Рудникот САСА им ги зголеми платите на вработените за пет проценти


Македонска Каменица, 19 февруари, 2019 - 11:09 (META) 

Менаџерскиот тим на рудникот за олово и цинк САСА донесе одлука за ново зголемување на месечните примања на сите вработени за пет проценти, почнувајќи од 1. јануари оваа година, информираат од компанијата.

Со ова најново зголемување, платите во рудникот САСА ќе бидат и до 30 проценти повисоки од просечните плати во рударската индустрија во земјава.Зголемувањето на платите на сите вработени во рудникот САСА започна во април минатата година, кога раководството на компанијата ја објави динамиката по која ќе се одвива овој процес.

„Со најновата одлука за покачување на платите на сите вработени потврдуваме дека остануваме доследни на нашите ветувања и заложби за унапредување на благосостојбата и социјалната сигурност на сите вработени во САСА. И во оваа пригода можам да потврдам дека благосостојбата, заедно со безбедноста и здравјето на сите вработени остануваат наши највисоки приоритети во кои ние и понатаму ќе продолжиме да вложуваме“, изјави генералниот директор на рудник САСА, Олег Телној.

Покрај во покачување и усогласување на платите по работни позиции, рудникот САСА во изминатиов период направи и дополнителни вложувања во осовременување на системите  за организиран превоз и исхрана на вработените, како и во останатите сегменти кои имаат влијание врз унапредувањето на вкупните услови за работа во рудничкиот компекс.


Адеми: Пет отсто повисоки плати за наставниците од септември 


Скопје, 7 февруари, 2019 - 14:29 (META) 

Во 2019 година, вкупно за образование ќе се трошат 26,1 милијарда денари, што е зголемување на буџетот за седум отсто повеќе од лани. Парите ќе се трошат меѓудругото, и за повисоки плати за наставниците, информира на брифинг со новинарите денеска министерот за образование и наука, Арбер Адеми.

– Минатата година имаше зголемување на платите за пет отсто, а за уште пет отсто ќе се зголемат и од следната учебна година. Освен во основното и во средното образование, зголемување на платите ќе има и во високото образование. Најголем дел од парите, 16,3 милијарди денари, ќе се трошат во основното и во средното образование, а исто така, ќе се инвестира и во нова математичко-информатичка гимназија – рече Адеми.

Од буџетот за образование, една милијарда денари повеќе ќе има и за блок-дотациите, кои министерството им ги дава на општините, а се наменети за училиштата. За високото образование, министерот информира дека ќе се трошат 6, 45 милијарди денари.

– Ќе се вложува во инфраструктура, ќе се градат нови учлишта и нови спортски сали, а предвидени се пари и за универзиетот „Мајка Тереза“. Одредивме и локација за оваа високообразовна институција, таа ќе биде сместена во касарната „Илинден“. Ќе вложуваме и во обнова на сите студентски домови, а заедно со Министерството за финансии ќе разгледаме кои домови се приоритетни за обнова, иако речиси сите се соочуваат со потешкотии – изјави Адеми.


Пратениците од СДСМ ќе гласаат против зголемување на платите на вицепремиерите


Скопје, 28 јануари, 2019 - 16:12 (META) 

Пратениците од СДСМ ќе гласаат против зголемувањето на платите на вицепремиерите, кога точката ќе дојде на дневен ред, порача Костадин Костадинов, пратеник и портпарол на СДСМ, одговарајќи на новинарско прашање на прес-конференцијата во Собранието.

Прашан зошто се спротивставиле на предлогот точката целосно да се исфрли, тој рече оти тоа го направиле за да имаат можност да гласаат против Предлог-законот за изменување на Законот за плата и други надоместоци на избрани и именувани лица во Република Македонија.

– Секако го одбивме барањето за повлекување од дневен ред на точката поврзана за платите на вицепремиерите од причина што ставот на пратеничката група на СДСМ и коалицијата дека поддржување на дополнителни бенефиции за вицепремиери нема да има. Значи ќе гласаме против оваа точка, тоа ќе го докажеме и со самото гласање кога точката ќе дојде на дневен ред – рече Костадинов.

Тој смета дека бенефиции би требало има само за граѓаните.

– Дополнителни бенефиции за функционерите не се потребни, бенефиции ќе има исклучиво за граѓаните, тоа е јасна определба на СДСМ и коалицијата рече портпаролот на СДСМ.


Повисоки плати ќе побараат синдикатите, на протест во Штип во сабота


Штип, 24 јануари, 2019 - 13:28 (META) 

Десетина гранкови синдикати, членки на Конфедерацијата на самостојни синдикати (КСС) ќе излезат на протест во Штип, во сабота. На прес-конференција во Штип, претседателот на СОНК, Јаким Неделков кажа дека главните барање се зголемување на платите за 25 отсто, но има и повеќе други барања, како што е вклучување на синдикатите во најавените реформи и почеток на  дијалог со владата.

-Нашето барање за зголемувањето на платите да почне од први јануари 2019 година, беше упатено поодамна, а не со септемвриска плата во октомври 2019 и не за пет проценти како што е најавено, туку за многу повисок процент, со кои би се изедначиле со платите на национално ниво. Ако една воспитувачка има 20.000 денари плата, или еден наставник 22.000 плата, ако знаеме дека просечната плата е близу 25.000 денари, тогаш лесно се заклучува дека платите во секторот се под просекот и треба да се зголемат – изјави Неделков.

Главната забелешка на синдикатите е дека реформите се спроведуваат без синдикатите, како што е најавата за трансформација на работен однос од јавен во приватен сектор. СОНК конкретно бара нивни членови да бидат вклучени, пред воведувањето на новите реформи во средното образование, што се најавуват за септември. Синдикатите бараат да бидат информирани и да го кажат својот став.

На јавно искажаните реакции зошто ККС и СОНК не протестирале порано, во време на ВМРО-ДПМНЕ, туку сега, Неделков вели дека синдикалната борба не престанува.

-Неосновани се реакциите, еве, последно искажано незадоволство во време на ВМРО-ДПМНЕ имавме 2015 година, кога штрајкувавме скоро две недели за состојбите во дејностите што ги застапуваме – одговори претседателот на СОНК.

Протестот во Штип во сабота ќе започне во 12 часот, со собир пред Градскиот плоштад, ќе се формира поворка, која ќе помине низ центарот и повторно се враќа на плоштадот, каде претставници на повеќе синдикати ќе се обратат пред присутните. Од ККС очекуваат присуство на вработените во овие сектори и нивни членови, бидејќи протестот е во неработен ден, што значи, како што рекоа од синдикатите, нема изговор за неприсуство. Како што вели Неделков, треба да се мисли на себе и сопственото семејство.


Негативни оценки во ревизијата на работењето на Агенцијата за странски инвестиции во 2017


Скопје, 18 јануари, 2019 - 13:16 (META) 

Многу проблеми со оценувањето на работата и резултатите на економските промотори во 2017 година констатирал Државниот завод за ревизија, кој ја објави ревизијата на регуларност на финансиските извештаи на Агенцијата за странски инвестиции и промоција на извозот за 2017, заедно со ревизија на усогласеност.

Оценката за работењето на државната агенција е негативно. Така, ревизорите дале неповолно мислење во поглед на  вистинито и објективно прикажување на финасиските трансакции, а истата оценка се дава и за усогласеноста на финансиските трансакции со законската регулатива, упатства и воспоставените политики.

Големи проблеми се констатирани и во поглед на економските промотори, односно отсуствувало целосно уредување и прецизирање на прашањата поврзани со нивната работа, а притоа не се почитувал ни правилникот за нивната работа во странство и за нивните плати и надоместоци, а исто така не се следела и оценувала нивната работа. Проблематично било и исплаќањето аванси за материјални трошоци на економските промотори.

Државните ревизори утврдиле дека во Агенцијата за странски инвестиции не е воспоставен систем за внатрешни контроли на безготовинското и готовинското плаќање. Исто така, утврдиле дека немало пристап во CRM-ASIPIRM системот кој се користел во претходните години за обезбедување податоци и информации за приливот на странски директни инвестиции. Како забелешка е и тоа што не се обезбедени целосни податоци за стратешко планирање и отчетност. Дополнително, бил избран заменик-претседател на Управен одбор и му се исплаќал надомест, иако таа функција не била предвидена во законската и подзаконската регулатива.

Ревизорите констатирале и дека новите членови на Управниот одбор се избирале недоследно.

Проблеми имало во поглед на исплатата на државната помош – не била обезбедена соодветна документација, не се ставале во архива актите со кои се исплаќала државната помош, а внатрешниот ревизор не бил вклучен во ова работење.

Исто така, во врска со државната помош имало неусогласеност на Правилникот за контрола со Статутот, а таа се издавала и на основа на непотпишани документи.


Владата размислува да го зголеми „минималецот“


Скопје, 3 јануари, 2019 - 16:09 (META) 

Владата размислува да го зголеми прагот на загарантирана минимална плата, рече денеска премиерот Зоран Заев одговарајќи на новинарско прашање, како ќе го постигнат ветениот просек на платата од 500 евра.

„Владата има намера за дополнително носење на одлука за растот на минималната плата за оваа година“, одговори накратко Заев.

Министерот за финансии Драган Тевдовски рече дека „главната борба на оваа влада е платите да растат“, бидејќи платата за најголем дел од граѓаните е единствениот приход.

„Притискаме платите да растат, но истовреме даваме и поддршка за отворање на нови работни места. Платата од 2013 до 2017 година имала пораст од 1,9 проценти, а лани таа се зголемила за 5,7 проценти“, рече Тевдовски.

Зборувајќи за очекувањата на економски план, премиерот најави дека оваа година ќе биде економска, во која ќе нема пречка за реализација на капиталните инвестиции како што се изградба на патишта, железницата и гасификација.

Сите проблеми од техничка природа како проектна документација и решавање на имотно-правни односи биле надминати и очекува интензивирање на изградбата на пругата.

За гасификацијата очекува дека општините ќе ја градат секундарната мрежа, преку концесии или кредити кои би ги земале преку Македонски енергетски ресурси (МЕР).

Тој додаде дека повеќе пари кај граѓаните останале и преку евтината тарифа на струја, ослободување од плаќање на радиодифузна такса, намалување на казните, камати од заостанати долгови.

За оваа година најави и намалување на невработеноста под 20 проценти.

Министерот Тевдовски очекува стапката на раст на платите да продолжи од 4,5 проценти и во приватниот и во јавниот сектор.

„Политичката стабилност, ЕУ-перспективите, враќањето на довербата на инвеститорите, растот на приватните инвестиции, надминување на проблемите со техничките документи, решавање на имотно-правни односи за реализација на проектите ни дава за право да проектираме економски раст од 3,2 проценти“, рече Тевдовски.


Во Собранието денеска почнува комисиска расправа за предлог-буџетот за 2019


Скопје, 28 ноември, 2018 - 11:43 (META) 

Расправата по предлог-буџетот за 2019 година, почна денеска во матичната Комисија за финансирање и буџет во Собранието.

Предлог-буџетот за 2019 година тежи 3,7 милијарди евра, вкупните приходи се проектирани на 210,8 милијарди денари, (3,4 милијарди евра), а порастот на економијата 3,2 проценти на домашниот бруто-производ (БДП).

Со буџетот за 2019 година се предвидува намалување на буџетскиот дефицит, кој за следната година е проектиран на 2,5 проценти од домашниот бруто-производ (БДП).Во предлoг-буџетот за 2019 година предвидена е реформа во Фондот за пензиско осигурување, односно намалување на вкупниот трансфер.

Нови 10 проценти повисоки плати се предвидени за лекарите специјалисти од јануари 2019 година, а нови пет проценти повисоки плати од септември 2019 година за сите вработени во јавното здравство. Пораст на платите од пет проценти се предвидени и за просветните работници, вработените во градинките и за јавната администрација.

За капиталните инвестици, кои секоја година се кратат со ребаланс, предвидени се 25,7 милијарди денари.

Согласно фискалната стратегија, јавниот долг за 2019 година ќе изнесува 54,2 проценти и ќе се финансира од домашниот и странскиот пазар на хартии од вредност, но не е планирано издавање на нова еврообврзница.

Се очекува, стапката на инфлација да е ниска и стабилна, а стапката на невработеност да се намали на околу 20 проценти.


Заев: Владата ќе бара законски можности да ги проследи барањата на стечајците на „Охис“


Скопје, 26 ноември, 2018 - 16:33 (META) 

Премиерот Зоран Заев денеска прими делегација на Иницијативниот одбор на поранешни вработени во АД „Охис“ Скопје во стечај.

Нивните очекувања главно се однесуваат за исплата на побарувања од стечајната постапка за 24 неисплатени плати и за затворање на придонесите од плата за периодот од јуни 2012 година до октомври 2013 година, како и во списокот за обесштетувања од стечајната маса на АД „Охис“ да бидат вклучени и вработените од фабриката „Малон“ АД Охис.

„Премиерот Заев на средбата истакна дека, иако стечајната постапка на АД „Охис“ Скопје е завршена и спроведена од судските органи во процес во којшто Владата нема ингеренции, тој ќе го задолжи министерот без ресор задолжен за регулатива за подобрување на инвестициската клима за домашните претпријатија Зоран Шапуриќ, да ја продолжи понатамошната комуникација со поранешните вработени во „Охис“, да оствари средби со надлежни институции, како и со стечајниот управник Маринко Саздовски, за да се најде одржлив одговор на барањата на Иницијативниот одбор на поранешни вработени во АД „Охис“ Скопје во стечај“, се вели во соопштението од Влада.


Вработените во МЖ „Транспорт“ бараат плата до четврток


Скопје, 20 ноември, 2018 - 11:53 (META) 

Независниот синдикат на машиновозачите и железничарите на Македонија, Синдикалната организација на вработените на подружница влеча на возови, Синдикалната организација СММ и Синдикалната организација на МЖ „Транспорт“ АД Скопје се приклучуваат кон најавата за прекин на работните обврски, доколку не се исполнат барањата за исплата на плата и материјални трошоци и здравствено осигурување.

Ваквата одлука, како што соопштуваат денеска, е донесена на состанок одржан вчера. Во соопштението наведуваат дека во овие синдикални организации членуваат 90 отсто од вработените во МЖ „Транспорт“.

Вчера, исто така, прекин на работните обврски најавија и членовите на Независниот машински и извршен персонал.

Тие побараа до четврток да биде исплатена платата и материјалните трошоци за октомври, доколку не се исполни барањето од петок наутро нема да ги извршуваат работните обврски.


Администрацијата секоја година јаде сѐ поголем залак од буџетот


Скопје, 19 ноември, 2018 - 10:34 (META) 

На администрацијата секоја година се трошат сè повеќе пари од буџетот, а ништо поразлична нема да биде ниту 2019 година, кога се предвидува за плати на администрацијата од буџетот да се потрошат 461 милиони евра, што е зголемување за 25 милиони евра или од 5,7 отсто во однос на годинава, кога за оваа намена се одвоени 436 милиони евра.

Податоците за изминатиов период покажуваат континуирано зголемување на расходите наменети за плати во адмнистрацијата, односно од 2013 година наваму, секоја година за плати има зголемување во просек за 14 милиони евра.

Во рамки на 461 милиони евра проектирани во буџетот за 2019 година за плати во администрацијата предвидено е покачување на платите за 5 отсто за вработените во буџетските корисници во последниот квартал од годината, односно почнувајќи со исплатата на септемвриската плата во 2019 година.

„Ваквото зголемување се предлага со цел подобрување на стандардот на живот на вработените и зголемување на мотивот за професионално, квалитетно и целосно исполнување на работните задачи, особено во фаза на спроведувањето на преговорите околу интеграцијата во ЕУ и НАТО“, се вели во предлог-буџетот за 2019 година.

Сосем друго е прашањето какви рефлексии има ваквото зголемување во приватниот сектор, каде што платите растат со многу побавно темпо отколку во администрацијата.

На проблемот со постојаниот пораст и несоодветната функционалност на администрацијата неодамна укажаа и стопанствениците. Оттаму ѝ порачаа на Владата наместо да воведува прогресивно оданочување, кое ќе има негативно влијание врз вработените во приватниот сектор и воопшто врз бизнисите, да преземе мерки за рационализација во администрацијата.

„Стопанската комора на Македонија смета дека најсоодветен начин за уредување на прашањето за обезбедување дополнителни средства во буџетот на Република Македонија во насока на обезбедување подобар квалитет на јавните услуги е прво да се искористат сите расположливи можности за рационализација на расходите, а пред сѐ рационализација на процесите на државната администрација, пред да се пристапи кон воведување поголеми обврски за субјектите во системот и поголемо даночно зафаќање, особено ако се има предвид континуираниот тренд на пораст на сите даночни приходи во буџетот во периодот 2005-2017 година“, соопшти комората.