Владата ја финализираше постапката за прифаќање на возачките дозволи во Германија


Скопје, 26 јуни, 2018 - 17:21 (META) 

На својата 76-та седница одржана попладнево, Владата го прифатила текстот на декларацијата со која Македонија и Германија меѓусебно ќе си ги признаваат возачките дозволи.

Тоа е последниот чекор пред потпишувањето на документот, со кое во Германија ќе се прифаќаат македонските возачки дозволи на македонските државјани што имаат законски престој во Германија од најмалку 185 дена во годината, како и на германските државјани со законски престој од најмалку 180 дена во Македонија, се дознава од владиното соопштение.

Мерката ќе донесе олеснување на гастарбајтерите, кои сега мораат да вадат меѓународни возачки дозволи.

Министрите на денешната седница го прифатиле и годишниот извештај на Министерството за финансии за управување со јавниот долг за 2017-тата година. Според извештајот, тој на крајот на 2017 година изнесувал 4.786,9 милиони евра, што претставува 47,6% во однос на БДП. Од оваа сума, 3.187,5 милиони евра отпаѓаат на надворешниот, додека 1.599,4 милиони евра на внатрешниот јавен долг.

Државниот долг на Република Македонија на крајот на 2017 година изнесувал 3.958,5 милиони евра односно 39,3% во однос на БДП.

Според годишниот извештај на министерството за финансии, бројот на вработени во 2017 година се зголемил за 2,4%, односно за околу 17.000 лица споредено со 2016-тата година. Зголемување од 2,6% на номиналната основа и раст од 1,2% на реална основа, лани бележи и просечната нето/бруто-плата.

Владата на седницата го разгледала и го прифатила извештајот за работата на Фондот за пензиското и инвалидското осигурување на Македонија (ПИОМ) во 2017 година. Според истиот, бројот на регистрирани осигуреници во декември 2017 е зголемен за 5.406 осигуреници во споредба со истиот месец во 2016 година. ПИОМ минатата година остварил плус од 171 милиони денари, односно 2,78 милиони евра.

Фондот за пензиското и инвалидското осигурување, според извештајот, минатата година остварил вкупни приходи во износ од 65.319,96 милиони денари и вкупни расходи во износ од 65.148,94 милиони денари.


Царовска: Нема зголемување на старосната граница за пензионирање


Скопје, 13 април, 2018 - 12:03 (META) 

Нема да има зголемување на старосната граница за пензионирање, а пензиите се стабилни и безбедни, рече денеска министерката за труд и социјална политика Мила Царовска, која на прес-конференција во Владата информираше за сработеното во изминатите 11 месеци.

– Работиме на стабилизација на системот за пензии, затоа што знаеме дека за 10 години ВМРО-ДПМНЕ за трипати го зголеми долгот на пензискиот фонд. Редовно ги усогласуваме пензиите, за разлика од ВМРО-ДПМНЕ, кое две години не предвиде средства. Но, размислуваме и за идните пензионери и наскоро ќе излеземе со планот за стабилизација на ПИОМ. И, повторувам, дека покачувањето на старосната граница нема да има, иако тоа излезе од многу места како информација – рече Царовска.

Во однос на стечајците, таа рече дека 453 стечајни работници добиле позитивни решенија според Законот за стечајци, а со донесувањето на новиот закон за минималната плата, повеќе  од 90.000 граѓани добиле повисока плата, со што се изедначени примањата за сите работници во државата во текстилната и кожарската индустрија.

Ообезбедени се средства за 138 нови вработувања во центрите за социјална работа и се вработени 486 лица на неопределено време во градинките, отворени се три нови регионални преноќувалишта за бездомни лица и е завршена реконструкцијата на 30-те центри за социјална работа кои опслужуват повеќе од 200.000 граѓани.

Покрај капиталните и проектите за детска заштита, се подготвуваат нови закони за социјална заштита и за работни односи, се работи и на нов европски закон за недискриминација.

 


Заев: Во ПИОМ фалат 500 милиони евра, може ќе треба да се зголеми возраста за пензионирање


Скопје, 22 февруари, 2018 - 16:37 (META) 

Jавноста треба да знае некои работи за дупката во Фондот за пензиско и инвалидско осигурување на Македонија (ПИОМ), некои првпат ќе ги соопштам… Секоја година државата ја покрива дупката во ПИОМ и оваа година таа е приближно 500 милиони евра. Тоа се пари што државата мора да ги внесува во Фондот и ако не е тоа, тие пари би се користеле за изградба на патишта, школи, болници, рече премиерот Зоран Заев во Собранието во попладневната сесија на седницата за пратенички прашања. Тој најави можно зголемување на возраста за пензионирање и на придонесите за вработени.

За разлика од првата сесија, попладневната ја водеше новоизбраниот потпретседател на Собранието, Горан Мисовски.

Одговарајќи на прашањето на пратеничката од СДСМ, Фросина Ташевска – Ременски за дупката во ПИОМ, Заев рече дека за побараните информации секако ќе мора да се одговорат во писмена форма, но и дека поради сериозноста на прашање „се чувствува должен да каже некои работи“.

– Oва е важно прашање зашто актуелнитe пензионери се загрижени, но идните пензионери треба да бидат уште позагрижени. Треба да бидеме загрижени за стабилизирање на ПИОМ. Логиката за падот на невработеноста значи дека тој треба да се полни, но тој создава се поголем дефицит. Знаете дека годините на пензионирање пораснаа опционо 67 за маж, 65 за жени, и тоа треба да значи дека Фондот се полни, но тој создава се поголем дефицит. Фондот постојано се празни. Ако сакаме нормално и здраво да зборуваме, чесно треба да зборуваме и некои работи да ги донесеме во нормала – рече Заев обвинувајќи ја претходната власт.

Тој рече дека е ангажирана Светската банка да се направи комплетна анализа на ПИОМ, на сите влезни и излезни податоци, но и да се провери дали секој што добива пензија, има законска основа да ја прима, како и за тие работни места што се субвенционирани. Според премиерот, ако не се постигне целта да се заздрави економијата и да се крене стандардот, ќе мора, поради дупката во ПИОМ, да зголеми возраста за пензионирање и височината на придонесите.

– Веројатно ќе треба да се повлечат непопуларни мерки. Но, сакаме да го надминеме проблемот со заздравување на економијата. Ете, Македонија излезе од криза, има заинтересирани за инвестиции и тоа е стабилната основа и за ПИОМ и за нови работни места и за повисоки плати, до нивото додека економијата порасне до степен за достоинствени плати во Македонија, тоа е моментот когоа треба да се прекрши заминуваањето во странство од младите. Но ако не биде така, јас мора да ги соопштам и непопуларните мерки што би се презеле. Тоа се покачување на годините за пензија и да ги зголемиме придонесите. Но, тоа мора да го издржи економијата, оти ваквата мерка може да одврати инвестиции. Затоа сме насочени кон издржани мерки. Но и опозицијата мора да биде тука, да испраќаме сигнали за силна држава. Целото ова како механизам мора да биде ставено на здрави основи, без популизам. Се надевам нема да се покачи старосната граница и нема да се покачат придонесите. Но, тоа ќе значи дека е јака економијата – рече Заев.


ММФ: Потребна ви е политичка стабилност, реформи и поголема отвореност на пазарот


Скопје, 16 февруари, 2018 - 15:03 (META) 

Охрабрени сме од економскиот напредок на регионот, вклучувајќи ја и вашата земја. За овој регион е важно да остане отворен и економски да се ангажира надвор од границите. Многу е важно да се зајакнат врските со најголемите трговски партнери.

Тоа денеска го порача заменик-главниот директор на Меѓународниот монетарен фонд (ММФ), Тао Џанг, на Меѓународната конференција за монетарна политика и управување со финансиски средства, која што ја организира Народна банка.

Според Џанг, сега е момент нашата држава да го поддржи заздравувањето на регионалната економија.

– Се чувствува итна потреба макроекономската политика да доживее реформа за да се консолидира прогресот кој досега е остварен. Политичката стабилност на државите од регионот е позитивно нешто и е неопходна за да може да се покренат економски реформи – рече Џанг.

Шефицата на Мисијата на ММФ во Скопје, Јасмин Рахмен, рече дека во Македонија се потребни структурни реформи во управувањето и владеењето на правото.

– Во тие две области Македонија не стои добро во споредба со другите слични мали економии. Потребни се реформи во правосудството и транспарентност на јавните институции за да се зголеми довербата, не само меѓународен план и кај луѓето. Има висока стапка на миграција во развиените земји. Моја прва препорака е да се подобрат јавните институции и владеењето, за да се задржат стручните работници во државата. Имате една од највисоките стапи на невработеност во Европа и потребни се реформи на политиките, поголема отвореност на пазарот, пониски даночни стапки и инвестирање во образованието – рече Рахмен.

Таа додаде дека одливот на стручен кадар скапо ја чини нашата економија.

– За да ги задржите дома, треба да создадете работни места и подобрување на условите за работа, како и предвидлива бизнис средина. Кога би имале подобра иднина, тие би останале. Тие мора да сметаат на институциите дека ќе обезбедат вработување и затоа се потребни реформи во институциите и образованието, за вештините кои ги стекнуваат да соодветствуваат на работните места кои се отвораат – додаде Рахмен.

ММФ останува на ставот дека се потребни реформи во Фондот за пензиско и инвалидско осигурување, бидејќи како што рекоа неговите претставници, вака е неодржлив на долг рок, поради стареење на населението, ниските придонеси и ниската старосна граница за пензионорање во споредба со земјите членки на ЕУ.

На конференцијата следуваат уште две сесии. На следната ќе се расправа за согледување на централните банки и на менаџерите на финансиски средства за стратегиите за ефективно намалување на ризиците, а на четвртата сесија е предвидена дебата за Југоисточна Европа „Кој е тековниот пат кон интеграција и пораст?“, на која ќе учествуваат министерот за финансии Драган Тевдовски и министерот за финансии на Бугарија, Владислав Горанов.

Конференцијата се одржува во хотелот „Мериот“ во Скопје и на неа учествуваат високи претставници од ММФ, Европската централна банка (ЕЦБ), Светска банка, гувернери, вицегувернери, претставници од најголемата финансиска корпорација за управување со финансиски средства во светот, „Блек Рок“ и од една од најзначајните глобални банки, „УБС“ (UBS).


Скршена двојазичната табла на ПИОМ во Охрид


Охрид, 28 март, 2017 - 14:02 (META) 

Откако вработените веќе дошле на работните места, засега непознати сторители утрово ја искршиле двојазичната табла поставена на влезот од зградата каде е сместена подрачната единица на Фондот за пензиско и инвалидско осигурување (ПИОМ) во Охрид.

Таблата е поставена кон крајот на минатата година и досега никому не му пречеше, исто како што двојазични табли се поставени и во зградата на локалната самоуправа, каде се сместени испостави на републички институции.

Стефан Димоски, портпарол на СВР Охрид, за „Мета“ го потврди настанот, кој го пријавиле вработените од фондот. Тој кажа дека таблата била скршена меѓу 8 и 9 часот.

Некои медиуми јавија и за тепачка, но Димоски во изјава за „Мета“ го негираше тоа.

– Во некои медиуми се раширија дезинформации дека имало тепачка или какво било друго нарушување на јавниот ред и мир во случајот со скршената табла на ПИОМ, но такви работи не се регистрирани – изјави Димоски.

Тој вели дека СВР Охрид има сознанија за можниот сторител и дека во координација со јавен обвинител се преземаат мерки за расчистување на случајот.


Николов: Со овој неразвоен буџет се проектира нов дефицит и долгови од 305 милиони евра


Скопје, 28 септември, 2016 - 16:15 (META) 

„Владата ги игнорира укажувањата на Светска банка дека мора да почне да ја намалува задолженоста и да почне фискална консолидација, бидејќи јавниот долг ќе достигне повеќе од 50 проценти од домашниот бруто-производ. И во 2017 година Владата со овој неразвоен буџет проектира нов дефицит и нови долгови од 305 милиони евра“, истакна претседателот на собраниската Комисија за финансирање и буџет, Марјанчо Николов.

Тој истакна дека повторно се игнорира укажувањето на Светска банка дека зголемуавњето на приходите е минимално.

– Наспроти тоа, имаме експанзија на буџетските расходи чие трошење е неосновано затоа што најголем дел од овие расходи одат за непродуктивни трошења и за неразвојни проекти како што се барокни фасади, панорамски тркала, рајски градини. Светска банка потврди дека во 2017 година трансферите кон ПИОМ ќе се зголемат за 20 милиони евра со што дефицитот во ПИОМ ќе го достигне историски највисокото ниво од 450 милиони евра. Ова е уште една потврда за катастрофалните фискални политики – истакна Николов и додаде дека буџетот за 2017 година ќе претрпи темелна ревизија.

Денеска во Комисијата за финансирање и буџет почна расправата за предлог-буџетот за 2017 година.


СДСМ: Колку вработувања се спречија со петте милијарди евра што ги изнесе „фамилијата“?


Скопје, 24 март, 2016 - 15:52 (META) 

„Кумот Ставрески нека каже како заедно со кумашинот Груевски успеаја да изнесат криминално повеќе од 5 милијарди  евра пари на граѓаните надвор од државата и колку уништени вработувања се тоа за луксузите на фамилијата? Како е можно со пад на преработувачката индустрија од 2 отсто на годишно ниво, со пад на земјоделството од 0,7 отсто, со бруто-инвестиции еднакви речиси на нула, да креира нови работни места?“, се вели во соопштението на СДСМ.

Во него, исто така, се додава дека „крунскиот доказ дека Груевски лаже кога зборува за нови вработувања е токму историски највисокиот дефицит на Фондот за ПИОМ во 2014 година.

–  Дупката во ПИОМ во 2008 година изнесувала 165 милиони евра, за во 2014 година промашените економски политики на Груевски да ја продлабочат на неверојатни 369 милиони евра! Доколку вистински се намалуваше стапката на невработеност, дупката во ПИОМ требаше да се намалува, а не забрзано да се зголемува и да го доведе Фондот во ризик на неодржливост на среден рок, како што алармираше Светска банка – се вели во соопштението.

Од СДСМ потсетуваат дека според Светска банка, 626.312 граѓани ја напуштиле државава во потрага по работа и по достоинствени услови за живот.

– Поради промашените економски политики, 10.000 домашни фирми се затвроени, на сопствениците им се загрозени основните егзистенции, а 8.000 чекаат да бидат избришани од евиденција – додаваат од СДСМ.

 


Заев: На Триумфална капија ќе поставиме бројчаник кој ќе покажува колку украдени пари се вратени


Скопје, 3 февруари, 2016 - 21:46 (META) 

Лидерот на СДСМ, Зоран Заев, одговарајќи на новинарски прашања во емисијата „Нова дебата“ на „Нова ТВ“ најави дека кога СДСМ ќе дојде на власт, ќе постави бројчаник на Триумфалната капија и секогаш кога Агенцијата за запленет имот ќе продаде некој имот, бројчаникот ќе покажува колку украдени пари се вратени.

Според него, не постои шанса по изборите да се направи широка коалиција.

– Точно е дека некои работи треба да се договараат со консензус, но тоа не значи широка влада. Проблемот со името треба сите политички партии да го решаваат, но за тоа не ви треба заедничка влада. Силна опозиција и демократско однесување на владата се решение за секој проблем, па и за името. Ние верувавме дека треба да се направи еден чекор охрабрување. Членство во НАТО е огромно охрабрување за инвеститори. Преговори со Европската унија, поглавјата 23 и 24 – тоа значи нормализирање на државата. Меѓународната заедница е убедена дека Груевски уште 20 години да е на власт, нема да го реши проблемот со името. Неговото националистичко однесување го донесе до тоа и за него нема враќање. Ако е Груевски утре во опозицијата, ние ќе ги повикаме и ќе ги информираме за сè. Транспарентно и јавно ќе го отвориме прашањето и ќе изградиме стратегија за понатамошните прашања – рече Заев.

Лидерот на опозицијата рече и дека нови, вистински работни места и тоа во приватниот сектор ќе помогнат да се  реши катастрофалната состојба во пензискиот и во Фондот за здравство.

– Состојбата во ПИОМ е катастрофална. Но, пари има за да се реши овој проблем. Тоа се нови работни места кои ќе генерираат финансиски средства и тоа ќе овозможи да се полнат и двата фондови. Доколку беа успешни инвестициите на Владата, немаше да го има ова – рече Заев.


Ременски: Директорите што потпишаа менаџерски договор не се разрешени


Скопје, 13 јануари, 2016 - 15:32 (META) 

Пет од вкупно 28 директори на кои им бил понуден менаџерски договор не се разрешени затоа што уредно ги потпишале менаџерските договори и ја исполниле својата законска обврска за склучување менаџерски договор со министерот за труд и социјална политика, истакна денеска на прес-конференција Фросина Ременски, министерка за труд и социјална политика.

– Разешувањето на директорите е направено поради неисполнување на законските обврски за поднесување годишен извештај за материјално-финансиско работење до министерот и на законската обврска за склучување менаџерски договор. Диме Спасов, како министер за труд и социјала, избрал 28 директори на јавни установи, но не ја искористил законската обрска да склучи менаџерски договор со нив. За ова непостапување, јас во понеделникот поднесов кривична пријава против дополнителниот заменик-министер Диме Спасов – рече Ременски.

Таа додаде дека Спасов наместо да се затскрива зад разрешените директори и наместо да покажува лажно душегрижнитво, треба да им објасни на разрешените директори зошто се ставил над законот и не склучил менаџерски договор со нив. Таа побара тој да објасни и зошто партиски ја координирал непослушноста на директорите кон министерот за труд и социјала, поради што сега 23 директори се разрешени од работното место.

Одговарајќи на новинарско прашање, Ременски рече дека испратиле барања до Фондот за пензиско и инвалидско осигурување да им се одговори од која буџетска сметка е исплатен доглот кон приватните пензиски друштва, од таа за 2015 година или за 2016 година. Според неа, со тоа ќе се знае дали парите досега не се исплатени поради административни проспусти или, пак, поради немање пари.


За да платат данок, професорите не се јавни функционери, а за лустрација – се!


Скопје, 21 ноември, 2014 - 10:43 (META) 

Според еден закон, професорите и лекарите се носители на јавни функции, додека според друг – не се. Ако се суди според досегашните изјави на Томе Аџиев, претседателот на Комисија за верификација на фактите, професорите треба да бидат подложни на лустрација и на последиците од неа, додека, пак, според ПИОМ, тие најверојатно нема да бидат во оние граѓани што се ослободени од плаќање дополнителни давачки за социјално осигурување.

ПИОМ неодамна ја објави процедурата за дополнително социјално осигурување за лица кои склучиле договор на дело. Според правилникот, должност за плаќање дополнителни придонеси нема да имаат оние граѓани што најмногу заработуваат. Меѓу нив се професионалните спортисти, функционерите, пратениците, советниците и други носители на јавни функции (избрани или именувани).

Досега од ПИОМ не добивме одговор, дали под носители на јавни функции (избрани или именувани) ги вбројуваат и универзитетските професори и лекарите.  Ако државата одлучи да не ги ослободи професорите од дополнителни давачки, тогаш ќе мора да ги извади од листата на лица што се подлежни на лустрација бидејќи, според претседателот на Комисијата за верификација на фактите, професорите се носители на јавни функции.

Според професорот по управно право, Темелко Ристовски, професорите не се носители на јавни функции и нема зашто да бидат изземени од плаќање осигурување за хонорарите, но тој вели дека законските решенија мора да бидат усогласени.

– Законодавството мора да биде усогласено, што значи дека не може еден закон да ги третира професорите како носители на јавни функции, а друг не. Ако професорите не се изземени од плаќањето дополнителни надоместоци, тогаш тоа е доказ дека професорите не се носители на јавна функција и не треба да се лустрираат – вели Ристовски.

Тој додава дека во поширока смисла на зборот, секој врши некаква јавна функција, но во потесна смисла, тоа се само оние кои имаат управна функција.

Истата дилема е и за лекарите, кои подлежат на лустрација, а ќе мораат да плаќаат дополнителни давачки за осигурувањата.