!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Почина рокенрол-легендата Чак Бери


Сент Чарлс, 19 март, 2017 - 9:49 (META) 

Легендарниот гитарист и родоначелник на рокенролот, Чак Бери, починал вчера на 90-годишна возраст, објавија светските медиуми, повикувајќи се на полицијата на американската сојузна држава Мисури.

Полицијата на округот Сент Чарлс ја потврдила смртта на Чарлс Едвард Андерсон Бери и навела дека неговото семејство побарало приватност за време на периодот на жалост, пренесува „Гардијан“.

Музичката кариера на Чак Бери траеше повеќе од седум децении. Легендарниот гитарист ги спои блузот и свингот во нов музучки феномен, користејќи гитарски соло-партитури и изврши големо влијание на подоцнежната рок-музика.

Меѓу неговите најголеми хитови се издвојуваат „Roll Over Beethoven“, „Rock and Roll Music“ и „Johnny B. Goode“, која е една од најобработуваните песни во историјата на музиката.

Во 1984 г. Чак Бери доби Греми-награда за животно дело, а беше еден од првите музичари што станаа членови на „Рокенрол-холот на славните“ во 1986 година.

Неговата музика имаше големо влијание на бројни музичари, како и на целиот рокенрол.


Почина Мајк Илич, еден од најголемите донатори на ОМД


Детроит, 11 февруари, 2017 - 13:16 (META) 

Вчера на 87-годишна возраст почина Мајк Илич, еден од најбогатите Македонци во светот и еден од најголемите поддржувачи и долгогодишен донатор на Обединета македонска дијаспора (ОМД).

Веста ја соопштија локалните медиуми од Детроит, каде тој важеше за исклучително почитуван и влијателен граѓанин.

Мајк Илич (односно Мајк Илиевски, по татково презиме), е роден во САД, а по потекло е од Македонија. Тој е роден во 1929 година како прва генерација од децата родени во САД на македонските иселеници Сотир и Султана Илиевски.

Списанието „Форбс“ во листата на најбогати лица во светот за 2016 година, процени дека тој се наоѓа на 86. место меѓу 400 најбогати Американци. Неговото богатство беше проценето на шест милијарди долари.

Семејството Илич го поседува ланецот од пицерии „Малиот Цезар“ (Little Caesar’s Pizza) кој е распространет во САД и во Канада, и кој се смета дека е на трето место по „Пица хат“ и „Доминос“.

Илич беше сопственик и на хокеарскиот тим „Ред рок вингс“, како и на бејзбол тимот „Детроит тајгерс“.


Почина светската музичка ѕвезда Џорџ Мајкл


Лондон, 26 декември, 2016 - 9:39 (META) 

Пејачот и светска музичка ѕвезда Џорџ Мајкл вчера починал во својот дом во Оксфордшир, Велика Британија, на 53-годишна возраст, соопштил неговиот публицист, пренесува „Би-би-си“.

Медицинските екипи биле повикани во неговиот дом, вчера во 13.42 часот, според локално време, а полицијата соопштила дека смртта на пејачот засега ја третира како неразјаснета, но дека нема сомнителни околности.

Веста за смртта на Џорџ Мајкл ја соопшти неговото семејство, преку публицистот на пејачот.

„Со голема тага можеме да потврдиме дека нашиот сакан син, брат и пријател Џорџ почина во својот дом за време на божиќните празници. Неговото семејство бара нивната приватност да биде почитувана во овој тежок и емотивен период за нив“, стои во изјавата за смртта на Џорџ Мајкл.

Мајкл, кој е со грчко потекло и е роден како Георгиос Кирјакос Панајоту во северен Лондон, беше талентиран пејач, текстописец и продуцент, кој за време на својата кариера, која траеше речиси четири децении, продаде повеќе од 100 милиони албуми.

Својата кариера ја почна со музичкото дуо „Вем“ (Wham), со кое четирипати беше на врвот на британската листа за најдобри песни, пред да продолжи со издавање албуми како соло-артист, меѓу кои и „Faith“ во 1987 година, кој беше продаден во повеќе милионски тираж.

Мајкл соработуваше со голем број светски музички ѕвезди, меѓу кои и Арета Френклин и Елтон Џон, трипати беше победник на британските музички награди „Брит авордс“, а освои и две награди „Греми“.

По повод смртта на светската музичка икона, почит изразија повеќе негови колеги и пријатели, како неговиот партнер од дуото „Вем“, Ендрју Риџвеј, и Елтон Џон кој на својот профил на „Инстаграм“ напиша дека е во длабок шок.

„Изгубив сакан пријател – драг и добар човек и брилијантен уметник. Моето срце е со неговото семејство и сите негови обожаватели“, напиша Елтон Џон.


Почина канадскиот пејач, поет и уметник Леонард Коен


Монтреал, 11 ноември, 2016 - 10:15 (META) 

Вчера, на 82-годишна возраст, почина канадскиот пејач, текстописец и поет Леонард Коен. Веста за неговата смрт е објавена на официјалниот фејсбук-профил на музичарот, но не се наведени детали околу причините за смртта.

„Со длабока тага соопштуваме дека почина легендарниот поет, текстописец и уметник Леонард Коен“, стои во соопштението.

Канадскиот премиер Џастин Трудо му оддаде почит на пејачот, кој беше еден од највлијателните музичари и текстописци, кој со својот впечатлив баритон раскажуваше приказни за љубов, смрт, омраза, војна и за мир.

„Со длабока тага ја примив веста за смртта на легендарниот Леонард Коен. Тој ќе остане запаметен по своите груби вокали, карактеристичниот хумор и прогонувачките лирики кои ги направија негови песни омилени за многу генерации“, изјавил Трудо, пренесува „Би-би-си“.

Коен се појави во 1960-тите години, заедно со други музчки легенди, меѓу кои и годинешниот добитник на Нобеловата награда за литература, Боб Дилан, и неговиот сонародник Џони Мичел.

Во петдецениската кариера Коен објави 14 студиски албуми, од кои последниот, насловен „Сакавте помрачно“ (You Want It Darker), минатиот месец.

Во 2008 година канадскиот музичар беше примен во „Рокенрол холот на славните“.


Почина Гевин Мекфејден, менторот на Асанж и директор на „Викиликс“


Лондон, 23 октомври, 2016 - 16:46 (META) 

Директорот на „Викиликс“ и ментор на основачот на интернет-страницата, Џилијан Асанж, Гевин Мекфејден, почина на 76-годишна возраст, објави Центарот за истражувачко новинарство, чиј основач е Мекфејден.

Од организацијата засега не ја наведуваат причината за смртта на Мекфејден.

На социјалната мрежа „Твитер“ на профилот на „Викиликс“ беше објавено дека Мекфејден, освен што му бил ментор на Асанж, бил и него најблизок пријател во Лондон, каде основачот на „Викиликс“ се наоѓа повеќе од четири години, криејќи се во амбасадата на Еквадор.

„Гевин Мекфејден, саканиот директор на ‘Викиликс’, сега ги свртува своите тупаници за борба со бог. Удри го, засекогаш, Гевин“, стои во друг твит на „Викиликс“, потпишан со иницијалите на Асанж.

Поради ова, дел од медиумите шпекулираат дека тоа мoже да значи дека Асанж и понатаму е во контакт со „Викиликс“ иако пред една недела еквадорските власти му го исклучија интернетот во амбасадата во Лондон, откако „Викиликс“ ја објави електронската пошта од кампањата за претседателските избори во САД на кандидатката на демократите, Хилари Клинтон.


По кратко боледување почина пејачката Љупка Димитровска


Скопје, 4 октомври, 2016 - 20:30 (META) 

По кратко боледување, вчера почина познатата македонско-хрватската пејачка Љупка Димитровска, јавуваат хрватските медиуми.

Димитровска беше родена во 1946 година во Скопје, но по првите пејачки успеси најголемиот дел од кариерата и од животот ги помина во Загреб.

Нејзиниот прв албум „Љупка“ беше објавен во 1975 година.


Почина Шимон Перес, поранешен премиер и претседател на Израел


Тел Авив, 28 септември, 2016 - 10:25 (META) 

Поранешниот претседател на Израел, добитник на Нобеловата награда за мир, Шимон Перес, почина синоќа на 94-годишна возраст, две недели откако претрпе голем мозочен удар.

На погребот, кој ќе се одржи в петок на националните гробишта во Ерусалим, ќе присуствуваат претседателот на САД, Барак Обама, канадскиот премиер Џастин Трудо, Бил и Хилари Клинтон, јавува израелскиот весник „Хаарец“.

Перес бил еден од последните преживеани основачи на модерниот Израел. Роден е во Полска како Шимон Перски во 1923 година, а 11 година подоцна се преселил во мандатна Палестина со своето семејство.

Пораснал во Тел Авив, завршил средно земјоделско училиште, а потоа работел како фармер и пастир. Потоа запишува студии на „Харвард“ во Њујорк, САД.

Бил премиер и претседател на Израел и лидер на Лабуристичката партија. Тој е прв Израелец кој бил претседател на влада и шеф на држава.

За време на седумдецениската политичка кариера, бил на речиси сите значајни позиции во владата и играл клучна улога во историјата на земјата и како борец и како миротворец.

Член на Кнесетот, израелскиот парламент, бил од 1959 година до 2007 година, кога стана претседател. Министер за апсорпција на имигранти и за развој на окупираните територии стана во 1969 година.

Во 1993 година беше шеф на израелската дипломатија, помагал во преговорите за мир со лидерот на Палестинската ослободителна организација, Јасер Арафат. Следната година за спогодбата доби Нобелова награда за мир, заедно со Арафат и со тогашниот израелски премиер Јицак Рабин.

 


Почина охридската пливачка легенда Александар Леко Радиќ


Охрид, 17 јуни, 2016 - 11:40 (META) 

Во Охрид, на 87-годишна возраст, синоќа почина познатиот професор и тренер, пливачката легенда и доајен на маратонското пливање во Македонија, Александар Леко Радиќ.

Погребот ќе се изврши утре, 18 јуни, на градските гробишта во Охрид.

Александар Леко Радиќ беше вистинска спортска легенда на Охрид. Тој се смета за зачетник, татко на маратонското пливање и за творец на плејада врвни пливачи и спортисти, кои Охрид и Македонија ги прославија на сите светски меридијани.

Радиќ е човекот низ чии раце поминале сите наши пливачки шампиони, како што се братот и сестрата Дики и Атина Бојаџи, Климе Савин, Насте Јончески, Ристо Бимбиловски и Александар Маленко.

Роден е во 1929 година во Охрид, а својата пливачка и тренерска кариера ја почнал во ПВК „Охридски бранови“. Во 2013 година Леко Радиќ го доби највисокото општинско признание за животно дело, „Свети Климент Охридски – Патрон на градот“.


Почина Дарко Марковиќ, легендарниот карикатурист и автор на „Пецко“


Скопје, 10 јуни, 2016 - 9:55 (META) 

По долго и тешко боледување, синоќа почина Дарко Марковиќ, познатиот карикатурист, сатиричар и филмски режисер. Марковиќ, кај пошироката публика ќе остане запаметен како автор на стриповите со популарниот јунак „Пецко“, потпишани со псевдонимот кој е кратенка од првите три букви од неговото име и презиме „Дар – Мар“.

Марковиќ е роден во Скопје во 1940 година. Како сценарист и сценограф, аниматор, стрип-цртач, илустратор и дизајнер, зад себе остави богато и уникатно творештво. Во 1966 година дипломира архитектура, а во 1972 година специјализира анимиран филм во Загреб, под менторство на оскаровецот Душан Вукотиќ.

Професионалната кариера како карикатурист ја почна во 1960 година, работејќи за повеќе весници и списанија во Македонија и во поранешна Југославија. Од 1966 до 1975 година работи како главен уредник на хумористично-сатиричното списание „Остен“ и како директор на Светската галерија на карикатури во Скопје.

Со филм активно се занимава од 1975 година, кога се вработува во „Вардар филм“, отворајќи го студиото за анимиран филм. Од 1978 година работи како слободен уметник, а во 1983 година е назначен за професор на Факултетот за уметност во Скопје по предметот анимиран филм. Во истиот период работи како главен уредник на културно-уметничката програма во Телевизија „Скопје“.

Од 1988 до 1995 година живее и работи во Лондон, по што се враќа во Македонија.

За своите карикатури и анимирани филмови, има добиено повеќе од 30 награди и признанија.

Негови познати анимации се „Граница“ (1976), „Стоп“ (1976), „Три минути на светот на Мирослав Бартак“ (1976), „Бело топче“ (1977), „Циркус“ (1979) и други.

Времето на положувањето на посмртните останки на Дарко Марковиќ ќе биде дополнително соопштено.


Во Идризово почина затвореник


Скопје, 4 јуни, 2016 - 15:53 (META) 

Во Ургентниот центар утрово почина Д.Б. (67) од Дебар, осуденик во затворот КПУ „Идризово“, соопшти полицијата.

По наредба на јавен обвинител, телото е предадено на обдукција.