„Еко-свест“ покрена петиција за мерки за намалување на аерозагадувањето во Скопје


Скопје, 2 ноември, 2018 - 13:00 (META) 

Центарот за истражување и информирање за животна средина „Еко-свест“ по најновите извештаи за загадувањето на воздухот во Скопје, покрена онлајн-петиција со која од Министерството за животна средина и просторно планирање (МЖСПП) и Град Скопје се бараат итни чекори за борба против причините за загадување на скопскиот воздух.

Еко-свест“ ги повика сите граѓани да се потпишат на петицијата, со која се бара забрана за употребата на јаглен за загревање на домаќинствата, како и ограничување на движењето на возилата во центарот на Скопје, како и нов зимски сообраќаен режим во градот.

Се бара и намалување на ДДВ за топлинска енергија и намалување на трошоците за приклучување на старите и новите згради на централното градско греење, како и подобрување на јавниот транспорт. Дополнително се предлагаат стимулации за работниците кои одат до работа и до работа дома пеш или со велосипед или пак ќе се организираат повеќе лица да патуваат со еден автомобил.

Се предлага и ограничување на индустријата и градежните активности во зимскиот период, како и строги казни за палењето диви депонии или стрништа.

Петицијата може да се потпише тука.


Петиција во Словачка против тенковите на моторџиите „Ноќни волци“


Братислава, 6 август, 2018 - 9:48 (META) 

Повеќе од 200 истакнати имиња од Словачка ја потпишале досега петицијата со која се бара од премиерот Петер Пелегрини да преземе мерки за растурање на кампот на моторџиската група „Ноќни волци“, која има свои ограноци во многу земји, а е основана во Русија и ужива сесрдна поддршка од рускиот претседател Владимир Путин.

Петицијата беше покрената откако преку снимки се дозна дека се дозна дека во логорот на „Ноќни волци“ во Долна Крупа, на околу 65 километри североисточно од главниот град Братислава, има тенкови, оклопни возила и противавионски топови.


Коѕиас за протестите: Од милион стигнавме на 4.000, Грците ги кршат стереотипите


Атина, 18 јуни, 2018 - 12:00 (META) 

Од еден милион демонстранти, дојдовме на 100.000 и сега на 4.000 илјади. Ова покажува дека грчкиот народ ги крши стереотипите, рече грчкиот министер за надворешни работи Никос Коѕиас, коментирајќи ги вчерашните протести на грчките националисти кај Псарадес против потпишувањето на Спогодбата за решавање на спорот меѓуа Македонија и Грција.

Како што јави дописничката на МИА од Атина, шефот на грчката дипломатија, веднаш по потпишувањето на договорот со Македонија, се сретна со префектот на областа Западна Македонија, Теодорос Карипидис, кој му предаде резолуција од регионалниот совет во која се изразува несогласувањето на граѓаните со договореното сложено име со географска одредница за севкупна употреба.

– Локалното население овде не треба да протестира, бидејќи ако имаат можност за развој и да имаат добивка во животот, тоа е оваа соработка меѓу државите – му порача Коѕиас на префектот.


Во Врапчиште протест против спортските обложувалници


Гостивар, 12 јануари, 2018 - 20:48 (META) 

Жители на гостиварско Врапчиште денеска по петочната молитва протестираа против спортските обложувалници, јави телевизијата 21.

Тие го блокираа патот што минува покрај зградата на општина Врапчиште, и потпишаа петиција на која собраа 800 потписи.

Жителите на Врапчиште реагираат што во објекти наменети за домување се отвораат обложувалници и ја повикаа и централната власт да реагира.

На протестот, во знак на поддршка излезе и градоначалникот на Врапчиште, Исен Шабани.


Собирањето потписи за лицата со посебни потреби продолжува во другите градови


Штип, 24 април, 2017 - 14:15 (META) 

Денеска до пладне во Штип, 600 граѓани се потпишаа во книгите за собирање потписи за измена на закони и на подзаконски акти за соодветни права на децата со посебни потреби.

Претседателот на здружението „Сплотени срца“, Зоран Мијалков, кој е и татко на дете со посебни потреби, изјави дека очекува акцијата да се интензивира.

– Денеска и утре ќе се постават книги за потписи во сите градови и села. Им благодариме на граѓаните, кои масовно нè подржуваат секаде во земјава – рече Мијалков.

Претставниците на здруженијата што ги обединуваат лицата со посебни потреби очекуваат неделава да бидат повикани на средба со претставници на повеќе министерства.

Тие очекуваат да почнат со преговори за бараните законски измени, со кои ќе се олесни животот на лицата со посебни потреби и нивните семејства.

Овие здруженија бараат корекции во неколку закони или промена на формулацијата на одредбите, со кои правата на лицата со посебни промени и практично ќе можат да заживеат.


Акцијата за потписи за правата на децата со посебни потреби продолжува и денеска


Скопје, 23 април, 2017 - 13:38 (META) 

Акцијата за собирање потписи за иницијатива до Собранието за измена на закони и на подзаконски акти за соодветни права на децата со посебни потреби, денеска се одвива на плоштадот Македонија од 10 до 16 часот.
Досега се собрани нешто повеќе од 2.000 потписи, а требаат уште четирипати по толку за да се постигне цензусот од 10.000 потписи.

Родители и деца со посебни потреби три дена кампуваа во паркот Жена – борец, веднаш спроти Собранието, за, како што рекоа, сите пратеници да ги видат и да обрнат внимание на нивните проблеми.

 


Петиција на „Арсена“: Бараме поради арсенот гевгеличани водата да ја плаќаат како техничка


Гевгелија, 12 февруари, 2017 - 20:18 (META) 

Граѓанската иницијатива „Арсена“ денеска поведе граѓанска петиција за намалување на цената на водата од градскиот водоводен систем во Гевгелија на ниво на техничка, со цена од 5 денари за потрошен кубен метар.

Поводот петицијата, велат од здружнието, е неколкугодишното игнорирање од страна на локалните власти и Јавното претпријатие „Комуналец“ од Гевгелија да се соочат со проблемот со високата концентрација на отровниот металоид арсен во градскиот водоводен систем и забраната за употреба на водата изречена од државната Агенција за храна и ветеринарство.

„Општинските власти, пред сè Советот на општина Гевгелија досега не обезбедија мерки за снабдување на гевгеличани со чиста вода за пиење. Иако повеќе од 4 години и 4 месеци е на сила забраната за употреба на водата поради констатирани енормни концентрации на арсен кои се движат од 50 до 130 отсто над максимално дозволената граница пропишана од Светската здравствена организација, локалните власти и ЈПКД „Комуналец“ не се ниту обидоа граѓаните да ги известат дека водата смеат да ја користат само како техничка. Од тие причини, а и според Законот за заштита на потрошувачи, корисниците на вода од градскиот водоводен систем се должни да го плаќаат тоа што го добиваат – техничка вода за одржување на хигиената, а не и отровниот арсен за кој надлежните не најдоа решение“, велат од „Арсена“.

Здружението и граѓаните бараат ваквата цена за техничка вода да трае сè до моментот на обезбедување на чиста, здрава и безбедна вода за пиење за граѓаните на општина Гевгелија.


Петиција на 7.882 граѓани за запирање на изградбата на панорамското тркало


Скопје, 11 февруари, 2017 - 14:52 (META) 

Петиција на која 7.882 граѓани се потпишале против изградбата на панорамското тркало во Скопје е поднесена до градоначалникот на Град Скопје, Коце Трајановски.

Петицијата, со која се бара запирање на изградбата на панорамското тркало, денеска се појави на социјалните мрежи, и ако што може да се види од документот, таа е поднесена и архивирана од службите на Град Скопје на 10 февруари, оваа година, односно вчера.

„Во име на 7.882 потписници на оваа петиција спроведена електронски во периодот од 23.12.2016 до 03.01.2017 година, Ви ја доставувам истата во знак на протест против одлуката заградење на Панорамско тркало во Скопје и барам, во името на сите загрижени граѓани да ја запрете изградбата на овој финансиски бесмислен и за градот и за жителите опасен проект“, стои во документот, потпишан од Горазд Смилевски, како подносител на петицијата до Град Скопје.

Иницијативата за собирање на потписите, како што пишува Смилевски на својот фејсбук-профил, е на Анета Георгиевска – Шајн.

Панорамското тркало треба да биде поставено на просторот меѓу зградата на „Телеком“ и новиот мост на реката Вардар што треба да се изгради помеѓу Камениот мост и мостот „Гоце Делчев“.

Тркалото го град скопски „Бетон“, чија понуда беше единствена на конкурсот што го распиша Јавното сообраќајно претпријатие Скопје, надлежно за проектот и изнесува 18,2 милиони евра.

Овие пари ЈСП, како што е предвидено ќе ги обезбеди од сопствениот буџет и со донации од Владата, а изградбата ќе се финансира во повеќе буџетски години, до 2018 година.

Тркалото треба да биде готово до 2019 година.


Повеќе од еден милион потписи на петицијата против посета на Трамп на Лондон


Лондон, 30 јануари, 2017 - 12:32 (META) 

Повеќе од еден милион граѓани на Велика Британија се потпишаа на петицијата против официјална државничка посета на американскиот претседател Доналд Трамп на Велика Британија и средба со кралицата Елизабета Втора.

Бројот на лица што се потпишуваат на петцијата постојано се зголемува, откако Трамп на 27 јануари го потпиша указот со кој им за забранува влез во САД на државјани на седум земји со мнозинско муслиманско население.

„На Доналд Трамп треба да му биде дозволено да влезе во Обединетото Кралство во својство на шеф на владата на САД, но не треба да биде поканет во официјална државничка посета бидејќи тоа би ја посрамотило нејзиното височество, кралицата. Документираната мизогинија и вулгарност на Доналд Трамп го дискфалификуваат од можноста да биде примен од нејзиното височество кралицата или од принцот од Велс. Поради тоа, за време на неговото претседателство, Доналд Трамп не треба да биде канет во Велка Британија во официјлна државничка посета“, стои во образложението на петицијата, чиј иницијатор е Греам Гест, адвокат од Лидс.

Британската премиерка Тереза Меј посетата на Трамп на Лондон ја најави за време на нејзиниот престој во Вашингтон и средбата со американскиот претседател, во петокот минатата недела.

Од Даунинг стрит, како што пренесува „Би-би-си“, ги одбиле повициите за откажување на посетата на Трамп, оценувајќи ги како „популистички гест“.

Лидерот на лабуристите, Џереми Корбин, пак, ја повикал Меј да ја откаже посетата на Трамп.


Петиција на движењето „За чист воздух“


Скопје, 29 декември, 2016 - 13:37 (META) 

Движењето „За чист воздух“ отвори петиција за собирање потписи бидејќи, како што велат, сакаат да се спротивстават на игнорантскиот став на надлежните кон воздухот што го дишат граѓаните на Република Македонија.

„Состојбата со нечистиот воздух во државата, од ден на ден станува сè поалармантна. Секој ден сме сведоци на сè поголем број болни деца од респираторни болести, a смртните случаи не се исклучок, за жал. Но, градските власти како да имаат поголеми приоритети од тоа да им обезбедат здрав живот на своите сограѓани и на нивните деца“, велат од движењето.

Оттаму додаваат дека оваа петиција е создадена како последна шанса за да се издејствува институционалната битка за почист воздух, да се обезбеди поквалитетен живот и да се намали смртноста од аерозагадувањето.

„Апелираме до Владата да се откријат деталите за причините за загадувањето, со констатација дека Министерството за животна средина и просторно планирање сè уште нема излезено со веродостојни податоци околу причинителите на аерозагадувањето. Без овие информации ветувањата од надлежните дека проблемот ќе биде решен, најверојатно нема да ја доживеат својата реализација“, додаваат од движењето.