Еден уапсен признал вина за кражбата на податоци на германски политичари


Берлин, 8 јануари, 2019 - 14:54 (META) 

Уапсениот 20-годишник, кој се сомничи за кражбата на податоци и разговори на стотици политичари во Германија, која беше откриена, ја признал вината, пишува германски „Шпигл“ на својата веб-страница.

Истражител од канцеларијата на Федералната криминалистичка полиција (БКА), која се занимава со овој, еден од најголемите досега, хакерски напади во историјата на Германија, рекол дека уапсениот рекол оти не бил свесен за сите последици на својата постапка и засега нема потврда дека бил поврзан со странски разузнавачки служби.

Полицијата соопшти само дека е пребаран станот на 20-годишникот не изнесувајќи други податоци.

Во овој случај што беше обелоденет во четвртокот, украдени се лични податоци и записи од разговори на околу 1.000 луѓе, од кои огромен број политичари од сите германски парламентарни партии освен од ултрадесничарската „Алтернатива за Германија“.


Хакери објавија разговори и лични податоци на Меркел и стотици германски политичари


Берлин, 4 јануари, 2019 - 15:43 (META) 

Германија врие од вчера, кога беше откриено протекувањето во јавноста на лични податоци и различни комуникации на германската канцеларка Ангела Меркел и на стотици политичари.

Материјалите, објавени на интернет, биле поставувани во изминативе две седмици од Твитер-корисникот ‘G0d’, кој вели дека се наоѓа во Хамбург, а според неговиот блог, станува збор за истражувач на ИКТ-безбедност.

Материјалите содржат и лични и партиски податоци, вклучувајќи тука електронски адреси, броеви на мобилните телефони, фотографии или снимки на лични карти, трансакции со дебитни картички, податоци за кредитни картички, разговори со членови на семејствата и разговори во рамките на партиите.

Интересен момент во скандалот е дека се објавени податоци од припадници на сите парламентарни партии освен од крајно десната Алтернатива за Германијa, што, според некои аналитичари, можеби сигнализира за мотивацијата на сторителите на хакерските упади.

Во моментов се прават опсежни анализи за тоа како се правени упадите и кражбите, а засега се знае дека во најголемиот скандал од овој вид во Германија досега, не се објавени политички чуствителни информации.

Протекувањето го истражува германската агенција за безбедност БСИ, а во објавените податоци има и материјали од музичари.

Претходно ваков голем напад беше направен во 2015 година, кога беше нападната мрежата на Бундестагот и беа украдени чувствителни информации. За овој напад беа обвинети руските државни органи.

Компјутерскиот систем на германскиот парламент беше нападнат и во 2017 година, но експертите успеаја да спречат упад.


Борисов: Давањето совети не е дипломатски, ги поддржуваме соседите на патот кон ЕУ


Софија, 2 октомври, 2018 - 14:47 (META) 

Секоја нација ја одредува сопствената судбина и можеме само да кажеме дека ги поддржуваме нашите соседи на патот кон ЕУ и НАТО, бидејќи сме во ова семејство, изјавил бугарскиот премиер Бојко Борисов за референдумот во Македонија, јавува дописничката на „Мета“ од Софија.

„Оттаму, според мене, давањето совети или разбирање не е правилно, дипломатски, ниту чесно. Ние треба да ги оставиме македонските политичари да одлучат кој е патот што ќе го изберат по референдумот и ги поддржуваме на секој начин на тој пат кон ЕУ и НАТО“ додаде Борисов кој што изнесува лично мислење, а не официјален став на владејачката парламентарна група ГЕРБ.


Анѓушев: Нема политичка криза по референдумот


Белград, 2 октомври, 2018 - 10:10 (META) 

Вицепремиерот за економски прашања, Кочо Анѓушев за време на Самит 100 во Белград, изјавил дека после референдумот на кој не излегле доволно гласачи, не очекува политичка криза во државата, јавува дописничката на „Мета“ од Белград.

„Мислам дека 600.000 гласови „за“ е сосема јасен доказ за поддршката од страна на граѓаните. По референдумот се можни две сценарија. Првиот е да имаме доволен број на гласови во Парламентот за да се изгласаат уставни промени, за што би требало да гласаат и претставниците на опозицијата. Друго решение се брзи избори“, изјавил Анѓушев на маргините на Самитот во Белград.

Во обраќањето на учесниците на Самитот, Анѓушев рекол дека регионот мора да направи заеднички проекти и дека ја зајакнува соработката, а државите и политиката треба да обезбедат поддршка за тоа.

Централна тема на дводневниот Самит 100 на кои се собраа бизнис-луѓето и политичарите на Југоисточна Европа е дигитална трансформација и како регионот да ја искористи четвртата индустриска револуција.


„ЦРТА“: На Балканот, медиумите во Македонија најмногу цитираат „неименувани извори“


Белград, 16 август, 2018 - 12:52 (META) 

Најголем број медиумски објави без цитирање извор имало во Србија, а најголем број на објави со цитирани „неименувани извори“ имало во Македонија, односно, такви биле дури 43 отсто од објавите, покажува истражувањето на српската невладина организација „ЦРТА“ спроведено од 14 мај до 10 јуни оваа година.

Интересно е дека, според истражувањето, присутноста на Русија во медиумите е најмало во Македонија во однос на Србија и Црна Гора, па и во Босна и Херцеговина.

Медиумски објави во Србија на кои не им е познат изворот најчесто се насочени про-руски и анти САД, а во Македонија најчесто се про-ЕУ, а во тој период немало про-руски објави.

Премиерот Зоран Заев бил најцитираниот политичар во Македонија во мај и јуни.

Во истражувањето бил применет компаративен пристап на Црна Гора, Македонија, Босна и Херцеговина и Србија на 5.553 медиумски објави од дневни весници, портали, информативни и утрински програми, а анализирани биле теми како политика, војска и вооружување, економија, Косово, култура, човекови права и здравство.

Клучна тема во Македонија во тој период била политиката, каде што ЕУ, САД и НАТО повеќе се присутни во позитивно светло (39%), отколку во негативно (20%).

Втора по застапеност тема била војската, а трета економијата.

За време на самитот ЕУ и Западен Балкан одржан на 17 мај, во Македонија медиумите најчесто заземале про ЕУ став (41%), ЕУ неутрално се известувало во 30 отсто од случаите, додека анти ЕУ се известувало во 12 проценти.


Кукан: Пред да се објави договорот, политичарите да ја подготват јавноста


Брисел, 8 јуни, 2018 - 12:04 (META) 

Европратеникот Едвард Кукан смета дека политичарите треба прво да ја подготват јавноста пред да го објават договорот за името во кој најтешкиот дел не е името само по себе.

-Мислам дека ја научија лекцијата последниот пат со предлогот Илинденска Македонија – смета Кукан и додава дека според него не е најважно името туку Уставот, јазикот, културата.

Кукан вели дека од лидерот на грчката опозициска партија Нова демократија, Кирјакос Мицотакис, биле информирани дека тој немало да биде комплетно негативен кон решението за името.


Ослободени шест од осум каталонски политичари


Барселона, 4 декември, 2017 - 18:13 (META) 

Шпанскиот Врховен суд одлучи да пушти на слобода шест од осум членови на поранешната каталонска влада, кои се сменети и уапсени по прогласувањето независност.

Судот, меѓутоа, го одби барањето за ослободување со кауција на поранешниот каталонски потпретседател Ориола Жункерас и регионалниот министер за внатрешни работи Жоаким Форна.

За шестeмина поранешни членови на каталонската влада кои беа притворени во рамките на истрагата за вмешаност и незаконско еднострано прогласување независност на 27 октомври, им е одредена кауција во износ од 100.000 евра.

Истовремено одлуката за испорачување на Шпанија на поранешниот каталонски претседател Карлес Пучдемон и четворица членови на неговата сменета влада, ќе биде донесена на 14 декември, седум дена пред регионалните избори во Каталонија.

Пучдемон и неговите министри одбиваат да се вратат во Шпанија каде што се обвинети за бунт и за злоупотреба на јавните фондови поради што би можеле да добијат повеќедецениска казна затвор.


Пет премиери од регионот и 100 бизнисмени на „Самитот 100“ во Скопје


Скопје, 9 октомври, 2017 - 14:17 (META) 

Шестиот годишен „Самит 100“ за бизнис-лидери од Југоисточна Европа ќе се одржи во Скопје на 16 и 17 октомври. На овој настан ќе учествуваат 100 реномирани бизнис-лидери, пет премиери на држави во регионот – Албанија, Црна Гора, Косово и Хрватска, Македонија – како и претставници од Европската комисија.

Претседателот на управниот одбор на „Самит 100“ и генерален директор на „Алкалоид“, Живко Мукаетов, на прес-конференција рече дека овој настан е уникатен затоа што отвора можности за поврзаност и за искористување на заедничкиот потенцијал на земјите од регионот.

– Гледано во светски рамки, нашите пазари се мали, но обединувајќи ги интересите и капцитетите во заеднички настап, можеме да бидеме сериозно меѓународно конкурентни и истовремено да го свртиме вниманието на глобалниот бизнис кон инвестицискиот потенцијал на земјите од Западен Балкан, Хрватска и од Словенија – изјави Мукаетов.

Проектот „Едисон“ е една од главните теми за која ќе се разговара на овој настан, а истиот предвидува електрификација на регионот, односно поставување на полначи за електрични автомобили во сите земји во регионот.

Мукатов додаде дека од досегашната организација на овој „Самит 100“, произлегол проектот „Феникс“, со кој градежните компании од регионот се здружиле за учество на трети пазари и на просторот на поранешниот СССР.

Програмскиот директор на „Самит 100“, Јелена Радуловиќ, информираше за содржината на панел-дискусиите што ќе се одржат, но како што кажа, целта е да се искористат предностите на заедничкиот настап на регионот во светски рамки за да се забрзаат порастот и развојот на економијата.

Една од целите е намалување и унифицирање на царинските процедури на земјите од регионот кои можат да бидат препознатливи по добрата храна и по туризмот.

– Учесниците ќе имаат можност да дискутираат за важноста на поврзувањето на регионот, слободното движење на стоките и на услугите и за тоа како локалните идеи можат да достигнат глобален успех. Работилниците ќе бидат посветени на енергетиката, економијата базирана на знаење, брендирање на производите од секторот храна, како и на дигитална економија и туризам – изјави Радуловиќ.

На премиерите од регионот ќе им бидат претставени заклучоците, а тие ќе го дадат својот осврт на „Новиот договор за новата доба“, кој воедно е и слоган на овој самит.

Еден од главните говорници е еврокомесарката за транспорт, Виолета Бул, претставници на водечките компании како „Горење“, „Бе-Ем-Ве“, „Подравка“, „Филип Морис“, „Убер“, „Бамби“, но и претставници на Европската банка за обнова и развој, Светска банка и др.


Немало прислушување политичари и бизнисмени во Хрватска, вели министер од БИХ


Сараево, 26 септември, 2017 - 18:48 (META) 

Директорот на Безбедносно-разузнавачката агенција на Хрватска, Даниел Маркиќ, денеска се сретнал со својот колега од БИХ, Осман Мехмедагиќ, откако хрватските медиуми објавија дека Разузнавачко-безбедносната агенција на БИХ (ОСА) прислушувала хрватски бизнисмени и политичари од Хрватска и од БИХ.

По средбата, министерот за безбедност на Босна и Херцеговина, Драган Мектиќ, рече оти челниците на разузнавачките агенции на БИХ и на Хрватска заклучиле дека немало незаконско прислушување на хрватски политичари и бизнисмени.

– Нема никаква разузнавачка афера и сите служби работат во рамките на законот. Констатирано е дека соработката меѓу двете служби е многу добра и ќе продолжи и во иднина. Исто така е констатирано дека на некој начин треба да се „спушти“ медиумски испровоцираната анкета – вели Мектиќ.

Хрватскиот неделник „Национал“ неодамна објави документи кои наводно потекнуваат од ОСА, за прислушување на хрватски бизнисмени и политичари. „Национал“ наведе дека ОСА веќе подолго време илегално спроведувала мерки за следење и за прислушување. Весникот тврди дека врз основа на увидот во повеќе тајни извештаи на ОСА, имаат докази дека таа служба „води специјална војна против Хрватска, хрватскиот премиер Андреј Пленковиќ и надворешната политика на хрватската Влада, но и хрватскиот народ во БИХ“.


Кандидатите за градоначалници потпишаа кодекс за фер и демократски избори


Скопје, 24 септември, 2017 - 14:33 (META) 

Kандидатите за градоначалници во сите општини во Македонија и Градот Скопје го потпишаа кодексот за фер и демократски избори, по повод изборната кампања за локалните избори која ќе почне утре.

Со потпишувањето на кодексот, кандидатите се обврзуваат дека нема да вршат никаков притисок или обид за притисок врз вработените во јавната и во државната администрација, во други институции или установи, финансирани од буџетот на државата, буџетите на општините и на Град Скопје, како и во трговски друштва и претпријатија со државен капитал.

Кандидатот за градоначалник на Град Скопје од СДСМ, Петре Шилегов, не им посака среќа на другите кандидати, бидејќи како што кажа, се надева дека граѓаните ќе одлучат да направат промена.

– Се надевам дека тоа што му се случуваше на Скопје и на другите општини повеќе никогаш нема да се повтори – рече Шилегов.

Актуелниот градоначалник на Град Скопје, Коце Трајановски, кој се кандидира за втор мандат, на сите кандидати им посака среќа и успех, повика на фер и демократски избори и им порача да водат фер кампања.

– Имајќи предвид како почна новата влада, ќе треба многу да се направи за овие избори да бидат фер и слободни – рече Трајановски.