!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Пожари на потегот од Бар до Никшиќ, НАТО и ЕУ ќе испратат помош


Подгорица, 18 јули, 2017 - 10:33 (META) 

Голем број шумски пожари ја зафатија Црна Гора, слично како во соседна Хрватска, а најголем проблем во моментот е пожарот на полуостровот Луштица кај Тиват, каде ако ветерот продолжи да дува, ќе го донесе огнот до куќите. НАТО вети помош за справувањето со пожарите и се очекува таа да стигне денеска. Црна Гора побара меѓународна помош вчера.

Министерот за внатрешни работи, Мевлудин Нухоџиќ, ги посети погодените подрачја на приморјето и процени дека ситуацијата е сериозна, но нема причини за страв и за паника.

– Побаравме помош од Механизмот за цивилна заштита на Европската комисија, во која се вклучени 34 земји. Барањето се разгледува во Брисел и постои можност да добиеме помош во авиони – вели Нухоџиќ.

НАТО вети противпожарни авиони „канадер“, кои Црна Гора ги побара вчера.

Вчерашниот ден беше многу тежок за пожарникарите и за жителите на црногорското приморје. Од населбата Понте Весло на полуостровот Луштица, беа евакуирани 40 луѓе. Неколкумина поради пожарот скокнале в море и чекале помош еден час. Засега нема повредени, а загрозените со чамци се префрлани во Здравствениот дом во Херцег Нови.

Инаку, активен е и пожарот кај Сутоморе, на Голо Брдо, но тој е локализиран и не се загрозени куќите. Пријавен е и пожар кај Паштровичи. Кај Будва гори Паштровска Гора, но тој пожар е под контрола. Во Котор нема пожари, но пожарникарите се на готовс.

Кај Тиват, освен пожарот на Луштица, од ноќеска гори и на Забрѓе. Иако не се загрозени станбени објекти, ситуацијата се менува од час во час.

Кај Херцег Нови има пожари кај Росе, на ’ртот Весло, кај Обосник, но и таму не се загрозени станбени објекти.

Гори и на периферијата на Подгорица, во непристапни места на ридовите. Пожар има и околу Цетиње, но не се загрозени куќи или згради. Кај Даниловград има два шумски пожари, а кај Никшиќ три, но таму нема опасност за станбени објекти.


Пожари во Подгорица, пламенот висок десетици метри


Подгорица, 16 јули, 2017 - 18:36 (META) 

Голем шумски пожар изби денеска попладне кај трговскиот центар „Делта“, во главниот град на Црна Гора, Подгорица, а пожарникарите се обидуваа да ги заштитат куќите од огнот, чии пламења достигнуваа и до неколку десетици метри во височина.

Набргу голем пожар се прошири и кај Тутунскиот комбинат, а огнот се закануваше да зафати неколку куќи.

Ситуацијата е критична и многу граѓани се вклучуваат да помогнат. Покрај овој пожар, голем пожар има и на вегетацијата во Мареза каде огнот го гаснат три екипи. Влезот во Подгорица од правец на Никшиќ е блокиран, па полицијата ги враќа возилата назад преку Мареза.

Пожар има и во селата Црнци и Лопате. И на овие места загрозени се голем број домаќинства, а четири противпожарни екипи се справуваат со пламените јазици.

Во исто време, пожар гори и кај Суто Море, на јадранскиот брег, како и кај поранешната престолнина Цетиње и кај Даниловград.


Македонија, кодомаќин на средба со потпретседателот на САД


Скопје, 4 јули, 2017 - 9:32 (META) 

Македонија ќе биде кодомаќин на средбата на потпретседателот на САД, Мајк Пенс, со земјите членки на Јадранска повелба, која ќе се одржи на  2 август во Подгорица.

Република Македонија која е претседавач на Јадранската повелба оваа година, заедно со Црна Гора е кодомаќин.

Во Јадранската повелба членуваат Македонија, Албанија, Хрватска, Црна Гора и Босна и Херцеговина, а Србија, Косово и Словенија имаат статус на земји набљудувачи во групата. Јадранската повелба е формирана под покровителство на САД во 2003 година и има цел да ги координира активностите за поддршка на земјите аспиранти за членство во НАТО.


Петмина работници ја победија Црна Гора во Стразбур


Стразбур, 24 февруари, 2017 - 20:11 (META) 

Петмина поранешни вработени во некогашниот гигант на СФРЈ и потоа на СРЈ, производителот на градежни машини „Радоје Дакиќ“, по седум години чекање, го добија спорот против владата на Црна Гора што го поведоа во Европскиот суд за човекови права во Стразбур, јавија црногорските медиуми.

Сега црногорската влада мора да им исплати најдоцна за три месеци сума од 217.000 евра, колку што изнесува сумата од нивните 77 неисплатени месечни плати. Покрај тоа, владата на Црна Гора мора да им исплати и по 2.000 евра за нивните трошоци и за претрпената штета.

Пресудата ќе има далекусежни последици, оти, според нивниот адвокат, прифаќајќи ја тужбата од петмината работници, судот во Стразбур го утврди принципот според кој сите поранешни вработени, а не само оние 369 што ги застапува пред Европскиот суд за човекови права, ќе може да си ги остварат правата.

Доколку сите 1.800 некогашни работници на гигантот за градежни машини тргнат по патот на своите колеги, тоа би можело Црна Гора да ја чини 80 милиони евра.

Петтемина работници се обратиле до судот во Стразбур жалејќи се дека владата на Црна Гора не ја почитувала одлуката во нивна полза што црногорските судови ја донеле уште во 2005 година.


Ќе се формираат заеднички истражни тимови во борба против криминалот во ЈИЕ


Подгорица, 21 септември, 2016 - 11:41 (META) 

Формирање на заеднички истражни тимови во Југоисточна Европа во борба против криминалот, е тема на дводневната конференција на обвинителствата од земјите во регионот што се одржува во Подгорица, соопшти Регионалниот совет за соработка (РCC).

– Загрижува фактот дека има меѓународни криминални групи, а нема заеднички истражни тимови. Поразително ако се знае дека меѓу криминалците постои поголема доверба, отколку меѓу оние што ги гонат – изјави главниот обвинител на Црна Гора, Ивица Станковиќ.

Тој се заложи за непосредна размена на информации, без формални и директни барања за спроведување истражни дејства, без упатување замолници, а сето тоа „врз база на протокол на Европската конвенција за правна помош во кривични постапки и врз основа на Конвенцијата на ООН за борба против транснационалниот криминал“.

– Регионалниот совет за соработка (РCC) ќе ги поддржи сите активности за формирање заеднички инструмент за сузбивање на организираниот криминал преку меѓусебни активности и работилници на заедничките истражни тимови, за да се подобрат директните контакти и размена на искуство – изјави Ивана Гораниќ од РCC.

Заедничката тимови се „услов без кој не се може“ во борбата против криминалот, додаде таа.

Дводневната конференција, на која учествуваат и високи претставници од македонското обвинителство, продолжува со размена на искуства и со можни контакт-точки во борба против перењето пари и финансирањето на тероризмот.

Конференцијата е во организација на Советодавната група на обвинители од ЈИЕ, Центарот за спроведување на закони во ЈИЕ и на Регионалниот совет за соработка, главно оперативно тело на земјите членки од Процесот за соработка во ЈИЕ (SEECP), каде што членува и Република Македонија.


По бурната ноќ со демонстрантите, мирно утро во Подгорица


Подгорица, 25 октомври, 2015 - 10:55 (META) 

Нередот во центарот на Подгорица по демонстрациите организирани од опозицискиот Демократски фронт, траеше до доцна во ноќта. Припадниците на специјалната антитерористичка единица ги растерувале демонстрантите и брутално се пресметувале со поединци и со групи, пренесува црногорскиот медиум „Вијести“.

Во Подгорица утринава е мирно. Протестите кои почнале во 19 часот, по неколку часа се претвориле во судир на демонстрантите со полицијата, која со солзавец и со шок-бомби ги растерувала учесниците. Во градот се слушале и пукотници.

Според министерството за внатрешни работи на Црна Гора, демонстрантите врз полицијата фрлале камења и молотови коктели.

На улицата Слобода, каде што се одржувале протестите, искршени се повеќе излози и три семафори на крстосницата кај хотелот „Хилтон“.

За време на судирите, приведен е и еден од лидерите на опозицијата, Андрија Мандиќ, како и пратеникот Славен Радуновиќ.

Во демонстрациите учествувале околу 6.000 луѓе, повредени се 20 полицајци, а 27 граѓани побарале лекарска помош.

Демонстрантите бараа оставка од владата на Црна Гора и од премиерот Мило Ѓукановиќ.