!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Штипјанец пронајден мртов во својот стан


Штип, 26 јуни, 2017 - 13:24 (META) 

Педесет и петгодишниот К.Г. вчера околу 20.15 часот бил пронајден мртов во неговиот стан на улицата Стојан Гологанов во Штип, информираше денеска полицијата.

Засега нема информации за причините за смртта на штипјанецот, која била констатирана од страна на лекар.

Јавен обвинител, лекар патолог и екипа на СВР Штип извршиле увид на местото, а по наредба на јавниот обвинител телото на починатиот е дадено за обдукција.


Пронајдени двајца мртви мажи во Скопје, едниот бил во трафостаница


Скопје, 26 април, 2017 - 14:39 (META) 

Две мртви машки тела се пронајдени вчера во Скопје, од кои едното е на засега непознато лице, а било пронајдено во трафостаница, извести СВР Скопје.

Имено, вчера вработен во „ЕВН Македонија“ пријавил во полиција дека во подземна вклучена 10-киловолтна трафостаница, лоцирана во непосредна близина на Македонска опера и балет, пронашол безживотно тело на непознато машко лице.

Екипа на брза помош констатирала смрт, а увид извршиле јавен обвинител и увидна екипа на СВР Скопје. По наредба на јавен обвинител, телото на починатото лице е предадено во Институтот за судска медицина и за криминалистика за обдукција.

СВР Скопје вели дека се преземаат мерки  за утврдување на идентитетот на починатиот и за целосно расчистување на случајот.

Вториот случај бил пријавен вчера попладне, при што пријавувачот кажал дека пронашол починато лице во објект во изградба на улицата Сава Ковачевиќ. Смртта ја констатирала екипа на брза помош, а увидна екипа на СВР Скопје утврдила дека се работи за Г.Б. (27) од Скопје. По наредба на јавен обвинител на телото на починатиот ќе се врши обдукција.


Непознат маж пронајден мртов во опожарена барака


Кочани, 9 март, 2017 - 13:49 (META) 

Непознат маж бил пронајден мртов во барака во Кочани, која синоќа била зафатена од пожар, информираат од МВР. Според полициските информации, пожарот избувнал околу 23.40 часот, во лимена барака на улицата Охрдиска во Кочани, во која привремено престојувал 62-годишниот В.С., жител на градот.

При гаснењето на пожарот од страна на Територијалната противпожарна единица Кочани, во бараката било пронајдено починато непознато машко лице.

Како што информираат од МВР, увид на местото ќе се врши денеска.


Тројца бегалци починале од студ во кампот Морија на Лезбос


Атина, 30 јануари, 2017 - 13:46 (META) 

Бегалец утринава е пронајден мртoв во кампот Морија на Лезбос. Станува збор за момче на возраст меѓу 18 и 20 години, најверојатно од Пакистан, кое починало од премрзнување.

Момчето е трета жртва од студот во бегалскиот камп Морија во Грција. Викендов од студ почина и 46-годишен бегалец од Сирија, а на 24 јануари од премрзнување почина и 20-годишно момче од Египет, кое, исто така, престојуваше во бегалскиот камп на Лезбос.

На Лезбос има повеќе од 5.000 бегалци, што го прави остров на кој се згрижени најголем број бегалци и мигранти од сите други грчки острови.

Според информациите на локалните медиуми, во Морија владее вознемиреност меѓу бегалците и постои страв од демонстрации поради смртта на тројцата бегалци.

Дел од бегалските кампови низ Грција имаат соодветни услови за престој, но дел од нив немаат соодветно греење и бегалците едвај преживуваат на ниската зимска температура.


Почина диригентот Саша Николовски-Ѓумар


Скопје, 14 јануари, 2017 - 19:20 (META) 

На 50-годишна возраст, денеска почина Саша Николовски-Ѓумар, еден од најдобрите македонските диригенти.

Тој беше роден во Битола во 1966 година. Факултетот за музичка уметност на отсекот за музичка теорија и педагогија го завршил како најдобар студент на генерацијата. За време на студиите, се запишал и на отсекот за композиција и за диригирање, на кој дипломирал со највисоки почести, диригирајќи ја Вердиевата опера „Травијата“ во Македонската опера и балет.

Во 1999 година магистрирал со највисоки оцени на Академијата „Панчо Владигеров“ во Софија, каде што учел оркестарско диригирање со Васил Казанџиев и оперско диригирање со Боби Хинчев.

Од 1998 година на Факултетот за музичка уметност предаваше хорско и оркестарско диригирање, оперско студио и група предмети од областа на диригирањето.

Саша Николовски-Ѓумар ја предводеше и македонската филхармонија во Македонскиот народен театар за Божиќниот концерт на 7 јануари.


Прилепчанец пронајден мртов на Божиќ


Прилеп, 8 јануари, 2017 - 11:54 (META) 

Во објектот на поранешно инфективно одделение на болницата во Прилеп, вчера е пронајдено починато лице, соопшти полицијата.

Смртта била констатирана од страна на лекар од итната медицинска помош, а увид на местото на настанот извршиле јавен обвинител и увидна екипа на прилепската полиција. Констатирано е дека најверојатно се работи за лицето П.М. (26) од Прилеп.

По наредба на јавен обвинител над телото на починатиот ќе се врши обдукција.


Старица починала во пожар во скопско Буковиќ


Скопје, 7 јануари, 2017 - 11:38 (META) 

Осумдесет и тригодишната М.Б. вчера била пронајдена почината во изгорен кат од куќа во скопското село Буковиќ.

Како што информира МВР, вчера во ЕИК–Скопје било пријавено дека во 13.25 часот во село Буковиќ од засега непознати причини избувнал пожар во куќа, сопственост на Р.Б. (49), при што целосно биле изгорени приземјето и катот, каде била неговата мајка М.Б., која била пронајдена почината.

Пожарот бил изгаснат од екипи на бригадата за противпожарна заштита. По наредба на јавен обвинител, телото на почината е предадено на семејството за погреб.


Русија: Убиството на амбасадорот е терористички напад


Москва, 19 декември, 2016 - 19:42 (META) 

Убиството на рускиот амбасадор во Турција, Русија го окарактеризира како терористички напад.

Портпаролката на Министерството за внатрешни работи, Марија Захарова, објави дека темата за нападот врз рускиот дипломат ќе биде поставена пред официјални лица во Советот за безбедност на Обединетите нации.

Свое обраќање се очекува да има и рускиот претседател Владимир Путин.

Турското министерство за внатрешни работи го зајакна обезбедувањето на руската амбасада по нападот врз Карлов. Амбасадата сега ја обезбедуваат тимови од специјалци на турската полиција.

Нападот врз рускиот амбасадор Карлов го осуди и американскиот Стејт департмент.

„Го осудуваме секој облик на насилство, без разлика од каде потекнува“, соопштија од Стејт департментот.

Рускиот амбасадор во Турција, Андреј Карлов, почина откако во него беше пукано за време на отворање на изложба во уметничка галерија.


Рускиот амбасадор во Турција им подлегна на повредите


Анкара, 19 декември, 2016 - 18:42 (META) 

Рускиот амбасадор во Турција, Андреи Карлов почина откако беше ранет со огнено оружје за време на изложбата „Русија во очите на Турците“, потврди руското министерство за надворешни работи.

Мотивот на напаѓачот е непознат, но турските медиуми пишуваат дека извикувал „Ова е за Алепо“. Уште три други лица се ранети во нападот.

Според пишувањата на медиумите, напаѓачот, маж во костум со вратоврска, со пиштол во рацете, е убиен во пресметка со полицијата.

Руските медиуми пренесуваат дека за трагедијата бил известен и рускиот претседател Владимир Путин, а се очекува тој денеска да има свое обраќање.

„Ројтерс“ наведува дека напаѓачот во галеријата влегол покажувајќи полициска пропусница.

На Карлов му била пружена помош на самото место, а полицијата упаднала во галеријата при што имало размена на оган со напаѓачот.


Битолчанец пронајден мртов во својот дом


Битола, 24 јули, 2016 - 12:52 (META) 

Б.Д. (53) од Битола е пронајден мртов вчера попладне, околу 17 часот, во неговиот дом, соопшти полицијата.

Доктор од итна медицинска помош констатирал смрт без видливи траги на насилство.

Увид извршила екипа од СВР-Битола, а јавен обвинител наредил обдукција врз телото на починатиот.