминувањето на политичката криза. Тој за време на еднодневната посета ќе разговара со политичките лидери за статусот на формирањето нова влада, за билатералните односи, како и за неопходните реформи за евроатлантска интеграција на земјава.


СДСМ: Неразумната блокада на Собранието ѝ нанесува штета на целата држава


Скопје, 26 април, 2017 - 10:10 (META) 

Никола Груевски и ВМРО-ДПМНЕ дури и од опозиција имаат одговорност да не им штетат на државните и на граѓанските интереси, вели СДСМ во денешното утринско соопштение.

„Граѓански интерес е земјоделците да си ги добијат заостанатите субвенции што им ги попречи досегашната власт во заминување. Да добијат обесштетување за штетите од временските непогоди. Вработените во општините, училиштата, градинките, културните установи, другите општински установи да не останат без плата, а привремено ангажираните без надоместоци“, велат од СДСМ.

Од партијата истакнуваат дека ако продолжи блокадата на парламентот уште три недели, на 15 мај ќе престанат надлежностите на градоначалниците и на советите, а со тоа ќе се блокира исплатата на плати и на надоместоци, бидејќи нови локални избори не може да се распишат без нов претседател на Собранието.

„Неразумната блокада на Собранието што ја спроведуваат пратениците од ВМРО-ДПМНЕ, Трајко Вељаноски, Ѓорге Иванов, ја блокира целата држава и остава простор да се реализираат сценаријата на етнички провокации од страна на Никола Груевски. И сето тоа поради стравот од соочување со одговорност на Груевски и на раководството на ВМРО-ДПМНЕ за сторениот криминал и злоупотреби. Тоа е директно нанесување штета на стабилноста на државата и тешко протиувуставно казниво дело“, велат од СДСМ и ги го повикуваат институциите и вработените во нив да застанат во одбрана на демократските процеси, Уставот и на законите.


Хојт Ји на 1 мај доаѓа во Скопје на средба со политичките лидери


Скопје, 25 април, 2017 - 21:17 (META) 

Заменик-помошникот државен секретар за Европа и за Евроазија во американскиот Стејт департмент, Хојт Брајан Ји, в понеделник ќе допатува во Македонија во обид да помогне во надминувањето на политичката криза.

Ји, како што соопштија од Амбасадата на САД во Скопје, за време на посетата ќе разговара со политичките лидери за статусот на формирање нова влада, за билатералните односи, како и за неопходните реформи на евроатлантските интеграции.

Засега нема информации дали американскиот дипломат ќе има средба и со претседателот Ѓорге Иванов.

Заменик-помошникот државен секретар на САД во март, за време на посетата на Загреб, изрази загриженост за ситуацијата во Македонија и го повика претседателот Иванов да го додели мандатот за формирање влада.

– Искрено се надеваме дека македонскиот претседател ќе им овозможи на пратениците кои изразија желба за тоа и на партиите што тие ги претставуваат да формира влада што е можно поскоро, бидејќи на Македонија ѝ треба влада која ќе ги продолжи и ќе ги доврши почнатите процеси во рамки на претпристапниот процес на Европската Унија – изјави Ји во Загреб.


Груевски на амбасадорите им рекол дека изборите се најбрз начин за излез од кризата


Скопје, 25 април, 2017 - 19:17 (META) 

Претседателот на ВМРО-ДПМНЕ, Никола Груевски, денеска со амбасадорите на Германија, Велика Британија, Шведска и на Холандија, Кристине Алтхаузер, Чарлс Гарет, Матс Стафансон и Ваутер Пломп, разговарал за актуелната политичка состојба, за позициите и за ставовите на ВМРО-ДПМНЕ во однос на нејзино надминување.

На средбата, на која присуствувале и членовите на извршниот комитет на партијата, Никола Попоски, Никола Тодоров и Владимир Ѓорчев, Груевски на амбасадорите им соопштил дека „најдобар и најбрз начин да се излезе од политичката криза е спроведување на предвремени парламентарни избори заедно со редовните локални избори“.

Во однос на дебатата во Собранието, од ВМРО-ДПМНЕ било истакнато дека партијата ги користи сите законски и деловнички можности за искажување на сопствените ставови и позиции.

„Ништо нема незаконски и нема ништо што досега не се случило во минатото во Македонија, низ Европа и во светот, практично тоа е начинот на кој ВМРО-ДПМНЕ го изразува револтот од прифаќањето и од наметнувањето на тиранската платформа“, стои во соопштението.

ВМРО-ДПМНЕ ги информирал амбасадорите дека во јануари, за време на разговорите со ДУИ за коалицирање, партијата истакнала дека нема да преговара за албанската платформа и оти потоа разговорите се фокусирале на унапредување на користењето на јазиците на немнозинските заедници во општините каде тие се повеќе од 20 отсто.

Од партијата нагласиле дека „е потребен дијалог и дебата, во рамките на институциите за поместување на работите, и организирање избори за излез од кризата“.

Претходно, амбасадорската четврока на 19 април имаше средба со лидерот на СДСМ, Зоран Заев.


ВМРО-ДПМНЕ го обвини СДСМ дека со молчењето ги крши демократските принципи


Скопје, 25 април, 2017 - 18:05 (META) 

И денешното осумнаесетто продолжение на конститутивната седница на Собранието не успеа да се помести од мртва точка. Наместо да се дебатира за избор на членови на Комисијата за избори и за именувања, се разговараше за таканаречената „тиранска платформа“, за која пратениците од ВМРО-ДПМНЕ повторно бараа одговори од СДСМ.

Пратеникот Илија Димовски од говорницата порача дека дебатата е еден од двата клучни принципа на демократијата, но дека СДСМ одбива да дебатира.

– Демократијата подразбира два принципи, а изборот на Комисијата за избори и за именувања и сите други процеси се поврзани со тие два принципи, а тоа се почитување на резултатот и дебата. Требаше СДСМ да излезе и да честита дека ВМРО-ДПМНЕ е победник на овие избори. Освен тоа, сè додека не почна работата со Собранието, полна им беше устата дека треба да се дебатира. Што гледаме последните денови? Дека се молчи. Не добиваме одговор на прашањата што се поставуваат тука. Ова не е ништо друго освен непочитување на основните принципи на демократијата – рече Димовски.

Пратеникот на ДУИ, Ејуп Алими, ги повика пратениците да се придржуваат до точките кои се наоѓаат на дневниот ред и да не ја злоупотребуваат говорницата за одвлекување на вниманието и за напаѓање на соседни земји за мешање во внатрешните работи.

– Гледам дека оваа говорница се злоупотребува од некои колеги. Би побарал од вас да ја почитувате Албанија како соседна држава која е пријателска држава, која има придонесено за мирот и за демократизацијата на Македонија. Затоа да се вратиме на реалните проблеми што ги имаме во државата. Тука се зборува за сè што ќе им текне, за нешто што не е на дневен ред. Има нефункционални општини, нефункционално собрание и техничка влада и не сакам да поверувам дека еден ден ќе има техничка држава. Исто така, треба да ги слушаме и советите на меѓународниот фактор или ќе бараме нивна помош само кога ни е празна касата? – рече Алими.

Максим Димитриевски од СДСМ го обвини претседавачот со конститутивната седницата, поранешниот собраниски спикер Трајко Вељаноски, за кршење на деловникот и порача дека е време граѓаните да си ја земат државата во сопствени раце.

– Нека се појави тука Никола Груевски, да нè погледне в очи и да каже кој ја измисли платформата која веќе со недели ги одржува на власт на кристални нозе – рече Димитриевски, додавајќи дека дебата што се води во Собранието е бесполезна.

Вељаноски реплицираше дека тој не ги крши точките од деловникот и дека ниту се пријавил за збор.

– За ефикасноста на дебатата не може да одлучи еден пратеник за останатите, најдобро може да оцени јавноста и тоа на избори – рече Вељаноски.

На тоа се надоврза и Илија Димовски, кој истакна дека обидите да се прекине дебатата се само доказ дека на СДСМ само им е важно да дојдат на власт.

– Се сложувам со пратеникот Димитриев, народот треба да ја земе државата во сопствени раце, на нови избори – рече Димовски.

Претседавачот со конститутивната седница, поранешниот спикер Трајко Вељаноски, и денеска во 18 часот ја прекина седницата и го закажа нејзиното продолжение за утре во 11 часот.


Наместо нови избори – нова влада, порачаа Пломп, Стефансон и Јазбец


Скопје, 25 април, 2017 - 16:45 (META) 

Амбасадорите на Шведска, на Холандија и на Словенија, Матс Стефансон, Ваутер Пломп и Милан Јазбец, денеска порачаа дека Брисел не гледа потреба за одржување на нови предвремени парламентарни избори, особено зашто последните биле оценети како фер и слободни, а новите избори би значеле само продлабочување на политичката криза во Македонија.

– Изборите што се одржаа во декември беа слободни и фер, како што потврдија многубројните меѓународни набљудувачи. Затоа би имало многу малку корист од нови избори толку бргу по изборите во декември. Сметам дека само ќе ја продолжат кризата, која веќе долго трае – рече холандскиот амбасадор Пломп.

Според шведскиот амбасадор, новите избори може да доведат до дестабилизирање на Македонија, поради што решението треба да се најде во Уставот.

– Нови избори во ваква ситуација би се одржале во клима на екстремна конфронтација, што не е добро за стабилноста. Решението треба да се бара во Уставот. Мислам дека е прерано и за „Пржино 3“ и не сум чул дека за тоа се разговара. За лидерски средби, немам инсајдерски информации, но во ситуација на таква конфронтирачка политичка клима во Македонија, дијалог меѓу опозицијата и владата не е лоша идеја, но тие треба да решат – рече амбасадорот Стефансон.

Словенечкиот амбасадор Милан Јазбец порача дека наместо да се бараат нови избори, политичките лидери треба да се фокусираат на спроведување на резултатите од изборите и на избор на нова влада.

– Фокусирајте се на суштината, обидете се да формирате влада, според односите во парламентот, не гледам потреба за нови избори – рече амбасадорот Јазбец.

Амбасадорите, сепак, не ја потврдија информацијата на германскиот неделник „Шпигел“, дека Европската Унија планира да воведе санкции за Македонија, односно да стави забрана за патување и за блокада на сметките на одредени македонски политичари, како и да ги скрати претпристапните ИПА-фондови. Според неделникот, германската канцеларка Ангела Меркел, наводно, за време на конференцијата на ЕПП во Малта, го предупредила лидерот на ВМРО-ДПМНЕ, Никола Груевски, дека ќе следат санкции доколку не престане блокадата на демократските процеси.

За донесување ваква одлука, потребен е консензус од сите 27 земји членки на ЕУ.


СДСМ: Нема да има нови парламентарни избори


Скопје, 25 април, 2017 - 15:37 (META) 

Ќе биде избран нов претседател на Собранието, кој ќе отвори пат за избор на новата реформска влада, реагира СДСМ на изјавата на лидерот на ВМРО-ДПМНЕ, Никола Груевски, дека брзи парламентарни и локални избори се решение на кризата.

Од партијата наведуваат дека нови парламентарни избори нема да има и дека Груевски не е фактор, туку граѓаните.

„И не е точно дека неколкуте стотини граѓани, кои сè потешко излегуваат на нарачаните протести во одбрана на криминалната платформа на Груевски и на фамилијата, го промениле ставот за измислената платформа. Груевски сфати дека не може да се вози повеќе на таа апсурдна проѕирна лага, затоа што единствениот реален документ што постои е програмата на новата реформска влада, позната на целата домашна јавност и на цел свет. Во неа нема ни промена на химна, знаме, грб, банкноти, име, ниту пак штети врз македонскиот јазик како службен јазик во Република Македонија. Содржината на програмата е јавно достапна“, велат од СДСМ и додаваат дека предвремените избори му се потребни единствено на Груевски, за да ја продолжи политичката криза.

Од партијата наведуваат дека Груевски мора да престане да го уценува трансферот на власта со насилство и да ја прифати реалноста дека ВМРО-ДПМНЕ е опозиција.