!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Собранието не расправаше за законот за јазиците, пауза до утре поради локалните избори


Скопје, 13 септември, 2017 - 15:57 (META) 

По подолга пауза, Собранието попладнево ја прекина 15. седница, на која требаше, меѓу другото, да расправа за Законот за употреба на јазиците, со образложение дека сите парламентарни партии имале обврски поради пријавувањето на кандидати за локалните избори.

Претходно експресно беше изгласана одлуката за објавување јавен оглас за избор на член на Државната изборна комисија (ДИК), која беше уфрлена како дополнителна точка.

Денешната седница мина со две гласања за симнување на законот за јазиците од дневниот ред и со две барања за пауза, кои претседателот на Собранието, Талат Џафери, ги одобри, а последната потраја многу подолго од предвиденото.

Пред давањето пауза во 13.40 часот во Собранието се случуваше жестока расправа за дневниот ред на седницата, кога пратениците од ВМРО-ДПМНЕ излегоа на собраниската говорница. Опозициската партија бараше пауза откако нејзините претставници не успеаја нивните обиди законот за јазиците да се симне од дневниот ред.

Речиси сите координатори на пратеничките групи на ВМРО-ДПМНЕ во расправата бараа да се симне законот од дневниот ред. Тие велеа дека законот не може да има европско знаменце оти не е наведено со кој пропис на ЕУ се усогласува, како и дека е прекршен деловникот, оти не бил даден во Комисијата за политички систем како матична комисија, туку на Комисијата за европски прашања.

Седницата ќе продолжи утре во 11 часот.


Пратениците од ВМРО-ДПМНЕ се собраа пред Џафери, барајќи пауза


Скопје, 13 септември, 2017 - 13:59 (META) 

Голем број пратеници од ВМРО-ДПМНЕ и од Коалицијата за подобра Македонија се собраа пред претседателот на Собранието, Талат Џафери, инсистирајќи да даде пауза. По неколку минути расправање, другите пратеници се повлекоа, а остана Илија Димовски да се расправа со Џафери. Претседателот на Собранието ги обвини пратениците од опозицијата дека сакаат насилно да прават промени.

– Мора да се работи според деловникот и законите, а вие сакате насилно да направите промени – рече Џафери, по што сепак даде еден час пауза.

Димовски побара пауза откако го нападна предлог-законот за јазиците во расправата за дневниот ред. Откако Џафери одби да го направи тоа, првин Димовски пред неговиот микрофон постојано му бараше пауза, а потоа се собраа пратениците, барајќи го истото. Џафери одбиваше да даде пауза додека пратениците не се вратат на своите места.

Претходно, во расправата за дневниот ред за денешната 15. седница, сите координатори на пратеничките групи на ВМРО-ДПМНЕ бараа да се симне законот од дневниот ред. Тие велеа дека законот не може да има европско знаменце оти не е наведено со кој пропис на ЕУ се усогласува, како и дека е прекршен деловникот, оти не бил даден во Комисијата за политички систем како матична комисија, туку на Комисијата за европски прашања.

Неколкупати во текот на денешната расправа се бараше да се гласа за симнување на законот од дневниот ред, а Џафери тоа двапати го направи, но на гласањето немаше доволно гласови „за“ и расправата продолжуваше.


ВМРО-ДПМНЕ обвинува за злоупотреба на деловникот, СДСМ велат опозицијата блокира


Скопје, 28 јули, 2017 - 15:29 (META) 

Собранието ќе ја продолжи осмата седница по паузата за ручек, откако претседателот на Собранието, Талат Џафери, ја прекина петтата седница за извештајот на Агенцијата за администрација.

Пратениците на ВМРО-ДПМНЕ велат дека претседателката на Комисијата за финансирање и буџет, Лилјана Кузмановска, не го потпишала извештајот од расправата за ребалансот на буџетот и побараа пауза и информација за тоа кој, како што тврдат, неовластено го потпишал извештајот.

Џафери претходно даде уште една пауза, откако не ѝ дозволи на Кузмановска да зборува од говорницата. Кузмановска побара време за процедурално обраќање за да ја објасни ситуацијата во која се најде, но Џафери упорно тврдеше дека таа треба да оди на своето место и да бара збор, бидејќи нема право на процедурална забелешка.

Истовремено, Џафери му го исклучи микрофонот на пратеникот Антонио Милошоски од ВМРО-ДПМНЕ кој дофрлаше од место, додека Џафери ѝ објаснуваше на Кузмановска, која беше на говорница, дека нема право на збор.

Собранискиот спикер го прифати барањето за пауза, но нагласи дека ребалансот на буџетот не е на дневен ред на оваа седница и оти пратениците на ВМРО-ДПМНЕ бараната информација ќе ја добијат кога ќе се расправа по таа точка.

Петре Шилегов од СДСМ на денешната прес-конференција во Собранието рече дека јавноста е сведок на обидите за блокада што ги врши ВМРО-ДПМНЕ иако претходно на координација со претседателот Џафери било договорено денеска да завршат со изборот на замениците на генералниот секретар на Собранието, измените на Кривичниот законик во делот на Суперкупот и да го усвојат извештајот за работата на Агенцијата за администрација.

– Вчера ги спречивме да опструираат да не се донесе извештајот на Комисијата за финансирање и буџет. Претседателката на Комисијата одби да го потпише извештајот произлезен од неа. Во таков случај мнозинството членови на комисијата, според деловникот, го потпишаа извештајот – тврди Шилегов.


Димовски побара еден час пауза на почетокот на продолжението на петтата седница


Скопје, 28 јули, 2017 - 12:35 (META) 

Пратениците на ВМРО-ДПМНЕ побараа еден час пауза на почетокот на продолжението на петтата седница во Собранието.

Тие побараа информација од претседателот на Собранието, Талат Џафери, да ги извести за тоа кој синоќа го потпишал извештајот од амандманската расправа за ребалансот на буџетот на Комисијата за финансирање и буџет бидејќи тоа не го сторила претседателката Лилјана Кузмановска, како што е пропишано со деловникот.

Илија Димовски од ВМРО-ДПМНЕ рече дека овој извештај е потпишан од други пратеници и за тоа кој го потпишал побара информацијата да биде доставена до нив, за што побара еден час пауза.

Претседателот на Собранието, Талат Џафери, го прифати барањето за пауза.

– Не спорам право да барате информација во однос на тоа што го изнесовте како процедурално, но таа можност ќе ја имате кога на дневен ред ќе дојде соодветната тема во однос на расправата за ребалансот на буџетот. Извештај за тоа прашање нема да добиете затоа што не е на дневен ред. Во редовна процедура ќе го добиете сиот материјал. Точно е дека во членот што го цитиравте токму така пишува, но ситуација кога претседател на комисија ќе одбие да потпише извештај е работа за која во Собранието се дадени надлежности – рече Џафери.

Во Собранието денеска ќе продолжат петтата, шестата и осмата седница. По завршувањето на осмата седница, ќе продолжи шестата седница, односно расправата за разрешувањето на јавниот обвинител Марко Зврлевски, прекината пред десетина дена.


ВМРО-ДПМНЕ побара пауза, а СДСМ откажување од дискусиите „во интерес на реформите“


Скопје, 13 јули, 2017 - 13:16 (META) 

Координаторот на една од десетте пратенички групи на ВМРО-ДПМНЕ, Илија Димовски, 40 минути откако почна собраниската седница на која на дневен ред е разрешувањето на државниот јавен обвинител Марко Зврлевски, побара еден час пауза за, како што рече, „да видат како ќе ја тераат дискусијата понатаму“.

Тој побара да се разгледа и да се промени Законот за јавно обвинителство за да не случува секојпат кога ќе се промени владата, да се менува и јавниот обвинител иако не му е истечен мандатот.

– Ако сакаме Собранието да биде посериозна институција, пристапот треба да е поинаков. Не го спорам правото Владата да иницира ваква постапка за разрешување. Ниту една влада досега, а ниту оваа не успеа да испочитува крај на мандат на јавен обвинител. Веројатно треба да најдеме начин ние, како Собрание, да го решиме некако. Да ја запреме дискусијата и прво да разговараме за Законот за јавно обвинителство, па да разговараме за оваа точка. Прво да зборуваме за стандарди на постапка, па потоа за постапката – рече Илија Димовски.

На ова му реплицираше пратеникот од СДСМ, Бетаин Китев, кој побара пратениците да се откажат од расправа по оваа точка, да се премине на гласање за да не се запираат реформите што треба да се спроведат.

Претходно, пратеникот од ВМРО-ДПМНЕ, Антонио Милошоски, рече дека разрешувањето на Зврлевски е првиот чекор во партизирањето на државната администрација што новата влада сака да го спроведе.

– Оваа инцијатива е единствено во согласност со изјавите на Заев дека кога ќе дојдат на власт, ќе сменат сè, од хигиеничар до министер. Ваквиот потег ја покажува неговата загриженост за она што обвинителството го има за неговиот случај. И целта ќе биде Заев да не одговара за она што целата македонска јавност виде дека го сторил во предметот „Поткуп“ – рече Милошоски.


Само што почна, „паузирана“ седницата за разрешувањето на Зврлевски


Скопје, 10 јули, 2017 - 12:17 (META) 

Седницата на Собранието на Република Македонија на која треба да се расправа за разрешување на републичкиот јавен обвинител, Марко Зврлевски, продолжи денеска во 11 часот, но веднаш беше прекината откако координаторот на седмата од десетте пратенички групи на опозициската ВМРО-ДПМНЕ, Димитар Стевананџија, побара еден час пауза.

Претседателот на Собранието, Талат Џафери, побара од Стевананџија да објасни „од која пратеничка група, од која политичка партија, од кој субјект бара пауза“ и, сепак, и покрај бурните реакции од мнозинството, ја прекина седницата.

Џафери, во четвртокот откако двајца од координаторите побараа пауза, ја прекина седницата и го најави нејзиното продолжение за денеска.

На днешното продолжение би требало да се расправа за oдлуката за давање согласност на општите акти на Народниот правобранител, по што следува расправата за разрешувањето на Зврлевски.

На дневниот ред се и годишни извештаи на некои агенции, како и предлог-законот за зголемување на породилното отсуство на 18 месеци.


Продолжи блокадата во Собранието со серија прекини, барања за паузи и за извинувања


Скопје, 6 јули, 2017 - 17:06 (META) 

Шестата собраниска седница, на која како петта точка на дневниот ред треба да се расправа за предлогот на Владата за разрешување на јавниот обвинител Марко Зврлевски, претседателот на Собранието Талат Џафери ја прекина во 16.20 часот, откако пратеникот Димитар Стевананџија, претставувајќи се како координатор на една од десетте пратенички групи, побара пауза од 60 минути, а за тоа време народниот правобранител да им се извинел на пратениците.

Претходно извинување побара Зоран Илиоски, исто така велејќи дека народниот правобранител Иџет Мемети треба да им се извини на пратениците.

Пред да стави крај на денешното продолжение на шестата седница и да го закаже следното за утре во 11 часот, Џафери рече дека тоа што го прават пратениците на ВМРО-ДПМНЕ е очигледно злупотреба на актите и дека граѓаните лесно ќе сфатат што всушност се случува.

– Тоа е злопотреба, но јас немам намера да ве попречам, Деловникот го овозможува тоа, ќе добиете еден час пауза. Ќе потсетам, заради граѓаните, јас и претходно кажав дека намерата со десетте пратенички групи е нон-сенс и дека сакате да блокирате, но граѓаните нека одлучуваат. Ќе добиете пауза, оти сакате да блокирате, ја прекинувам седницата и таа ќе продолжи утре во 11 часот – рече Џафери, одговарајќи му на Стевананџија.


Координаторите на ВМРО-ДПМНЕ ја почнаа блокадата на Собранието


Скопје, 6 јули, 2017 - 16:05 (META) 

Попладневната сесија на шестата седница на Собранието на Република беше прекината по само две минути од почетокот.

Зоран Илиоски, како „координатор на третата пратеничка група на ВМРО-ДПМНЕ“, побара половина час пауза и стенограми од претходната дискусија и видеозапис.

Претседателот на Собранието, Талат Џафери, му укажа дека не се меша во правото на пратениците на ВМРО-ДПМНЕ да формираат пратенички групи, но дека тоа што ВМРО-ДПМНЕ го направи е за да имаат 10 координатори кои постојано ќе бараат паузи за да ја блокираат седницата.

– Не коментирам процедурално, Вие побаравте половина час, ќе добиете еден час. Десет групи сте, ќе добиете 10 часа пауза за да блокирате. Сега ќе добиете половина пауза, а ќе добиете стенограм за да го видите вашето меѓусебно комуницирање. Видеоснимка ќе добиете во текот на работата – рече претседателот на Собранието пред да прогласи нова пауза.


Најстариот пратеник Маноиловски ги повика пратениците да работат за Македонија


Скопје, 31 март, 2017 - 14:12 (META) 

Петтото продолжение на конститутивната седница поминува во меѓусебни надмудрувања на политичките партии и во давање процедурални забелешки, наместо во расправа за точката на дневен ред, односно за избор на членови и на претседател на Комисијата за избори и за именувања.

Најстариот пратеник во Собранието, Бранко Маноиловски од ДУИ, ги повика пратениците да ги остават партиските интереси и да работат во интерес на граѓаните на Македонија.

– Првпат доаѓам во Собранието и забележав голема нервоза кај вас. А од далеку е јасно како ова може да се реши, но ставаме пречки од интереси и од убедувања. Сето тоа е залудно. Вие сите сте прекрасни. Дајте да ги исфрлиме тие интереси и да бидеме едно. Би сакал да видам еден вид мост, едно разбирање меѓу вас. Само малку смирете се сите партии, оставите ги партиските интереси на страна – рече Маноиловски.

Дискусијата почна со Томислав Тунтев од СДСМ, кој посочи дека 110 дена се крши собраниската процедура и 60 дена не може да се формира влада.

– Повеќе од два месеца граѓаните трпат недонесување закони, нерешавање на горливите проблеми. Колку и да повторуваат пратениците од ВМРО-ДПМНЕ, не можат да убедат никого дека има некаква платформа. Фактите и вистината не може да се сменат. Има програма на новата реформска влада, предводена од СДСМ и, притоа, ниту една одреденица во неа не се коси со Уставот – рече Тунтев.

Пратеникот Ферид Мухиќ рече дека во Македонија треба да се расчисти преминот од авторитарна свест кон граѓанската демократска свест.

Павле Богоевски ги обвини пратениците од ВМРО-ДПМНЕ дека не дебатираат за Комисијата за избори и за именувања туку дека штитат криминал.

Претседавачот со седницата и поранешен претседател на Собранието, Трајко Вељаноски, неколкупати на пратениците им ја прочита третата точка на дневен ред, односно изборот на членови и на претседател на Комисијата за избори и за именувања и ги замоли да расправаат по таа точка.

– Денеска е петти ден, има пријавено 50 пратеници за збор, поминати се само двајца, а процедурални забелешки имаше преку 100. Ве молам да се придржувате на дневниот ред, но ваше право е да имате реплики и контрареплики – рече Вељаноски.

Пратеникот од ВМРО-ДПМНЕ, Зоран Илиоски, рече дека нормално е граѓаните да реагираат и да излегуваат на протести затоа што била изиграна нивната волја.

– Народот има дилеми и нормално е дека народот реагира. Врз основа на резултатите од изборите, се предложи Комисијата за избори и за именувања каде што мнозинство има коалицијата што победи на изборите, а тоа е ВМРО-ДПМНЕ. Тоа е нормална реакција кога некој се обидува по изборите да ја изигра волјата на народот. Која цена СДСМ ја плаќа за да дојде на власт и за да оформи влада – праша Илиоски.

По низата процедурални забелешки што ги бараа пратениците, претседавачот на Собранието, Вељаноски, даде пауза до 15 часот, кого ќе продолжи седницата.


ДИК на пауза – дополнително ќе се сослушуваат членовите на избирачките одбори


Скопје, 17 декември, 2016 - 14:42 (META) 

Државната изборна комисија денеска, со час и половина задоцнување, ја почна седницата на која се разгледува последниот приговор од коалицијата предводена од СДСМ за избирачкото место 2011, општина Теарце, во ИЕ 6, на кое на почетокот на гласањето недостигало гласачко ливче со сериски број, а по пребројувањето тоа ливче е најдено во кутијата.

Претставникот на СДСМ во ДИК, Игор Милев, истакна дека прекршен е и принципот за тајноста на гласањето бидејќи ливчето е скинато сосе серискиот број од кочанот и оти поради тоа се знае точно кој гласал и за кого гласал. Тој побара гласањето на ова гласачко место да се поништи, особено затоа што недостига и доверливиот записник број 15.

Според претставникот на ДУИ во ДИК, Субхи Јакупи, во овој приговор има неразјаснети работи и оти е потребно да се повикаат членовите на избирачкиот одбор од спорното гласачко место. Тој исто така се пожали на притисоците од медиумите, во ДИК и од случувањата надвор пред комисијата, посочувајќи дека во таква ситуација не може да се работи. Јакупи, исто така, побара да се поведе постапка за сите што давале лажни изјави и го прекршиле Изборниот законик.

Претставникот на ДПА во ДИК, Бедредин Ибраими, рече дека е против пребројување на гласови и повикувањето на избирачкиот одбор и, како што рече, против тоа да се прават драми. Тој побара од членовите на комисијата да се придржуваат до правилата и до процедурите за да се донесат мериторни одлуки.

Силвана Бонева, претставник на ВМРО-ДПМНЕ во ДИК, пак, побара да се отфрли приговорот на СДСМ бидејќи содржи неточни наводи за ливче со сериски број, кое било наводно користено за „бугарски воз“.

– Ниту едно гласачко ливче во Македонија нема сериски број – рече Бонева, додавајќи дека гласачко ливче со ваков сериски број не може да постои.

Претседателот на ДИК, Александар Чичаковски, речиси час и половина по почетокот на седницата побара да се повикаат членовите, претседателите и замениците на избирачкиот одбор и на општинскиот изборен одбор за да бидат дополнително сослушани. Предлогот беше прифатен со шест гласа „за“ и со три „против“, по што со ист број гласови се одлучи истовремено да се донесе целиот избирачкиот материјал и да се утврди каде исчезнал записникот број 15, на кој наводно има изјава која е во прилог на приговорот. Додека се донесе избирачкиот материјал и членовите на одборите, ДИК ќе прави пауза.

Во меѓувреме, пред ДИК продолжуваат протестите на приврзаниците и на функционерите на ВМРО-ДПМНЕ, кои веќе трет ден се собираат пред заградата каде што се наоѓа комисијата за, како што велат, „да ја одбранат изборната победа“.