!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Борисов телефонски му честиташе на Заев за успешното спроведување на изборите


Скопје/Софија, 16 октомври, 2017 - 15:46 (META) 

Премиерот Зоран Заев денеска имал телефонски разговор со својот бугарски колега, Бојко Борисов, кој, како што соопштија од Владата, му го честитал на Заев успешното спроведување на локалните избори.

„Премиерот Борисов му го честиташе на премиерот Заев успешното спроведување на локалните избори во Република Македонија и истакна дека организацијата на изборите создаде услови во кои граѓаните можеа слободно, врз основа на сопствената политичка волја, да го реализираат правото на учество на изборите и да го дадат својот глас за политичката опција според нивниот избор“, стои во соопштението.

Бугарија, рекол Борисов, останува и понатаму доследна на поддршката за политиките на новата Влада на Македонија, посакал успех за земјава во иницијативите во регионот и изразил надеж и очекување дека наскоро Македонија ќе стане членка на НАТО и ќе ги почне преговорите за членство во Европската Унија.


Марковиќ – Заев: Пет средби за пет месеци, продолжува соработката за развој на регионот


Скопје, 16 октомври, 2017 - 13:52 (META) 

Одличната комуникација меѓу Македонија и Црна Гора е пример за добра билатерална соработка, изјави денеска во Скопје црногорскиот премиер Душан Марковиќ, на заедничката прес-конференција со претседателот на македонската Влада, Зоран Заев.

– Ова е петта средба во измениве четири-пет месеци, по таа во Брисел, Трст, Подгорица, Драч, а сега во Скопје. Применуваме нова практика за лидерите од Балканот, односно директни разговори и дијалог за доброто на сите – рече Марковиќ.

Тој истакна дека на средбата со Заев ја потврдиле посветеноста на целиот Балкан за интеграција во Европската Унија и во НАТО. Тој рече дека Црна Гора, како најмлада членка на Северноатлантската алијанса, силно ќе ги поддржи апсирациите на Македонија за членство во НАТО и ќе ги сподели искуствата од преговорите со ЕУ кои треба да помогнат за побрза интеграција.

Црногорскиот премиер најави серија билатерални договори и зачестени посети на високо ниво. Во тој контекст, рече дека во ноември министрите за одбрана и за надворешни работи на Црна Гора ќе допатуваат во Скопје.

Заев рече дека на средбата е разговарано за продлабочување на билатрелната соработка во областа на образованието, здравството, туризмот и технологиите, а најави и можост за воспоставување директен лет од Скопје до Подгорица.

– По Трст и Драч, покажуваме дека продолжува соработката за развој на регионот – рече Заев.


Заев: Изборите в недела ќе бидат новиот 11 Октомври за Прилеп и за Македонија


Прилеп, 11 октомври, 2017 - 23:08 (META) 

Кога секому е јасно дека Никола Груевски е минато, недозволиво е Прилеп да остане неосвестен. Прилеп прв се освестил кога требало, тука пукнала првата пушка, затоа 15 октомври ќе биде новиот 11 Октомври за Прилеп и за Македонија, а јас сум убеден дека Прилеп повторно ќе крене востание и повторно ќе победи. Ова вечерва го порача лидерот на СДСМ и премиер, Зоран Заев, од партискиот митинг во Прилеп.

Тој истакна дека потребни се чесни политичари на централно и на локално ниво, бидејќи само така Македонија ќе оди напред.

Претходната власт на ВМРО-ДПМНЕ, рече Заев, 11 години ширела лажен патриотизам и давала ветувања кои никогаш не биле исполнети.

– Со сите пет соседи бевме скарани. За четири месеци не само што изградивме пријателства со сите соседи, туку тие ни станаа сојузници. Со пријателство Македонија ќе оди напрад. Македонија ќе биде 30. членка на НАТО и ќе почне преговори со Европската Унија. И со Грција, која има проблем со нашето уставно име, изградивме пријателство. Македонија ќе го реши проблемот и ќе бидеме горди Македонци и ќе покажеме на сите дека Македонија може да решава проблеми со пријателство и со добар дух – рече Заев.

Тој вети целосна поддршка од централната власт и од Собранието за проектите за развој на Прилеп.

– Определба на Владата е да ја продолжиме децентрализацијата. Имаме намера социјалната заштита и здравствените домови да бидат под локалните власти. Прилеп ќе ја добие мојата и поддршката на Владата и на Собранието. Ќе стоиме и јас, и Владата и Собранието зад гасификација на Прилеп, зад нов модерен театар, зад регулирање на депониите, зад водоводи… – рече Заев.


Захариева: Спроведете ги реформите поради граѓаните, не само поради членството во ЕУ


Будимпешта, 11 октомври, 2017 - 17:49 (META) 

„Стабилноста и просперитетот на Западен Балкан е долгогодишен надворешно-политички приоритет на Бугарија и ќе биде во фокусот на бугарското претседателство со ЕУ. Апелот до нашите пријатели е: Спроведете ги реформите поради вашите граѓани, не само поради идното членство во ЕУ“, истакна министерката за надворешни работи на Бугарија, Екатерина Захариева, на денешниот состанок на министрите за надворешни работи на земјите од Вишеградската група и на Западен Балкан, во Будимпешта.

Како што јави бугарската агенција БТА, министрите присутни на годинешниот состанок во Будимпешта, што се одржа во рамките на унгарското претседавање со Вишеградската група, ѝ додоа целосна поддршка на Захариева за побрза интеграција на регионот во Европската Унија за време на бугарското претседателство со Советот на Унијата, во првата половина на следната година.

– Без Западен Балкан во ЕУ нема да биде завршен европскиот проект и Европа нема да биде доволно стабилен и безбеден континент. Нашата цел е на самитот на ЕУ во Софија следната година да имаме јасен план за секоја од балканските земји. Ние сме балканска држава и јас се гордеам со тоа. Ако ја оставаме историјата во минатото, ако гледаме напред во иднината и сме чесни и отворени за проблемите, тогаш многу побргу ќе постигнеме напредок – рече Захариева.

Таа додаде дека покрај политичката поддршка за шесте земји од Западен Балкан (Србија, Македонија, Босна и Херцеговина, Црна Гора, Албанија и Косово), кои сакаат да станат членки на ЕУ, треба да им се овозможи и техничка и експертска помош во преговарачкиот процес.

Шефот на романската дипломатија, Теодор Малекшану, на состанокот истакна дека Договорот за пријателство меѓу Бугарија и Македонија е пример за целиот регион.

Министерот за надворешни работи на Унгарија, Петер Сијарто, кој е домаќин на форумот во Будимпешта, претходно истакна дека неговата земја се залага Македонија и Албанија да добијат датум за почнување преговори најдоцна во првиот квартал од 2018 година.

На министерскиот состанок во Будимпешта учествуваше и шефот на македонската дипломатија, Никола Димитров.


Заев од Тетово: Иднина има само заедничка, а не „чиста“ Македонија


Тетово, 5 октомври, 2017 - 21:46 (META) 

„’Чиста’ Македонија нема иднина. Иднина има само заедничка Македонија. Тоа е нашето богатство и тоа богатство треба да го искористиме, зашто е наша предност, а не слабост“, порача лидерот на СДСМ и премиер, Зоран Заев, на вечерашниот митинг во Тетово.

– Мораме да живееме заедно и Тетово е пример за тоа. Ги отворивме сите теми, затоа што ако не ги отвориме, тие ќе бидат злоупотребувани од политичарите. Продолжете да го поддржувате концептот на заедничка Македонија. Да ги заокружиме промените во Македонија и да ги испратиме Груевски и режимот во историјата – рече Заев.

Тој истакна дека СДСМ ќе ѝ ја даде поддршката на актуелната градоначалничка на Тетово и кандидатка за претстојните избори од ДУИ, Теута Арифи, и ја побара поддршката на тетовци за советничката листа на СДСМ.

Заев потсети на мерките што Владата ги реализира изминатите четири месец, истакнувајќи го напредокот и подобрувањето на односите со сите земји соседи на Македонија, кои, како што нагласи, биле нарушени од претходната власт.

– Не можете да бидете скарани со сите пет соседи. За четири месеци ги унапредивме и ги отворивме перспективите со сите соседи. Бугарија е прв сојузник на Македонија која ќе стори сè Maкедoнија да стане дел од НАТО и да ги почне преговорите за членство во Европската Унија, за време на нејзиното претседавање со ЕУ. Со Србија, и покрај сите недоразбирања, отворивме одлична соработка. Градиме пријателство и со Грција. Јас ви ветувам дека ќе најдеме решение за проблемот (со името) и притоа ќе останеме сите горди граѓани на Македонија – рече Заев.

Тој најави повеќе проекти за развој на економијата, инфраструктурата, културата, спортот и на образованието во Тетово, кои, како што истакна, ќе добијат поддршка од централната власт.

– Тетово е една од најголемите општини во Македонија и треба да добие најголема поддршка од централната власт. Ветувам дека Тетово ќе блеска – порача Заев.

Претходно денеска Заев и градоначалничката на Тетово, Теута Арифи, ја посетија гимназијата „Кирил Пејчиновиќ“, од каде најавија доградба на објектот, а ја посетија и Мала Речица, каде е предвидена изградба на ново основно училиште.


Каталонија бара поддршка од ЕУ за референдумот за независност


Брисел, 28 септември, 2017 - 16:20 (META) 

Европската Унија би требало да ја исполни својата должност како ризница на демократските вредности, така што ќе и укаже на Шпанија да дозволи одржување на референдумот за независност на Каталонија, изјавил во Брисел Раул Ромева, министерот за надоврешни работи на регионалната каталонска влада, јавуваат светските агенции.

„Ги повикуваме европските институции да ги поддржат вредностите и принципите. Се кршат граѓанските права и квалитетот на демократијата во Шпанија е паднат“, истакна Ромева на прес-конференција.

Со избегнувањето да повикаат на дијалог се добива впечаток дека Европската комисија ги поддржува „репресивните мерки“ на Мадрид, бидејќи се апсат функционери на регионалната влада, градоначалници и новинари, додал Ромева.

Според него, институциите на ЕУ мора да разберат дека референдумот е „големо прашање“.

Ромева побара поддршка од Брисел еден ден откако каталонскиот претседател Карлес Пуџдемон го обвини ЕУ дека им свртела грб на Каталонците во спорот со шпанската централна влада.

Комисијата во Брисел, како што јавуваат агенциите, соопштила дека го почитува уставниот поредок на Шпанија.

Шефот на каталонската дипломатија ја обвинил шпанската влада дека врши притисок на каталонските официјални претставници референдумот да не се одржи.

Ромева рекол дека не очекува насилство, додавајќи дека не е во гените на Каталонците со насилство да ги решаваат политичките проблеми.

Референдумот за независноста на Каталонија, кој шпанските власти го сметаа за нелегален, е закажан за в недела.


Давутоглу на средбата со Заев: Иднината на Македонија е во НАТО


Скопје, 27 септември, 2017 - 19:01 (META) 

Македонија веќе е успешна приказна и иднината на земјата е во НАТО, порачал поранешниот премиер на Турција и актуелен пратеник во турскиот парламент, Ахмет Давутоглу, на средбата со премиерот Зоран Заев.

– Република Македонија веќе е успешна приказна, бидејки прогресот е видлив, државата е клучен фактор за стабилноста на Балканот и продолжете да работите со енергичната посветеност на реформите, вашата иднина е во НАТО – рекол Давутоглу, кој е во посета на земјава.

Премиерот Заев на средбата истакнал дека Владата е определена кон реформскиот процес, „значаен за квалитетен живот на граѓаните, како и за интеграцијата на Македонија во Европската Унија и во НАТО“.

На средбата заеднички било констатирано дека членството во НАТО ќе значи дополнителна стабилност на државата и отворање можности за инвеститорите, што ќе придонесе за зголемување на стандардот на граѓаните и за пораст на економијата во Македонија.

Заев и Давутоглу, како што стои во соопштението на владината прес-служба, разговарале и за интересот на турски бизнисмени за инвестирање во Македонија.


Готемелер: Приемот на Црна Гора во НАТО значи дека вратите се отворени и за Македонија


Брисел, 27 септември, 2017 - 17:04 (META) 

Членките на НАТО и на меѓународната заедница беа престрашени од насилството во парламентот во април оваа година и го поздравуваме прогресот што е направен оттогаш, изјави заменичката на генералниот секретар на НАТО, Роуз Готемелер, на заедничката прес-конференција со министрите за одбрана и за надворешни работи на Македонија, Радмила Шекеринска и Никола Димитров, кои се во посета на седиштето на НАТО во Брисел.

Таа потсети на пораката на генералниот секретар на Алијансата, Јенс Столтенберг, по средбата со премиерот Зоран Заев во јуни годинава, дека сега е важно сите страни да ги надминат разликите и да работат конструктивно „за имплементирање на потребните реформи, преку засилување на доброто владеење и владеењето на правото во мултиетничкото општество“.

– На оваа предизвикувачка реформска агенда ѝ се потребни време и напор, но реформите ќе бидат од корист за земјата кон достигнување на евро-атлантските цели – рече заменичката на Столтенберг.

Готемелер посочи дека фактот што Црна Гора стана 29. членка на НАТО, покажува дека вратите на НАТО се отворени и дека Алијансата продолжува со поддршката на Македонија на нејзиниот пат кон членството во НАТО.

Министрите за одбрана и за надворешни работи, Шекеринска и Димитров денеска во седиштето на НАТО учествуваат на состанокот на Северноатлантскиот совет со Република Македонија.

Шекеринска на прес-конференцијата рече дека Македонија е одлучна да се врати на патот на реформите и на патот кон членство во Европската Унија во НАТО. Таа истакна дека Македонија од 2018 година ќе го зголеми буџетот за одбраната за 0,2 отсто и дека за 20 отсто ќе го зголеми учеството во мисијата „Одлучна поддршка“ на НАТО во Авганистан.

Шефот на македонската дипломатија истакна дека во седиштетот на НАТО се чувствува како дома и оти очекува тоа наскоро да биде дом и на Македонија.

– Земјата одлучи да инвестира во демократија за ништо како последните години да не се случи повторно. Ние сакаме слободни медиуми, функционален парламент, судиите да судат независно и антикорупциската комисија да функционира за земјата да биде повеќе како земјите членки на НАТО и да гради вредности како нивните. Ние ќе ја убедиме Алијансата дека има повеќе причини зошто Македонија треба да е 30. членка на НАТО – рече Димитров.


Гутереш охрабрува за надминување на спорните прашања


Њујорк, 22 септември, 2017 - 19:08 (META) 

„Македонија е еден од најпозитивните примери за меѓукултурен, меѓурелигиски и меѓуетнички соживот. Ја цениме улогата што ја има вашата држава во регионот како фактор што го помага разбирањето и дијалогот меѓу државите. Македонија има голема поддршка од Обединетите нации и таа ќе продолжи и во иднина“, порачал генералниот секретар на ОН, Антонио Гутереш на средбата со премиерот Зоран Заев во Њујорк.

Генералниот секретар на ОН, како што соопшти владината прес-служба, на средбата истакнал дека е важно Македонија да обезбеди развој и изразил „охрабрување за надминување на спорните прашања, во насока на обезбедување на стратешките евроатлантски цели на Македонија“.

Премиерот Заев на средбата нагласил дека Владата е силно посветена на потребните реформи за квалитетен живот на граѓаните и за отворање на перспективите на државата.

– Водиме инклузивни политики, ја градиме Македонија во едно општество за сите граѓани низ мултиетничка кохезија, развиваме добри односи со соседите, градиме пријателства на меѓународен план и се надеваме дека со тоа даваме позитивен пример за целиот регион. Договорот меѓу Република Македонија и Република Бугарија е доказ дека отворените прашања се надминуваат таму каде што постои политичка волја за тоа – рекол Заев, додавајќи дека интеграциите на Македонија во ЕУ и во НАТО се иднината на државата.

Заев истакнал дека Македонија ги поддржува активностите за реформа на Обединетите нации, што ги спроведува Гутереш, и го поканил генералниот секретар на ОН да го посети регионот и Македонија.


Заев ќе се обрати пред Генералното собрание на ОН


Њујорк, 22 септември, 2017 - 10:21 (META) 

Премиерот Зоран Заев денеска ќе се обрати пред Генералното собрание на Обединетите нации во Њујорк и ќе се сретне со генералниот секретар на ОН, Антонио Гутереш, соопшти владината прес-служба.

На денешната агенда на македонскиот премиер е предвидена средба со вицепремиерот и министер за надворешни работи на Виетнам, Фан Бин Мин, како и кратка средба со премиерот на Непал, Шер Бахадур Деуба, на приемот по повод националниот ден на оваа земја.

Заев денеска ќе има и обраќање на конференцијата „Нов старт на Балканот“, во организација на УНДП.

Претседателот на македонската влада вчера имал средба со премиерот на Кралството Холандија, Марк Руте, кој дал поддршка на реформскиот процес што го почна Владата и ги поздравил чекорите што ги презема државата за градење на добрососедски односи и регионална соработка.

Руте истакнал дека Холандија останува силен поддржувач на Македонија во заложбите на нашата држава за постигнување на стратешките цели, членство во Европската Унија и во НАТО.

Заев на средбата посочил дека очекува есенва да се тргне условеноста на препораката за членство на Македонија во ЕУ, а следен чекор да биде датум за почеток на преговори.