!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Поплави и свлечишта во Перу усмртија 75 лица


Лима, 20 март, 2017 - 12:32 (META) 

Поројни дождови, поплави и свлечишта во Перу ги однесоа животите на 75 лица, соопштија локалните власти.
Перуанската цивилна заштита соопшти дека 75 лица настрадале, 625.000 лица се загрозени, додека 70.000 останале без покрив над глава.

Поради поројните дождови поплавен е системот за канализација во градовите долж Тихиот Океан, а властите почнале да преземаат мерки против комарци.

Владата ја испрати војската да ѝ помогне на полицијата во одржување на јавниот ред во повеќе од 800 градови, во кои е прогласена вонредна состојба.


Судот во Перу нареди апсење на поранешниот претседател Толедо


Лима, 10 февруари, 2017 - 11:11 (META) 

Судот во Перу наредил да се уапси поранешниот претседател на земјата, Алехандро Толедо, поради сомневање дека земал мито од бразилска градежна компанија.

Судијата Ричард Консепсион го прифатил барањето на обвинителството да се уапси Толедо додека се истражува дека, наводно, примил 20 милиони долари за да издаде градежна дозвола на компанијата „Одебрехт“ за изградба на автопатот меѓу Бразил и брегот на Перу.

Толедо се наоѓа во Париз и во разговор со медиумите ја негирал одговорноста за корупцискиот скандал што го потресе регионот. Од „Одебрехт“, пак, признале дека платиле мито од речиси 800 милиони долари на влади во Латинска Америка, од кои 29 милиони за проекти во Перу.


Силен земјотрес во Перу, причинета материјална штета


Лима, 2 декември, 2016 - 10:51 (META) 

Земјотрес со јачина од 6,3 степени според Рихтеровата скала денеска го погоди јужниот дел од Перу.

Засега нема извештаи за повредени или загинати, но како што јавуваат локалните медиуми, потресот оштетил куќи и сообраќајници во тој дел од земјата.

Епицентарот на земјотресот бил на 45 километри северозападно од градот Хилујак, на длабочина од 32 километри.


Русија побара објаснување од Швајцарија зошто нејзин авион ја следел руската делегација


Москва, 19 ноември, 2016 - 16:40 (META) 

Русија побара објаснување од Швајцарија, откако воени авиони со швајцарски ознаки неколку минути го следеле авионот со руска делегација во воздушниот простор на таа земја.

– Изразивме недоверба и побаравме објаснување од швајцарската страна поради инцидентот со рускиот владин авион на небото над Швајцарија – се наведува во соопштението на руската амбасада во Швајцарија објавено на „Твитер“.

Вчера, воени авиени со швајцарско знаме го следеле авионот со руска делегација на небезбедно растојание.

Во авионот се наоѓале членови на руската делегација, меѓу кои и шефот на Федералната служба за воено-техничка соработка, Александар Формин, како и новинари кои патувале кон Перу на самит на Азиско-пацифичка економска соработка.


Најголемиот наркодилер на Перу е уапсен во Колумбија


Меделин, 1 мај, 2016 - 16:51 (META) 

Најголемиот наркодилер на Перу, Херсон Галвес, е уапсен вчера во еден ресторан во колумбискиот град Меделин, соопшти колумбиското министерство за одбрана.

По Галвес била распишана потерница од Интерпол и тој се смета за „новиот Ел Чапо Гусман на Јужна Америка“. Тој е познат под името Каракол и властите во Перу го бараат поради убиства, шверц на дрога и учество во криминална организација. За него е понудена дури и награда од 150.000 долари.

Колумбискиот претседател Хуан Мануел Сантос ја поздрави националната полиција поради апсењето на „еден од најопасните наркодилери во регионот“.


Во Перу забележан прв случај на вирусот зика


Лима, 30 јануари, 2016 - 10:47 (META) 

Властите во Перу соопштија дека во оваа земја е регистриран првиот потврден случај на опасниот вирус зика. Вирусот го донел маж од Венецуела, кој живее во Лима, а неодамна ја посетил Колумбија.

Министерот за здравство на Перу, Анибам Веласкес, рече дека очекува уште случаи на лица што го добиле вирусот во странство.

Тој додаде дека пациентот е изолиран и дека се преземаат чекори за да се запре ширењето на вирусот.

Перу се граничи со Колумбија, Еквадор и со Бразил, а зика со голема брзина се шири во Колумбија и во Еквадор.

Вирусот зика, кој се поврзува со оштетување на мозокот на новороденчињата, го пренесуваат комарци, а засега најзастапен е во Латинска Америка.

Венецуела регистрираше 4.700 можни случаи.


Перу: 16 загинати во автобуска несреќа


Лима, 19 јануари, 2016 - 9:51 (META) 

Шеснаесет лица загинаа, а 10 се повредени кога автобус не успеал да влезе во свиок на пат во централниот дел на Перу и слетал во реката Тарму, соопшти перуанската полиција.

Возачот на автобусот, кој се движел кон градот Пичанаки, поради неприлагодена брзина, изгубил контрола над воланот, при што паднал од 35 метри височина во реката, соопшти локалниот шеф на полицијата Хозе Мендоза.


Земјотрес во Бразил – нема жртви и материјална штета


Бразилија, 26 ноември, 2015 - 10:52 (META) 

Земјотрес со јачина од 6,7 степени според Рихтеровата скала утринава го погоди западниот дел на Бразил, соопшти американскиот институт за геофизика и додаде дека засега не се регистрирани жртви, ниту материјална штета.

Потресот се случил на длабочина од 604 километри, а епицентарот бил 130 километри југозападно од градот Тарауака, односно 700 километри североисточно од Лима, главниот град на Перу, каде, исто така, се почувствувал.

Два силни земјотреса синоќа се регистрирани во Перу, на границата со Бразил, наведе американскиот институт и додаде дека нема жртви.


Перу: Свештеник осуден на затворска казна за силување момче


Лима, 28 октомври, 2015 - 10:58 (META) 

Перуанскиот суд осуди свештеник на 35 години затвор, поради повеќекратно силување на момче во училиште во кое тој бил капелан.

Судот утврдил дека Валдир Перез го користел тоа што бил свештеник и капелан во приватно училиште во сиромашна населба, за сексуално да злоупотребува момче од јули 2010 до април 2012 година.

Момчето имало 10 години кога Перез првпат сексуално го злоупотребил, соопшти Врховниот суд на Перу.

Освен затворска казна, Перез, кој ја призна вината, мора да му плати парична казна на момчето во висина од 2.400 долари.

Жртвата рече дека Перез по едно од силувањата му дал пари да си купи „ем-пе-три плеер“.

Католичката црква во последните десет години ја тресат скандали поради свештеници кои сексуално злоупотребуваат деца, особено во САД и во Европа, но пресудите во овие случаи се ретки.

Слични обвиненија против свештеници на Католичката црква се сè почести во земјите од Латинска Америка, каде свештениците се поактивни во училиштата.


Во сообраќајна несреќа во Перу загинаа 16 лица, поголемиот број деца


Лима, 8 јуни, 2015 - 19:35 (META) 

Најмалку 16 патници, поголемиот број деца, загинаа, а 30 се повредени кога камион со кој се превезувале се превртел во бездна во централниот дел на Перу, соопштија денеска перуанските власти.

– Во несреќата погинаа приближно 16 лица – изјави регионалниот гувернер, Рубин Алва Очоа, додавајќи дека 30 повредени.

Несреќата се случила во неделата кога учениците, наставниците и родителите се враќале од организирано одбележување на национален празнк.

Алва рекол дека за несреќата е виновен лошиот пат и погрешната процена на возачот.

Сообраќајните несреќи се чести во Перу поради нерамните планински патишта кои се ризични за возачите.