СДСМ и коалицијата ќе ја поддржат Ангеловска Бежовска за гувернерка на Народна банка


Скопје, 17 мај, 2018 - 12:30 (META) 

Пратеничката група на СДСМ и коалицијата в понеделник на координација ќе го разгледаат предлогот на претседателот Ѓорге Иванов, вицегувернерката Анита Ангеловска Бежоска да биде новата гувернерка на Народната банка.

Координаторот Томислав Тунтев рече дека пратеничката група на СДСМ и Коалицијата, позитивно гледаат на новиот предлог на Иванов.

„Лично сметам дека Ангеловска Бежоска, која што е докажан експерт и професионалец во својата област, ја заслужува нашата поддршка. Само да потсетам дека лани летото ние како пратеничка група го искажавме нашиот афирмативен став и ја дадовме нашата поддршка за Анита Ангеловска Бежоска, кога го поддржавме и гласавме за нејзиниот реизбор на функцијата вицегувернерка. Имајќи ја предвид нејзината импозантна биографија, богатото искуство и нејзините професионални постигнувања, воопшто не се сомневам дека генералниот став на нашата пратеничка група во врска со овој предлог ќе остане непроменет – дека ќе биде позитивен и дека само ќе биде потврден на претстојната координативна средба на пратеничката група“, рече Тунтев.

Тој додаде дека станува збор за исклучително значајна позиција, поради што личноста што ќе застане на чело на НБРМ мора да произлезе преку здрав и аргументиран дијалог помеѓу највисоките државни функционери, за да се дојде до заедничко прифатливо решение за гувернер.

„На позицијата гувернер потребно е да застане човек кој ќе ја гарантира независноста на институцијата, кој ќе се грижи за развој и унапредување на банкарскиот систем и за финансиската стабилност на државата, и кој ќе работи исклучиво во интерес на граѓаните“, додаде тој.


Околу осум илјади компании може да ја искористат државната финансиска помош


Скопје, 7 мај, 2018 - 13:26 (META) 

Mинистерката без ресор задолжена за странски инвестиции, Зорица Апостолска оцени дека околу осум илјади компании би можеле да ги исполнат условите за користење на владината финансиска поддршка.

„Првичната бројка на компании кои можеа да ги искористат предвидените средства од државата беше седум илјади, но со олабавувањето на законската можност што помина во Собранието, бројката барем од сегашна перспектива, ќе изнесува осум илјади“, одговори Апостолска на новинарско прашање во Стопанска комора на Македонија, пред презентацијата на новиот пакет мерки пред италијанските инвеститори.

Таа исто така додаде дека се враќа интересот на италијанските компании за инвестирање во државата.

Првите два месеци од годината, вкупната трговска размена помеѓу Македонија и Италија е 104,72 милиона американски долари. Италија е шести најголем трговски партнер на Македонија.


Матис до Шекеринска: Не сакаме да ве видиме запрени пред вратите на НАТО


Вашингтон, 1 мај, 2018 - 18:58 (META) 

Македонија и САД имаат цврсто стратешко партнерство. САД ги ценат чекорите кои Македонија ги презема кон НАТО и не сакаат да ја видат Македонија запрена пред вратите на Алијансата, е порака од официјалната средба на министерката за одбрана на Република Македонија, Радмила Шекеринска, со американскиот секретар за одбрана, Џејмс Матис, во Пентагон.

Матис на почетокот од средбата потсетил на зборовите на министерката Шекеринска на состанокот на министрите за одбрана на НАТО, околу предизвиците со кои се соочува Западот.

-Бевте убедлива и вашите зборови доминираа во дискусијата, силно потсетувајќи нè на нашата одговорност да ги одбраниме демократските вредности – рече Матис.

Тој додал дека САД ги ценат обврските кои Македонија ги презема како партнер на НАТО – испраќањето на војници во мисијата „Одлучна поддршка“ во Авганистан, придонесот кон коалицијата за пораз на ИСИС, како и решителната одлука да се издвојуваат 2% од БДП за одбраната.

-Ние ги цениме вашите напори. Тие ја афирмираат одлукатa на НАТО во Букурешт во 2008, Македонија да добие покана за членство ‘веднаш штом ќе се постигне заеднички прифатливо решение на прашањето за името’ со Грција. Ја поздравуваме вашата работа со Грција на разрешувањето на ова прашање и се надевам дека наскоро ќе има резултати. Не сакаме да ве видиме запрени пред вратите на НАТО. Денешната безбедносна состојба бара дух на пријателство меѓу сите оние кои се залагаат за слобода, основни човекови права и владеење на правото – рече Матис.

Шекеринска се заблагодарила за цврстата поддршка што Македонија ја добива од САД и потсетила на силниот консензус во државата од нејзиното осамостојување, за членство во НАТО.

-Дозволете ми да ве уверам дека Македонија е подготвена за членство во НАТО. Ние брзо се опоравивме од долгата политичка криза и по еден силен реформски залет, на нас се гледа како на извор на надеж на Балканот. Започнавме важни одбранбени реформи и го зголемивме нашиот придонес во мисијата предводена од НАТО во Авганистан. Докажавме дека сме посветен и сигурен партнер. Наша цел е да бидеме и таков сојузник. Затоа, дозволете ми да ја побарам вашата поддршка како стратешки партнер на нашето членство во НАТО. Поканата за Македонија во јули годинава ќе нè поддржи во нашата стратешка цел, ќе му помогне на регионот во градењето на долготрајна стабилност и ќе ги зголеми влијанието и подготвеноста на САД и НАТО – рече Шекеринска.


Имате поддршка и пријателство од Велика Британија, му пиша Џонсон на Димитров


Лондон, 27 април, 2018 - 15:43 (META) 

Министерот за надворешни работи на Велика Британија, Борис Џонсон, со писмо му ја честиташе на својот македонски колега Никола Димитров 25-годишнината од воспоставувањето на дипломатските односи помеѓу двете земји. Тој ја потврди поддршката и пријателството од Велика Британија и изрази надеж дека партнерството на двете држави ќе биде уште посилно во наредните години.

„Среќен сум што имам можност да одбележам 25 години од воспоставувањето на дипломатските односи помеѓу Британија и Македонија. Во поново време, Велика Британија и Македонија соработуваа на Единбуршкиот самит во 1992 година, кога се решаваа проблеми околу признавањето на вашата земја. Британските мировни трупи стационирани во Македонија помогнаа да се постигне договор за прекин на огнот во 2001 година, а во 2005 година, Велика Британија помогна Македонија да добие кандидатски статус за членство во Европската Унија“, вели тој во писмото.

Џонсон додава дека оваа година ќе биде особено важна за двете земји – Велика Британија се подготвуваа за идната улога надвор од Европската Унија, додека Македонија, вели Џонсон, продолжува со амбициозните реформи и со барање решение за спорот за името со Грција.

„Радосен сум што ја потврдувам поддршката и пријателството од Велика Британија. Значително ја зголемуваме техничка помош на Македонија и едвај чекаме да се видиме на самитот на земјите од Западен Балкан во јули. Се надевам дека нашето партнерство само ќе расте во годините што следат“, се вели во пораката на Борис Џонсон.


Ердоган на средбата со Џафери го потврдил ставот за употребата на уставното име


Анкара, 20 април, 2018 - 10:07 (META) 

Претседателот на Собранието, Талат Џафери, во рамките на официјалната посета на Турција, се сретнал со претседателот Реџеп Таип Ердоган во Анкара.

Ердоган ја нагласил поддршката на Турција за интеграција на Македонија во НАТО, како и принципиелниот став во однос на употребата на уставното име на Република Македонија.

„Тој подвлече дека Турција беше една од првите држави што ја призна нашата земја под нејзиното уставно име, таа прва отвори амбасада и назначи амбасадор во земјата. Истовремено, турскиот претседател се осврна на потребата за интензивирање на економската соработка, реафирмирајќи ја заложбата годишната трговска размена меѓу Турција и Македонија да се искачи на една милијарда долари“, информираат од кабинетот на Џафери.

На средбата, меѓудругото, станало збор и за потребата од интензивирање на соработката во борбата против тероризмот, при што било нагласено дека Македонија го осудила обидот за државен удар во Турција и ги поддржува демократски избраните институции.

„На крајот од средбата, заеднички беше нагласено значењето на меѓупарламентарната соработка и парламентарната дипломатија за билатералните и мултилатералните односи, во однос на унапредувањето на политичкиот дијалог и зголемувањето на динамиката на севкупната соработка меѓу земјите“, се додава во соопштението.


Стејт департмент: САД ја подржуваат интеграцијата на Македонија во ЕУ и НАТО


Вашингтон, 19 април, 2018 - 14:47 (META) 

Американскиот Стејт департмент дава безрезервна поддршка за евроатлантската иднина на Македонија, откако земјата доби неусловена препорака од Европската комисија за започнување на преговори за членство во ЕУ.

На прашањето од МИА како САД ги оценуваат напорите на новата македонска Влада за подлабоки реформи и демократизација на општеството, од Стејт департментот велат дека САД продолжуваат да работат со Македонија на овие предизвици.

„Со Владата работиме на спроведување на судските реформи и владеењето на правото, слободата на медиумите и одговорно владеење. САД остануваат верен пријател и партнер на Македонија и ја подржуваме евроатланската иднина на земјата“, велат од Стејт департментот.

Од таму додаваат дека даваат и силна поддршка на возобновените разговори под покровителство на ОН за спорот со името на Македонија и очекуваат разрешување на оваа долготрајна причина за раздор помеѓу Грција и Македонија.

„Ги охрабруваме двете земји да демонстрираат потребна флексибилност и креативност за да се најде заеднички прифатливо решение во интерес на безбедноста, економскиот развој и мирот во регионот“, се вели во изјавата од Стејт департментот.


Заев: Германија дава поддршка за реформите и за решение за спорот за името


Скопје, 12 април, 2018 - 13:56 (META) 

Премиерот Зоран Заев денеска се сретна со делегација од Бундестагот на Република Германија, предводена од Гунтер Крихбаум, претседавач со Комисијата за европски прашања во германскиот парламент, придружувани од амбасадорот на Германија во Македонија, Томас Герберих.

Од владината прес-служба информираат дека Крихбаум и пратениците од Бундестагот пренеле порака на охрабрување од Република Германија, за важните чекори што ги презема Република Македонија во реформскиот процес и во надминувањето на билатералните прашања, што ќе ги отворат перспективите на државата.

Претставниците на германскиот Бундестаг изразиле поддршка за реформските закони, како и за разговорите помеѓу шефовите на дипломатиите на Република Македонија и на Република Грција во Охрид во насока на изнаоѓање решение на прашањето што стои на патот на интеграциите на државата.

-Почнуваме со носењето на реформските закони значајни за обезбедување независно судство, владеење на правото, професионални медиуми, или општо земено, со пакетот реформски закони, направени според препораките на Европската комисија и експертската група на Рајнхард Прибе. Низ инклузивните политики, нашата цел е да обезбедиме функционални институции во служба на сите граѓани. Исто така, од министерската средба во Охрид очекувам потврда на напредокот во разговорите, низ, коишто, верувам, сме на пат да го решиме долгогодишниот спор. Интеграциите во ЕУ и НАТО за Република Македонија се стабилност, безбедност и економски развој – рече Заев.

На средбата се разговарало и за отворените можности за унапредување на соработката меѓу бизнис заедниците на државите, во здравството, како и во други области значајни за граѓаните.


Предлог-законот за финансиска поддршка на инвестициите денеска на собраниска комисија


Скопје, 4 април, 2018 - 10:11 (META) 

Предлог-законот за финансиска поддршка на инвестициите денеска ќе се разгледува на седница на Комисијата за економски прашања на Собранието, која започнува во 13.30 часот.

Овој предлог-закон овозможува државна финансиска поддршка за нови инвестиции и нови подобро платени работни местa, технолошки развој и внесување на иновации на компаниите, со што ќе се зголеми конкурентноста на македонските компании, а целта е да се зголеми извозот и да се постигнат повисоки стапки на економски пораст.

„Со Законот се овозможува примена на мерките од првиот и вториот столб од Планот за економски пораст, усвоен од Владата во декември 2017 година.  Планот за економски пораст е креиран во соработка со Стопанските комори, академската заедница и невладиниот сектор, се организираа повеќе активности и јавни трибини на кои се дискутираше за мерките од планот, а Законот со кој се планира да се имплементират мерките беше јавно достапен на увид на целата јавност и преку Единствениот електронскиот национален регистар на прописи (ЕНЕР)“, информираат од Влада.


Мицкоски: ВМРО-ДПМНЕ гарантира стабилно мнозинство ако се отфрли законот за јазици


Скопје, 12 март, 2018 - 16:43 (META) 

Жалам што за вакво крупно прашање како Законот за јазиците не се земаат предвид аргументите и фактите, туку практично се погазува Уставот и по секоја цена се обидува да се донесе закон кој не е уставен, вели лидерот на ВМРО-ДПМНЕ, Христијан Мицкоски во неговото видео обраќање до јавноста.

Според него, не е возможно законот да се донесе по демократски пат, а без притоа да се прекрши Деловникот на Собранието и да не се изврши упад во процедурите, бидејќи, како што вели, ВМРО-ДПМНЕ нема да отстапи од 36-те илјади веќе поднесени и прифатени амандмани.

– Бидејќи ваков клучен закон се настојува да се донесе без дебата и разговор со опозицијата, да се игнорираат забелешките од претседателот на државата, само за да се задоволат одредени политички апетити јасно е за каков случај на пазарење на сметка на уставот и законот имаме. Уште еднаш повторувам дека Зоран Заев ќе ја има поддршката на ВМРО-ДПМНЕ во обезбедувањето на парламентарно мнозинство, и стабилноста на владата само да не потпаѓа под уцените кои се на штета на државата и да не го донесе неуставниот закон – вели Мицкоски.

Според лидерот на ВМРО-ДПМНЕ Македонија не смее да функционира по принцип на преседани и смета дека доколку се прекршат процедурите за носење на ова законско решение, тоа ќе значи воспоставување на нова незаконска практика и таа ќе биде применувана во иднина.


Заев – Марфи: Македонија се движи во правилна насока на патот кон НАТО и ЕУ


Скопје, 11 март, 2018 - 23:08 (META) 

Премиерот Зоран Заев се сретна со членот на Сенатот на САД, Крис Марфи и со американската делегација кои беа придружувани од амбасадорот Џес Бејли.

Како што соопшти владината прес служба, на средбата било констатирано дека Македонија се движи во правилна насока низ реформските процеси и низ чекорите на градење пријателства со соседите на патот кон НАТО и кон ЕУ.

Сенаторот од САД, Марфи ги охрабрил премиерот Заев и Владата да ги понесат позитивните промени за иднината на Македонија и истакнал дека САД остануваат нејзин искрен пријател.

Заев, во име на граѓаните на Македонија и на Владата, му се заблагодарил на сенаторот Марфи за целата поддршка и помош што ја добиваат од САД, во важните демократски процеси.

– Застанавме цврсто за концептот едно општество за сите, во што ја градиме Република Македонија. Се посветивме силно на реформите во државата и на конкретни исчекори во добрососедските односи. Водиме инклузивни политики на дијалог и разбирање. И очекуваме дека тоа ќе биде вреднувано и вратите на НАТО и ЕУ да се отворат за Република Македонија – рекол Заев.

Сенаторот Марфи и амбасадорот Бејли имаа средба и со претседателот на ВМРО-ДПМНЕ Христијан Мицкоски на која според партиското соопштение станало збор „за продлабочување на меѓусебното пријателство и надградување со нови форми на соработка во насока на исполнување на стратешките интереси на државата, како и за актуелната општествено политичка ситуација“.

Мицкоски на Марфи и Бејли им посочил дека „во САД гледа пријателска држава која треба да ги поддржи напорите за членството во НАТО“.