!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Потона брод во Јужна Кореја, 13 лица загинаа


Сеул, 3 декември, 2017 - 12:40 (META) 

Крајбрежната стража на Јужна Кореја соопшти дека 13 лица загинаа, а две лица се водат како исчезнати откако рибарски брод се судрил со брод за дополување гориво.

По сударот, рибарскиот брод потонал, а на него имало 22 лица, од кои седуммина биле спасени. Голем број хеликоптери се вклучени во потрагата по исчезнатите.

Секоја година во Јужна Кореја се случуваат голем број бродски несреќи. Пред три години настрадаа повеќе од 300 лица, од кои најголемиот дел ученици.


Тајфунот Демри усмрти 44 лица во Виетнам


Ханој, 6 ноември, 2017 - 10:56 (META) 

Силниот тајфун што го погоди Виетнам однесе најмалку 44 животи и предизвика голема материјална штета долж јужниот и централниот брег на оваа азиска земја.

Властите наведуваат дека 19 лица се водат како исчезнати по налетот на тајфунот Демри во саботата, вклучувајќи и деветчлен екипаж на товарен брод кој потонал кај покраината Нањ Хоа.

Повеќе од 116.000 куќи се урнати или оштетени откако тајфунот, втор по ред месецов, го погоди Виетнам и предизвика прекин на електричното напојување во регионот.


Во Нигерија од колера починале 14 лица


Абуџа, 3 септември, 2017 - 17:20 (META) 

На североистокот на Нигерија од колера починале 14 лица, а жртвите претежно биле раселени лица во прифатни центри кои побегнале поради насилствата на Боко харам.

Нигериското министерство за здравство соопшти дека до 1 септември умреле 14 лица и додаде дека околу 180 лица се заразени со колера.

Колерата е многу заразна болест од која може да се умре за неколку часа доколку на заразениот не му биде укажана лекарска помош. Симптомите се повраќање, дијареја, грчеви во мускулите и општа дехидрација на организмот. Обично се јавува во средини каде има лоши хигиенски услови.


Тројка бебиња починале на Клиниката за гинекологија и акушерство


Скопје, 23 август, 2017 - 14:50 (META) 

Три новороденчиња починале вчера на Универзитетската клиника за гинекологија и акушерство, соопшти Министерството за здравство.

Како што инфромираат оттаму, завчера на Клииката била хоспитализирана пациентката И.М., поради болки во стомакот, која истиот ден била породена со царски рез во 27-та недела од бременоста со тројка.

Новороденчињата биле прифатени од педијатар и акушерка во операционата сала, по што била извршена примарна реанимација и термостабилизација. Трите новороденчињата во инкубатор биле транспортирани на Одделението за интензивна неонатална нега и терапија. Следниот ден била констатирана смрт на сите три новороденчиња.

Министерството за здравство, стои во соопштението, веднаш по добивање на информациите формирало комисија за стручен надзор која детално ќе го испита случајот, со цел да утврди дали во целокупниот третман на родилката и новороденчињата е постапено согласно протоколите и медицината базирана на докази.

Истовремено е формирана комисиа и од страна на Државниот санитарен и здравствен инспекторат.


Едно лице почина во автобуската несреќа, a 28 се хоспитализирани


Скопје, 21 август, 2017 - 0:04 (META) 

Едно лице им подлегна на повредите, а 28 се хоспитализирани поради тешката сообраќајна несреќа која што се случи на патот Велес-Скопје, информираат од Министерство за здравство.

На Универзитетската клиника за хируршки болести „Св Наум Охридски“, се примени шест лица, од кои еден повозрасен маж е на интензивна нега, но е во стабилна состојба. Сите други пациенти се надвор од животна опасност.

„Во Општа болница Велес се примени четири пациенти и сите се надвор од животна опасност. Во клиничкиот центар „Мајка Тереза“ се донесени вкупно 17 пациенти од кои четири на КАРИЛ- еден пациент со абдоминално крварење, еден со сериозна торакална повреда и двајца со повреди на градниот кош. Еден пациент на Клиниката за детска хирургија е внесен итно на операција. Двајца пациенти се на Клиниката за неврохирургија и се примени на опсервација. Седум пациенти се на Клиниката за ортопедија, а тројца повредени се на опсервација во Ургентниот хируршки центар. Во Градската болница „8 Септември“ примен е само еден пациент со сериозни повреди, но е во стабилна состојба и надвор од животна опасност“, информираа од Министерството за здравство.


Извршена е дератизација и дезинфекција во Симница по двата смртни случаи


Скопје, 30 јули, 2017 - 18:26 (META) 

Комисијата за заразни болести при Министерството за здравство на 26 јули одржала итна седница поради двата смртни случаи од вирусна хеморагична треска, соопшти денеска Министерството за здравство.

Во соопштението се наведува дека стручен тим извршил епидемиолошки увид, анкета на домаќинствата на починатите, притоа е извршена дезинфекција и дератизација во домовите и во околината на починатите лица, земени се мостри од водата за пиење, извршена е едукација за лични превентивни мерки и совет за јавување на лекар при појава на први симптоми на болест.

Од анкетата со семејствата, добиена е информација дека починатите и поголем дел од семејството работеле и често престојувале на свое приватно бачило. Експертски тим излегол на терен и го посетиле бачилото во месноста наречена Буковиќ, во близина на преминот Стража.

„На бачилото не се затекнати ниту лица ниту овци. Извршена е дезинфекција во затворениот објект, во отворениот објект и во неговата непосредна околина како во близина на магацинот. Исто така, дезинфекција беше направена и на пошироката околина во самиот ограден простор и околу него“, се вели во соопштението од Министерството за здравство.

Од министерството соопштуваат дека Институтот за јавно здравје подготвил брошура за здравствените работници, но и за општата популација за едукација во врска со вирусните хеморагични грозници. Брошурата е објавена на веб-страницата на ИЈЗ, а е доставена и до центрите за јавно здравје за споделување со матични лекари и со други здравствени работници.


Таравари го смирува членството на ВМРО-ДПМНЕ и му порачува да не крева паника


Вашингтон, 29 јули, 2017 - 13:47 (META) 

Министерот за здравство, Арбен Таравари, денеска од САД им одговори на ВМРО-ДПМНЕ на барањето за оставка, порачувајќи им да престанат да шират паника.

„Одлучив да одговорам на барањето на ВМРО-ДПМНЕ, за моја оставка, поради тоа што сфатив дека не ја разбрале ситуацијава како што треба. Членовите на оваа партија, пред сè, ги гледам како граѓани на Македонија и имам должност во случај на паника да ги смирам. Другите граѓани на земјава ја разбрале состојбава и сфатиле дека сè е под контрола и одлучија да им веруваат на изјавите на армијата лекари. Не знам зашто поединци не можат да се смират“, напиша Таравари на својот профил на „Фејсбук“.

Таравари уште еднаш повторува дека трагичната случка со два смртни случаи од Гостиварско е резултат на акутна вирусна инфекција и е под контрола и дека седумте лица што биле во контакт со веќе починатите, се изолирани. Тој наведува дека лекарска должност е да им се помогне на сите.

„Потенцирам дека лекарите за разлика од луѓето на законот (судиите), треба да им помогнат на сите, а што е се однесува до законот, не можеме да ви помогнеме, секој ќе си одговара за тоа што го сторил во 11-годишното владеење на ВМРО ДПМНЕ, за добро или за лошо“, напиша Таравари.


ВМРО-ДПМНЕ: Две лица починаа поради негрижата на владата на Заев


Скопје, 29 јули, 2017 - 10:20 (META) 

За неполни два месеци владата на Зоран Заев дозволи две лица да починат поради нивната негрижа, обвини денеска опозициската ВМРО-ДПМНЕ.

„Заев и Таравари не се потрудија ниту да обезбедат реагенси за дијагноза на болеста, ниту обезбедија карантин, но затоа дозволија уште неколку лица да се заразат. Владата на СДС единствено се залагаше оваа вест да не стигне до македонската јавност, без притоа да се грижат за доброто на граѓаните“, стои во соопштението.

Од партијата наведуваат дека министерот за здравство, Арбен Таравари, преку видеопораката признал дека во време на ВМРО-ДПМНЕ пациенти не починувале од ваква болест.

– Таравари ја призна целата негрижа, неспособност и незнаење како да се справи со сериозна здравствена закана по граѓаните во Република Македонија. Неспособноста и неодговорноста на Таравари ја видоа и почувствуваа граѓаните на својот грб. Таравари нека престане да прави стратегии за односи со јавноста и да праќа честитки од луксузните хотели во Америка и нека се фати за работа. И како министер за здравство нека го спречи ширењето на оваа заразна болест во Гостивар и во Гостиварско“, велат од ВМРО-ДПМНЕ.

Според опозициската партија, двете жртви се директна последица на потценувачкиот однос на Таравари и затоа тој треба веднаш да понесе оставка.


Еден од починатите на Инфективна најверојатно имал корејска хеморагиска треска


Скопје, 27 јули, 2017 - 15:09 (META) 

Постариот од двајцата пациенти од Гостиварско кои починаа на Клиниката за инфективни болести во Скопје, за што вчера информираше Комисијата за заразни болести при Министерството за здравство, е жртва на вирусот хантаан, односно корејска хеморагиска треска, дознава неофицијално „Мета“ од извори во здравствените институции.

Во очекување на резултатите од анализите, односно официјална потврда за причините за смртта на двајцата пациенти, кои најверојатно се татко и син, во „Журнал за вирусологија“ – научно списание, се вели дека дека хантаан-вирусот е предизвикувач на корејска хеморагиска треска.

Вирусот на луѓето го пренесуваат глувци, претежно домашниот глушец, и тој се наоѓа во нивниот измет и урина. Луѓето со овој вирус се заразуваат при вдишување на тие честички. Самиот вирус е припадник на опасната група ханта-вируси.

На Клиниката за инфективни болести моментално со истите симптоми, односно со системски напад на повеќе органи, со треска и со проблеми со засирувањто на крвта, се хоспитализирани уште седум пациенти.

Заменик-министерот за здравство, Гоце Чакаровски, денеска изјави дека најдоцна до утре ќе бидат објавени официјално причините за смртта на двајцата гостиварци.

– Екипите вчера не успеаја да се качат до бачилото, бидејќи тоа е на непристапен терен. Денеска обезбедивме теренско возило. Нашите екипи се на терен. Комисијата за заразни болести заседава постојано. Се надевам дека до крајот на денот, најдоцна до утре, јавноста ќе добие конкретна информација за сите настани со дефинирани резултати за причинителите – изјави Чакаровски.


Пет лица починале од високите температури во Бугарија


Софија, 2 јули, 2017 - 10:19 (META) 

Пет лица починале вчера од топлото време, со екстремно висока температура во Бугарија. Температурата на одделни места во земјата достигнала до 44 Целзиусови степени, јавуваат бугарските медиуми.

Меѓу починатите бил и 75-годишен маж, кој излегол да трча во паркот во Софија и починал на самото место.

Екипите на итната помош во Софија вчера интервенирале на околу 200 повици од граѓани, а 18 лица колабирале, меѓу кои и деца на возраст од 13 и од 17 години.

Поголемиот дел од Балканот изминативе неколку дена е зафатен од топлотен бран, со екстремно висока температура. Намалување на температурата и посвежо време се очекува од денеска попладне.