!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Почина светската музичка ѕвезда Џорџ Мајкл


Лондон, 26 декември, 2016 - 9:39 (META) 

Пејачот и светска музичка ѕвезда Џорџ Мајкл вчера починал во својот дом во Оксфордшир, Велика Британија, на 53-годишна возраст, соопштил неговиот публицист, пренесува „Би-би-си“.

Медицинските екипи биле повикани во неговиот дом, вчера во 13.42 часот, според локално време, а полицијата соопштила дека смртта на пејачот засега ја третира како неразјаснета, но дека нема сомнителни околности.

Веста за смртта на Џорџ Мајкл ја соопшти неговото семејство, преку публицистот на пејачот.

„Со голема тага можеме да потврдиме дека нашиот сакан син, брат и пријател Џорџ почина во својот дом за време на божиќните празници. Неговото семејство бара нивната приватност да биде почитувана во овој тежок и емотивен период за нив“, стои во изјавата за смртта на Џорџ Мајкл.

Мајкл, кој е со грчко потекло и е роден како Георгиос Кирјакос Панајоту во северен Лондон, беше талентиран пејач, текстописец и продуцент, кој за време на својата кариера, која траеше речиси четири децении, продаде повеќе од 100 милиони албуми.

Својата кариера ја почна со музичкото дуо „Вем“ (Wham), со кое четирипати беше на врвот на британската листа за најдобри песни, пред да продолжи со издавање албуми како соло-артист, меѓу кои и „Faith“ во 1987 година, кој беше продаден во повеќе милионски тираж.

Мајкл соработуваше со голем број светски музички ѕвезди, меѓу кои и Арета Френклин и Елтон Џон, трипати беше победник на британските музички награди „Брит авордс“, а освои и две награди „Греми“.

По повод смртта на светската музичка икона, почит изразија повеќе негови колеги и пријатели, како неговиот партнер од дуото „Вем“, Ендрју Риџвеј, и Елтон Џон кој на својот профил на „Инстаграм“ напиша дека е во длабок шок.

„Изгубив сакан пријател – драг и добар човек и брилијантен уметник. Моето срце е со неговото семејство и сите негови обожаватели“, напиша Елтон Џон.


Почина пејачот Скот Вејланд на 48-годишна возраст


Блумингтон, 4 декември, 2015 - 10:24 (META) 

Скот Вејланд, поранешниот водач на американската рок-група „Стоун темпл пајлoтс“ (Stone Temple Pilots) починал вчера на возраст од 48 години, јавуваат светските медиуми.

Веста за смртта на пејачот синоќа ја потврдил и неговиот менаџер, Том Виторино, кој соопштил дека Вејланд починал во сон.

Познатиот пејач починал за време на турнејата со својата група „Вајлдабаутс“ (Wildabouts) во Блумингтон, Минесота.

Како што пренесува „Би-Би-Си“, Вејланд имал историја на проблеми со дрога.

Пејачот ја формираше групата „Стоун темпл пајлотс“, со која во 1994 година доби „Греми“ за најдобра хардрок-изведба, а беше член и на „Велвет револвер“.


Фил Колинс се враќа на сцената


Лос Анџелес, 30 октомври, 2015 - 10:20 (META) 

Фил Колинс изјави дека ја прекинува пензијата и планира нова турнеја.

„Официјално, повеќе не сум во пензија“, рече Колинс за магазинот „Ролинг стоун“ (Rolling Stone), додавајќи дека „коњот е надвор од шталата и одвај чека да потрча“.

Колинс (64) во 2011 година изјави дека ја напушта музиката „за да може целосно да биде татко на своите синови“. Славниот музичар нема објавено нов албум од 2002 година.

Покрај тоа, имаше и здравствени проблеми. Почна да го губи слухот, а на повратничката турнеја на „Џенесис“ во 2007 година ја повреди карлицата и нервите во рацете, заради што не можеше да тропа на тапани.


Почина музичката легенда Џо Кокер


Шефилд, 22 декември, 2014 - 20:45 (META) 

Познатиот пејач Џо Кокер починал денеска, на 70-годишна возраст, по кратка борба со болест за која медиумите велат дека била рак на белите дробови.
Британскиот пејач ќе остане запаметен по 40-годишната кариера и по големиот број хитови како „Summer in the city“, „You can leave your hat on“, „You are so beautiful“, „Up where we belong“ и „Unchain my heart“.
Џо Кокер во 2011 година одржа концерт во Скопје, во спортската сала „Борис Трајковски“.