Семафори на копче кои ќе ги палат/гасат пешаците за да се намали загадувањето


Скопје, 2 ноември, 2018 - 12:19 (META) 

Кога наместо автоматските, наместени на одреден временски период, би се вовеле семафори на кои пешаците ќе може да вклучат зелено светло по потреба, би имало најмалку 6.000 непотребни запирања помалку секој ден, велат проф. д-р Кирил Сотировски и Бошко Цветковски од Шумарскиот факултет.

Според проценките, секој ден во Скопје непотребно согоруваат најмалку по 100 литри гориво и непотребно се  испуштаат 250 килограми јаглероден двооксид поради непотребното застанување на возилата на црвено светло за да поминат пешаците.

Ова е дел од рефератот на научната конференција „Загадувањето на градовите во Република Македонија: кои се решенијата“, која вчера и денеска се одржува во МАНУ.

Авторите од 20 пешачки премини со автоматски семафори во Скопје вршеле набљудувања за тоа колку непотребни запирања на возила има на црвено светло за да пропуштат пешаци, иако немало пешаци што чекаат. Овие семафори со тајмери така непотребно сопирале до 240 автомобили и 11 автобуси или камиони на час, на секој семафор.

Оттаму, авторите извеле заклучок дека кога би се вовеле семафори на кои црвено светло за возилата, а зелено за нив, би вклучувале пешаците, дневно би се заштедувале околу 100 литри гориво, односно во скопскиот воздух би се испуштиле 250 килограми јаглероден двооксид помалку.

Заштедата на гориво на годишно ниво би била 35.000 до 50.000 литри и значително би се намалило загадувањето на воздухот, велат Бошко Цветковски и Кирил Сотировски, авторите на студијата.


Возило влета во толпа во Мелбурн – 19 лица се повредени


Мелбурн, 21 декември, 2017 - 10:51 (META) 

Најмалку 19 лица се повредени откако џип влета помеѓу пешаци, соопшти австралиската полиција, додавајќи дека возачот е уапсен. Засега нема информации дали станува збор за терориристички напад.

„Би-Би-Си“ јави дека полицијата во Мелбурн соопшти дека станува збор за „намерен чин“, но дека се уште е рано да се зборува за мотивите за нападот.

– Врз основа на тоа што го видовме, веруваме дека станува збор за намерен чин. Мотивите не се познати – рече Расел Барет, началник на полицијата на австралиската сојузна држава Викторија.

Очевидецот Кри Гет вели дека стоел на аголот на улиците Флиндерс и Елизабет со кафе во рака кога слушнал врескање.

– Кога се свртев, видов многу тела на земја. Видов автомобил кој гази луѓе. Летаа тела на сите страни – рече Гет.

Тој наведува дека помеѓу 60 и 100 лица ја минувале раскрсницата кога во толпата влетал автомобил, кој се движел со брзина од околу 70 километри на час.

Локалните медиуми јавуваат дека полицијата ги повикала граѓаните да го избегнуваат ова подрачје.


Пет лица се повредени откако автомобил влета помеѓу пешаци во Лондон


Лондон, 2 декември, 2017 - 12:09 (META) 

Автомобил влета помеѓу пешаци во Лондон поради што пет лица се повредени, а двајца се во критична состојба, јавуваат странските медиуми.

Инцидентот се случил на улицата Стоквел, а полицијата соопшти дека овој случај не го третира како тероризам.

Улицата е затворена, а истрагата е во тек.


Сообраќајот на граничните премини кон Грција е нормализиран


Скопје, 20 октомври, 2017 - 10:54 (META) 

Сообраќајот на граничните премини Богородица, Стар Дојран и Меџитлија за премин кон Грција е нормализиран, информираат од Авто-мото сојузот на Македонија.

Сообраќајот на овие гранични премини вчера беше во прекин поради штрајк на грчките царински служби.

Интензитетот на сообраќајот на патните правци надвор од градските средини е умерен. На граничните премини нема подолги задржувања за влез и за излез од земјава. Оваа информација се однесува само за македонската страна на премините.


Терорист со камион повреди петмина во Канада


Едмонтон, 1 октомври, 2017 - 14:01 (META) 

Пет луѓе се повредени од 30-годишник кој вчеравечер во канадскиот град Едмонтон првин со нож избодел полицаец, а потоа со изнајмен камион од фирмата „У хаул“ удрил пешаци додека бегал од полицијата. Откако ги повредил луѓето, камионот се превртел и напаѓачот е уапсен.

Според канадските медиуми, во кабината било пронајдено знаме на терористичката мрежа Исламска држава. Полицијата го испрашува уапсениот, а според досегашните информации, дејствувал сам.

Инцидентот се случил пред стадионот „Комонвелт“, околу 20 часот по локално време вчера. Првин камионот со голема брзина удрил во барикада на сообраќајната полиција, по што еден полицаец летнал неколку метри. Потоа возачот излегол и неколкупати со нож го избодел паднатиот полицаец, па избегал со камионот.

По четири часа, полицијата му сигнализирала на камионот да застане на друга барикада, но возачот избегал и почнала полициска потера. Таа завршила така што терористот возејќи удрил четворица пешаци, а потоа камионот се превртел.


Дебармаалци попладнево ќе протестираат за безбедни улици


Скопје, 21 август, 2017 - 11:19 (META) 

Граѓанската иницијатива „Во одбрана на Дебар Маало“ денеска во 18 часот на протест пред Министерството за култура ќе ги повикаат Општина Центар и Град Скопје да ги применат постоечките закони за да ги заштитат пешаците од, како што велат „опасноста предизвикана од тротоари окупирани од возила и кафеани, опасно неорганизиран сообраќај и неконтролирано градење“.

Протестот кој се одржува под слоганите „Вратете ни ги тротоарите“ и „Здравјето пред профитот“, ќе се одвива од 18 до 19.30 часот, на улицата Антоние Грубишиќ, на потегот од ОУ „Коле Неделковски“ до Министерство за култура.

Минатата недела, кај ОУ Коле Неделковски загина постара жена која одеше по коловозот на улицата Антоние Грубишиќ.

„Тротоарите се постојано зафатени со возила, а комбето што ја усмрти се движеше во рикверц затоа што нема простор и затоа што дотур се прави во најфреквентните часови и во текот на цел ден. Брзината, иако формално ограничена, никој не ја санкционира, бучавата ги надминува сите дозволени граници, градежните активности продолжуваат и покрај тоа што граѓаните го оспорија предложениот Детален урбанистички план. Иако градоначалникот на Центар и Општината се обврзани со закон да одговорат на анкетните ливчиња за ДУП-от, градоначалникот Андреј Жерновски и Општината го прекршија законот и сѐ уште одбиваат да одговорат на над 400 анкетни забелешки од граѓаните“, велат од граѓанската иницијатива, потсетувајќи дека повеќе од две години предупредуваат на опасноста и бара од градоначалниците на Центар Андреј Жерновски и Скопје Коце Трајановски.


Тројца од петмината убиени терористи во Камбрилс се идентификувани


Барселона, 19 август, 2017 - 13:33 (META) 

Шпанската полиција потврди дека телата на тројца од петмина убиени терористи во Камбрилс се идентификувани, а во тек е потрага по возачот на комбето кој уби 14, а 100 лица беа повредени во Барселона.

Шпанската полиција и безбедносните служби почнале потрага по преостанатите членови на терористичката организација која ја сочинуваат државјани на Мароко, поради стравувања дека се подготвуваат нови напади на познати туристички места.

Според припадници на безбедносните сили, нападите во Барселона и Камбрилс биле организирани од терористичка група во која биле најмалку 12 лица, а кои биле поттикнати од нападите во Лондон.

Терористите во Камбрилс повредија петмина граѓани и еден полицаец.


Расте бројот на загинати и на повредени во терористичкиот напад во Барселона


Барселона, 17 август, 2017 - 21:26 (META) 

Шпанските власти соопштија дека расте бројот на жртвите во терористичкиот напад во Барселона што се случи попладнево на улица во близина на плоштадот „Каталуња“. Според последните информации во нападот загинале најмалку 13 лица, а 50 се повредени.

Нападот се случи кога комби влетало во група пешаци на улицата Ла Рамбла, прегазувајќи дел од нив, а потоа продолжило да се движи кон луѓето додека се обидувале да побегнат од местото.

Шпанската полиција соопшти дека го третира инцидентот како акт на тероризам и дека е приведен маж под сомнение дека е поврзан со нападот.

Шпанските медиуми објавија дека возачот на комбито, кое било изнајмено во градот, избегало пеш од местото на нападот.

Во меѓувреме полицијата објавила фотографија од маж, идентификуван како Дрис Убакир, роден во Мароко, осомничен дека го изнајмил комбито користено во нападот на пешаците.


Најмалку еден загинат и 32 повредени во терористичкиот напад во Барселона


Барселона, 17 август, 2017 - 20:13 (META) 

Најмалку едно лице загинало, а 32 се повредени, од кои 10 сериозно откако комби удри во група пешаци на улица во близина на плоштадот „Каталуња“ во центарот на Барселона, јавуваат светските медиуми.

Шпанската полиција потврдила дека инцидентот го третира како терористички напад.

Властите апелирале граѓаните да го избегнуваат тој дел од градот и да не ги напуштаат своите домови, а побарано е и затворање на трамвајските и на метро-страниците.

По нападот луѓето на плоштадот „Каталуња“, почнале да се засолнуваат во околните продавници и кафулиња.

Полицијата сè уште трага по возачот на комбито, кој побегнал откако удрил во групата луѓе на улицата Ла Рамбла.

Инаку, улицата Ла Рамбла и плоштадот „Каталуња“ се меѓу најпопуларните места во Барселона, кои дневно ги посетуваат илјадници турсти.

Шпанскиот премиер Мариано Рахој изјавил дека е во контакт со властите во Барселона и дека во моментов најважно е згрижувањето на повредените.

Американскиот државен секретар Рекс Тилерсон изјавил дека САД се подготвени да и помогнат на Шпанија.

„Заедно со сојузниците, САД се одлучи да ги пронајдат терористите и да ги изведат пред лицето на правдата“, изјавил Тилерсон.


Комби влета во група луѓе во центарот на Барселона, неколкумина повредени


Барселона, 17 август, 2017 - 18:11 (META) 

Неколку луѓе се повредени кога комби се залетело и удрило во пешаци на плоштадот „Каталуња“ во центарот на Барселона, јавуваат светските медиуми.

Службите за итна помош, апелирале граѓаните да го избегнуваат тој дел од градот и побарале да бидат затворени трамвајските и метро-страниците.

Извештатите од местото наведуваат дека луѓето се засолнуваат во околните продавници и кафулиња.

Возачот на комбито побегнал од местото, јавуваат дел од шпанските медиуми, повикувајќи се на полициски извори.

Плоштадот „Каталуња“ е едно од најфрекфентните места во Барселона кое дневно го посетуваат илјадници туристи.