Мијалков: Христијане, играш двојно, лажеш, лицемер си и немаш капацитет


Скопје, 8 ноември, 2018 - 13:33 (META) 

Поранешниот шеф на УБК и висок функционер во ВМРО-ДПМНЕ кој неодамна беше исклучен од партијата, Сашо Мијалков, му пиша второ писмо на актуелниот лидер на партијата, Христијан Мицкоски.

Според Мијалков, ниедно претходно раководство на ВМРО не доживеало ваков срам на меѓународна сцена од сестринските партии кои се дел од Европската Народна Партија. Тој изразува уверување дека во иднина секој прв човек на ВМРО ќе биде фактор кој ќе биде прашан околу тоа дали ќе има една или две партиски делегации и кој ќе биде во тие делегации.

„Ти не си фактор и наместо да ја обединиш и зацврснеш партијата, ти ја слабееш и ја делиш. За тоа си крив ти, твоето лицемерие, лажниот патриотизам и твојата незаинтересираност за иднината на Македонија. Во иста вечер јавно да те бламираат и да ти пишуваат пораки на социјалните мрежи и Дорис Пак и Јоханес Хан не говори ништо друго, освен што покажува дека и тие ги прочитале твоите лаги и не ти веруваат. Така е тоа Христијане кога играш дупло. Така е тоа Христијане со искусни политичари кои знаат дека твои советници од доверба шетаат по Скопје и зборуваат „а да си побаравме ние друг партнер, на исток”. Нели Христијане клечеше, се крстеше и се колнеше во Македонија? Која е сега таа конструктивност која што сега ти стана повредна од Македонија? Има ли твојата “борба за Македонија” цена и која е таа ? Дали ќе организираш протести и дали во Собранието ќе ги искористиш сите средства за да го блокираш договорот од Преспа, а такви средства имаш многу“, прашува Мијалков.

Во писмото тој исто така го прашува лидерот на ВМРО-ДПМНЕ дали ќе стори нешто или „ќе се правдаш како имало нова реалност, а ти кутриот не си моќен да преземеш ништо“.

„Ти кажав и пак ќе ти кажам, тоа што го правиш не е чесно и не доликува на човек што треба да го води ВМРО. Сакаш да дојдеш на власт ама ти да си патриотот, а другите да се предавници. Сакаш да газиш преку туѓи животи. Кукавички и ниско од некој што треба да води организација како ВМРО. Прочитан си Христијане дека играш двојно со нашето членство и целиот народ. Извини се на членството за двојните игри и лицемерието. Извини се и на граѓаните на Македонија што ги лажеше дека ти ќе си го бранел името до крај“, додава Мијалков.

На крај поранешниот функционер му вели на Мицкоски дека има подолг стаж во ВМРО од него и од неговите соработници и дека писмата до него имаат една цел – да го спасат и направат посилно ВМРО.

„Ти не си ВМРО. ВМРО е над тебе. Ти си времено на функција во ВМРО. Доколку ВМРО загуби на претстојните избори затоа што е изолирано, тоа ќе биде само заради тоа што немаш капацитет. Крајно време е да размислиш и одлучиш, за враќање на прозападниот курс, зацртан во трајните определби на партијата“, завршува Мијалков.


Арнаудов: Никој не е предавник и ништо не е ветувано за случајот


Скопје, 22 октомври, 2018 - 11:24 (META) 

Пратеникот Љубен Арнаудов, обвинет за случувањата од 27 април во Собранието, денеска пред почетокот на рочиштето во Основен суд Скопје 1 изјави дека не смета оти некој е предавник и дека не знае кој стои зад завчерашното писмо, испратено до медиумите во име на пратениците од ВМРО-ДПМНЕ што во петокот гласаа за почнување со уставните измени. Истакна дека не е точно дека имале закани и дека примиле пари.

– Ништо не е ветувано за случајот 27 април и затоа не сакам да давам никакви информации. Доаѓаме тука да докажеме дека сме невини – изјави Арнаудов.

Пред него, реагираа и пет од осумтемина пратеници на ВМРО-ДПМНЕ, кои упатија иста порака – дека не добивале уцени или закани, ниту пак биле подмитени.

Помеѓу првите се огласи Нола Исмајлоска-Старова, а реагираа и Сашо Василевски, Зеќир Рамчиловиќ, и Емилија Александрова. Сите порачаа дека одлуката не била лесна, но сметале дека уставните измени се неопходниот чекор за да продолжат евроинтеграциите.

Во писмото упатено до медиумите во саботата, напишано во име на пратениците од опозицијата кои ги поддржаа уставните измени, се вели дека и посакуваат добро на Македонија и наведоа како сакаат да продолжи процедурата. Бараат гаранција дека ќе се поништат уставните измени ако Грција не го ратификува Договорот и ги попречува македонските евроатлантски интеграции, но и собраниско тело што ќе подготви план за национално помирување, според пораката на премиерот Заев од понеделникот, на првиот ден на седницата за уставните измени.

„Да се пристапи во наредната, но не и конечна фаза, на дискусија по уставните амандмани, само под следните услови од чие исполнување ќе зависат и нашите идни ставови и нашата конечна поддршка за Уставните измени:

1. Прифаќање на амандман на Уставот со кој ќе се гарантира македонскиот идентитет.
2.Прифаќање на одредба на Уставот со која ќе се гарантира дека доколку Република Грција не го ратификува договорот и повторно ги попречува евро-атлантските интеграции на Република Македонија, ќе има безусловно поништување на сите прифатени уставни амандмани кои произлегуваат од имплементацијата на договорот од Преспа.
3.Постепена промена на името за внатрешна употреба, следејќи го процесот што води кон полноправно членство на РМ во ЕУ.
4.Прифаќање на иницијативата на Претседателот на Владата на Република Македонија г. Зоран Заев искажана на 61-та седница на Собранието на Република Македонија на 15 октомври 2018 год., за простување во врска со настаните на 27 април 2017 год. во Собранието на Република Македонија и сеопфатно национално помирување, со формирање на собраниско тело составено од шефовите на пратеничките групи, тројца пратеници и Претседателот на Собранието на Република Македонија кои ќе изготват и предложат до Собранието план за национално помирување“, се вели во писмото.


Меркел со писмо до Заев: Да се преземат важни чекори за имплементација на Договорот со Грција


Берлин, 9 октомври, 2018 - 16:02 (META) 

Договорот од Преспа нуди историска шанса за Македонија и за зајакнување на добрососедските односи, нагласува германската канцеларка Ангела Меркел во писмото до македонскиот премиер Зоран Заев.

„На 30 септември огромно мнозинство од над 90 отсто од оние кои учествуваа на референдумот гласаа „за“ договорот со Грција. Договорот нуди шанса за историски договор и зајакнување на односите меѓу двете земји. Тој исто така ја отстранува клучната пречка за приближување на земјата кон ЕУ и НАТО. Сега е клучно да се преземат многу важни чекори за имплементација на договорот за името со усвојување на неопходните уставни амандмани. Ќе продолжам да соработувам со вас за остварување на оваа цел“, наведува Меркел во писмото до Заев, објавено на веб страницата на германската Влада.


Мицкоски: Македонија не е дивоградба која мора да се впише во катастар


Скопје, 24 јули, 2018 - 13:54 (META) 

Граѓани од Центар утринава во своите сандачиња добиле писмо потпишано од лидерот на ВМРО-ДПМНЕ, Христијан Мицкоски во кое тој им порачува дека е време да го кренат гласот, дека ќе стои рамо до рамо со нив во сите битки се додека, како што вели, не ја „направиме Македонија, стаменита, силна и непокорна“, објави „Фокус“.

Во периодот откако е СДСМ на власт, стои во писмото, стравот ја заменил демократијата, неморалот го заменил моралот, а непринципите ги замениле принципите.

„Корупцијата и криминалот цветаа како никогаш досега, преку ноќ се создадоа недопирливи луѓе, законот не важи за сите подеднакво, рекетот царува. Си поигруваат со човечки судбини, со судбините на убиените деца кај Смилковско, со судбините на семејствата на загинатите полицајци во кумановско Диво насеље. Непотизмот е главна одлика за вработување. Се вработува по партиски клуч. Советници стануваат криминалци и крајно некомпетентни луѓе. Младите се иселуваат не гледајќи никаква перспектива“, пишува во писмото на Мицкоски.

Македонија, вели Мицкоски, не е дивоградба која мора да се впише во катастар. Граѓаните, додава тој, имаат идентитет и минато од кое нема откажување.

„Знам дека не ме познавате доволно добро за да речете дека јас сум тој што треба да го поддржите. Јас сум само еден од вас и гледајте го на тој начин. И оттука не треба да ми верувате мене, туку барам да си верувате себеси. Затоа што јас верувам во вас“, додава тој во писмото.

Според лидерот на ВМРО-ДПМНЕ, во општеството владее хаос и апатија и додава дека тоа го „избрала историјата за нас“.

Во врска со својата партија Мицкоски самокритично посочува „не велам дека сме безгрешни и дека нема да грешиме, но ви ветувам дека умееме да се поправиме“, завршува тој.


Орбан на Заев му го честита Договорот со Грција


Будимпешта, 20 јули, 2018 - 16:25 (META) 

Премиерот Зоран Заев добил писмо од унгарскиот премиер Виктор Орбан со честитки по повод договорот за македонско-грчкиот спор за името и за стратегиско партнерство меѓу двете земји, информираат од владината прес-служба.

Во писмото, кое премиерот на Унгарија Орбан го потпишал и во име на Вишеградската Четворка, го поздравува решението што двете земји, Република Македонија и Република Грција, го најдоа во врска со прашањето за името.

„Унгарската Влада постојано, преку сите форуми се залага за забрзување на евроатланската интеграција на целиот регион на Западен Балкан, така и за Република Македонија. Унгарија го поддржа усвојувањето на резолуцијата на Европската Унија со која се овозможува започнување на преговорите за членство на Република Македонија во ЕУ“, се вели во писмото.

Орбан во писмото исто така вели дека Унгарија ја поддржува поканата за членство што Макеоднија ја доби од НАТО на 11 јули.


Заев од премиерите од ЕУ побара поддршка за старт на преговорите со Македонија


Скопје, 26 јуни, 2018 - 14:44 (META) 

Премиерот Зоран Заев испратил писма до премиерите на земјите-членки на ЕУ со кои ги повикал да поддржат одлука за старт за пристапни преговори на Македонија со ЕУ, како одлука која е одамна заслужена, соопшти Владата.

Информирајќи ги за Договорот за решавање на разликата околу името и за воспоставување на стратешко партнерство меѓу Македонија и Грција, македонскиот премиер напоменува дека тој е веќе ратификуван во Собранието и дека на есен ќе биде одржан референдум, по што ќе почне постапка за уставните измени.

„За да се обезбеди реализацијата на договорот и потенцијалните придобивки од него за двете земји, за регионот на Југоисточна Европа и за Европа како целина, од огромно значење е политичката поддршка на земјите-членки на ЕУ, за да ја потврдат со конкретни мерки стратегиската визија за европската иднина на мојата земја и целиот регион“, истакнува Заев, барајќи на Европскиот совет да се даде поддршка за почеток на преговорите.

„Со таквата одлука ќе биде оддадено признание за евидентните реформски процеси и ќе го олесни понатамошното продлабочување на реформскиот импулс. Покрај тоа, таквата одлука ќе има пресуден придонес во создавањето на неопходната позитивна клима за успешно завршување на секој од чекорите предвидени во Договорот за да спроведе деликатно избалансираниот компромис за решавање на долготрајниот и комплексен спор“, вели Заев во писмото.


Бошњаковски: Заев не побара бришење на „Македонска“ од името на МПЦ


Скопје, 31 мај, 2018 - 13:19 (META) 

Според портпаролот на Владата, Миле Бошњаковски, во своето писмо до вселенскиот патријарх Вартоломеј, македонскиот премиер не побарал бришење на зборот „Македонска“ од името на Македонска православна црква.

Како што веќе беше објавено, и Македонска православна црква – Охридска архиепископија (МПЦ-ОА) и премиерот Зоран Заев писмено се обратиле до Вселенската патријаршија со молба да се додели автокефален статус на МЦП-ОА.

– Премиерот Заев има испратено замолница за решавање на долгогодишното црковно прашање. Во замолницата испратена до вселенскиот патријарх не е побарано бришење на зборот „Македонска“. За сите други информации би ве упатиле на Синодот – рече владиниот портпарол Бошњаковски одговарајќи на новинарско прашање на денешната редовна прес-конференција во Владата.

Според владата, писмото на Заев било „еден придонес за кој сметаме дека треба да биде даден за решавање на долгогодишното црковно прашање“.


Имате поддршка и пријателство од Велика Британија, му пиша Џонсон на Димитров


Лондон, 27 април, 2018 - 15:43 (META) 

Министерот за надворешни работи на Велика Британија, Борис Џонсон, со писмо му ја честиташе на својот македонски колега Никола Димитров 25-годишнината од воспоставувањето на дипломатските односи помеѓу двете земји. Тој ја потврди поддршката и пријателството од Велика Британија и изрази надеж дека партнерството на двете држави ќе биде уште посилно во наредните години.

„Среќен сум што имам можност да одбележам 25 години од воспоставувањето на дипломатските односи помеѓу Британија и Македонија. Во поново време, Велика Британија и Македонија соработуваа на Единбуршкиот самит во 1992 година, кога се решаваа проблеми околу признавањето на вашата земја. Британските мировни трупи стационирани во Македонија помогнаа да се постигне договор за прекин на огнот во 2001 година, а во 2005 година, Велика Британија помогна Македонија да добие кандидатски статус за членство во Европската Унија“, вели тој во писмото.

Џонсон додава дека оваа година ќе биде особено важна за двете земји – Велика Британија се подготвуваа за идната улога надвор од Европската Унија, додека Македонија, вели Џонсон, продолжува со амбициозните реформи и со барање решение за спорот за името со Грција.

„Радосен сум што ја потврдувам поддршката и пријателството од Велика Британија. Значително ја зголемуваме техничка помош на Македонија и едвај чекаме да се видиме на самитот на земјите од Западен Балкан во јули. Се надевам дека нашето партнерство само ќе расте во годините што следат“, се вели во пораката на Борис Џонсон.


Нимиц им пишал на Димитров и Коѕиас во пресрет на нивната средба во Охрид


Њујорк, 11 април, 2018 - 12:36 (META) 

Медијаторот во решавањето на спорот за името, Метју Нимиц им испратил писмо на шефовите на дипломатиите на Македонија и Грција, Никола Димитров и Никос Коѕијас, во кое ја опишува актуелната ситуација во преговорите за името, односно точките за кои има согласување и точките за кои има разлики, онака како што тој ги формулирал за време на разговорите во Виена. Дописот на министрите им е испратен во пресрет на нивната нова средба во Охрид, вечерва и утре.

Информацијата за писмото ја објавија весникот „Катимерини“, радиото „Атина984“ и информативниот портал „Њуз247“, повикувајќи се на свои извори.

Грчкото МНР, ниту ја потврдува ниту ја демантира веста во грчките медиуми дека Нимиц испратил допис до Димитров и Коѕијас, јави дописникот на МИА од Атина.

„Според одредени извори, последниот допис на Нимиц ги одразува кристализираните ставови на американскиот дипломат за прашањето, како што тие беа формулирани по последната негова повеќечасовна средба со министрите за надворешни работи на Грција и ПЈРМ во Виена (30-31 март). Истите извори споменуваат дека Нимиц стигнал до точките што треба да бидат параметри на решението“, пишува „Катимерини“.

Радио „Атина984“, пак, објави дека станува збор за претходно одредена и предвидена процедура на медијаторот.

„Двајцата министри се очекува да одговорат на прашалникот што им беше доставен од специјалниот медијатор и да го имаат пополнето до нивната следна заедничка средба“, објави атинското радио.


Лавров: Русија ќе ги брани легитимните интереси на Србија


Москва, 3 април, 2018 - 10:52 (META) 

Русија е подготвена и понатаму на српските партнери да им дава поддршка во одбраната на легитимните национални интереси во однос на Косово, пред сè во меѓународните структури, му напишал шефот на руската дипломатија Сергеј Лавров на својот српски колега Ивица Дачиќ.

Во врска со акцијата на РОСУ на косовската полиција во Косовска Митровица и апсењето на директорот на Канцеларијата за Косово и Метохија, Марко Ѓуриќ, Лавров го известува Белград дека се испратени „соодветни инструкции на постојаните претставници на Русија во ОН во Њујорк, како и во ЕУ и во НАТО во Брисел и во ОБСЕ во Виена“.

Писмото на Лавров е одговор на писмото што српскиот министер за надворешни работи Дачиќ го испрати до сите членки на ОН. Шефот на руската дипломатија во својот одговор му порачува на српскито колега „дека во целост ги споделува изнесените оценки“.