Почина Тодор Атанасовски, генерал полковник во пензија


Скопје, 27 јули, 2018 - 11:54 (META) 

На 93 годишна возраст почина првоборецот и носител на партизанска споменица од 1941 година Тодор Атанасовски, генерал полковник во пензија, соопшти Генералштабот на Армијата на Република Македонија, кој изрази жалење и сочувство кон семејството.

Генералот Атанасовски ќе биде погребан со воени почести денеска петок на градските гробишта во „Бутел“ во 12 часот.

Тодор Атанасовски бил борец и партизански командантза време на Народно Ослободителната Војна, а во поствоениот период, бил редовно унапредуван во повисок чин.

Во текот на неговата воена кариера до неговото пензионирање во 1985 година, извршувал повеќе високи воени должности меѓу кои последните негови највисоки должности: началник на главниот штаб на Народна одбрана на СР. Македонија (1974 – 1982) и командант на Републички штаб за територијална одбрана на СР. Македонија (1982 – 1985).

Во пензионерските години генералот Тодор Атанасовски  беше претседател на Сојузот на борците на Македонија.


Почина поранешниот новинар и основач на „Макфакс“, Ристо Поповски


Скопје, 24 јули, 2018 - 11:44 (META) 

Ристо Поповски, еден од најпознатите македонски новинари, почина вчера на 74 години, по кратко боледување.

Во долгата и богата кариера, Поповски работел како новинар за Радио Скопје и новинската агенција Танјуг, а бил и дописник од Москва за време на историските промени на почетокот на 90-тите години. Toj е автор на првата вест во светот воопшто за почетокот на распаѓањето на Советскиот Сојуз.

Во 1992 година Поповски ја основал независната новинска агенција „Макфакс“, првата приватна новинска агенција во поранешна Југославија.

Своите новинарски ставови како коментари ги објавуваше и во неделникот „Глобус“ и дневниот весник „Слободен печат“, а беше и коментатор од Македонија за „Ал Џазира Балканс“. Добитник е на Наградата за животно дело на Здружението на новинари на Македонија.


Почина Ингвар Кампрад, основачот на „Икеа“


Лајден, 28 јануари, 2018 - 14:03 (META) 

Ингвар Кампрад, основачот на шведскиот производител на мебел „Икеа“, почина на 91-годишна возраст, соопшти компанијата.

Тој важеше за еден од најбогатите луќе на светот, а според проценките на магазинот „Форбс“ неговото богатство изнесува 3,3 милијарди долари.

Кампрад ја основал „Икеа“ во 1943 година, а првиот продажен центар е отворен во 1958 година во Шведска. Седумдесетите години од минатиот век комапнијата почнува со отворање на продавници и во останатите делови на Европа и светот.

Името на компанијата е акроним од Ингвар, Кампрад, Елмтарид (семејната фарма) и Агунарид (соседното село).

„Икеа“ е позната по пристапните цени и по специфичниот дизајн на мебелот. Компанијата денес вработува 190.000 лица и има годишен промет од 38 милијарди евра.

Во 1994 година беше откриено фашистичкото минато на Ингвар Кампрад. За време на Втората светска војна тој бил член на шведска политичка партија која ги поддржувала нацистите.

Во својата книга тој призна дека тоа била една од работите во неговиот живот, поради која најмногу се срами.


Во Нигерија од колера починале 14 лица


Абуџа, 3 септември, 2017 - 17:20 (META) 

На североистокот на Нигерија од колера починале 14 лица, а жртвите претежно биле раселени лица во прифатни центри кои побегнале поради насилствата на Боко харам.

Нигериското министерство за здравство соопшти дека до 1 септември умреле 14 лица и додаде дека околу 180 лица се заразени со колера.

Колерата е многу заразна болест од која може да се умре за неколку часа доколку на заразениот не му биде укажана лекарска помош. Симптомите се повраќање, дијареја, грчеви во мускулите и општа дехидрација на организмот. Обично се јавува во средини каде има лоши хигиенски услови.


Почина кинескиот нобеловец и дисидент Лју Сјаобо


Пекинг, 13 јули, 2017 - 20:26 (META) 

Кинескиот добитник на Нобеловата награда за мир и дисидент, Лју Сјаобо, почина на 61-годишна возраст, соопштија денеска властите во кинеската провинција Лиаонинг, каде Сјаобо беше хоспитализиран поради рак на црниот дроб.

Како што пренесуваат светските агенции, кинеската правосудна канцеларија соопштила дека нобеловецот починал три дена откако бил префрлен на интензивна нега поради откажување на повеќе органи.

Сјаобо кон крајот на мај оваа година беше префрлен од затвор во болница, откако му беше дијагностициран рак на црниот дроб во терминална фаза.

Кинеските власти, како што наведуваат странските агенции, ги одбиле бројните повици на групите за човекови права и на странски влади, да овозможат негово лекување во странство, наведувајќи дека Сјаобо го лечат најдобрите кинески лекари.

Лју Сјаобо, кој беше најпознатиот политички затвореник во Кина, беше уапсен во 2009 година поради наводна вмешаност во активности за уривање на кинеската влада. Тој беше осуден на затворска казна од 11 години.

Нобеловиот комитет на 8 октомври 2010 година го објави неговото име како добитник на Нобеловата награда за мир за 2010 година, со образложение дека наградата му се доделува за „долгата и ненасилна борба за основните човекови права во Кина“.


Почина поранешниот воен лидер на Панама, Мануел Антонио Нориега


Панама Сити, 30 мај, 2017 - 11:33 (META) 

Поранешниот воен лидер на Панама, генерал Мануел Антонио Нориега, почина на 83-годишна возраст како последица на здравствени проблеми предизвикани по операција на мозокот, соопшти панамскиот државниот секретар за комуникации, Мануел Домингез.
Нориега долго време важеше за клучен сојузник на САД, сè до 1989 година, кога американските трупи извршија инвазија на Панама и го протераа од земјата. Подоцна заврши во затвор во САД поради обвиненија за шверц на дрога и за перење пари, а беше обвинет и во Франција и во Панама поради убиства, корупција и проневера на пари.
Во јануари годинава панамските власти го пуштија од затвор поради операција на мозокот.


Почина поранешниот грчки премиер Константинос Мицотакис


Атина, 29 мај, 2017 - 10:36 (META) 

Поранешниот грчки премиер Константинос Мицотакис почина денеска во 99. година од животот, соопшти неговото семејство.

„Почина еден час по полноќ, опкружен со луѓето што го сакаа и што ги сакаше“, стои во краткото соопштение, во кое не се откриваат детали.

Мицотакис, кој е роден во 1918 година, се повлече од политичкиот живот во 2004 година, кога му истече последниот пратенички мандат.

Премиерската функција ја вршеше од 1990 до 1993 година, а член на грчкиот парламент, без прекин, беше од 1946 година, со исклучок на десетгодишниот период, за време и непосредно по периодот кога со Грција владееше воената хунта од 1967 до 1974 година.

За време на „Диктатурата на полковникот“, во 1967 година, успеал да побегне во Париз, каде живеел во егзил до враќањето во демократска Грција во 1974 година.

На чело на конзервативната партија Нова демократија беше од 1984 до 1993 година, а претходно, во неколку конзервативни влади тој ги извршуваше функциите министер за финансии и за надворешни работи.

Неговиот син, Киријакос Мицотакис, е актуелен лидер на Нова демократија, а неговата ќерка, Дора Бакојани, е поранешна шефица на грчката дипломатија, поранешна министерка за култура, како и некогашна градоначалничка на Атина.


Почина познатиот актер Роџер Мур


Лондон, 23 мај, 2017 - 20:00 (META) 

Британскиот актер Роџер Мур почина во 89-година од животот, соопшти семејство на „Твитер“.

Мур кратко време боледуваше од рак. Почина ви Швајцарија каде живееше во последните години.

Во текот на кариерата оствари серија филмски улоги, а љубителите на филмот ќе го паметат по улогата на тајниот агент 007, Џејмс Бонд, кого го овековечи во неколку филмови.

Мур ќе остане запаметен и по улогата на Сајмон Темплар од телевизиската серија „Светец“, која го лансираше кон Бонд.


Почина Ахмед Катрада, борецот против апартхејдот


Јоханесбург, 28 март, 2017 - 10:36 (META) 

Ахмед Катрада, борецот против апартхејдот во Јужна Африка, кој 26 години помина во затвор, од кои поголемиот дел заедно со Нелсон Мандела, починал утрово во Јоханесбург, на 88-годишна возраст.

Како што пренесуваат светските агенции, фондацијата на Катрада соопштила дека тој починал откако на почетокот на овој месец бил хоспитализиран поради тромб во мозокот.

Катрада е роден на 21 август 1929 година, во мал град во северозападниот дел на Јужна Африка, како дете на индијски мигранти.

Многу млад се вклучил во борбата против апартхејдот, а во јули 1963 година е уапсен во предградието на Равонија, каде се состанувал со други активисти. Осуден е на доживотна затворска казна, заедно со уште седум луѓе, меѓу кои и Нелсон Мандела, поради саботажа против владејачкото бело мнозинство во Јужна Африка.

Од затвор е пуштен во 1989 година, по укинувањето на апартхејдот, по што станува пратеник во јужноафриканскиот парламент. Тој неодамна остро ги критикуваше владата на земјата и претседателот Џејкоб Зума.

„Кети беше инспирација за милиони луѓе во различни делови од светот. Ова е голема загуба за Африканскиот национален конгрес (владејачката партија на Јужна Африка), на поширокото ослободително движење и за цела Јужна Африка“, изјавил директорот на фондацијата „Ахмед Катрада“, Нишан Балтон.


Почина рокенрол-легендата Чак Бери


Сент Чарлс, 19 март, 2017 - 9:49 (META) 

Легендарниот гитарист и родоначелник на рокенролот, Чак Бери, починал вчера на 90-годишна возраст, објавија светските медиуми, повикувајќи се на полицијата на американската сојузна држава Мисури.

Полицијата на округот Сент Чарлс ја потврдила смртта на Чарлс Едвард Андерсон Бери и навела дека неговото семејство побарало приватност за време на периодот на жалост, пренесува „Гардијан“.

Музичката кариера на Чак Бери траеше повеќе од седум децении. Легендарниот гитарист ги спои блузот и свингот во нов музучки феномен, користејќи гитарски соло-партитури и изврши големо влијание на подоцнежната рок-музика.

Меѓу неговите најголеми хитови се издвојуваат „Roll Over Beethoven“, „Rock and Roll Music“ и „Johnny B. Goode“, која е една од најобработуваните песни во историјата на музиката.

Во 1984 г. Чак Бери доби Греми-награда за животно дело, а беше еден од првите музичари што станаа членови на „Рокенрол-холот на славните“ во 1986 година.

Неговата музика имаше големо влијание на бројни музичари, како и на целиот рокенрол.