Од пештерата во Тајланд спасени и последното момче и тренерот


Бангкок, 10 јули, 2018 - 14:20 (META) 

Специјалците „фоки“ од тајландската Воена морнарица предмалку соопштија дека од пештерскиот систем, каде беа заглавени од 23 јуни годинава, се спасени и последното момче и тренерот.

Излегувањето од отворот на пештерите Там Луанг на нуркачите и на момчето, беше поздравено со бурен аплауз и френетични извици. Четиримина нуркачи остануваат внатре во пештерите „за секој случај“, велат од тајландската армија, иако со сигурност се знае дека сите заглавени се спасени, а се водеше евиденција и за нуркачите.

Тие ќе бидат пренесени в болница, каде ќе бидат под лекарска нега и набљудување во следните денови.

Првите четири момчиња беа спасени во неделата, а четири во понеделникот, а другите денеска.

Денеска е третиот ден од спасувачката операција за 12-те момчиња, млади фудбалери, и тренерот кои повеќе од две седмици беа заглавени во пештерата во Тајланд, која беше поплавена, па нуркачи им носеа канистри со кислород и храна и пијалоци. Притоа нуркач загина во петокот, кога му снемало кислород враќајќи се од местото каде што беа момчињата.

Системот пештери и пештерски канали, дел поплавени, при што мора да се нурка, а преку кој се извлекуваат момчињата, е долг четири километри. При секое поединечно спасување во изминативе три дена, двајца нуркачи придружуваа а по едно момче и го носеа неговиот канистер со кислород, а момчињата беа со  нуркачка маска преку целото лице, во која влегува кислородот. Тоа е одбрано како подобра варијанта од класичниот нуркачки респиратор, кој се држи со забите. Познатиот бизнисмен Илон Маск понуди и специјална капсула за спасување, во која момчињата би биле затворени, но беше избрана погоре наведената варијанта.

Момчињата исто така добиле лекови за смирување, за да се спречат напади на паника, при што би можеле да се повредат или да ги повредат нуркачите.

Момчињата на возраст од 11 до 16 години на 23 јуни тргнале на своевидна екскурзија за докажување во пештерскиот систем, по што поради поројните дождови кои поплавија некои од каналите, тие оделе сè подалеку и не можеа да се вратат назад. Животите им зависеа од постојаниот дотур на кислород, храна и пијалоци, што беа многу истоштувачки за нуркачите.


Се чека од пештерата во Тајланд да се спасат последните две момчиња и тренерот


Бангкок, 10 јули, 2018 - 12:55 (META) 

Од пештерскиот систем Там Луанг во Тајланд, во кој беа долго заглавени, денеска се извлечени уште две момчиња, и сега внатре се уште две и нивниот тренер, јавија светските агенции.

Денеска е третиот ден од спасувачката операција за 12-те момчиња, млади фудбалери, и тренерот кои повеќе од две седмици беа заглавени во пештерата во Тајланд, која беше поплавена, па нуркачи им носеа канистри со кислород и храна и пијалоци. Притоа нуркач загина во петокот, кога му снемало кислород враќајќи се од местото каде што беа момчињата.

Системот пештери и пештерски канали, дел поплавени, при што мора да се нурка, а преку кој се извлекуваат момчињата, е долг четири километри. При секое поединечно спасување, двајца нуркачи придружуваат едно момче и го носат неговиот канистер со кислород, а момчињата имаат нуркачка маска преку целото лице, во која влегува кислородот. Тоа е одбрано како подобра варијанта од класичниот нуркачки респиратор, кој се држи со забите. Момчињата исто така добиле лекови за смирување, за да се спречат напади на паника, при што би можеле да се повредат.

Момчињата на возраст од 11 до 16 години на 23 јуни тргнале на своевидна екскурзија за докажување во пештерскиот систем, по што поради поројните дождови кои поплавија некои од каналите, тие не можеа да се вратат назад. Животите им зависеа од постојаниот дотур на кислород, храна и пијалоци, што беа многу истоштувачки за нуркачите.


 


Спелеолози пронашле черепи додека истражувале во пештера во село Корито


Гостивар, 20 август, 2017 - 14:05 (META) 

На 18 август, претседателот на спелеолошкиот клуб „Кораби“ Ј.О. се јавил во полициската станица во Гостивар и пријавил дека на 17 август на место викано Чавкарник, во сeло Корито, додека истражувале пештера, на околу 20 метри длабочина забележале остатоци од неколку черепи и една неексплодирана граната.

За настанот бил запознаен Јавен обвинител кој наредил да се изврши увид.

„Увидот бил извршен на 19 август од страна на Јавен обвинител во содејство со полициски службеници, претставници од Дирекцијата за заштита и спасување и од Секторот за антитероризам при УБК Гостивар. Притоа, од дното на пештерата, на длабочина од околу 30 метри биле пронајдени и извадени дел од активирана граната од рачен фрлач, делови од човечки труп, еден долен дел од обувка, еден дел од реденик за куршуми, две чаури од патрони од ловечка пушка, повеќе парчиња облека и една запалка. Пронајдените предмети се фотографирани и доставени за вештачење“, информираат од МВР.


Полјакот Старнавски нурна до 240 метри во пештерата Врело и го урна сопствениот рекорд


Скопје, 19 август, 2017 - 14:38 (META) 

Светски познатиот спелеолошки нуркач Криштоф Старнавски од Полска се спушти на длабочина од 240 метри во подводната пештера Врело на Матка, соборувајќи го минатогодишниот сопствен рекорд од 230 метри.

Старнавски во придружба на неговиот тим и со логистичка поддршка од домашните спелео- нуркачи од клубовите „Акватек“ и „Врело“ од Скопје, по повеќе од пет часа успеа да се спушти на оваа длабочина, користејќи специјален систем за подводно нуркање наречен „ребридер“.

– Подводната пештера Врело е извонредна, со кристално чиста вода и огромни галерии. Сакам да изразам голема благодарност до мојот како и до македонскиот тим од нуркачи, со кои успеавме да направиме истражување на пештерата до 240 метри во длабочина и над 800 метри во должина. Она што е најважно е што утврдивме дека постојат уште многу можности за понатамошно истражување во следна експедиција. Јас како човек и нуркач сум во потрага по најдлабоката истражена пештера во светот, а Врело има голем потенцијал да стане токму тоа – кажа Старнавски.

Минатата година Старнавски стигна до 230 метри длабочина со што го сруши рекордот на нуркачот Луиџи Касати кој во 2010 година стигна до 212 метри длабочина.

Пештерата Врело на Матка неколкупати досега е истражувана од страна на домашни и странски нуркачки експедиции и истражен е само дел од нејзината внатрешност.Не се знае точно до каде се простира и на колку метри е нејзиното дно.

Со 200.000 денари, Градот Скопје финансиски ги поддржа сите истражувања на подводната пештера Врело преку здружението „Акватек“.


Во пештера во Кичевско пронајдени десетици черепи


Кичево, 3 септември, 2016 - 17:57 (META) 

Обвинители, полиција, истражители и форезинчари сè уште вршат увид откако вчера во пештера во Кичевско биле пронајдени човечки черепи и коски.

Од Основното јавно овинителство – Гостивар велат дека кичевската полиција добила анонимна дојава дека во пештера помеѓу селата Тајмиште и Бачишта (Кичевско), над Бачишка Река, има човечки черепи, по што основниот јавен обвинител излегол на терен.

Од обвинителството не го соопштуваат бројот на черепи бидејќи сè уште трагаат, а поради карактеристичниот терен на пештерата, инаку меѓу народот нарекувана Череп, ќе треба повеќе време за да се истражи цела. Од обвинителството соопштија дека увидот ќе трае и во наредните денови.

„Во пештерата која има неколку краци, пронајдени се и подигнати неутврден број човечки черепи и коски. Истрагата продолжува во наредните денови, а пештерата по наредба на јавен обвинител ќе биде непрекинато обезбедена сè до отповикување на наредбата. За секое ново сознание што нема да ја попречи истрагата, Основното јавно обвинителство – Гостивар ќе ја информира јавноста“, пишува во соопштението на обвинителството.


Полски нуркач ќе го урива рекордот за спуштање од 212 метри во пештерата Врело


Скопје, 31 август, 2016 - 13:26 (META) 

Спелеолошкиот нуркач Кшиштоф Старнавски од Полска ќе се обиде да го надмине рекордот на италијанскиот нуркач Луиџи Казати, кој во 2010 година се спушти на длабочина од 212 метри во пештерата Врело на Матка.

Во организација и на покана на нуркачкиот клуб „Акаватек“ и спелео-нуркачкиот клуб „Врело“, Старнавски веќе неколку денови, заедно со тим од домашни нуркачи, ги прави подготовките и нуркањата во пешерата Врело, по што ќе се обиде да го урне рекордот на Казати.

Подвигот на Старнавски ќе трае окулу десет часа и, како што велат домашните нуркачи, за него е потребна многу голема концентрација и психо-физичка подготвеност.

Старнавски во вторникот се спушти на длабочина од 188 метри и ги провери премините и условите за подлабоките нуркања, и со помош на домашните нуркачи го постави хабитатот потребен за декомпресија.

Во 2010 година Казети се симна до длабочина од 212 метри во десниот крак на пештерата Врело, а се претпоставува дека оттаму кракот повторно се дели на две нови патеки, кои продолжуваат понатаму во длабочина.

Оваа пештера досега неколкупати ја истражувале домашни и странски нуркачки експедиции, при што е испитан само дел од нејзината внатрешност и не се знае до каде точно се простира и на колку метри длабочина е нејзиното дно.

Според неофицијални информации, се смета дека длабочината на Врело е 330 метри, што ја прави најдлабоката пештера во светот.


Нова експедиција во пештерата Ѓоновица


Скопје, 27 септември, 2015 - 10:26 (META) 

Македонските нуркачи, предводени од спелеo-нуркачкиот клуб „Врело“, денеска ја почнуваат експедицијата во пештерата Ѓоновица, Гостиварско. Најдобрите спелеонуркачи и спелеолози од земјава во следните пет дена ќе ги покажат своите способности во истражување на внатрешноста на една од најубавите пештери во Македонија.

Освен нуркачите, во истражувањето се вклучени и научници од повеќе области, кои треба детално да ги испитаат дадените примероци од вода, седименти и од животински свет од пештерата. Дел од експедицијата се и врвни фотографи и сниматели за во меѓународната јавност да се пласираат пронајдените информации од убавините што ги крие оваа пештера.


Откриена нова пештера на Галичица


Скопје, 29 август, 2015 - 10:56 (META) 

Спелеолозите открија нова, до сега не истражена пештера на планината Галичица. Пештерата била откриена во рамки на првиот спелеолошки камп што во организација на СК „Златоврв“ – Прилеп и „Ботом тајм“ – Охрид, се одржа овој месец на Галичица.

– Откриена беше нова пропаст во близина на Елшани. Таа не е многу туристичка, малку е ризична за обични посетители, потребна е опрема и добра подготвеност бидејќи внатре има одрони и треба да се внимава – вели Никола Паскали од „Ботом тајм“.

На планината Галичица постојат голем број други пештери кои имаат голем туристички потенцијал кој засега не е искористен. За да се стават во функција на туризмот потребно е тие да се оспособат за посети, односно да се обележат и соодветно да се осветлат.