!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Агенцијата за прислушување (ОТА) и законот треба да бидат готови до петок


Скопје, 20 ноември, 2017 - 17:36 (META) 

Новите законите за следење на комуникациите и за Оперативно техничката агенција (ОТА) кој ќе го врши следењето, треба да бидат готови до петок (24 ноември), оваа недела, стои во известувањето за почетокот и рокот за подготовка на законите.

Станува збор за сосема нов закон за следење на комуникациите, бидејќи во известувањето не е наведено измена и дополнување на закон, туку „почеток на процес за подготовка на Закон за следење на комуникациите“.

Со законот за Оперативна техничка агенција (ОТА) се воведува сосема нов државен орган со специфична функција, кој со самото дефинирање како агенција се означува како самостоен. Агенциите (покрај дирекциите и комисиите) се дефинирани како самостојни органи на државната управа.

Надлежно за подготовката на законите е Министерството за внатрешни работи.

Во известувањето за подготовката на двата закони се наведува дека со нивното донесување ќе бидат имплементирани препораките на групата високи експерти за системски прашања од владеењето на правото во врска со следењето на комуникациите, односно на експертската група на Рајнхард Прибе.

Инаку, работната група која работи на реформите во системот за прислушување беше формирана со одлука што владата ја донесе на 34. седница одржана на 31 октомври. На чело на работната група е Силјан Аврамовски, висок функционер на Управата за безбедност и контраразузнавање (УБК) и поранешен директор на УБК и министер за внатрешни работи.

На седницата од петокот, минатата недела, Влада одлучи во работната група да ги вклучи и Специјалното јавното обвинителство и домашни и странски експерти.

Актуелниот директор на УБК, Горан Николовски неодамна изјави дека со новите законски решенија се предвидува системот за следење на комуникациите, односно медијациските уреди (уреди за пренасочување) да се извадат од УБК и да се префрлат во Оперативната технучка агенција, според прифатениот модел. Со ова, како што рече Николовски, ќе се укине монополот што Управата го имаше врз следењето на комуникациите и ќе се оневозможи злоупотребата на овој систем.

Според Николовски, ОТА нема да може да собира податоци, односно нема да ги следи комуникациите, туку само ќе го обезбеди сигналот.

– Таа ќе го стиска копчето. Тие ќе може да го вклучуваат сигналот, но нема да може да слушаат – рече шефот на УБК на научно-стручната дебата „Безбедносни дијалози за процесот на трансформација на УБК и механизми за контрола на следењето на комуникациите“, што на почетокот на месецов се одржа на Факултетот за безбедност во Скопје.


Два месеци ќе трае подготовката на измените на Законот за судовите


Скопје, 31 октомври, 2017 - 15:15 (META) 

Основите за разрешување судија и редефинирањето на условите за избор на судија ќе бидат дел од новиот закон за судовите, чија подготовка Министерството за правда ја почнало вчера.

Измените и дополнувањата на законот треба да бидат готови до 30 декември.

„Со предлог-законот за изменување и за дополнување на законот за судовите се врши негово усогласување со препораките дадени во мислењето на Венецијанската комисија, кое, главно, се однесува на основите за разрешување судија, основите за утврдување одговорност на судија и за изрекување дисциплинска мерка, редефинирање на условите за избор на судија, зајакнување на надзорната функција на Министерството за правда во поглед на примената на одредбите од Судскиот деловник“, стои во известувањето.

Основна цел на законот, како што се наведува, е зајакнување на независноста и на интегритетот на судиите и на нивната специјализација по области, утврдување на јасни критериуми за одговорност во вршењето на судиската функција, како и внесување на квалитативни критериуми при подготвувањето на оценката за работа.

Според Уставот, за измени и за дополнувања на Законот за судовите е потребно двотретинско мнозинство во Собранието.


Почна подготовката на Законот за заштита на сведоци што го бараше СЈО


Скопје, 29 септември, 2017 - 11:18 (META) 

Министерството за правда вчера ја почнало постапката за подготовка на измените на Законот за заштита на сведоци, со кои ќе му се даде надлежност на Специјалното јавно обвинителство да учестува во постапката за заштита на сведоци, односно да бара и да предлага заштита на одредени сведоци кога тоа е неопходно за истрагата.

Ова, како што може да се види од информациијата за почеток на постапката, е и главната цел поради кои се менува Законот, бидејќи СЈО не фигурира во аткуелното законско решение. Советот за заштита на сведоци сега брои пет членови, односно судија од Врховниот суд, претставник од Јавното обвинителство од редот на замениците јавни обвинители, директорот на Управата за извршување на санкциите, претставник од МВР и раководителот на одделението во МВР.

„Целта за пристапување кон измени и дополнувања на законот е обезбедување услови за спроведување на Законот за Јавното обвинителство за гонење кривични дела поврзани и кои произлегуваат од содржината на незаконското следење на комуникациите и обезбедување на целосна имплементација на начелото на автономија, односно обезбедување услови за целосна автономија во истражувањето и во гонењето на кривични дела поврзани и кои произлегуваат од содржината на незаконското следење на комуникациите“, стои во информацијата на Министерството за правда.

Оттаму додаваат дека со оваа законска измена ќе се изврши усогласување на домашното законодавство со европските и со меѓународните стандарди.

Инаку, специјалната јавна обвинителка, Катица Јанева, уште во јануари минатата година побара измени во Законот за заштита на сведоци, кои по 10 месеци, односно во октовмри, на предлог на тогашната опозиција, се најдоа во Собранието, но не беа поддржани од тогашното парламентарно мнозинство на ВМРО-ДПМНЕ.

Вицепремиерот за европски прашања, Бујар Османи, на крајот на август годинава, на прес-конференција за спроведените реформи од првиот дел на планот „3-6-9“, брифираше дека се доцни со дел од мерките, посочувајќи дека Министерството за внатрешни работи „сè уште не почнало со подготовката на новиот предлог-закон за заштита на сведоци и сè уште нема точно поделени ингеренции со Министерството за правда“.

Наредниот ден од МВР преку соопштение информираа дека Министерството ги исполнува обврските од планот „3-6-9“ и дека текстот на предлог-законот за заштита на сведоци е подготвен.

Како што може да се види на владината интернет-страница „Енер“, временската рамка за подготвување на предлог-законот е од 28 септември до 31 октомври 2017 година.


Рокот за дебата за прописите на ЕНЕР ќе се зголеми за 20 дена


Скопје, 17 август, 2017 - 15:20 (META) 

Владата на последната седница одлучи рокот за консултации за прописите објавени на Единствениот национален електронски регистар (ЕНЕР) пред нивното донесување се зголеми од 10 на 20 дена,министерот за информатичко општество и администрација Дамјан Манчевски.

– Со оваа одлука на Владата се придонесува за поголема транспарентност, отвореност, навременост и одговорност при подготовката на предлог-законите од страна на Владата. Зголемувањето на рокот за консултации има за цел да поттикне поголемо учество на пошироката јавност и граѓаните при подготовка на прописите. На тој начин креаторите на политиките ќе носат одлуки засновани на аргументи и во консултација со сите засегнати страни. Со оваа одлука се придонесува и кон тоа најголемиот дел од предлог законите, пред да се достават на разгледување во владина постапка, задолжително да се објавуваат на ЕНЕР. Тука, во период од 20 дена јавните корисници ќе може да ги испраќаат своите коментари и на тој начин да се вклучат во креирањето на новите предлог закони преку дискусија и давање предлози, со цел квалитативно да влијаат врз донесувањето на новите законски решенија – објасни Манчевски.


Денеска почнува „Вевчанскиот карневал“


Струга, 10 јануари, 2017 - 11:07 (META) 

Годинешниот „Вевчански карневал“ почнува денеска со културни настани предвидени за оваа манифестација.

Програмата денеска е во знакот на одбележувањето на верскиот празник Свети Василиј Велики, заштитник на вевчанските василичари и на Вевчани, додека формалниот почеток на карневалот е в четврток.

Денеска, со почеток во 17 часот, во Клубот на пензионери во Вевчани ќе се одржи трибина на тема „Перспективите на руралниот туризам во Република Македонија со осврт на општина Вевчани“. Утре ќе биде извршена промоција на романот „Пред шарени врати“ од Косте Шутиноски.

Изложбата на слики од академскиот сликар Ниче Василев ќе биде отворена на 12 јануари (четврток) во 12 часот, во Клубот на пензионери.

Забавниот дел ќе почне на 12 јануари во 21 часот, со настап на домашните групи „ДНК“ и „Нокаут“, а пред полноќ ќе се претстави групата „Фрајле“ од Србија.

На 13 јануари, во 21 часот, присутните ќе ги забавува фолк-пејачката Анета Наковска, додека православната Нова година ќе биде пречекана со настапот на вевчанецот Ефто Пупиноски.

Традиционалното дефиле на маските ќе се одржи на 13 јануари, по 14 часот.

Карневалот завршува на 14 јануари, со традиционалното палење на маските.


Хан: ДИК има доволно време да го подготви избирачкиот список


Драч, 31 март, 2016 - 19:27 (META) 

Несомнено треба да има избори во Македонија, а Државната изборна комисија треба да го подготви избирачкиот список, за што сега би требало да има доволно време, изјави денеска еврокомесарот за проширување и соседска политика, Јоханес Хан во Драч, Албанија каде учествува на министерската конференција на Западен Балкан.

Еврокомесарот вели дека ако проблемите околу избирачкиот список претходно биле причина за меѓународен притисок за одлагање на датумот на изборите, сега, според него, нема индикации дека подготовката на списокот не може да се направи на време.

– Несомнено треба да има избори. Релевантните и одговорните власти, а особено Државната изборна комисија прават сè што е во нивна моќ да го подготват избирачкиот список што не е оспорено од никого. Немам индикации дека тоа не е возможно. Тоа беше причината поради која имаше меѓународен притисок да се одложат изборите, но сега би требало да има доволно време да се направи се што е неопходно. Го имаме договорот од јуни/јули, а конечната цел од тој договор се фер, транспарентни и меѓународно признати избори кои ќе бидат основа за натаможен развој на земјата особено кога станува збор за евро-атлантските интеграции – вели Хан.

Изборите на 5 јуни биле тема на разговорот меѓу Хан и министерот за надворешни работи, Никола Попоски на маргините на конференцијата, на кој било заклучено дека тие се најдобар пат за Македонија да ја врати агендата и почне со преговори за членство.


Демократскиот сојуз ќе ангажира експертска група за законот за амнестија


Скопје, 21 септември, 2015 - 14:55 (META) 

Демократскиот сојуз денеска соопшти дека има ангажирано експертска група што работи на подготовка на закон за амнестија.

Партијата истакнува дека поради комплексноста на прашањето, законот ќе се подготвува во соработка со Министерството за правда, Врховниот суд, Јавното обвинителство, невладиниот сектор и со експерти, доколку има интерес за тоа.

– Амнестијата е чин на простување, но и на корекција на неправда, како и можност за ресоцијализација. Демократскиот сојуз смета дека само со силни и со издржани аргументи и поширок општествен и политички консензус, можна е амнестијата – се вели во соопштението и се додава дека протестите како форма на изразување на револт се демократско право, но оти ескалацијата на незадоволството може негативно да се одрази на процесот на подготовка и на носењето на законот.

Во Македонија последната општа амнестија е спроведена во 1999 година.


Франција планира воздушни напади против ИД во Сирија


Париз, 7 септември, 2015 - 13:02 (META) 

Францускиот претседател, Франсоа Оланд, наредил армијата да се подготви за почнување воздушни напади врз позиции на Исламска држава (ИД) во Сирија, јавуваат светските медиуми.

Според информациите, Оланд изјавил дека Франција утре треба да почне со извидувачки прелети, како дел од подготовките за напад на милитантите на ИД.

Тој, истовремено, отфрлил секаква можност за ангажирање копнени трупи во Сирија.

Според Оланд, станува збор за одговор по информациите дека ИД планира напади на повеќе земји, меѓу кои и Франција.

„Моја одговорност е да се осигураме дека сме информирани колку што е можно во однос на заканите кон нашата земја. Во таа насока, побарав од министерот за одбрана од утре да се почне со извидувачки летови над Сирија, како подготовка за воздушни напади против Исламска држава“, ја пренесува „Би-Би-Си“ изјавата на францускиот претседател.