Богоевски ја лаже и манипулира јавноста, велат од ВМРО-ДПМНЕ


Скопје, 7 август, 2018 - 17:02 (META) 

Павле Богоевски ја лаже и манипулира целата македонска јавност, се вели во реакцијата на ВМРО-ДПМНЕ на изјавата на пратеникот од парламентарното мнозинство предводено од СДСМ и коалицијата.

„Во договорот јасно стои дека македонскиот јазик ќе биде единствениот јазик кој во Обединетите нации ќе биде запишан со фуснота, за разлика од тоа како е запишан во моментов. Македонското државјанство ќе биде заменето со граѓани на Република Северна Македонија. Се менуваат и меѓународните кодови и кратенки. Оние останати државни симболи за кои тој говори дека ќе останат непроменети се оние кои СДСМ во минатото веќе ги промени“, се вели во соопштението на ВМРО-ДПМНЕ.

Од таму додаваат дека „и додека устите им се полни со ЕУ и НАТО и европските вредности, во реалност прават се спротивно на вредностите за кои наводно се залагаат.“

„Користење на службено возило за патување на годишен одмор не преставува европска вредност“, се додава во соопштението.


Богоевски: За прв пат имаме шанса сами да одлучуваме за иднината


Скопје, 7 август, 2018 - 14:29 (META) 

Пратеникот од парламентарното мнозинство предводено од СДСМ и коалицијата, Павле Богоевски денеска ги повика граѓаните „заедно, храбро и посветено, да учествуваме во обезбедувањето на иднината на нашата држава.“

„За прв пат, имаме шанса, навистина сами да одлучуваме за сопствената иднината. Со прифаќање на Преспанскиот договор ние ги прифаќаме и неговите придобивки. Со овој Договор, македонскиот идентитет е зајакнат и заштитен еднаш-засекогаш. Јазикот е обезбеден и признаен во својата изворна форма без никакви фусноти, придавки или додавки. Нашето државјанство е македонско, сега и во иднина, а државните симболи како што се химната, знамето и грбот нема да се менуваат“, рече Богоевски.

Тој порача „на 30 септември, храбро, масовно и достоинствено да кажеме „да“ за членство во ЕУ и НАТО со прифаќање на Преспанскиот договор.“


Богоевски: Нема повреда на Деловникот на која укажуваат пратениците на ВМРО-ДПМНЕ


Скопје, 14 март, 2018 - 15:17 (META) 

Претседателот на Комисијата за деловнички и мандатно имунитетни прашања, Павле Богоевски рече дека комисијата може да заседава ако тоа го побара претседателот на Собранието, Талат Џафери. Тој објасни дека најпрво треба да има повреда на Деловникот, односно да не се разгледуваат амандманите, па потоа Комисијата да го каже нејзиниот став.

„Немаме наводна поврeда на Деловникот, на која укажуваат пратениците на ВМРО-ДПМНЕ. Сè уште не сме стигнале до тоа дали амандманите ќе се разгледуваат“, изјави Богоевски за „Макфакс“

Пратеникот на ВМРО-ДПМНЕ, Илија Димовски, на денешната Собраниска седница на која на дневен ред е ставен законот за употреба на јазиците во трето читање побара да се прекине седницата и да заседава Комисијата за деловнички и мандатно имунитетни прашања која треба да одлучи дали да има расправа по 36.000 амандмани поднесени од ВМРО-ДПМНЕ.


Савески: Ќе има ли еден аршин за Богоевски, друг аршин за обвинетите од Левицa


Скопје, 18 јануари, 2018 - 11:53 (META) 

Познатиот активист д-р Здравко Савески ја поздрави одлуката на Обвинителството да не го гони Павле Богоевски, но порача дека треба да се има еднаков пристап и кон членовите на Левица, кои се исто така обвинети поради активностите во Шарената револуција. Во пост на неговиот Фејсбук-профил рече дека ако членовите на Левица, чиј основач е тој, не бидат еднакво третирани како Богоевски, тоа ќе значи дека со критичарите на власта се постапува по друг аршин.

„Обвинителството нема да го гони Павле Богоевски. Правилен потег. Немаше основа за кривично гонење. Но, во контекст на тоа што кривичната постапка против нас, членовите на Левица, поради нашето учество во протестите во 2016 година, се уште трае – да се повлече обвинението против Павле Боговски, а да не се повлече против нас – ќе да тоа посочува на двојни аршини. За тој што е во власта еден аршин, а за тој што критикува друг аршин“, напиша Савески.

Поранешниот универзитетски професор реагира и дека судскиот процес против него се развлекува безмалку две години, а како што вели, може да продолжи и до 10 години постојано малтретирање со влечкање по судови.

„На 25 јануари повторно ќе се појавам на суд. Судскиот процес трае без малку 2 години, а постапката е буквално на самиот почеток. Ќе дочекам пресуда за помалку од 10 години или во мојот случај на тој начин ме казнуваат за критиките кон претходната и кон сегашната власт – со влечкање по судови што е можно подолго?“, прашува Савески.


Обвинителството се откажало од гонење на Богоевски за фрлање боја


Скопје, 17 јануари, 2018 - 20:52 (META) 

Oбвинителството се откажало од кривичен прогон на пратеникот Павле Богоевски за фрлање боја врз објектот на Министерство за култура во текот на протестите од Шарената револуција, објави на „Фејсбук“ адвокатското друштво „Давидовиќ и Јанковиќ“.

На денешното судско рочиште, како што напишаа тие, се утврдило дека никој нема право без одобрение на Заводот за заштита на спомениците на културата да презема какви било дејствија врз заштитениот објект, а уште помалку да го вештачи, а објектот веќе бил оштетен со неовластено варосување.

„Се утврди дека единствена надлежна и лиценцирана институција за утврдување на штета на вакви објекти е Заводот за конзервација. Тие формираа комисија и утврдија две работи- зградата на Министерството е без одобрение и проект искречена по нарачка на министерството и нанесена е огромна штета која при отстранување на бојата може да нанесе структурална штета на ѕидовите на зградата, и второ, бојата од Шарената револуција се мие со вода и сапун, штетата е 15.000 денари и најважно од се НЕ МОЖЕ ДА СЕ ОШТЕТИ ВЕЌЕ ОШТЕТЕНА ФАСАДА. Обвинителството го повлече обвинението“, напишаа адвокатите.


Утре напладне комисиска расправа за имунитетот на уапсените пратеници


Скопје, 29 ноември, 2017 - 21:06 (META) 

Седница на Комисија за деловнички и мандатно-имунитетни прашања, на која ќе се расправа за барањата за притвор на пратениците Крсто Мукоски, Љубен Арнаудов, Јохан Тарчуловски, Сашо Василевски, Љупчо Димовски и Жаклина Пешевска, ќе се одржи утре, со почеток во 12 часот, потврди претседателот на Комисијата, Павле Богоевски.

Одлуката е објавена и на веб-страницата на Собранието.

Барањата за одземање на пратеничкиот имунитет се поднесени вчера од Основен суд Скопје 1, односно од Одделението за организиран криминал и корупција, а претседателот на Собранието, Талат Џафери, вечерва ги препратил до Комисијата за деловнички и мандатно-имунитетни прашања.


Судот досега нема побарано одземање на имунитетот на приведените пратеници


Скопје, 28 ноември, 2017 - 11:30 (META) 

До овој момент во Собранието нема пристигнато барање од Кривичниот суд за одземање на пратеничкиот имунитет на пратениците што се приведени утрово за насилствата во законодавниот дом од 27 април оваа година, изјави за „Мета“, пратеникот Павле Богоевски, претседател на собраниската Комисија за деловнички и мандатно-имунитетни прашања.

– За да заседава и да одлучува Комисијата, треба да пристигне барање од судот. До овој момент од судот нема стигнато такво барање – вели Богоевски.

Инаку, член на оваа комисија е и пратеникот Крсто Муковски, кој е еден од приведените пратеници, заедно со пратеничката Жаклина Пешевска и со пратеникот Љубен Арнаудов, тројцата од редовите на опозициската ВМРО-ДПМНЕ.

Засега нема информации ниту од обвинителството, ниту од судот, дали и какви мерки за обезбедување на присуство побарало Основното јавно обвинителство за гонење организиран криминал и корупција и дали евентуално ќе се бара мерка притвор.

Според членот 64 од Уставот, пратениците во Собранието уживаат имунитет и пратеник не може да биде притворен без одобрување на Собранието, освен ако е затечен во вршење кривично дело за кое е пропишана затворска казна во траење од најмалку пет години. Собранието може да одлучи да се примени имунитет над пратеник и кога тој самиот не се повикал на него, ако е тоа потребно заради вршење на функцијата пратеник.

Неофицијално, упатени извори за „Мета“ велат дека е можно воопшто да не се бара од Собранието да одлучува за имунитетот на пратениците, односно Обвинителството да се повика на тоа дека пратениците се затечени, бидејќи има снимки, во вршење кривично дело за кое е предвидена затворска казна од најмалку пет години.

Обвинителството денеска соопшти дека отворило истражна постапка против 36 лица за насилствата од 27 април, кои се осомничени за терористичко загрозување на уставниот поредок и на безбедноста, кривично дело за кое според Кривичниот законик е предвидена казна затвор од најмалку 10 години.


Полупразна сала, реплики и контрареплики на продолжението на расправата за Зврлевски


Скопје, 11 август, 2017 - 13:03 (META) 

Осмото продолжение на собраниската расправа за разрешување на државниот јавен обвинител, Марко Зврлевски, почна и се одвива според истиот шаблон на реплики и на контрареплики меѓу пратениците на опозициската ВМРО-ДПМНЕ и на процедурални забелешки.

Пратеникот на ВМРО-ДПМНЕ, Илија Димовски, на почетокот на денешното продолжение на седницата побара од претседателот на Собранието да ја прекине расправата поради членот 8-а од Изборниот законик, кој, како што рече, му налага на Собранието поради распишаните локални избори, да ја стави расправата во мирување, но и поради тоа што во собраниската сала не се присутни речиси половина од пратениците.

– Дури и да повикате не гласање, нема да има доволно пратеници за Марко Зврлевски да биде разрешен. Мислам дека оваа точка треба да ја ставите во мирување и да го испочитувате членот 8-а од Изборниот законик, кој е договорен во Пржино, на барање на СДСМ, изгласан е во Собранието, потпишан е од мене и од Вас и пропишано е како треба да се спроведува – рече Димовски.

На ова спикерот Џафери, повикувајќи се на деловникот на законодавниот дом, нагласи дека дебатата не зависи од присуството на мнозинството во салата туку од присутните пратеници, односно дека во случајот само се расправа за предлогот за разрешување, а не се одлучува.

Расправата продолжи со реплики (за кои беа пријавени 25 пратеници) и со контрареплики меѓу пратенциите од ВМРО-ДПМНЕ, Нада Ципушева, Зоран Илиоски Благица Ласовска и Трајчо Димков, кои си даваа поддршка и го дополнуваа заедничкиот став дека целта поради која владејачкото мнозинство инсистира на дневен ред да биде разрешувањето на Зврлевски е да се дефокусура јавноста, како што рекоа, од важните прашања, како Договорот за добрососедство со Бугарија, пожарите, стратегијата за бегалци, задолжувањето, законот за јазиците.

Дебатата се вжешти откако независниот пратеник од владејачката коалиција, Павле Богоевски, на говорницата рече дека тоа што го прават пратениците од ВМРО-ДПМНЕ во Собранието нема врска со демократија, туку е само обид да се спасат кожите на дел од членовите на партијата кои „треба да одат во затвор“.

– Со месеци ги исмевате демократските процедуи. Зврлевски ќе биде разрешен и тие што треба ќе одат во затвор. Во интерес на Македонија е да се разреши Зврлевски. Откажете се од говори и ќе видите колку бргу ќе се собере мнозинството за гласање. Ве предизвикувам, откажете се од говорите – рече Богоевски.

На ова жестоко реагираа пратениците од ВМРО-ДПМНЕ, а Даниела Рангелова побара од Богоевски да им се извини на сите пратеници затоа што им се заканил со затвор.

– Денеска ги навредивте сите пратеници и на сите им се заканивте со затвор. Што сте Вие, обвинител? Судија? Заради тоа колегите ќе прават опструкции. Сега ви требаат обвиненија за да победите на избори. Немојте да помислите да правите такви работи. Ако сте доблесен, колега Богоевски, сега треба да излезете и да им се извините на сите колеги – рече Рангелова, која побара пауза од еден час.


Богоевски: Со „Шарена револуција“ засекогаш ја променивме политичката сцена


Скопје, 12 април, 2017 - 12:45 (META) 

Пред една година, на 12 април, илјадници граѓани револтирани од одлуката на претседателот на државата, Ѓорге Иванов, да прогласи широка аболиција и да помилува 56 лица – политичари и нивни соработници, кои се споменуваат во прислушуваните разговори, излегоа на масовен протест пред народната канцеларија на Иванов во центарот на градот.

Таа одлука, донесена пет дена по распуштањето на Собранието, предизвика бура протести низ целата земја и на сите нивоа. Секој ден се бараше повлекување на одлуката и оставка на претседателот, сè додека Иванов целосно не ја повлече одлуката за аболиција. Протестите од Скопје се проширија низ целата земја, а демонстрантите од т.н. „Шарена револуција“ на иновативен начин и со „герила-акции“ го изразуваа револтот.

На годишнината од „Шарената револуција“ потсети и независниот пратеник од коалицијата на СДСМ, Павле Богоевски, кој беше еден од водачите на револуцијата, а по изборите во декември минатата година стана пратеник во законодавниот дом.

Богоевски на собраниската говорница рече дека „Шарена револуција“ е најголемото граѓанско будење и дека граѓаните со протестите минатата година порачале дека е доста страв и молк.

– Денеска е една година од најголемото граѓанско будење за заедничка цел. Благодарение на „Шарена револуција“, Никола Груевски, голем дел од неговата банда и дел од вас, не се аболирани туку осомничени лица. Со „Шарена револуција“ засекогаш ја променивме политичката сцена во Македонија, сакале или не вие да го признаете тоа. Нè нарекувате хулигани и насилници и велевте дека сме ги сквернавеле државни симболи. Ние го обоивме овој дом, но вие го уништивте долго пред да го обоиме. Го сведовте на гласачка машина за ВМРО-ДПМНЕ. Нè правите насилници, но откако го фрливме првиот балон боја имаше само три-четири скршени прозорци. Доста беше! „Шарена револуција“ рече доста. Доста беше страв, доста беше молк. Јас ќе бидам „шарен“ уште долго откако ќе престанам да бидам пратеник. „Шарена револуција“ уште долго ќе го бои овој дом, но сега однатре – рече Богоевски.

На ова му одговори претседавачот со Собранието, Трајко Вељаноски, кој истакна дека „Шарена револуција“ двапати го оштетила законодавниот дом.

– „Шарена револуција“ двапати го оштети овој дом, за 600.000 денари и за 1.200.000 денари, кои ги платија граѓаните за Вие да си седите во овие клупи и да си земете плата од овој дом што го боевте – рече Вељаноски.


ВМРО-ДПМНЕ: Целосна измислица е дека Владата му го плаќа телефонот на Груевски


Скопје, 4 април, 2017 - 14:42 (META) 

Веста дека владата го плаќа телефонот на претседателот Никола Груевски е целосна измислица. Груевски нема телефон кој го плаќа владата. Ниту пак од Малта имал разговори за такви високи сметки, реагираше ВМРО-ДПМНЕ со соопштение попладнево, откако на денешното седмо продолжение на Конститутивната седница на Собранието независниот пратеник од коалицијата на СДСМ, Павле Богоевски покажа фотографија на кој се гледа телефонска сметка на Груевски. Тој праша дали телефонот на Груевски го плаќа владата?

„Лагите и лажните вести станаа синоним за СДСМ. Пратеникот Павле Богоевски со лажно претставување како невладин активист влезе во Собранието, а сега преку пласирање на невистини се обидува да му се додвори на неговиот лидер, криминалецот Зоран Заев“, вели ВМРО-ДПМНЕ во соопштението.