!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Делегација на СДСМ оддаде почит на претседателот Киро Глигоров


Скопје, 1 јануари, 2017 - 15:28 (META) 

Делегација на СДСМ положи цвеќе и оддаде почит на првиот претседател на независна и суверена Република Македонија, Киро Глигоров, денеска, на петгодишнината од неговата смрт.

– СДСМ, како и сите граѓани на Македонија, со достојна почит ги вреднува заложбите и придонесот на претседателот Глигоров, кој градеше мостови на соработка во нашата држава и во светот, со што ги отвори перспективите за граѓаните и за Република Македонија – се вели во соопштението на СДСМ.


Почина канадскиот пејач, поет и уметник Леонард Коен


Монтреал, 11 ноември, 2016 - 10:15 (META) 

Вчера, на 82-годишна возраст, почина канадскиот пејач, текстописец и поет Леонард Коен. Веста за неговата смрт е објавена на официјалниот фејсбук-профил на музичарот, но не се наведени детали околу причините за смртта.

„Со длабока тага соопштуваме дека почина легендарниот поет, текстописец и уметник Леонард Коен“, стои во соопштението.

Канадскиот премиер Џастин Трудо му оддаде почит на пејачот, кој беше еден од највлијателните музичари и текстописци, кој со својот впечатлив баритон раскажуваше приказни за љубов, смрт, омраза, војна и за мир.

„Со длабока тага ја примив веста за смртта на легендарниот Леонард Коен. Тој ќе остане запаметен по своите груби вокали, карактеристичниот хумор и прогонувачките лирики кои ги направија негови песни омилени за многу генерации“, изјавил Трудо, пренесува „Би-би-си“.

Коен се појави во 1960-тите години, заедно со други музчки легенди, меѓу кои и годинешниот добитник на Нобеловата награда за литература, Боб Дилан, и неговиот сонародник Џони Мичел.

Во петдецениската кариера Коен објави 14 студиски албуми, од кои последниот, насловен „Сакавте помрачно“ (You Want It Darker), минатиот месец.

Во 2008 година канадскиот музичар беше примен во „Рокенрол холот на славните“.


Делегација на МВР оддаде почит на пилотите што загинаа кај Струмица


Скопје, 10 јули, 2016 - 17:52 (META) 

Делегација на Министерството за внатрешни работи, денеска оддаде почит на загинатите пилоти Драги Мицев, Иљо Лопатички, Марјан Трајковиќ и Тоде Орешков на спомен-обележјето во аеродромската база Брест во Петровец, соопштија од МВР.

Делегацијата на МВР била придружувана од семејствата на трагично загинатите пилоти.

Хеликоптерската несреќа се случи на 10 јули 2014 година кај Струмица.


Знамето на САД на половина копје до четврток на зајдисонце


Вашингтон, 13 јуни, 2016 - 12:25 (META) 

Претседателот на Соединетите Американски Држави, Барак Обама, денеска издаде наредба знамето на САД на Белата куќа, сите јавни згради, бродови на американската морнарица, амбасади и конзуларни преставништва во странство да бидат поставени на половина копје, во чест на жртвите од масакрот што се случи вчера во Орландо, а во кој животите ги загубија 50 лица.

Знамињата, како што стои во наредбата на претседателот Обама, ќе останат на половина копје до четврток, 16 јуни, на зајдисонце.

„Во знак на почит кон жртвите од терористичкиот напад изведен во недела на 12 јуни во Орландо, Флорида, во согласност со овластувањата што ги имам како претседател на Соединетите Американски Држави, во согласност со Уставот и со законите на САД, издавам наредба знамето на САД да биде спуштено на половина копје на Белата Куќа и на сите јавни згради и имоти, на воените објекти, морнарички бази и на сите пловила на морнарицата на Федералната влада во Округот Колумбија и низ целата територија на Соединетите Држави и териториите во нејзино владеење, сè до зајдисонце на 16 јуни 2016 година. Исто така, наредувам знамето да биде спуштено на половина копје, во истиот период, на сите амбасади на САД, конзуларни преставништва и други објекти во странство, вклучително и на сите воени објекти, бродови на морнарицата и бази“, стои во прокламацијата на претседателот Барак Обама.


Делегации на партиите и семејствата оддадоа почит на загинатите кај Карпалак


Тетово, 8 август, 2015 - 11:47 (META) 

По повод 14-годишнината од загинувањето на десетте припадници на македонските безбедносни сили, делегација на СДСМ, предводена од потпретседателката Фросина Ременски, и делегација од општинската организација на СДСМ од Тетово, денеска оддадоа почит и положија свежо цвеќе пред спомен-плочата кај месноста Карпалак.

На тој трагичен ден, животот го загубија: Нане Наумовски, Сашо Китаноски, Бранко Секулоски, Горан Миноски, Марко Деспотоски, Ердован Шабаноски, Љубе Грујоски, Дарко Велјаноски, Пеце Секулоски и Веби Рушидоски.

Венци цвеќе на Карпалак положија делегација на Владата, предводена од министерот за одбрана Зоран Јолевски, на Министерството за одбрана и на Генерал-штабот на чело со началникот на ГШ на АРМ, генерал-полковник Горанчо Котески, од Кабинетот на Претседателот на државата, семејства на загинатите, Општина Прилеп, повеќе здруженија на бранители, партиски делегации, како и други граѓани и здруженија.


Свеќа и почит за Васил Шишков


Скопје, 22 декември, 2014 - 12:30 (META) 

Група граѓани, пријатели и колеги на познатиот актер Васил Шишков, вечерва организираат достојно испраќање на уметникот, кој синоќа ненадејно почина.

Вечерва, во 19 часот, во паркот Жена-борец, ќе се соберат да му оддадат последна почит на актерот.