!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Книжевно пладне посветено на руските поетеси Ахматова и Цветаева


Охрид, 21 март, 2017 - 12:47 (META) 

По повод 21 март, Светскиот ден на поезијата, библиотеката „Григор Прличев“ од Охрид и почесниот конзулат на Руската Федерација, во Охрид, денеска организираа книжевно пладне.

Пред љубителите на поетскиот збор, беше претставен избор од творештвото на руските поетеси Ана Ахматова (1889-1966) и Марина Цветаева (1892-1941).

За нивниот живот и творештво говореше Елена Обухова, додека стихови интерпретираа Тоде Илиевски и Маја Мојсова.


Тројца македонски поети претставени во Солун


Солун, 13 март, 2017 - 14:32 (META) 

Македонската современа поезија и литературни автори беа претставени на поетската вечер „Живите гласови на Медитеранот“ во Францускиот институт во Солун. Бројната грчка и странска публика ги слушна стиховите и поетските мисли на истакнатите македонски автори Владимир Мартиновски, Николина Андова-Шопова и Ѓоко Здравески.

Поетската вечер се одржа по повод Месецот на Франкофонијата, настан на кој Македонија со помош на Генералниот конзулат на државата во Солун веќе редовно настапува последните три години. Настанот, кој беше уникатна можност за грчката и меѓународната франкофонска публика да се запознае со македонската поезија, литература и уметност и со тоа да ги надмине политичките проблеми, беше организиран повторно со помош на Генералниот конзулат и на македонската конзулка во Солун, Маја Апостолова.

За време на поетската вечер, професорот Мартиновски, Андова-Шопова и Здравески читаа дел од својата поезија на македонски и на француски јазик. Авторските дела со кои се претставија беа дел од творештвото со кое тројцата автори учествуваа и на поетскиот фестивал во Сете, Франција. За грчката публика, стиховите на македонските автори ги препеа грчкиот издавач Јоргос Јанопулос.

Благодарение на интензивираната културна соработка меѓу македонските автори и грчки издавачи, се очекува дел од македонската современа поезија да биде објавена во грчко литературно издание.

Грчката публика имаше можност на изминатите изданија на поетските читања на Месецот на франкофонија во Солун да слушне и дел од поетското творештво и дела на познатиот македонски автор Влада Урошевиќ.

Македонската современа култура сè почесто се претставува во Северна Грција и особено во Солун, преку активностите на конзулатот. Пред само две недели во втората грчка престолнина беше претставена старата македонска чалгиска музика преку концерт на „Чалгија саунд систем“.


Почнуваат „Струшките вечери на поезијата“


Струга, 24 август, 2016 - 9:35 (META) 

„Струшките вечери на поезијата“ ќе почнат вечерва на платото пред Домот на поезијата во Струга, во 20.30 часот.

На годишната поетска манифестација во Струга ќе учествуваат 32 поети од 30 земји, меѓу кои Франција, Италија, Кина, Мексико, Израел, Австралија, Хрватска, Бугарија и други.

55. издание на „Струшките вечери на поезијата“ ќе трае до 28 август, а поетски читања ќе има и во Битола, Ресен и во Охрид.

Фестивалската програма завршува на 29 август со поетско матине на Матка и со Меѓународен поетски митинг на Камениот мост во Скопје.

Педесет и петтото фестивалско издание донесува радикални програмски измени, кои ќе овозможат посеопфатна презентација на поетското творештво.

Секое попладне ќе се пие „поетско кафе“ низ книжевни разговори, дебати и со поетско читање.

Годинашен лауреат на наградата „Златен венец“ е канадската поетеса, книжевна критичарка, романсиерка и есеистка Маргарет Етвуд.


Годинава „Поетска ноќ во Велестово“ посветена на творештвото на Санде Стојчевски


Охрид, 14 јули, 2016 - 12:21 (META) 

Од утре до 18 јули, ќе се одржи 28. издание на манифестацијата „Поетска ноќ во Велестово“, која се одржува со поддршка на Општина Охрид, а ќе почне со портрет на поетот Санде Стојчевски, за чие творештво ќе беседи Зоран Анчевски, додека стихови ќе читаат актери од независната аматерска театарска група „Аматер“. Музиката е на Петар Кочовски.

В сабота, на 16 јули, ќе се одржи „Вечер на ирската поезија“ на која ќе настапат поетите Патрик Котер, Џери Марфи, Били Рамзел и Алва Ни Гиарвуи, а ќе биде промовирана и антологија на ирската поезија во која се претставени 11 поети.

Традиционалната изложба, во тремот на црквата „Успение на Св.Богородица“ во Велестово, годинава е со дела на Стефан Хаџи-Николов.

Манифестацијата завршува на 18 јули со поетско пладне во библиотеката „Григор Прличев“, на кое стихови ќе говорат ирски и македонски поети.


Јубилејни десетти „Лесновски ѕвона“ во Кратово


Кратови, 12 јуни, 2016 - 10:22 (META) 

Во Кратово се одржа јубилејната, десетта по ред, поетска манифестација „Лесновските ѕвона“, посветена на прерано починатиот автор Чедо Јакимовски, еден од најзначајните македонски поети во 20 век.

На манифестацијата учествуваа дваесетина македонски поети.

Беседа за Јакимовски одржа неговиот колега Ристо Лазаров, кој го вброи меѓу великаните на македонската поезија, редок творец опседнат со совршенството на песната.

Сеќавања за еден дел од животот на Јакимовски изнесе и професорот и амбасадор, Владимир Петковски.

Со свои стихови настапија и поетите Михаил Ренџов, Гордана Михаилова Бошњаковска, Ристо Лазаров, Милован Стефановски, Благоја Самоников, Ирена Јурчева, Елена Пренџова, Марина Мијаковска, Горан Анчевски, Драгана Велковска и Иван Јовановски.

Поетско читање се одржа и во Лесновскиот манастир, за кого Чедо Јакимовски ја има напишано својата антологиска и легендарна песна „Лесновските ѕвона“.

Се одржа и ликовна работилница „Цвеќе на мирот“ на сликарот Живко А. Поповски – Цветин.


Македонска поезија објавена во српското книжевно списание „Брничево“


Белград, 7 јуни, 2016 - 14:07 (META) 

Во најновиот број на списанието за книжевност „Браничево“ од Пожаревац, Република Србија, се објавени одбрани песни од македонските поети Ристо Ѓ. Јачев, Христо Петрески, Петко Шипинкаровски, Славица Г. Свидерски, Весна Мундишевска-Велјановска, Зоран Пејковски, Маја Стела Босилковска, Тоде Илиевски и Марина Мијаковска.

Најновата презентација на македонските поети надвор од Македонија е уште една потврда на активноста и на заложбите на редакцијата на ревијата за книжевност „Бранувања“, што се темели на воспоставување соработка и на градење мостови помеѓу македонската и културите од регионот и пошироко.

На 8 јули во библиотека „Григор Прличев“ во Охрид, во рамките на годинашната манифестација „Струшки книжевни средби“, ќе бидат промовирани списанијата „Браничево“ од Пожаревац (Србија) и „Бранувања“ од Струга, кога за списанијата ќе говорат нивните уредници Билјана Миловановиќ-Живак и Петко Шипинкаровски.


Заврши третото издание на поетскиот фестивал „Литературни искри“ во Гостивар


Гостивар, 23 мај, 2016 - 12:20 (META) 

Викендов Гостивар беше домаќин на поети од различни генерации, од кои дел веќе афирмирани поетски пера, а дел автори чие време допрва доаѓа, а во рамките на третото издание на Меѓународниот поетски фестивал „Литературни искри“.

Во саботата вечерта поетите финалисти ги прочитаа своите стихови, а наградите беа доделени на свеченост во недела. Годинава Гран при наградата ја освои Слаѓана Ставрева од Скопје, поетеса, но и прозаист, автор на романот „Калдрма“.

– Чест е да се добие оваа награда. Истовремено за мене значи и обврска во натамошното творештво да го задржам нивото. Секоја чест за организаторите, се беше беспрекорно, да не знаев дека се одржува трета година по ред, ќе мислев дека постои најмалку триесет години – изјави Ставрева.

Првото место на фестивалот и припадна на Надица Тренчева од Кавадарци, второто на Митре Мангоски Радождански од Охрид, а третото го доби Митко Гогов од Струмица. За најуспешен странски поет беше прогласена Вања Савова од Бугарија, а за најмлада поетска искра Неврија Адеми од Гостивар.

Најдобрите беа избрани во конкуренција од над 120 поети од Македонија и балканските земји. Изборот го направи жирито во состав Бранко Цветкоски, како претседател и членовите Габриела Петроска и Адем Абдулаху.

На манифестацијата беше промовирана и заедничката збирка со 80-тина поети што конкурираа, по избор на жирито.

Меѓународниот поетски фестивал „Литературни искри“ во Гостивар го организираа Центарот за култура „АСНОМ“ со поддршка на Министерството за култура.


Викендов се одржува Меѓународен поетски фестивал во Гостивар


Тетово, 18 мај, 2016 - 13:25 (META) 

Претстојниот викенд во Гостивар ќе се одржи третото издание на Меѓународниот поетски фестивал „Литературни искри“. На отворањето на фестивалот, во сабота (21 мај) ќе се претстават поетите финалисти избрани од жири комисијата на чело со претседателот Бранко Цветкоски. Наградите ќе бидат доделени во недела (22 мај) на свечена манифестација.

Четиринаесетте финалисти беа избрани во конкуренција на 125 поети од земјава и повеќе балкански земји. Тоа се: Исток Улчар, Наташа Василевска Трајчевска, Митре Мангоски Радождански, Невриј Адеми, Надица Тренчева, Слаѓана Ставрева, Константин Карев, Ивана Китаноска, Валентина Трајкоска, Маријана Давиткова, Митко Гогов сите од Македонија како и Вања Савова, Катја Вангелова и Пламен Димитров Парнарев од Бугарија.

„Годинешната поетска жетва, најригорозниот, би рекол златниот одбир на гостиварскиот и меѓународен фестивал „Литературни искри“ се одликува со суптилна тематска архитектоника, со разнородна, но високо мотивирана стилска изведба, со бројни микропоетички градации на темите на современата личност загледана и упатена кон големите очекувања, пресвртите и жестокостите на животот, со уверлива експонажа на внатрешната устројба на песните“, пишува во својот осврт претседалот на жири комисијата, поетот, критичар и есеист, Бранко Цветкоски.

Поетскиот фестивал „Литературни искри“ го организира Центарот за култура АСНОМ од Гостивар во чест на 24 Мај, Денот на сесловенските просветители. Настанот е поддржан од Министерството за култура.

Дел од поетите кои учествуваа на конкурсот, по избор на жирито ќе бидат застапени во заеднички алманах, кој ќе се промовира на манифестацијата.


Поезија од македонски автори објавена во романско книжевно списание


Охрид, 5 мај, 2016 - 12:12 (META) 

Одбрани песни од поетите Мишо Китаноски, Петко Шипинкаровски и Димо Димчев објавени се, во печатена и во електронска верзија, во најновиот број, за март и за април, на книжевното списание „Хелис“ во Романија.

Преводот на стиховите на романски го направи македонскиот поет Димо Н. Димчев, а списанието го уредува угледниот романски поет Ѓеорѓи Добре.

Објавувањето на творештвото на македонските поети книжевното списание „Хелис“ го прави во континуитет.


Во вторник почнува Зимскиот поетски фестивал во Скопје


Скопје, 6 декември, 2015 - 17:53 (META) 

Во организација на „Струшките вечери на поезијата“, од вторник до 11 декември во Скопје ќе се одржи првиот „Зимски поетски фестивал“, на кој ќе учествуваат четворица врвни поети од земјава и од странство, пишува порталот „Лидер“.

Според директорот, Мите Стефоски, овој фестивал е дел од промените за проширување на функционирањето на институцијата, за во зимскиот период да овозможи интензивна активност на „Струшки вечери на поезијата“ насекаде низ земјава.

– „Зимски поетски фестивал“ ќе се одржи во период кога не само во Струга, туку и во Република Македонија нема поголеми книжевни настани. Целна публика ќе биде академската средина, затоа и ќе се одржува на Филолошкиот факултет во Скопје – изјави Стефоски.

Директорот најави проширување на фестивалот во наредните години и на универзитетите во Штип, Битола, Охрид и во други градови во земјава.

Програмата ќе се одвива во четири фестивалски дена, со фокус на тројца странски поети и актуелниот добитник на наградата „Браќа Миладиновци“ за најдобра поетска книга меѓу две изданија на фестивалот „Струшки вечери на поезијата“. Годинашни учесници ќе бидат Мохамед Бенис од Мароко, Александар Шурбанов од Бугарија, Душко Новаковиќ од Србија и Виолета Танчева-Златева од Македонија.