Почина американскиот сенатор и воен херој Џон Мекејн


Вашингтон, 26 август, 2018 - 14:01 (META) 

Вчера во неговиот дом во Корнвил, Аризона, почина американскиот воен херој и политичар Џон Мекејн (81), објави неговото семејство. Мекејн, кој служеше како шест кратен републикански сенатор од Аризона, подолго време боледуваше од рак на мозокот и пред неколку дена најави дека го прекинува третманот.

Сопругата Синди Мекејн пиша на Твитер: „Моето срце е скршено. Имав среќа што во тек на цели 38 години ја проживеав авантурата на љубов со овој неверојатен човек. Тој замина како што и живееше, под негови услови, опкружен со луѓето кои ги љубеше, во неговото најсакано место.“

Во текот на војната во Виетнам Мекејн како воен пилот бил соборен и поминал 5 и пол години како воен заробеник (1967-73) во самица и под тортура. Како син на адмирал му бил понуден повластен третман и пуштање, но тој ги одбил барајќи прво да бидат пуштени соборците кои биле заробени пред него. По 20 години во морнарицата, Мекејн имаше долга политичка кариера со особен фокус на безбедноста, при што два пати беше и кандидат за претседател на САД. Како еден од највлијателните републикански сенатори, Мекејн својата политичка кариера ја темелеше принципи поради кои не се колебаше да гласа и против ставовите на мнозинството на неговата партија, како и јавно да опонира на ставовите на републиканскиот претседател Доналд Трамп. Мекејн до самиот крај на животот беше политички активен и се спротивставуваше на ширењето на непријателското влијание на Кремљ, посетувајќи ги Грузија и Украина знак на поддршка и укажувајќи и дека скандалот со хакирање на изборите претставува акт на агресија. Мекејн се залагаше и за влез на Македонија во НАТО и во април 2018 година Мекејн одржа средба и со вицепремиерката на Република Македонија Радмила Шекеринска при нејзината посета на Вашингтон. На 13 јуни, по потпишувањето на Договорот од Преспа, тој испрати порака на целосна поддршка до премиерите Ципрас и Заев за нивната работа на решавањето на спорот со името. „Ако продолжат да покажуваат државничка храброст, резултатот ќе биде поголема безбедност и просперитет и за нивните земји и за регионот,“ тогаш изјави Мекејн.

Објавата за прекин на лекувањето на интернет предизвика лавина на изрази на поддршка и надеж од пријателите на Мекејн. Еден од нив беше и сопартиецот Арнолд Шварценегер, филмска ѕвезда и бивш гувернер на Калифорнија, кој објави порака до „еден од најголемите борци во историјата на нашата земја“:

„Верувам дека на луѓето треба да им се каже  што ви значат пред да им кажете збогум, па затоа сенаторе Мекејн, ви велам: Благодарам! Ви благодарам од сѐ срце за Вашата посветеност на нашата земја, Вашата инспирација и Вашето пријателство.“

Почитувачите на Мекејн го истакнуваат неговиот интегритет и достоинство преку споделување примери од неговата долга кариера. Меѓу нив се истакнува моментот кога одбива да прифати напади на лична основа кон неговиот противкандидат Обама од страна на сопствена поддржувачка и учтиво ја замолчува со „тој е пристоен семеен човек, граѓанин со кого се погодило дека јас имам несогласувања за фундаментални прашања. Само тоа е поентата на оваа кампања.“


Параглајдерист починал по слетувањето во Гевгелиско


Гевгелија, 10 април, 2018 - 10:28 (META) 

М.Ќ.(47) од село Мрзенци-гевгелиско, кој бил член на Клуб за екстремни спортови, вчера бил пронајден починат над село Сермин-гевгелиско, во близина на манастирот „Свети Илија“.

Како што соопшти МВР, настанот бил пријавен вчера, попладне во 15 часот.

На М.Ќ., по неговото успешно слетување со параглајдер, му се слошило и по кратко време тој починал. Од страна на лекар од Итната медицинска помош била констатирана смрт, наведуваат од МВР.

Увид на местото на настанот извршиле Јавен обвинител и увидна екипа од Полициска станица Гевгелија. По Наредба на Јавен обвинител телото на починатиот било предадено за обдукција


Кавадарчанец одбивал лекарска помош, а потоа бил пронајден мртов


Кавадарци, 26 март, 2018 - 15:02 (META) 

Кавадарчанец вчера ноќта бил пронајден починат пред Здравствен дом Кавадарци, откако претходно пијан правел проблеми на вработените и одбивал лекарска помош, соопшти МВР.

Случајот го пријавиле дежурните медицински лица во 1.10 часот вчера, кои на кавадаречките полицајци им кажале дека првин непознато лице во пијана состојба ги навредувало и одбивало да му се пружи лекарска помош, а кога непосредно пред телефонски да го пријават случајот за да видат што се случува со човекот, излегле надвор и го нашле починат.

По извршените проверки констатирано е дека се работи за Ј.М. (48) од Кавадарци. По наредба на Јавен обвинител, телото на починатиот ќе биде предадено на обдукција.


Почина поранешниот вицепремиер Абдилаќим Адеми


Скопје, 16 февруари, 2018 - 9:37 (META) 

По тешко боледување, синоќа почина Абдилаќим Адеми, член на ДУИ и поранешен висок државен функционер.

Од 2008 година Адеми беше вицепремиер задолжен за спроведување на Рамковниот договор, од 2011 до 2014 година беше министер за животна средина и просторно планирање, а од 2014 до 2016 година ја извршуваше функцијата министер за образование и наука.

Од 2002 до 2006 беше пратеник во Собранието на Република Македонија. Беше член на ДУИ од основањето на Централниот одбор и претседател на огранокот на ДУИ за општина Јегуновце.

Роден е на 20 декември 1969 година во тетовското село Шемшево. Дипломирал на Политехничкиот факултет во Тирана, а во Германија на Техничкиот универзитет стекнал обука во Институтот за градежни и стаклени материјали.

Адеми беше оженет и татко на еден син.

Ќе биде погребан денеска на пладне на гробиштата во неговото родно село Шемшово.


Почина Ингвар Кампрад, основачот на „Икеа“


Лајден, 28 јануари, 2018 - 14:03 (META) 

Ингвар Кампрад, основачот на шведскиот производител на мебел „Икеа“, почина на 91-годишна возраст, соопшти компанијата.

Тој важеше за еден од најбогатите луќе на светот, а според проценките на магазинот „Форбс“ неговото богатство изнесува 3,3 милијарди долари.

Кампрад ја основал „Икеа“ во 1943 година, а првиот продажен центар е отворен во 1958 година во Шведска. Седумдесетите години од минатиот век комапнијата почнува со отворање на продавници и во останатите делови на Европа и светот.

Името на компанијата е акроним од Ингвар, Кампрад, Елмтарид (семејната фарма) и Агунарид (соседното село).

„Икеа“ е позната по пристапните цени и по специфичниот дизајн на мебелот. Компанијата денес вработува 190.000 лица и има годишен промет од 38 милијарди евра.

Во 1994 година беше откриено фашистичкото минато на Ингвар Кампрад. За време на Втората светска војна тој бил член на шведска политичка партија која ги поддржувала нацистите.

Во својата книга тој призна дека тоа била една од работите во неговиот живот, поради која најмногу се срами.


Почина режисерот Љупчо Тозија, поранешен директор на МТВ и амбасадор во Италија


Скопје, 10 јануари, 2018 - 15:20 (META) 

Вчера во Скопје, по кратко боледување на 71 годишна возраст почина Љупчо Тозија, режисер и поранешен амбасадор на Република Македонија во Италија.

По завршувањето на Академијата за театар и филм во Загреб во 1974, Тозија скоро целиот професионален ангажман го помина во Македонската телевизија, сѐ до 2005 кога беше поставен за вонреден и ополномоштен амбасадор на Република Македонија во Рим, Република Италија.

Беше автор, режисер, уредник на редакции, а во периодот од 2002 до 2005 година директор и главен и одговорен уредник на МТВ. Потписник е на голем број снимени телевизиски емисии, театарски претстави и документарни филмови.

Посмртните останки на Љупчо Тозија ќе бидат изложени утре од 12 часот во капела на гробиштата Бутел, а погребот ќе се одржи во 13 часот.


Скопјанец загинал во пожар, кочанец се удавил во канал за наводнување


Скопје, 8 септември, 2017 - 12:22 (META) 

Две жртви на несреќи регистрирала полицијата во изминатото деноноќие, од кои едната се случила во Скопје, а втората во Кочани.

Вчера, во 16.50 часот, во атарот на селото Грдовци, С.Ј.(42) од Кочани го пронашол својот татко  Д.Ј. (70) удавен во канал за наводнување. Смртта била констатирана од лекар од итна медицинска помош, а притоа не биле забележани видливи траги на насилство. Увид извршиле јавен обвинител и увидна екипа од Полициска станица Кочани,  по што по одобрение на обвинителот, телото на починатиот било предадено на семејството за погреб.

Денеска, околу 3 часот, во стан на булеварот Јане Сандански во Скопје, од засега непознати причини избувнал пожар. При интервенцијата на пожарникарите, во станот бил пронајден починат Н.Н. (23). Смртта била констатирана од лекар од итна медицинска помош, а по наредба на јавен обвинител, телото на починатиот било предадено на обдукција.


Штипјанец пронајден мртов во својот стан


Штип, 26 јуни, 2017 - 13:24 (META) 

Педесет и петгодишниот К.Г. вчера околу 20.15 часот бил пронајден мртов во неговиот стан на улицата Стојан Гологанов во Штип, информираше денеска полицијата.

Засега нема информации за причините за смртта на штипјанецот, која била констатирана од страна на лекар.

Јавен обвинител, лекар патолог и екипа на СВР Штип извршиле увид на местото, а по наредба на јавниот обвинител телото на починатиот е дадено за обдукција.


Пронајдени двајца мртви мажи во Скопје, едниот бил во трафостаница


Скопје, 26 април, 2017 - 14:39 (META) 

Две мртви машки тела се пронајдени вчера во Скопје, од кои едното е на засега непознато лице, а било пронајдено во трафостаница, извести СВР Скопје.

Имено, вчера вработен во „ЕВН Македонија“ пријавил во полиција дека во подземна вклучена 10-киловолтна трафостаница, лоцирана во непосредна близина на Македонска опера и балет, пронашол безживотно тело на непознато машко лице.

Екипа на брза помош констатирала смрт, а увид извршиле јавен обвинител и увидна екипа на СВР Скопје. По наредба на јавен обвинител, телото на починатото лице е предадено во Институтот за судска медицина и за криминалистика за обдукција.

СВР Скопје вели дека се преземаат мерки  за утврдување на идентитетот на починатиот и за целосно расчистување на случајот.

Вториот случај бил пријавен вчера попладне, при што пријавувачот кажал дека пронашол починато лице во објект во изградба на улицата Сава Ковачевиќ. Смртта ја констатирала екипа на брза помош, а увидна екипа на СВР Скопје утврдила дека се работи за Г.Б. (27) од Скопје. По наредба на јавен обвинител на телото на починатиот ќе се врши обдукција.


Непознат маж пронајден мртов во опожарена барака


Кочани, 9 март, 2017 - 13:49 (META) 

Непознат маж бил пронајден мртов во барака во Кочани, која синоќа била зафатена од пожар, информираат од МВР. Според полициските информации, пожарот избувнал околу 23.40 часот, во лимена барака на улицата Охрдиска во Кочани, во која привремено престојувал 62-годишниот В.С., жител на градот.

При гаснењето на пожарот од страна на Територијалната противпожарна единица Кочани, во бараката било пронајдено починато непознато машко лице.

Како што информираат од МВР, увид на местото ќе се врши денеска.