Државните обврзници ќе се тргуваат на Македонска берза од почеток на 2019 


Скопје, 19 декември, 2018 - 12:56 (META) 

Државните хартии од вредност од почетокот на 2019 година ќе котираат на Македонска берза. Денеска министерот за финансии, Драган Тевдовски и директорот на Македонска берза, Иван Штериев, потпишаа договор за котација на државните обврзници. Со ова државните хартии од вредност ќе станат достапни за поголем број на инвеститори, како домашни така и странски.

Теводвски истакна дека со ова се следи европската пракса, но и примерите на сите развиени земји со функционален пазар на капитал.

– Се прави клучен чекор кон развивање на пазарот на капитал. Покрај добро развиениот примарен пазар, се развива секундарниот пазар на тргување. Од почетокот на 2019 година, државните хартии од вредност ќе станат достапни за повеќе инвеститори – како во земјата, така и во странство. Ќе напоменам дека преку заедничката платформа на берзите од регионот СЕЕ линк, македонските државни обврзници ќе станат достапни за инвеститорите од регионот, но и Европа. Инаку државните хартии од вредност на останатите земји од регионот веќе се достапни на СЕЕ линк. Ова ќе придонесе за поголема видливост на цените т.е. поголема транспарентност. Секако, поголемата  конкуренција кај побарувачката ќе обезбеди подобра цена, односно камата – рече Тевдовски.

Штериев истакна со котацијата на државните хартии од вредност ќе се зголеми расположивата понуда на берзата.

– Ова е многу значаен ден за Македонска берза и за нејзините членки. Берзанската котација на државните обврзници ќе значи дека овој финансиски инструмент ќе стане максимално визибилен и полесно достапен на секундарниот пазар на хартии од вредност во Македонија, а истовремено ќе ја зголеми расположливата понуда на Берзата. Воедно, котацијата и тргувањето на регулиран пазар ќе претставува нов квалитет за континуираните државни обврзници што би требало да придонесе за уште поголем интерес за вложување во овој инструмент од страна на домашните и странски инвеститори, со сите позитивни повратни импликации од тоа, вклучително и поповолни услови при издавање на обврзниците во иднина – рече Штериев.

Во 2018 година за првпат беше издадена 30-годишна државна обврзница, што според Тевдовски укажува на доверба на инвеститорите во економските политки кои се спроведуваат.


Анѓушев: Се надевам дека набрзо ќе се формира една регионална берза на електрична енергија


Скопје, 29 ноември, 2018 - 13:45 (META) 

Македонија денеска, како актуелен претседавач, е домаќин на 16. состанок на Советот на министри на Енергетската заедница на која учествуваат премиерот Зоран Заев, вицепремиерот Кочо Анѓушев, министерот за економија Крешник Бектеши, кој претседава со Советот заедно со директорката за енергетска политика во Европската комисија, Меган Ричардс.

Заев истакна дека мисијата на оваа заедница е да воспоставува стабилна регулаторна и пазарна рамка, способна да привлече инвестиции во производство на електрична енергија и мрежи.

„Работата на Енергетската заедница секогаш треба да се гледа од аспект на интересот на граѓаните и токму затоа создавање интегриран енергетски пазар кој овозможува прекугранична трговија со енергија и интеграција со пазарот на ЕУ е од суштинско значење за нив. Тоа значи безбедно снабдување за да се обезбеди стабилен и континуиран пристап на енергијата до граѓаните и до компаниите, што е од суштинско значење за економскиот развој и социјалната стабилност“, рече Заев.

Македонија како членка на Енергетската заедница, се обврза да стане дел од внатрешниот пазар на енергија во Унијата преку членството во Енергетската заедница.

Анѓушев рече дека соработката во регионот е важна за енергетиката бидејќи таа не може да ги следи границите на државите кои што се територијални. Енергетиката, како што рече тој, е област која што само административно познава граници.

„Нашиот регион е премногу мал за сите ние да правиме поединечни берзи и аукции, така што правецот во кој што се движат работите во делот на енергетиката да има регионален пристап е вистинското решение. Лично се надевам дека брзо ќе дојде денот кога ќе се формира една регионална берза на електрична енергија и една куќа за аукции на крос-бордер капацитети во делот на енергетиката, бидејќи тоа е правото решение за проблеми коишто во моментов ги имаме“, рече меѓу другото вицепремиерот Анѓушев.

Очекувањата за следната година, како што посочи вицепремиерот, Анѓушев се дека државата ќе создаде околу 200 мегавати инсталирана сила во фотоволтаични електрани, што ќе има сериозен импакт во развојот не само на енергетиката, туку и на градежништвото.


Економската соработка со БиХ ќе се продлабочува преку деловен клуб


Скопје, 31 октомври, 2018 - 13:24 (META) 

Во присуство на претставници на повеќе компании од двете земји, во Едукативниот центар „М6“ беше формиран македонско – босанско-херцеговски деловен клуб.

Целите на Клубот се интензивирање и продлабочување на економската соработка меѓу двете земји, преку подобрување и олеснување на условите за деловна соработка помеѓу компаниите од двете држави.

Функционирањето на Клубот треба да овозможи поуспешен настап на компаниите на пазарот на другата земја, заеднички бизнис-проекти и промовирање на бизнис поволностите на пазарите на Македонија и Босна и Херцеговина, како и на инвестициските поволности на двете земји.

За претседател на македонско – босанско-херцеговскиот деловен клуб беше избран генералниот директор на ВВ „Тиквеш“, Радош Вукичевиќ.

– Здружувањето и редовното состанување на стопанствениците на двете земји е од особена важност во поглед на унапредување на билатералните односи и поголемо вмрежување во регионот. Потенцијалот за соработка е навистина голем, особено оној меѓу различните сектори и секоја компанија може активно да придонесува во развојот и интензивирањето на овие врски- истакна Вукиќевиќ.

За потпретседател беше избран Митко Кржовски, управител на компанијата „Енерџи деливери систем“ (Energy Delivery Solutions – EDS), а беа формирани и Управен и Надзорен одбор на клубот.

На формирањето на деловниот клуб присуствуваше и актуелната амбасадорка на Босна и Херцеговина во Македонија, Лепа Бабиќ.

– Придонесот од страна на компаниите е навистина значаен, а формирањето на овој македонско – босанско-херцеговски деловен клуб треба да претставува платформа за понатамошен развој и раст и нешто што ќе го олесни настапот на компаниите на пазарите и ќе им помогне во надминувањето на бариерите кои стојат на патот за остварување повисоко ниво на соработка. Очекувам со ангажманот на компаниите од двете земји работата на овој клуб сѐ повеќе да се зголемува во иднина и да дава конкретни резултати – изјави Бабиќ.

Основачи на македонско – босанско-херцеговскиот деловен клуб се повеќе компании од двете земји, кои меѓудругото најавија и интензивирање на работата за зголемување на заедничкиот настап на трети пазари.


Петер: Европските пари ќе секнат и државата ќе оди во изолација ако кажете не ЕУ


Скопје, 25 септември, 2018 - 13:24 (META) 

Компаниите членки во Советот за странски инвестиции се за полесно водење на бизнис во Македонија, а  НАТО и ЕУ се вратата кон полесно водење на бизнис, рече денеска на прес-конференција претседателот на Советот на странски инвеститори, Штефан Петер.

Тој додаде дека Македонија во Европска Унија би била постабилна отколку надвор од неа, што би значело пристап до евтини кредити, финансиска помош од ЕУ за проекти како и стабилен пазар за извоз.

– Доколку Македонија каже НЕ на претстојниот референдум ќе го изгуби кредибилитетот, а со тоа и довербата односно вербата во иднината. Ако младите и децата немаат верба во иднината, најпаметните ќе заминат, ќе дојде до изолација. Едена милијарда евра финансиска помош од ЕУ за различни проекти, нема да дојдат во Македонија. Стабилноста на денарот би можела да биде нарушена, притисокот врз банкарскиот сектор ќе се зголеми, а ќе се намалат увозот и извозот. Компаниите ќе ја изгубат конкурентноста, ќе се намалат странските директни инвестиции бидејќи земјата ќе нема долгорочни перспективи, а ќе ја изгуби и конкурентноста во однос на други земји-кандидати за членство во ЕУ. Банкарскиот сектор ќе се стесни и кредитите ќе бидат поскапи – рече Петер.

Тој вели дека ќе ги нема и позитивните аспекти кои сега ЕУ ги поттикнува во државата, а тоа е владеење на правото, поттикнување на подобра животна средина, како и подобрување на правото на потрошувачите.

– Важно е да излезете да гласате, активно да учествувате во демократијата, не да бидете себични и да размислувате за себе, туку за последиците од гласањето за иднината. За демократијата да функционира нацијата треба да учествува, а не да набљудува. Оној кој нема да гласа го губи правото да се жали. Гласајте, па потоа жалете се за резултатот – рече Петер.


Намалени цените на индустриските производи на домашниот пазар


Скопје, 27 јули, 2018 - 13:37 (META) 

Продажните цени на производителите на индустриски производи на домашниот пазар, во јуни се пониски за 0,3 проценти на месечно ниво, а за 0,8 проценти на годишно ниво, соопшти Државниот завод за статистика.

Во јуни 2018, во споредба со мај годинава, продажните цени на производителите на индустриски производи на домашниот пазар се пониски во групите eнергија за 0,6 проценти, капитални производи за 0,3 проценти, интермедијарни производи, освен енергија за 0,2 проценти и нетрајни производи за широка потрошувачка за 0,1 проценти.

Во споредба, пак, со јуни 2017 година, продажните цени на производителите на индустриски производи на домашниот пазар се пониски во групите енергија 7,3 проценти и капитални производи 0,6 проценти.


Цената на нафтата на највисоко ниво во последните три години


Лондон, 21 мај, 2018 - 11:46 (META) 

На лондонскиот пазар, цената на нафтата се зголеми за разлика од претходните шест недели, па достигна на највисоко ниво во последните три и пол години.

Зголемување на цената на нафтата е последица на падот на производство во Венецуела, зголемената глобална побарувачка и најава за повторно воведување на санкции кон Иран од страна на САД.

На лондонскиот пазар, цената за барел нафта се зголеми за 2,5 отсто, односно по прв пат од декември 2014 година се зголеми на повеќе од 80 долари.

На американскиот пазар, барелот поскапе за 0,8 отсто односно на 71,30 долари.


„Даути комерц“ отвори дистрибутивен центар во Подгорица, инвестиција од 3,5 милиони евра


Подгорица, 14 мај, 2018 - 10:20 (META) 

По Косово и Албанија, македонската компанија „Даути комерц“ отвори дистрибутивен центар во Подгорица, а инвестицијата е во вредност од 3,5 милиони евра, информираат од Стопанска комора на Македонија.

„По 14 години работа на црногорскиот пазар од 2004 година, своето присуство „Даути комерц“ сега го заокружува со сопствен стопански објект во Подгорица, преку кој ќе се третира увезената стока од Македонија, Србија, земји членки на Европската Унија, Азија, Јужна Америка. Препознатлива е преку успешното пласирање на неколку македонски и меѓународни бренда на пазарите во регионот како што се „Бекутан” на Алкалоид АД Скопје, италијанскиот бренд за тестенина „Дивела“, млечниот бренд „Мегле“, се вели во соопштението.

Претседателот на Стопанска комора, Бранко Азески изјави дека „компанијата својот успех го потврдува во исклучително професионалниот начин на продажба и пласирање на производите на пазарот, со развиени најнови технологии во сите свои претставништва.“


Анѓушев: Новиот закон за енергетика ќе штити од неконтролиран раст на цените на струјата


Скопје, 4 мај, 2018 - 13:56 (META) 

На денешната јавна расправа за предлог- законот за енергетика во Собранието, вицепремиерот за економски прашања Кочо Анѓушев порача дека овој закон се носи за доброто на граѓаните и дека обезбедува конкурентност во енергетскиот сектор.

„Овој Закон обезбедува конкурентност, а кога постои конкурентност има и бенефит за крајните корисници, бидејќи со зголемена конкуренција се подобрува квалитетот на услугите и се намалуваат цените“, рече Анѓушев.

Механизмот на изборот на универзален снабдувач, кој ќе биде избран во јавна постапка, обезбедува заштита на граѓаните, како крајни потрошувачи на енергенсите.

„Мораме да се заштитиме од можноста цените неконтролирано да растат. Тоа во овој закон е направено квалитетно, во делот на електричната енергија, каде што е воведен универзалниот снабдувач кој ќе биде избран на јавен повик, со дефинирани критериуми “, дополни Анѓушев.

Преку спроведување на законот се овозможува поддршка за обновливите извори на енергија. Со овој Закон, преку воведување на премиум тарифите се дава можност за отворање нови локации за изградба на фотоволтаични централи, при што државата ќе објави тендери за премиуми, а инвеститорите ќе имаат можност произведената струја да ја продаваат на слободен пазар.

Тој додаде дека Владата ќе го реализира проектот за изградба на нови ветерните електрани, додека се постигне моќност од 150 мегавати, што е во согласност со студијата за одржливост во рамките на енергетскиот систем на Македонија.


Прва 30-годишна државна обврзница на македонскиот пазар на капитал


Скопје, 24 април, 2018 - 13:29 (META) 

Денеска за првпат на македонскиот пазар на капитал е издадена државна обврзница со време на достасување од 30 години, информираат од Министерство за финансии.

„Ова е сигнал за довербата на инвеститорите во македонската економија, бидејќи зголемената рочност, односно време за враќање на средствата, укажува на зголемена доверба. Големата доверба се покажа и преку двојно поголемата побарувачка на инвеститорите за 30-годишната обврзница во однос на понудениот износ од Министерството за финансии“, информираат од таму.

Министерот за финансии, Драган Тевдовски вели дека економските показатели укажуваат на  раздвижување на економијата.

„Безусловната препорака за почеток на преговори за членство во ЕУ, добрата фискална политика и подобрувањето на изгледот на кредитната агенција „Фич“ за Македонија, доволно говорат за патот по кој се движиме. Врз основа на сето ова може да излеземе на пазарот со инструмент како 30-годишна државна обврзница, кој укажува на силна доверба од инвеститорите“, вели Тевдовски.

Инвеститори во 30-годишната обврзница се приватните пензиски друштва и осигурителни компании.

„Имајќи ги предвид обврските на фондовите, целите кон кои е насочена инвестиционата стратегија и возраста на членството на фондовите, инвестирањето во 30-годишна обврзница е од најдобар интерес на нашите членови и остварување на нивните долгорочни цели. Макроекономската стабилност и позитивните очекувања за долгорочен раст, дополнително даваат поткрепа на одлуката за инвестирање во овој инструмент “ истакнаа од КБ Прво пензиско друштво.

Новата 30-годишна обврзница е продадена на сума од 19,5 милиони евра, што претставува половина од побарувачката од страна на инвеститорите, каматна стапка е 4,85 отсто.

„Покрај довербата, издавањето на долгорочни хартии од вредност го намалува ризикот на рефинансирање на јавниот долг“, дополнуваат од Министерство за финансии.

Македонија, покрај Словенија, е единствената земја во регионот која издала 30-годишна обврзница. Најблиску до оваа рочност во регионот дошле членките на Европската Унија – Бугарија која издала 20-годишна обврзница и Хрватска каде најдолг рок на кој е издадена државна обврзница е 13 години.

Од Министерство за финансии појаснуваат дека обврзници со достасување од 30 години имаат земји како Германија и САД. Обврзница со највисока рочност има издадено Австрија, односно 100-годишна обврзница.


ЕИБ финансиски ќе го поддржи регионот за развој на дигиталните технологии


Скопје, 19 април, 2018 - 14:22 (META) 

Регионалниот директор од Европската инвестициона банка (ЕИБ), Мигуел Моргадо во дискусијата на панелите на Дигиталниот самит рече дека ЕИБ инвестирала повеќе од 10 милиони евра во нашиот регион во процесот на развој на клучните дигитални технологии во последните години.

– Планот е оваа помош да се зголеми во следниот период со оглед на тоа дека Европската инвестициона банка е финансиска алатка за постигнување на дигиталните цели на Европската унија – додаде Моргадо.

Наталија Гелвановска од Светската банка од Вашингтон, потенцираше дека телекомуникацискиот сектор во принцип е приватен и дека владите мора да помагаат во развојот на технологии исклучиво преку заемно разбирање и договор со нив.

– Комуникацијата меѓу овие два чинители е од клучна важност за да се продолжи со развојот на дигитализацијата, посебно во руралните региони – рече Гелвановска и додаде дека малопродажните цени за широкопојасниот интернет генерално се превисоки и дека без директна регулација, ќе биде тешко да се исполнат целите за комплетен развој на оваа технологија во руралниот сегмент.

Нивес Сандри, како претставник на компанијата „Нокиа”, истакна дека приватните компании и операторите имаат инвестирано многу во развојот на широкопојасниот интернет, но дека мор да се работи заедно со владите за да се изгради соодветна инфраструктура.

Претседателот на Телото на европските регулатори за електронски комуникации (BEREC) Јоханес Гангл, истакна дека ова европско тело работи на хармонизација на законите за телекомуникации на земјите од Западен Балкан, и дека здравата конкуренција е клучна во развојот на дигиталното поврзување во Европа.