Заев: Со пенкало падна режим, со пенкало ќе ја обезбедиме иднината


Брисел, 12 јули, 2018 - 16:50 (META) 

Ви реков дека ќе падне режим и падна режим. Ви реков ќе станеме 30-та членка на НАТО и станавме. Ова, пенкалото, целиот период нè движи. Режим падна со пенкало, сега потпишавме и добивме покана за НАТО. Верувам до небото. Добивме датум за преговори со ЕУ, таа верба не носи. Ни по точка разно не размислувам дека нема да успее референдумот, рече премиерот Зоран Заев на прес-конференцијата во Брисел по потпишувањето на поканата за прием во НАТО.

– Референдумот ќе успее и ќе биде порака дека има народи, нации и мултиетнички општества кои веруваат во својата иднина. Колку и да е тешка ќе ја донесеме одлуката сите заедно во Република Македонија – рече Заев.

Тој изрази жалење што претседателот Ѓорге Иванов не е дел од делегацијата на Македонија во НАТО. Од Иванов, рече Заев, не добиле ништо, ниту било каква порака, ниту честитка за поканата на НАТО.

– Ние мораме да ја прифатиме одлуката на граѓаните, каква и да е. Оваа прилика уште еднаш ќе ја искористам да ги повикам да се приклучат сите да им помогнеме на граѓаните, да бидеме ветар во нивниот грб. Со пенкало, само така и личи на Македонија. Иднината на Македонија ќе биде обезбедена пред се од нас, да го дадат својот глас – рече тој и изрази уверување дека и Грција ќе го заврши својот дел од Договорот кој ќе донесе бенефит, прогрес и просперитет и за двете земји.

Премиерот ги повика сите граѓани на Република Македонија во сабота да излезат по градовите, да си честитаат и да прослават.

За време на свечената церемонија генералниот секретар на НАТО, Јенс Столтенберг истакна дека по завршувањето на внатрешните процедури и ратификување на договорот, Македонија ќе седи на иста маса со сојузниците.


Столтенберг на Заев и официјално му ја врачи поканата за НАТО


Брисел, 12 јули, 2018 - 16:25 (META) 

Генералниот секретар на НАТО, Јенс Столтенберг на премиерот Зоран Заев и официјално му ја врачи поканата за почеток на преговори, денеска во Брисел.

– Договорот за името ги отстрани пречките за отворање на пристапните преговори. Остваривте клучен напредок со кој се отвори патот за вашата земја да стане полноправна членка на НАТО. Сега ќе започнат деталните пристапни преговори кои ќе и помогнат на вашата земја да ги направи последните подготовки за целосно членство – изјави Столтенберг.

Премиерот Заев изрази благодарност до генералниот секретар, но и до премиерите на соседните Грција и Бугарија, за постигнувањето на договорите за добрососедство.

– Ова е историска одлука за земјата и за граѓаните, признание за нашата посветена работа две децении и за сите македонски политичари од независноста до денеска – рече Заев.

Тој изрази увереност дека членство на Македонија ќе ја консолидира демократијата во регионот и ќе служи како позитивен пример во Западниот Балкан

– Како идна 30 земја на Алијансата подготвени сме да дадеме позитивен пример и да придонесуваме за обликување на Западниот Балкан во мирен, просперитетен и демократски регион – додаде Заев.


На „Твитер“ за прославата: Ало Влада, истресете го ВМРО од себе!


Скопје, 12 јули, 2018 - 13:13 (META) 

Голем број на граѓани на социјалните мрежи реагираа на најавената „граѓанска прослава“ на Владата по повод поканата за почеток на пристапните преговори за членство во НАТО. Прославата ќе се одржи во сабота во 15 градови, а ќе настапуваат 40 музичари меѓу кои Кирил Џајковски, Дуке Бојаџиев, Фолтин, Архангел, Љубојна, Нокаут, Ферус Мустафов, Владо Јаневски, Ареа и други.

Граѓани револтирано прашуваат колку чини прославата и кој ќе го плати хонорарот на учесниците, а дел од нив владеењето на СДСМ и организацијата на прослави го споредија со владеењето на ВМРО-ДПМНЕ.


Владата организира прослава во 15 градови за поканата за членство во НАТО


Скопје, 12 јули, 2018 - 10:50 (META) 

Владата организира „голема граѓанска прослава“ за поканата за членство во НАТО, во 15 градови ширум земјата заедно со преку 40 домашни артисти и музичари в сабота, 14 јули.

„Македонија започнува нова приказна – добивме покана за членство во НАТО и датум за преговори со ЕУ.  Застануваме рамо до рамо со најсилните земји од Европа и светот. Македонија зачекорува во ново време. Време на надеж, на победи, на гордост. Време на сигурност и безбедност. Доаѓа време на подобар живот за сите граѓани тука во нашата земја. Се изборивме за сигурна иднина“, се вели во поканата до граѓаните на фејсбук-настанот на Влада.


Пендаровски: Добиваме покана од НАТО да ги почнеме пристапните преговори


Брисел, 11 јули, 2018 - 16:56 (META) 

Националниот координатор за подготовка на Македонија за влез во НАТО, Стево Пендаровски, од седиштето на НАТО во Брисел рече дека денеска добиваме покана да ги почнеме пристапните преговори.

Според него, она што е специфично за Македонија и што е наша конкретно домашна задача е да го имплементираме до крај договорот со Грција, Преспанскиот договор, и НАТО ќе не цени низ таа призма.

– Грубо кажано, ќе има практично две сесии за политички и за технички прашања како што е со секоја друга земја аспирант во минатото. Значи, нема да биде доволно само овие воено технички, па и политички и легални правни услови да ги исполниме, отприлика, во наредните четири до шест месеци, туку ќе биде неопходно да ја завршиме и процедурата за ратификацијата за референдум во однос на договорот и се разбира уставните промени- рече Пендаровски.

Според негова проценка, некаде околу средината на јануари 2019 година би требало, како што вели, ако се биде успешно, да ги завршиме и овие преговори и потоа треба да има ратификација во сите парламенти на земјите членки и тоа може да трае до една година.

Тој додаде дека НАТО нам ќе ни достави план по точки по кои очекува ние да се произнесеме.

Вицепремиерката и министерка за одбрана Радмила Шекеринска рече дека очекува Македонија конечно да ја добие поканата за членство.

– Постои една точка околу која се согласни сите 29 земји членки, а тоа е дека Македонија ја заслужи поканата, и дека она што го пропуштивме како шанса во 2008 година овој пат во Брисел ќе успееме да го искористиме. Подобро некогаш, отколку никогаш, подобро сега отколку понатаму во иднината – вели Шекеринска.

Вицепремиерот за евроинтеграции Бујар Османи рече дека денеска се отвора иднината за Македонија и во делот на НАТО и во делот на ЕУ и дека перспективите што ги нудат двете организации се стабилност и напредок на економијата.


Македонија на Самитот на НАТО очекува да добие покана за преговори за членство


Брисел, 11 јули, 2018 - 9:38 (META) 

Дваесет и деветте лидери од Североатланскиот совет денеска, на првиот ден од дводневниот Самитот на НАТО во Брисел, ќе постигнат согласност да и испратат на Македонија покана за почеток на преговори за членство.

Ова го најави генералниот секретар на НАТО, Јенс Столтенберг за време на вчерашната прес-конференција и додаде дека очекува по историскиот Договор со Грција за името, Македонија да добие покана за формално правно да и пристапи на Унијата откако целосно ќе ја имплементира спогодбата.

НАТО ќе го чека исходот од референдумот за Преспанскиот договор закажан за септември или октомври. Доколку тој биде успешен и Договорот прифатен од граѓаните на Македонија, НАТО ќе го чека завршувањето на целата процедура за ратификација на Договорот од сите 29 земји членки, по што Македонија ќе стане формално полноправна членка. До тогаш Македонија ќе може да учествува во сите постапки и да дискутира, но не ќе може да гласа.

Американската амбасадорка во НАТО, Кеј Бејли Хачинсон вчера потврди дека САД сака да ја види Македонија како членка на Алијансата, но порача дека за тоа е неопходно граѓаните да го потврдат Договорот со Грција на референдум.

Во Брисел денеска пристигна македонскиот премиер Зоран Заев придружуван од министерот за надворешни работи Никола Димитров, министерката за одбрана Радмила Шекеринска и вицепремиерот за евроинтеграции Бујар Османи.

Премиерот ќе има обраќање на конференцијата „NATO-engages” што се одржува на маргините на Самитот, а потоа е поканет на вечерата на сите 55 лидери на земји членки и земји партнери кои учествуваат на Самитот.

Во текот на вториот ден од Самитот, во раните попладневни часови, е предвидена церемонија со која ќе се означи поканата за Македонија, а се очекува и заедничка прес-конференција на првиот човек на НАТО Столтенберг и премиерот Заев.


Столтенберг: Покана за НАТО кога ќе се исполни Договорот со Грција


Брисел, 10 јули, 2018 - 14:23 (META) 

Генералниот секретар на НАТО Јенс Столтенберг очекува дека по договорот со Грција Македонија ќе биде поканета да почне со преговори за членство во НАТО.

На денешната пре-конференција Столтенберг рече дека Македонија ќе стане членка на НАТО под новото име Република Северна Македонија.

– Очекувам дека по историскиот договор постигнат минатион месец за спорот со името ќе го поканиме Скопје да почне со преговори за членство. Кога договорот ќе биде финализиран и имплементиран, ќе можеме да ја поканиме поранешната југословенска Република Македонија да стане 30 членка на НАТО под нејзиното ново име, Република Северна Македонија. Ова е сигнал дека портата на НАТО е и ќе остане отворена – изјави Столтенберг, јави диписничката на МИА од Брисел.


Столтенберг ја појасни процедурата за зачленување на Македонија во НАТО


Брисел, 29 јуни, 2018 - 11:29 (META) 

Генералниот секретар на НАТО, Јенс Столтенберг, денеска по средбата со премиерот Зоран Заев, ја појасни процедурата за зачленување на Македонија во Алијансатa, пренесува МИА.

Успешен референдум за Договорот со Грција останува клучен услов, но Македонија веќе ќе учествува на сите состаноци на НАТО и пред полноправното членство.

Столтенберг појасни дека на претстојниот Самит на НАТО на 11 и 12 јули во Брисел, Македонија ќе добие покана за започнување на пристапните преговори со Алијансата.

– Уверен сум дека шефовите на држави и влади ќе ја поканат ПЈРМ да започне пристапни преговори, потоа неколку месеци ќе имаме пристапни преговори и доколку внатрешните процеси се финализирани во земјата, тогаш можете да се приклучите кон НАТО – рече генералниот секретар.

По заокружувањето на пристапните преговори ќе биде потпишан Протокол за пристапување кој потоа треба да биде ратификуван од парламентите на сите земји членки на НАТО. Овој процес на ратификација е тој што одзема најмногу време.

За Црна Гора, објасни тој, поканата за почеток на преговори била изададена во декември 2015, преговорите биле финализирани во март 2016, а потоа сите 28 земји членки го ратификувале Протоколот до јуни 2017.

Албанија и Хрватска, пак, беа поканети во април 2008, а се приклучија во април 2009, една година подоцна.

– Зборуваме за нешто како година и половина од поканата до полноправно членство, Но, штом го потпишеме Пристапниот протокол, што трае неколку месеци, три месеци за Црна Гора, тогаш земјата ќе биде поканета да учествува на сите средби на НАТО и ќе седи на маса и ќе биде дел од Советот на НАТО. Црна Гора почна да учествува во сите активности на НАТО во март 2016, само три месеци откако почнаа преговорите за членство – рече Столтенберг.

Тој посочи дека процесот може да оди многу брзо, но за тоа е неопходно да завршат сите процедури околу Договорот со Грција.

-Тоа значи дека потребните промени во Уставот треба да се направени и потоа можеме да ја поканиме земјата да пристапи под новото име, Република Северна Македонија. Навистина се надевам дека народот во вашата земја ќе ја зграпчи оваа прилика, ова е историска прилика – порача геренарлниот секретар на НАТО.

Доколку референдумот не успее Македонија, нема да може да стане членка на НАТО потсети Столтенберг.


Заев: Видовме каде ќе биде подигнато нашето знаме во НАТО


Го видовме местото каде треба да биде подигнато нашето знаме како 30-та членка на Алијансата. Тоа го чекаме од 2008 година, кога беше констатирано дека ги постигнавме стандардите. Оттогаш активно учествуваме на мисиите на НАТО за сузбивање на глобални терористички и ектремистички закани. Припадниците на АРМ добиваат доверба да бидат главни актери во сериозни безбедносни предизвици. Со мисиите растеа капацитетите на Армијата, рече премиерот Зоран Заев на прес-конференција на седиштето во НАТО во Брисел, пo неговата средба со генералниот секретар на НАТО, Јенс Столтенберг.

Тој рече дека се очекува поканата, а Македонија покажала дека се грижи за добрососедството со потпишување на договорите со Бугарија и Грција.

– Договорот со Грција го откочи нашиот прием во Алијансата и нашата земја го добива местото што го заслужува. Со Грција изградивме пријателство. Со Бугарија остваривме договор што долго се одложуваше и ќе ја продлабочи економската соработка – рече Заев.

Генералниот секретар на НАТО, Столтенберг, го поздрави договорот со Грција, кој го нарече производ на трпелива дипломатија.

– Топло ја поздравувам спогодбата за спорот за името. Тоа е големо постигање за Скопје и Атина и демонстрација на вредноста на трпеливата дипломатија. Откако ќе бидат завршени сите обврски од договорот за името ќе станете член на НАТО. Без исполнување на договорот нема да може да станете дел од НАТО – изјави Столтенберг.

Прашан за очекувањата од претстојниот Самит, тој рече дека верува оти земјата ќе биде поканета да почне пристапни преговори.

– Откако ќе ги завршиме пристапните преговори и ќе биде затворен договорот за името, тогаш земјата ќе стане полноправна членка, рече Столтенберг.


Пендаровски: Утре чекаме официјална најава за покана во НАТО


Скопје, 28 јуни, 2018 - 11:22 (META) 

Утре чекаме официјална најава од седиштето на НАТО во Брисел дека на Македонија ќе и биде доделена официјална покана на следниот Самит на Алијансата во Брисел на 11 и 12 јули, изјави денеска Националниот координатор за НАТО, Стево Пендаровски, на 98. РОС-РОТ Семинар што се одржува во македонското Собрание.

– Генералниот секретар Јенс Столтенберг ќе го објави тоа што македонските граѓани го чекаат со години. Тоа ќе биде завршна етапа од нашето асоцирање во Алијансата, имајќи предвид дека Република Македонија е неславен рекорден со 19 кругови од акциониот план за членство во НАТО – рече Пендаровски.

Во меѓувреме, како што кажа тој, Македонија покажала завидно ниво на отпорност, жилавост, со оглед дека двапати се наоѓала на работ.

– Првиот пат тоа беше во 2001 година кога имавме внатрешен конфликт, а само четири години подоцна во 2005 добивме статус кандидат за ЕУ. Вториот пат кога се вративме од работ е мината година кога по 11 години тврд автократски режим, за само една година добивме покана за членство во Алијансата. Сега, една година по упадот во Собранието разговараме Македонија да стане членка на Алијансата и начелно договорен датум за преговори со ЕУ за јуни следната година – оцени Пендаровски.

Тој додаде дека во изминатата година Македонија затворила три крупни стратешки прашања – првото е потпишувањето на Договорот за добрососедство со Бугарија, што според него било камен на сопнување за приближувањето кон ЕУ. На внатрешен план е донесен Законот за јазици – стожерен елемент на Рамковниот договор и последното е потпишувањето на Договорот со Грција за решавање на спорот со името.

Пендаровски потсети дека влезот во НАТО е најголемиот кохезивен фактор во земјава, имајќи предвид дека околу 80 отсто од граѓаните се за влез во Алијансата, без оглед на етничката припадност, што не е случај со останатите земји аспиранти.

За придобивките од НАТО денес, вели дека иако нема закана по територијалниот интегритет на земјава, светот се соочува со друг вид закани како хибридни војни, кибер напади и ефектот од лажните вести што можат да направат прилична штета на економијата во земјата.

Тој заклучи дека за разлика од ЕУ, во НАТО нема замор од проширувањето, во НАТО никој не размислува за Брегзит, а за напуштање на Алијансата не размислуваат ниту Исланд кој нема армија, а ниту ни Луксембург чија армија брои 450 војници.