Сијарто: Унгарската влада не може да влијае на Службата за имиграција што му дала азил на Груевски


Будимпешта, 18 јануари, 2019 - 14:53 (META) 

Службата за имиграција и државјанство е независен орган и Владата на Унгарија не може да влијае на нејзините решенија. Поранешниот македонски премиер Никола Груевски ја помина процедурата за азил и имиграционата служба реши да издаде позитивно решение, рече Петер Сијарто, министерот за надворешни работи во интервјуто за бугарската национална телевизија БНТ.

– Службата е независен орган и унгарската влада нема влијание над нејзините одлуки. Прашањето со азилот на Груевски е правно прашање, а не политичко – рече Сијарто во интервјуто.

Тој изјави дека по бегството на Груевски односите на Унгарија и Македонија не се променети.

– Нашата позиција е дека Македонија веќе требаше да биде поканета во НАТО. Ние сме за целосна интеграција на Македонија, силно ги поддржуваме за испраќањето покана за НАТО веднаш штом биде завршена процедурата за името и од двете страни, а македонската јавува дека веќе ја завршиле. Сега на потег е Грција. Тие ја имаат нашата поддршка и ќе ја имаат, политичка, економска. Јас бев јасен пред министерот за надворешни работи-тоа правно прашање нема да влијае на никаков начин – рече Сијарто.

Во однос на коментарот на еврокомесарот за проширување и соседска политика, Јоханес Хан, дека не се согласува со заштитата на Унгарија што му ја дава на Груевски, Сијарто му порача да си ја гледа сопствената работа.

– Комесарот Хан треба да си ги гледа сопствените задолженија. Неговиот мандат од пет години како комесар за политика за добрососедство и проширување беше целосно неуспешен. Зашто, нема никаков напредок во однос на политиката кон соседите и затоа треба да се концентрира на сопствената работа – вели шефот на унгарската дипломатија.


Сијарто: Груевски законски мина три граници, наши дипломати не го криумчареа


Будимпешта, 21 ноември, 2018 - 12:32 (META) 

Поранешниот македонски премиер Никола Груевски мораше да мине три граници за да стигне во Унгарија и во сите три случаи го стори тоа во целосна согласност со регулативите, порача унгарскиот министер за надворешни работи, Петер Сијарто на прес конференција денеска во Будимпешта.

Тој рече и дека неговото министерство никако не е поврзано со случајот, имајќи предвид дека телото што го доделило азилот на Груевски не е под контрола на Министерството за надворешни работи и трговија на Унгарија.

– Поранешниот македонски премиер ги покажал своите документи во трите случаи и тие биле соодветно прегледани од властите – рече Сијарто, негирајќи дека  унгарски дипломати се вмешани во каков било „план за криумчарење или бегство“.

– Тие првпат го виделе Груевски во унгарската амбасада во Тирана и тогаш првпат слушнале за неговото барање азил – рече шефот на унгарската дипломатија, велејќи дека не е запознат со некаков таен договор во врска со случајот.

– Дијалогот во врска со ова прашање со Македонија постојано трае – рече Сијарто, напоменувајќи дека е во контакт со својот македонски колега, а исто така и министерот за внатрешни работи Пинтер Шандор е во контакт со македонскиот министер за внатрешни работи.

Сијарто напомена дека и претходно поранешни членови на влади барале и добивале азил.


Димитров: Иронија и парадокс е земја-членка на ЕУ да му даде заштита на осуденик


Скопје, 21 ноември, 2018 - 12:21 (META) 

Иронија е и парадокс земја-членка на ЕУ да му даде заштита на осуденик, рече министерот за надворешни работи Никола Димитров на денешната заедничка прес-конференција со неговиот колега од Данска, Андерс Самуелсон.

Тој додаде дека Македонија во решавањето на случајот со унгарските власти, ќе инсистира на почитување на владеење на правото и ќе ги земе предвид сите национални интереси вклучувајќи го и интересот за добри односи со Унгарија

– Мислам дека во речниците, случајот за Груевски може да се води под иронија и парадокс, бидејќи се работи за човек под чие што владеење Европската комисија ја дефинираше Македонија како заборена држава. Имаме заклучок од Советот за општи работи од јуни годинава, каде се бара правна разврска и одговорност за индициите за кривични дела што произлегуваат од прислушкуваните разговори поддржани од Европскиот совет. И сега Македонија како земја кандидат прави се, во државата да владее правото. И навистина е иронија и парадоксално што човек што има пресуда, осуденик кој што се соочува и со четири други обвиненија и со пет истраги да најде заштита и добие азил во земја членка. Ова е проблем за Македонија, меѓутоа е проблем и за ЕУ и за кредибилноста на принципот на владеење на правото во ЕУ. Ние имаме еден сложен терен сега и ќе ги земеме во предвид сите наши интереси меѓу кои и интересот за добри односи со Унгарија во решавањето за тоа што ќе правиме и како ќе правиме – рече Димитров.

Тој најави дека со неговиот унгарски колега Петер Сијарто ќе имаат средба на маргините на министерскиот состанок на НАТО на 4 и 5 декември, на кој што отворено  ќе разговараат за овој случај.

Запрашан, дали постои опасност и други земји да го следат овој пример на Унгарија, да ги прифатат нејзините приговори во однос на состојбата со правосудството и да не блокираат на нашиот пат кон ЕУ и НАТО, Димитров рече дека Македонија ќе инсистира на своите принципи и државниот интерес.

– Не сè што се случува е по наша волја. Наше е да инсистираме на принципите, да објаснуваме. Кој било што ја следел ситуацијата во Македонија и сите извештаи од 2015 наваму, ќе знае да процени, а тоа меѓу другото и се случува, изјавата на Хан и ставот на Вашингтон. Ќе работиме на тоа да се држиме до нашите принципи и нашиот државен интерес – вели Димитров.


Сијарто: Ниедна земја на ЕУ не го покрена прашањето за Груевски


Будимпешта, 20 ноември, 2018 - 9:47 (META) 

Унгарскиот министер за надворешни работи, Петер Сијарто, по вчерашниот состанок на министрите во ЕУ порача дека ниеден колега не го покренал прашањето за азилот на Груевски, извести МИА.

Како одговор на новинарско прашање, Сијарто рече дека поранешниот македонски премиер Никола Груевски изразил желба да поднесе барање за азил во унгарска амбасада, но владата на Унгарија немала никаква улога во неговото доаѓање.

Тој рече дека унгарските власти првпат разбрале за случајот во една од соседните земји на Македонија и дека Груевски „целосно законски дојде во Унгарија во согласност со релевантните национални и меѓународни закони, а сите премини (на граници) беа легитимни”, пренесува МИА.

Унгарските власти, врз основа на безбедносни мерки, одлучиле да го сослушаат неговото барање за азил и тоа во централната канцеларија на Бирото за имиграција и азил во Будимпешта.

Наспроти тоа, полициите на Албанија и Црна Гора соопштија дека Груевски влегол и излегол од нивните земји со лична карта во време кога за него не била распишана меѓународна потерница, но во придружба на унгарски дипломати. Српскиот претседател Александар Вучиќ, пак, синоќа рече и дека Груевски излегол од територијата на Србија со лична карта и пропусница издадена од Унгарија.

Претходно со тврдење слично како тоа на Сијарто излезе и унгарскиот премиер Виктор Орбан, кој негираше дека Унгарија му помогнала на Груевски да ја напушти Македонија.


Димитров до Сијарто: Парадоксално е барањето азил во земја на ЕУ, од страна на осуденик


Скопје, 15 ноември, 2018 - 12:49 (META) 

Министерот за надворешни работи Никола Димитров, иницирал и остварил телефонски разговор со својот унгарски колега Петер Сијарто, а во врска со поднесеното барање за азил до унгарските власти од страна на поранешниот премиер, Никола Груевски информираат од МНР.

„За време на разговорот, министерот Димитров посочи дека во случајот станува збор за осуденик, против кого се водат и уште неколку други судски постапки за сериозни кривични дела. Министерот воедно ја потенцираше важноста на принципот на владеење на правото, кој претставува темелен европски принцип. Притоа укажа на парадоксалноста на ситуацијата да се бара политички азил во земја членка на ЕУ, од страна на личност во чие време на владеење, земјата кандидат за членство во ЕУ беше окарактеризирана како „заробена држава“ и од страна на самата Европска комисија“, се вели во соопштението на МНР.

Од таму исто така информираат дека Сијарто во телефонскиот разговор, ја потврдил информацијата дека Никола Груевски поднел барање за азил до надлежните унгарски власти и дека правната процедура е веќе започната.

„Притоа нагласи дека унгарската поддршка за реализација на аспирациите за европска и евро-атлантска интеграција на Република Македонија, како и добрата билатерална соработка меѓу двете земји ќе продолжат и во иднина“, се додава во соопштението.


Груевски му се пожалил на Сијарто дека во Македонија се загрозени човековите права и слободи


Скопје, 18 декември, 2017 - 21:00 (META) 

Претседателот на ВМРО-ДПМНЕ во заминување, Никола Груевски денеска се сретнал со министерот за надворешни работи на Унгарија, Петар Сијарто со кого разговарал за актуелните состојби во општественото и поличкото живеење, информираат од ВМРО-ДПМНЕ.

Груевски му рекол на Сијарто дека во Македонија се загрозени основните слободи и права и дека ВМРО-ДПМНЕ како и дека повеќе нејзини членови, како и истакнати општествени личности кои не се истомисленици со актуелната влада се мета на жесток политички притисок и прогон.

– Невини луѓе се наоѓаат во притвор, само затоа што слободно размислуваат и си ја сакаат и почитуваат сопствената држава и тоа преставува редок пример за една заробена држава во која наместо функционирање на правото и правната држава се носат одлуки под политички диктат -рекол Груевски.

Тој на Сијарто му потенцирал дека судството е уценето, а СЈО, а веќе и ОЈО функционираат како политички инструмент притоа целосно заобиколувајќи ги правните нормативи.

Груевски изразил благодарност за поддршката на Унгарија во остварувањето на стратешките интереси на државата.


Џафери и Попоски во Собрание се сретнаа со Сијарто


Скопје, 18 декември, 2017 - 19:45 (META) 

Претседателот на Собранието, Талат Џафери и пратеникот од ВМРО-ДПМНЕ кој е претседателот на Советот за евроинтеграции. Никола Попоски денеска имаа одделни средби со министерот за надворешни работи и трговија на Унгарија, Петер Сијарто.

Џафери му се заблагодарил на Сијарто за помошта и подршката на Унгарија, во справувањето со мигрантскиот бран.

Тој му потенцирал унгарскиот министер за надворешни работи и трговија дека членството на Република Македонија во НАТО и ЕУ останува и понатака врвен државен, политички и стратешки приоритет на што Сијарто рекол дека Унгарија ќе биде најсилен глас и поддржувач на интегрирањето на Македонија во овие структури, бидејќи смета дека се исполнети сите потребни критериуми за полноправно членство.

Џафери го информирал Сијарто за Договорот за добрососедство, пријателство и соработка со Бугарија и за интензивираната комуникација со Република Грција во насока на постигнување на заемно прифатливо решение во однос на спорот со името, со надеж овие напори да вродат со плод, односно Извештајот за напредокот на Република Македонија да биде позитивен, без дополнителни услови, а на Самитот на НАТО, Македонија да добие покана да стане 30-та членка на оваа безбедносна структура.

Сијарто и на Попоски му ја повторил поддршката од Унгарија во евроатлантските аспирации на Македонија.

-Кога ќе влеземе во ЕУ зависи од членките на ЕУ, но кога ќе се европеизираме зависи само од нас самите. Затоа, вниманието треба да ни биде на зајакнувањето на институциите и примена на законите повеќе отколку на што било друго – истакнал Попоски.

Двајцата соговорници констатирале дека местото на Македонија е во европското семејство, и дека стабилноста на државата зависи од односите на соседите.


Иванов – Сијарто: Соработката со Унгарија е пример на однос кон земја кандидат


Скопје, 18 декември, 2017 - 17:40 (META) 

Претседателот, Ѓорге Иванов, денеска се сретна со министерот за надворешни работи и трговија на Унгарија, Петер Сијарто, кој престојува во официјална посета на Македонија.

Како што информираат од кабинетот на македонскиот претседател, на средбата било изразено задоволство од севкупните билатерални односи меѓу Република Македонија и Унгарија кои ги карактеризираат искрено пријателство, заемно разбирање и почит, како и надеж дека во наредниот период ќе се продлабочи започнатата активна соработка, особено во сферата на економијата и трговската размена.

– Залагањето, соработката и солидарноста која Унгарија ги рефлектира во однос на нашите аспирации кон НАТО и во ЕУ се пример како треба да изгледа односот на земјите членки кон земјите кандидати. Унгарија е една од најзначајните партнери и пријатели на Република Македонија и тој однос треба да се негува и да продолжи во иднина – истакнал Иванов.

Сијарто ја нагласил неопходноста од динамизирање на евро-атлантските процеси на Република Македонија и ја повторил силната унгарска поддршка за Република Македонија да го добие заслуженото место во НАТО и да ги почне пристапните преговори со ЕУ.


Сијарто: Сакаме ЕУ во февруари да одреди датум за почеток на преговори со Македонија


Скопје, 18 декември, 2017 - 12:17 (META) 

Следниот самит на НАТО е незамислив без прашањето на проширувањето, а сакаме и ЕУ во февруари да одреди датум за почеток на преговори со Македонија, изјави денеска министерот за надворешни работи и трговија на Унгарија Петер Сијарто, Петер Сијарто на заедничката прес-конференција со шефот на македонската дипломатија, Никола Димитров.

– Унгарија и натаму ќе дава поддршка за Македонија и земјите од Западен Балкан и ја знае разликата. Ја знаеме разликата меѓу мирна состојба во регионот и немирна состојба. Сакаме овој регион да биде мирен, сакаме Западниот Балкан да биде извор и средство за натамошен европски развој, наместо ризик за Европа. Состојбите во Западниот Балкан можат да се надминат со неговата интеграција во НАТО и ЕУ. Знаеме дека Македонија и македонскиот народ веќе доста направија за да се интегрираат во ЕУ и НАТО и Унгарија останува најгласниот поддржувач на напорите за интеграцијата на Македонија и во ЕУ и во НАТО. Би сакале на следниот самит на НАТО да се најде на дневниот ред проширувањето, рече Сијарто.

Димитров се заблагодари за силната поддршката од Унгарија за евроатлантските интеграции на Македонија и истакна дека новата влада за кратко време успеала да го подобри квалитетот на односите со меѓународните партнери, особено со земјите од Европската Унија.

– За кратко време успеавме да внесеме нов квалитет во односите со ЕУ. Го запознав министерот и со политиката на добрососедство и нашата инвестиција во добрите односи со соседите. Цврсто сме решени да направиме се што може да не го пропуштиме следниот воз за Европа што се отвора во 2018 година, рече Димитров.

Сијарто и Димитров исто така разговарале за зголемената економската соработка меѓу двете земји, која е во постојан пораст. Сијарто, министерот Сијарто нагласи дека трговската размена меѓу двете земји минатата година пораснала за 45 проценти, а во првите девет месеци од годинава таа бележи раст 47 проценти. Унгарскиот министер рекол дека постои интерес за соработката во областа енергетиката, како и во областа на проекти за отпадни води.

Министрите денеска потпишаа и Акциски план за соработка во 2018 година меѓу МНР на двете земји со конкретни форми и активности за унапредување на соработката во повеќе области.

Шефот на унгарската дипломатија во текот на денот ќе има средби со претседателот Ѓорге Иванов, претседателот на Парламентот, Талат Џафери, премиерот Зоран Заев и вицепремиерите Бујар Османи и Кочо Анѓушев.


Шефот на унгарската дипломатија, Сијарто утре во посета на Македонија


Скопје, 17 декември, 2017 - 14:26 (META) 

Министерот за надворешни работи и трговија на Унгарија Петер Сијарто утре ќе престојува во официјална посета на Република Македонија на покана на шефот на македонската дипломатија Никола Димитров.

Како што соопштија од МНР, тие ќе разговараат за билатералните односи, европската и евроатлантската интеграција на Република Македонија, како и за внатрешно-политичката состојба во нашата земја и односите со соседите. Исто така, ќе бидат разменети и мислења за актуелните регионални и меѓународни прашања.

Димитров и Сијарто исто така ќе потпишат Акциски план за соработка на министерствата на двете земји во текот на 2018 година, кој предвидува конкретни форми и активности.

За време на посетата на Македонија, Сијарто ќе има средба со претседателот на Република Македонија Ѓорге Иванов, со претседателот на Собранието Талат Џафери, со премиерот, Зоран Заев, како и со вицепремиерите Бујар Османи и Кочо Анѓушев.