!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Сенатот на САД одобри 700 милијарди долари буџет за Пентагон


Вашингтон, 19 септември, 2017 - 12:14 (META) 

Горниот дом на американскиот конгрес го одобри буџетот на Пентагон, кој изнесува 700 милијарди долари, јавуваат светските агенции.

Сенатот синоќа со 89 гласа „за“ и осум „против“ го изгласа законот за одбранбената политика на САД, кој предвидува 640 милијарди долари за основните операции на Пентагон, вклучувајќи набавка на оружје и плати за војниците.

Дополнителни 60 милијарди долари се обезбедени за мисиите во Авганистан, Ирак, Сирија и во другите воени подрачја.

Администрацијата на претседателот Доналд Трамп до Конгресот поднесе предлог-буџет со кој бараше 603 милијарди долари за основните операции и 65 милијарди долари за мисиите во странство.

Законот усвоен во Сенатот предвидува 8,5 милијарди долари за зајакнување на системот на ракетна одбрана и 10,6 милијарди долари за 94 борбени авиони, што е 20 пати повеќе отколку што бараше администрацијата на Трамп.


САД има бројни воени опции против Северна Кореја, вели шефот на Пентагон


Вашингтон, 19 септември, 2017 - 10:57 (META) 

Соединетите Американски Држави имаат „бројни“ воени опции против Северна Кореја, од кои повеќето не би ја загрозиле Јужна Кореја, односно би го поштедиле Сеул од брутален контранапад, изјвил американскиот министер за одбрана, Џејмс Матис, јавуваат светските агенции.

„Пастојат многу воени опции кои можеме да ги примениме, заедно со нашите сојузници, за одбрана на сојузниците и на нашите интереси“, изјавил шефот на Пентагон во Вашингтон, без да прецизира за какви воени станува збор.

Инаку, и покрај зовриената реторика помеѓу САД и Северна Кореја, засега нема позиционирање на американски воени сили кои би упатиле на непосреден воен судир.

Матис изјавил дека верува во дипломатијата и санкциите со кои се врши притисок на Пјонјанг за запирање на нуклеарната програма.

Северна Кореја во текот на летото го изведе шестиот, најголем нуклеарен тест досега и лансираше неколку интерконтинентални балистички проектили, по што Советот за безбедност на Обединетите нации (ОН) донесе нов пакет санкации против Пјонгјанг.

САД најавија дека ќе го искористат Генералното собрание на ОН, кое заседава оваа недела во Њујорк, да побара целосна примена на меѓународните санкции против Северна Кореја.

Инаку, за време на Корејската војна, од 1950 до 1953 година, животите ги загубија 50.000 Американсци и милиони Корејци.


Дипломатските средства за Северна Кореја се при крај, вели амбасадорката на САД во ОН


Вашингтон, 17 септември, 2017 - 19:48 (META) 

Доколку САД ги исцрпат дипломатските опции за да ја убедат Северна Кореја да ја запре нуклеарната програма, тогаш најверојатно работите во свои раце ќе ги преземе Пентагон, вели амбасадорката на САД во Обединетите нации, Ники Хејли, за „Си-ен-ен“.

– Ние сакавме да бидеме одговорни и да ги искористиме сите дипломатски средства за да го привлечеме нивното внимание. Ако тоа не успее, тогаш генералот Џејмс Матис (министер за одбрана на САД) ќе ги преземе работите во свои раце – вели Хејли.

Таа предупредува дека војна би значело уништување на Северна Кореја.

– Ако Северна Кореја продолжи со своето несовесно однесување и ако САД треба да се бранат себе и своите сојузници на секој начин, Северна Кореја ќе биде уништена. Сите го знаеме тоа, но никој од нас не го посакува – вели амбасадорката.

Советот за безбедност на ОН во понеделникот оваа недела усвои нов пакет санкции за Северна Кореја како одговор на шестиот и најголем нуклеарен тест на Пјонгјанг.

Американскиот претседател Доналд Трамп санкциите ги нарече „уште еден мал чекор“. Хејли вели дека тие се значајни, но се близу до границите на тоа што САД можат да го постигнат преку ОН.

– Исцрпевме речиси сè што Советот за безбедност засега може да направи – вели Хејли.


Трамп: Америка нема да дозволи да биде застрашена


Њујорк, 11 септември, 2017 - 19:53 (META) 

Претседателот на САД, Доналд Трамп, рече дека Америка никогаш нема да го заборави нападот на 11 септември 2001 година и додаде дека нема да дозволи да биде застрашена.

– Ужасот и страдањата од тој тежок ден ни се врежани во сеќавањата засекогаш – изјави американскиот претседател на церемонијата во Пентагон, каде што се урна еден од четирите авиони што ги киднапираа членови на Ал каеда.

Трамп нагласи дека терористите, доколку поведат напад на земјата, „нема да можат да се скријат на земјината топка“.

Во Њујорк илјада луѓе се собраа пред споменикот изграден на местото каде што беа кулите близначки. На церемонијата присуствуваше градоначалникот Бил де Блазио и неговиот претходник Мајкл Блумберг.


Можни се воздушни напади на САД на позиции на Исламска држава на Филипини


Вашингтон, 8 август, 2017 - 13:09 (META) 

Пентагон разгледува план со кој на американската војска би ѝ се дало зелено светло да изврши воздушни напади на позициите на терористичката организација Исламска држава на Филипини, јави „Ен-би-си њуз“, повикувајќи се на двајца неименувани високи функциониери на одбраната.

Планот би можел да биде презентиран денеска, а како што се наведува, нападите би биле изведени со беспилотни летала.

Позициите на екстремистите на Исламска држава на Филипини се закана за сојузниците на САД во регионот,


САД по грешка убиле 18 борци на Сириските демократски сили


Вашингтон, 13 април, 2017 - 16:32 (META) 

Во воздушен напад по грешка се убиени 18 припадници на Сириските демократски сили јужно од градот Табке во Сирија, соопшти Пентагон.

„Нападот го побараа партнерските сили, кои ја идентификуваа локацијата како борбена позиција на Исламска држава“, стои во соопштението.

Од Пентагон наведуваат дека подоцна се утврдило дека локацијата, всушност, е истурена борбена позиција на Сириските демократски сили.


Кандидатите на Трамп за шефови на ЦИА и на Пентагон предупредуваат на закана од Русија


Вашингтон, 12 јануари, 2017 - 20:04 (META) 

Кандидатите за шефови на Пентагон и на ЦИА што ги предлага новоизбраниот претседател на САД, Доналд Трамп, денеска, на сослушувањата пред Сенатот, предупредија на заканата на Русија кон НАТО. Генералот Џејмс Матис и Мајк Помпео ја посочија вмешаноста на Москва во хакерските напади на Демократската партија на САД.

Генералот Џемјс Матис, кој е номиниран од Трамп за министер за одбрана, пред Комитетот за вооружените сили на САД на Сенатот, предупреди дека НАТО се наоѓа под најголемата закана од Втората светска војна и дека рускиот претседател Владимир Путин се обидува да ги подели членките на алијансата.

„Мислам дека сега е најважно да сфатиме каква работа си имаме со Путин. Ние гледаме дека тој се обидува да ја скрши Северно-атлантската алијанса и ние мора да преземеме чекори да се одбраниме онаму каде што мораме… Мислам дека станува збор за најголемата закана од Втората светска војна, која доаѓа од Русија, од терористичките групи и од она што Кина го прави во Јужното Кинеско Море“, рече Матис, пренесува „Би-би-си“.

Кандидатот на Трамп за шеф на ЦИА, Мајк Помпео, пред Комитетот за разузнавање на Сенатот рече дека Москва претставува закана за Европа и дека се поставува агресивно во Украина.

Тој рече дека верува во извештаите на разузнавачките агенции дека зад хакерските напади стои Русија, која се обидела да влијае на демократските процеси во САД.

Ставовите на Матис и на Помпео доаѓаат по изјавите на Трамп, кој повика на затоплување на односите меѓу Вашингтон и Москва и изјави дека се сомнева во разузнавачките извештаи за вмешноста на Русија во хакериските напади на Демократската партија.


Кинеската морнарица заплени американски подводен дрон во Јужното Кинеско Море


Пекинг, 16 декември, 2016 - 19:59 (META) 

Кинеската воена морнарица вчера во водите на Јужното Кинеско Море запленила американско беспилотно пловило – дрон за океанографски истражувања, јавуваат светските медиуми.

Соединетите Американски Држави денеска испратиле официјално барање до Кина пловилото веднаш да биде вратено, пренесува „Би-би-си“. Според Пентагон, подморницата била запленета во меѓународни води.

Како што јавуваат светските агенции, инцидентот се случил вчера, во моментот додека американски брод за океанографски истражувања се подготвувал да го преземе подводното возило.

Официјални претставници на САД навеле дека пловилото, наречено „подводна едрилица“, било користено за тестирање на соленитетот и на температурата на водата.


Ирачките сили ја продолжија офанзивата за ослободување на Мосул од ИД


Мосул, 18 октомври, 2016 - 11:01 (META) 

Ирачката војска денеска ја продолжи офанзивата за ослободување на градот Мосул од милитантите на Исламска држава, напредувајќи источно од градот, јавуваат светските медиуми.

Сепак, стравувањата се дека битката за Мосул ќе трае предолго, а Обединетите нации (ОН) веќе изразија загриженост од можна хуманитарна катастрофа за околу 1,5 милион жители на градот. Мосул е втор по големина град во Ирак и е последното упориште на Исламска држава во земјата.

Во офанзивата во Мосул учествуваат околу 30.000 припадници на ирачката војска.

Доцна синоќа, Пентагон соопшти дека операцијата почнала добро и дека борбите ќе бидат тешки и ќе бараат доста време.

Ирачката војска во текот на ноќта фрлала летоци над Мосул со безбедносни инструкции за населението.

Француското министерство за одбрана, исто така, синоќа соопштило дека министрите за одбрана на водечките земји од коалицијата против ИД, на 25 октомви ќе се состанат во Париз, за да разговараат за битката за преземање на Мосул.


Пентагон: Северна Кореја неуспешно лансираше ракети


Вашингтон, 16 октомври, 2016 - 13:34 (META) 

Американската војска детектираше неуспешно лансирање на севернокорејски балистички ракети во близина на градот Кусонг, на северозападот на Северна Кореја.

– Ние остро го осудуваме ова како и другите неодамнешни севернокорејски ракетни проби. Имаме намера да изразиме загриженост во Обединетите нации за да се зајакне меѓународната решеност во барање одговорност од Северна Кореја за ваквите акции – соопшти портпаролот на Пентагон, командантот на американската Морнарица, Гери Рос.

Тој додаде дека САД се непоколебливо и цврсто посветени на одбрана на своите сојузници во регионот, вклучувајќи ги Јужна Кореја и Јапонија.

Пентагон соопшти дека ракетната проба не претставувала закана за Северна Америка.