Од СОНК бараат зголемувањето на платите да биде повеќе од пет отсто и да почне од јануари


Скопје, 13 ноември, 2018 - 14:14 (META) 

Самостојниот синдикат за образование, наука и култура на Република Македонија – СОНК се залага зголемувањето на платите од пет осто во овие дејности да биде од први јануари, а не од септември 2019 година.

– Со пет отсто апсолутно не сме задоволни. Платите се далеку под просекот. Ако просечната месечна плата е околу 24 илјади денари, просечната плата во образование е околу 19 илјади денари. Најниската е 12.100, а на наставниците и професорите е до 22 илајди, ако не се земе предвид платата на директорите – рече денеска на прес-конференција претседателот на СОНК, Јаким Неделков.

Тој додаде дека има 250 лица чиј работен однос треба да се трансформира од определено на неопределено време.

– Општинските комисии што се задолжени да направат чекор во трансформации на работни договори од определено на неопределено работно време или одреден број на такви општински комисии воопшто не функционираат. Според наша проценка, тоа намерно се прави за да истечат овие три месеци на договори на определено време за потоа да се распишат конкурси и се вработат други луѓе, веројатно поподобни овие што се на работно место – рече Неделков.

Министерот за финансии Драган Тевдовски на вчерашната средба со синдикатите, при претставување на предлог-буџетот за 2019 година рече дека знае дека платите се мали, но тие како министерство гледале колкав е фискалниот простор за зголемување, бидејќи морале да внимаваат и на поддршката на економијата, компаниите, земјоделците.


Истражување: Повеќе од една петина од граѓаните на Србија сакаат да се иселат


Белград, 15 октомври, 2018 - 11:22 (META) 

Повеќе од една петина од граѓаните на Србија, или 22 отсто сакаат да се иселат од државата покажало истражувањето „Зошто луѓето заминуваат од Србија“, јавува дописничката на „Мета“ од Белград.

Бројките покажуваат дека секоја година од Србија се иселуваат помеѓу 40 и 70.000 лица, а ако кон тоа се додаде и негативниот природен прираст, Србија годишно губи по 100.000 жители.

Како што соопштила организацијата „Србија 21“, за иселување најмногу размислуваат младите помеѓу 18 и 29 години (34 отсто или околу 450.000 граѓани).

Од тие кои сакаат да си заминат, 45 проценти размислуваат за трајна преселба, а најголем мотив за тоа се стандардот (41 отсто), подобра платена работа (36 отсто), и лошата ситуација во државата (9 отсто) од испитаниците.

Најголем дел од граѓаните на Србија (85) отсто сакаат да се иселат во Европа, а само во два отсто во Русија.

Организацијата „Србија 21“ го спровела истражувањето во текот на јуни и јули годинава на примерок од 1.000 полнолетни граѓани.


Прилепскиот загубар „Еуроинвест“ ќе прогласи технолошки вишок


Прилеп, 25 септември, 2018 - 10:04 (META) 

Прилепскиот загубар „Еурокомпозит“ до крјаот на овој месец ќе ја објави листата на вработени кои што ќе бидат прогласени за технолошки вишок. Според вицепремиерот за економија, Кочо Анѓушев ова е една од мерките за консолидација на овој прилепски загубар со околу 260 вработени, кои што со децении живеат во агонија за својата работна судбина.

„Оваа компанијата се соочува со сериозни тешкотии што настанале во 2011, 2012 и 2013 година. Но, на добар пат сме да го решиме. До крајот на месецот како што се договоривме со Синдикатот и раководството ќе биде прогласен технолошки вишок, за да може сите тие луѓе да си ги остварат своите права, во рамките на законите, за да бидат згрижени. Оттука натаму, по први октомври ќе премине во период на реорганизација, значи пред стечајна реорганизација во која што се обезбедени инвеститори за да може „Еурокомпозит“, да продолжи да работи како нормална компанија“, рече вицепремиерот за економија Анѓушев.

Тој се надева дека за две години, оваа државна компанија ќе се реорганизира и ќе постигне резултати, бидејќи компаниите од дејноста што ја обавува „Еурокомпозит“ во регионот работат успешно.

„Еурокомпозит“ е единствена фабрика за наменско производство за потребите на одбраната и безбедноста, целосно во државна сопственост. Од осамостојување на Македонија до денес вработените оствариле десетици средби со сите македонски влади и добиле ветувања дека проблемот со овој загубар ќе биде решен. Но, наместо подобро, останувала практиката само преку штајк да обезбедуваат аванси за плати, зашто придонесе не им се плаќаат со години.


Тевдовски: Наплатата на даноци повисока за 120 милиони евра повеќе од лани


Скопје, 10 септември, 2018 - 11:24 (META) 

Наплатата на даноци и придонеси заклучно со август е повисока за 120 милиони евра во однос на минатата година, вели министерот за финансии Драган Тевдовски. Тој додаде дека даноците и придонесите пораснале за седум проценти во однос на минатата година.

– Наплатата на даноците покажува интензивирање на економската активност. Ова се должи во голема мерка на растот на данокот на добивка, чија наплата е подобра за 25 проценти во однос на лани или за околу 35 милиони евра. Тоа укажува на зголемена активност на фирмите. Исто така има раст на придонесите на седум проценти што укажува дека трендот на раст на плати и нови работни места продолжува и после второто тримесечје. Имено, високата наплата на придонеси во првото полугодие од годинава е поврзано со растот на платите за 5,6 проценти и растот на бројот на работни места за околу 10.000 нови – рече Тевдовски и дополни дека сервисирањето на обврските од државата се одвива непречено.

– Повратот на ДДВ кон фирмите е навремен и неселективен. Од почетокот на годината до крајот на август, во стопанството се вратени 250 милиони евра поврат на ДДВ. Во август имавме извршено најголем поврат во последните години, во износ од 44 милиони евра. Со обезбедување на ликвидност на фирмите, се поддржуваат нивните тековни, но и инвестициски активности. Во овој период се забележува поголема инвестициска активност на компаниите. Имено, ако се анализира увозот, во периодот од јануари-јули 2018, најголем раст од 19,7 проценти се забележува кај секторот машини и транспортни уреди. Овој податок укажува на раст на инвестициите на фирмите во основни средства. Тоа ќе придонесе за раст на економската активност и во иднина, поголемо производство и нови работни места- вели Тевдовски.


Мицкоски: Учебниците доцнат, образованието крахира, имаме демографска катастрофа


Скопје, 3 септември, 2018 - 15:12 (META) 

Македонија денес се соочува со демографска катастрофа, во вториот квартал во 2018 година, имаме пад за 6,3 проценти на бројот на новородени деца, тоа за шест години ќе значи и дополнително намалување на бројот на ученици, паралелки кои ќе се затворат, населени места кои забрзано замираат.

Ова денеска го истакна лидерот на ВМРО-ДПМНЕ, Христијан Мицкоски во неговото видео-обраќање.

Тој додаде дека на Македонија и се одзема иднината, а Владата не презема ништо.

– Поради тоа имаме кратење на паралелките, дури се соочуваме и со затворање на цели училишта.
Додека состојбата во образованието и училиштата е очајна. Имаме училишта кои прокиснуваат, влагата е честа појава, додека бесплатните учебници доцнат. Но затоа, затоа пак додека образованието за родителите е мака, за власта тоа е шанса за профит. Скандалите не престануваат. Милионскиот бизнис од 5,3 милиони евра за набавка на учебници се побрза да се додели на две фирми, во четири очи, без тендер, а фирмите според неформалните информации, важат за блиски до власта- рече Мицкоски.

Тој вели дека зголемувањето на платите за наставниците што го направија од владата е понижувачко и е далеку од првично ветените 500 евра просечна плата.


Ќе се зголемуваат платите во основното и средното образование


Скопје, 30 август, 2018 - 10:15 (META) 

Владата на вчерашната седница донесе одлука за зголемување на платите на вработените во основно и во средно образование за 5%, почнувајќи од исплатата на септемвриската плата годинава.

На покачувањето ќе му претходно потпишување договор меѓу Министерството за образование и наука и Самостојниот синдикат за образование, наука и култура (СОНК). Со овој документ ќе се утврди најниската плата за најнискиот степен на сложеност на вработените во основните училишта, која ќе изнесува 12.714 денари, а најниската плата за најнискиот степен на сложеност на вработените во средните училишта ќе изнесува 13.117 денари.

Исто така, донесена е одлука и да продолжи стипендирањето средношколоци во учебната 2018/2019 година. Според оваа одлука, 100 талентирани ученици и 80 талентирани ученици – спортисти ќе добиваат стипендија во висина од 2. 970 денари. Сто ученици со посебни потреби и 50 ученици – деца без родители ќе добијат стипендија од 2.750 денар, а 400 ученици ќе добијат стипендија за социјална поддршка од 2.200 денари.

Стипендии се предвидени и за средношколци од ромска националност.

На 85-тата седница, на предлог на Министерството за земјоделство, шумарство и водостопанство, Владата вчера прифатила да се дава дополнителна субвенција од 1 денар за килограм предадено грозје за сортите вранец и смедеревка.


Гувернерката Ангеловска-Бежоска учествува на Форумот на централно банкарство на ЕЦБ


Синтра, 19 јуни, 2018 - 10:32 (META) 

Гувернерката на Народната банка Анита Ангеловска-Бежоска, учествува на Форумот на централно банкарство на Европската централна банка (ЕЦБ), кој што традиционално се одржува во Синтра, Португалија.

„Годинешново издание на Форумот започна вчера и тематски е посветено на одредувањето на цените и платите во напредните економии – тема која што во изминатиов период зазема централно место во дебатите за монетарна политика на глобално ниво. Денес, по обраќањето на претседателот на ЕЦБ, Марио Драги, учесниците на Форумот дискутираат за макроекономските аспекти на оваа тема, додека сесијата и панел-дискусијата кои што ќе се одржат утре се посветени на нејзиниот микроекономски аспект. Во текот на утрешниот ден, на Форумот ќе се одржи и панел-дискусија за политиките на централните банки“, информираат од Народна банка.

На Форумот, покрај највисоките претставници на ЕЦБ и гувернерите на централните банки, учествуваат и професори од најреномираните универзитети од Европа и САД и значајни учесници на меѓународните финансиски пазари.

Во Синтра, гувернерката Ангеловска-Бежоска ќе оствари и одделни разговори со повеќе гувернери на централни банки, со високи претставници на меѓународните финансиски институции и организации и со истакнати меѓународни експерти за монетарна политика.

„Нејзиното учество на годинешниот Форум на централно банкарство на ЕЦБ е уште една потврда на определбата на НБРМ да чекори по патот којшто води кон Европскиот систем на централни банки“, додаваат од НРБМ.


Тевдовски: Пораст на платите во текстилната и кожарската индустрија и до 21 отсто во март


Скопје, 22 мај, 2018 - 13:52 (META) 

Податокот кој го објави Државна статистика за растот на платите е показател дека економските политики и мерки кои ги спроведува Владата даваат резултати, рече министерот за финансии Драган Тевдовски денеска на прес-конференција пред Владата.

Тој се осврна на објавата на Статистика за раст на мартовската плата за 5,6 отсто на годишно ниво.

– Ако се погледнат првите три месеци годинава во однос на првите три месеци минатата година, растот е околу 5 отсто. Тоа е пред се поради една од првите мерки која ја донесовме, односно зголемувањето на минималната плата, која придонесе околу 90.000 работници во Македонија да имаат поголеми плати. За нас е важно што растот кај платите е предизвикан пред се од растот кај оние работници кои имаат најниски плати. Станува збор за работниците од текстилната, кожарската и индустријата за производство на облека. Тие претходно имаа неправедно пониско ниво на минимална плата – рече Тевдовски.

Тој додаде дека последниот извештај за платите во овие три индустрии за текстил, облека и кожа, растот на платите во март годинава во споредба со март лани се движи помеѓу 15 и 21 проценти.


Административците со плати од 300 до 1.500 евра – далеку над македонскиот просек


Скопје, 16 мај, 2018 - 12:12 (META) 

Просечната месечна нето-плата во администрацијата се движи од 18.174 денари до 90.215 денари, покажува анализата направена од Фондацијата за демократија на „Вестминстер“ во рамките на проектот „Поддршка на македонската парламентарна реформа “.

Анализата покажува дека најголеми средства за бруто и нето плати по вработен на месечно ниво во 2016 година се издвоени за Агенцијата за странски инвестиции и промоција на извозот, и тоа по 96.071 денар просечна бруто, осносно 63.854 денари просечна нето-плата по вработен.

А најниски месечни расходи за бруто и нето плати во 2016 година биле реализирани во Секретаријатот за спроведување на Рамковниот договор со најниска месечна бруто-плата од 26.542 денари, или 18.174 денари месечна нето-плата по вработен.

„Од 2010 година до денес, може да се забележи тренд на зголемување на просечната месечна бруто плата во секторот јавна управа и одбрана и задолжително социјално осигурување и тоа од 36.800 во 2010 на 41.300 на крајот на 2017. Ваквиот тренд на зголемување е поголем од зголемувањето на просечната месена бруто-плата која од 30.225 денари во 2010 година се искачи на 34.079 денари. Исто така, значајно е да се напомене дека бројот на вработени во секторот јавна управа и одбрана и задолжително социјално осигурување е во постојан пораст и од 42.474 во 2010, се искачил на 47.364 во 2016, што претставува околу 15 отсто од вкупно вработените во Република Македонија за време на анализираниот период“, се вели во анализата.

Извештајот исто така покажува дека, според податоците во буџетот за 2016 година, просечниот износ за плати и надоместоци по вработен кај сите буџетските корисници на централниот буџет изнесува 42.563 денари, што е за скоро 10.000 денари поголем износ во однос на просечната бруто-плата во  Македонија за 2016 година. Или просечната месечна нето-плата по вработен кај сите буџетски кориници за 2016 година изнесува 28.700 денари, што пак е поголема за 6.360 денари од просечната месечна нето-плата во државата.

„Што се однесува пак до платите во регулаторните тела, може да се забележи дека просечните бруто и нето плати на сите 10 институции се поголеми од просечната бруто и нето-плата во државата. Тие се движат од 58.291 денар месечна бруто, односно 39.033 просечна месечна нето-плата по вработен, во Комисијата за аудио и аудиовизуелни медиумски услуги, до 136.194 денари просечна месечна бруто или 90.215 денари просечна месечна нето плата по вработен, во Регулаторната комисија за домување“, се додава во извештајот.

Оваа анализа е првично изработена за потребите на пратениците во Собранието на Република Македонија, со цел да им даде дополнителни информации кои би ги користеле во рамките на собраниската дебата, како и да им помогне во вршење на поквалитетен финансиски надзор врз работата на извршната власт.


Димитров: Зголемување на бројот на вработени да не е услов за државна помош на текстилците


Скопје, 20 април, 2018 - 12:55 (META) 

Претседателот на Огранизацијата на работодавачи, Ангел Димитров рече дека не постои текстилна компанија во Македонија што може да го зголеми бројот на вработени, што е еден од двата услова за добивање поддршка за инвестиции согласно законските измени кои се во собраниска процедура.

Текстилните компании денеска предупредија дека имаат голем недостиг на работна сила, а можат да опстанат само ако вложуваат во опрема и технологија, поради што поддршката им е повеќе од неопходна.

– Единствен начин да опстанеме е да инвестираме во опрема, во современи, автоматски машини, да почнеме со комплетно производство и креирање на сопствени брендови. Нашите компании го зголемуваат извозот, вкупниот приход и девизниот прилив, но зголемувањето на бројот на работници и да сакаат не можат да го остварат поради недостигот на работна сила на пазарот на трудот. Во текстилната, кожарската или чевларската индустрија има 5.000 слободни работни места – рече Димитров.

Според претседателот на Кластерот за текстил, Мирјана Перковска проблемот е што индустријата е недоволно технолошки подготвена, а цените на материјалите постојано растат. Поради тоа компаниите не можат да ја зголемат платата.

Законските измени за поддршка на инвестиции за овие индустрии предвидуваат два критериума компаниите да остварат зголемување на приходот од дејноста колку просекот во последните три години и да имаат ист или зголемен број вработени во однос на просекот во последните три години. Најмалку половина од текстилните компании ќе можат да конкурираат за поддршка за инвестиции, а некои почнале да вложуваат и во опрема.

Текстилната, кожарската и чевларската индустрија вработуваат 65.000 лица или 20 отсто од вкупниот број вработени во државата.

Вчера, на седницата на Комисијата за економски прашања на Собранието беше второто читање на предлог-законот за финансиска поддршка на инвестициите.