Претходната власт плаќала три пати поскапо за авионски карти, хотели и ресторани


Скопје, 22 март, 2018 - 11:40 (META) 

Алатката за отчетност за трошоците на носителите на јавните фунцкии, која владата ја промовираше вчера, покажува дека најголеми разлики во трошењето помеѓу сегашната и минатата власт има во авионските карти, хотелското сместување, но и кај трошењето во ресторани во странство.

За шестмесечен период, министерствата предводени од минатата власт за овие ставки потрошила двојно, а некаде и тројно повеќе народни пари за овие услуги.

Периодот кој што се анализира со оваа алатка е од 1 јуни до 1 декември 2014 година од владеењето на претходната власт и од 1 јуни до 1 декември 2017 година за време на владеењето на оваа власт, односно првите шест месеци од стапувањето на функции по прземање на власта.

Анализирањето на трошења по министерства, покажува дека министерството за финансии предводено од Зоран Ставрески потрошило 2.619.357 денари, а со Драган Тевдовски 583.170 денари.

Најголема разлика во трошењата има кај авионските карти, при што, Ставрески потрошил 947.579 денари, наспроти 144.514 денари потрошени од Тевдовски. Голема разлика има и кај хотелското сместување, 834.802 денари наспроти 206.283 денари. Евидентна е разликата и кај угостителски услуги во странство 345.243 денари, наспроти 32.748 денари.

MinFin

За угостителски услуги во земјата преку надворешни угостителски објекти, биле потрошени 171.469 наспроти 47.242 денари.

Разлики во трошењето има и во министерството за транспорт и врски, па така, кабинетот на Миле Јанакиески за авионски карти потрошил 615.774 денари, а за кабиентот на Горан Сугарески нема таков трошок.

За угостителски услуги во земјата, Јанакиески потрошил 286.661 денари наспроти 31.265 денари потрошени од Сугарески. Хотелското сместување во странство, Јанакиески го чинело 301.727 денари наспроти 16.700 денари потрошени од Сугарески.

Трошоците за мобилен телефон на кабиентот на Јанакиески се 419.132 денари, а на Сугарески 14.998 денари.

Кај Министерство за здравство, интересен е податокот што Никола Тодоров не потрошил ниту денар за авионски карти, но затоа за угостителски услуги во земјата преку надворешни угостителски објекти потрошил 816.607 денари, наспроти 276.982 денари, потрошени од Таравари.

MinODB

Министерството за одбрана за време на Зоран Јолевски потрошило 1.020.347 денари, а за време на Радмила Шекеринска 447.044 денари. Најголеми разлики во трошењето има кај авионските карти 636.533 денари за време на Јолевски, наспроти 225.872 денари за време на Шекеринска.

Речиси четири пати е поголема сумата потрошена на угостителски услуги преку мензи, ресорани и бифеа во рамките на институциите за време на Јолевски (800.277), наспроти 197.393 денари за време на Шеќеринска.


Владата очекува антикорупционерите да покажат одговорност кон буџетските пари


Скопје, 1 март, 2018 - 13:05 (META) 

Владата го следи принципот на нулта толеранција за корупција и очекува и членовите на Антикорупциска комисија да го следат тој принцип и да покажат одговорност, се вели во реакцијата на Владата на ревизијата на УЈП која констатирала нерегуларности во работењето на Комисијата.

„Владата на Република Македонија го следи принципот на нулта толеранција за корупција. Во изминативе седум месеци покажавме дека не постои толеранција кон именуваните функционери кои имаат покажано неодговорно трошење на парите на граѓаните и сите кај кои беше утврдена таква состојба поднесоа одговорност. Истовремено Владата постојано укажува дека одговорното трошење на буџетските пари треба да биде почитувано и од сите останати јавни функционери како што беше примерот со Државната изборна комисија. Очекуваме дека и членовите на Антикорупциската комисија ќе го следат принципот на нулта толеранција за корупција и ќе покажат одговорност имајќи ги предвид последните случувања и имајќи предвид дека тоа е суштината на нивната работа“, велат од Владата на Република Македонија.

Медиумите објавија дека ревизијата на УЈП констатирала нерегуларности во работењето на Комисијата, каде нејзини членови ненаменски трошеле буџетски средства. Конкретно, во ревизорскиот извештај било констатирано дека на членови од Комисијата им биле исплаќани патни трошоци за доаѓање на седници, а исплатата се вршела врз основа на неверодостојни патни налози. Потоа, некои од нив воопшто не доаѓале на работа, туку само на седници, и биле поднесувани по три патни налози за ист ден.


Пратениците попладнево релаксирани, Џафери им се заблагодари за трпението – и спасението


Скопје, 30 јануари, 2018 - 19:46 (META) 

Со зборовите „За продолжението дополнително ќе бидете известени, благодарам за трпението – и спасението“, претседателот на Собранието на Република Македонија вечерва ја заврши 32-та седница, на која поради немање кворум во попладневното продолжение само еден закон со гласање беше пратен на комисиска расправа. Во салата не беа пратениците од ВМРО-ДПМНЕ и коалицијата.

Сите други предлог-закони и одлуки поминаа без расправа, оти речиси никој не се пријавуваше за збор. Во салата имаше многу малку пратеници, па немаше услови да се врши гласање.

Поради тоа Џафери рече дека гласање за точките ќе има на продолжението на седницата, за која првично зборуваше дека ќе се одржи в четврток, за потоа на самиот крај да се поправи и да каже дека поради други обврски на пратениците в четврток, накнадно ќе го закаже продолжението на 32-та седница.

Расправа од говорницата имаше само Томислав Тунтев, координатор на пратеничката група на СДСМ, кој зборуваше за предлог-законите за намалување на парите што ќе се исплаќаат за патни трошоци на пратениците, односно предлог законите за измена на Законот за плати  и други надоместоци на избрани и именувани лица во Република Македонија и на Законот за пратеници. Притоа, Тунтев и Џафери навлегоа во долга расправа  за издржаноста на некои решенија и за надлежностите на собранискиот спикер.


ДУИ најави амандман за укинување на патните трошоци на сите функционери


Скопје, 23 јануари, 2018 - 13:12 (META) 

Пратеникот на ДУИ, Џеват Адеми на комисиската расправа за финансирање и буџет најави дека пратеничката групa на ДУИ ќе поднесе амандман за укинување надоместокот за патни трошоци на сите функционери.

Според него, новинарите немале други теми и им вршеле атак на пратениците и ги направиле „дежурни виновници“.

– Ајде на овој начин да ги испровоцираме другите функционери и да не сме ние на мета постојано. Да се жртвуваме, за новинарите да не пишуваат за нас – рече Адеми.

На Адеми му реплицираше независниот пратеник кој е дел од владејачката коалиција, Павле Богоевски кој се согласи со него, но вели дека ова решение е само привремено.

Предлогот на власта за кратење на патните трошоци денеска се најде пред членовите на комисијата за финансирање и буџет, а веќе утре е ставен на дневен ред и на законодавно- правната комисија и комисијата за политички систем.

Со измените се предвидува надоместокот кој пратениците го добиваат за секој поминат километар, зависно од цената на горивото, од досегашните 30 отсто да се намали на 20 отсто.


Ќе поминат ли законските измени со кои ќе се скратат патните трошоци за пратениците


Скопје, 15 јануари, 2018 - 15:04 (META) 

Пратеничката група на СДСМ на 12 јануари 2018 година до претседателот на Собранието, Талат Џафери, достави предлот-измени на Законот за плата и други надоместоци за пратениците и другите избрани и именувани лица и Законот за пратеници, со кои се предлага надоместокот, односно висината на сумата за патни трошоци да изнесува максимум 20 отсто од цената на горивата, наместо 30 отсто како што е во актуелниот закон, пишува „Вистиномер“ кој оценува дека ова ветување на СДСМ е во тек на реализација.

По донесување на овие измени, СДСМ предлага потоа да се смени и предлог-одлуката во Собранието со која патните трошоци ќе ги одредат на 15 отсто. За отстранување на злоупотребите, пак, се предлага пратениците сами со своите кредитни картички да плаќаат, а како доказ да ги приложат фискалните сметки.

СДСМ ова ветување го даде за време на парламентарните избори во 2016 година во „Планот за живот“ (страна 28) во одделот „Одговорна власт и контрола на власта – СТОП ЗА ЗЛОУПОТРЕБА НА ПАТНИТЕ ТРОШОЦИ“, а се актуелизира по силните реакции на јавноста за висината на патните трошоци кои им се исплаќаат на пратениците во текот на годината и злоупотребите на пропишаното. Податоците изнесени во јавноста покажаа дека на годишно ниво пратениците од Охрид, Гевгелија, Струмица, Битола… добиваат и по 20.000 евра за патни трошоци, а од страна на собраниските служби никогаш и не биле вршени построги контроли.

(Целиот текст од „Вистиномер“ можете да го прочитате и да го преземете ТУКА)


Карневалот во Вевчани со маски за загадувањето и за трошоците на пратениците


Вевчани, 13 јануари, 2018 - 18:10 (META) 

Во Вевчани со карневалската поворка која тргна во 14 часот денеска почна традиционалниот карневал кој датира 1.400 години наназад. Одбележувањето ќе заврши утре со спалувањето на маските и честитки за Стара нова година.

Општествено политичките случувања кај нас и во светот и годинава беа инспирација за василичарите да имаат креативни и критички маски во дефилето. Колоритните маски продефилираа низ Горна и Долна маала, а покрај традиционалните Глупав Август, ѓаволите, музикантите, зетот и невестата, забележани беа „Скопје 2025“ за загаденоста во главниот град, но имаше и карневалска група што ги исмејуваше народните избраници и нивните паушали за патни трошоци, за двојазичноста, случувањата во Собранието, правата на ЛГБТ заедницата…

Вевчанскиот карневал привлече голем број туристи од земјава, но имаше посетители од Србија, Бугарија, Турција. Покрај бројните туристи кои допатуваа во Вевчани беа присутни политичари и дипломати од странските амбасади.

На свеченото прогласување на карневалот за беше и министерот за култура Роберт Алаѓозовски, кој рече дека е првпат на вевчанскиот карневал, и приватно и професионално.

– Вевчани и карневалот се носители на отпорот и на традицијата, на демократската борба и на критичноста, на слободоумноста и на креативноста. Тие резонираат и со новите владини политики. . Креативни се отворени и го шират принципот за кој се залагаме демократизација на културата и општеството, освојување на нови хоризонти на критичната култура – рече Алаѓозовски.


СДСМ поднесе иницијатива за намалување на патните трошоци за пратениците


Скопје, 12 јануари, 2018 - 14:04 (META) 

Пратеничката група на СДСМ поднесе инцијатива за намалување на патните трошоци на пратениците, информираше координаторот Томислав Тунтев на денешниот брифинг со новинарите.

Со иницијативата се предлага патните трошоци од 30 отсто од цената на изминат литар бензин, да се намали на 15 отсто. За таа цел, потребно е менување на законот за плати на именувани функционери и законот за пратеници.

– Решението кое го предлагаме ќе биде со цел да се стави крај на манипулациите и шпекулациите во јавноста. Претседателот Талат Џафери го има предлогот, уште на 1 декември, но досега се нема изјаснето ниту една пратеничка група – рече Тунтев.

Тој потенцираше дека за оваа инцијатива очекуваат поддршка од сите пратеници вклучувајќи ја и опозицијата.

Наплатата според овој предлог закон би се вршела само со фискална сметка која е платена од личната картичка на пратеникот, за да се отстранат, како што објасни Тунтев, сите сомнежи дека пратеникот би можел да носи и фискални сметки кои од други лица.


Транспаренси Интернешнл и ЦЕA бараат Собранието да скрати на патните трошоци


Скопје, 22 август, 2017 - 11:46 (META) 

Собранието на Република Македонија да направи измени во Законот за пратениците и да донесе Кодекс за етика на пратениците заради отстранување на проблемот со наплатата на нереално високи надоместоци за патни трошоци на пратениците, според препораките од извештаите на Државниот завод за ревизија, побараа „Транспаренси Интернешнл – Македонија“ и Центарот за економски анализи.

„Законот за пратениците предвидува право за членовите на Собранието на РМ да примаат надоместок за користење на автомобили во лична сопственост за службени цели, во висина од 30 отсто од продажната цена на еден литар гориво, според изминатиот километар за возилото кое се користи. Државниот завод за ревизија во извештаите за извршена финансиска ревизија од 2008, 2010 и 2016 година препорачал да се преиспита висината на надоместокот во насока на нејзино намалување со оглед на тоа што овие расходи се нереални и опфаќаат значителен дел од вкупните расходи на Собранието на РМ. И покрај тоа, Собранието сè уште нема постапено по препораките на Државниот завод за ревизија и понатаму на пратениците им исплаќа нереално високи надоместоци за патни трошоци со што значително го оптоварува својот буџет“, нагласуваат организациите.

Тие повикуваат Собранието да го донесе Кодексот за етика на пратениците, за да се постави рамка за етичко однесување на пратениците во ситуации кога одредено однесување иако е легално, не е етичко. Со донесувањето на ваков кодекс Собранието истовремено ќе ја исполни и препораката на ГРЕКО од извештајот за усогласеност од четвртиот круг на евалуација, а кој меѓу другото се однесува на превенција на корупција меѓу членовите на парламентот, се вели во сооопштението.


СДСМ предлага алтернативи место патни трошоци на пратениците


Скопје, 6 август, 2017 - 17:56 (META) 

Координаторот на пратеничката група на СДСМ во Собранието, Томислав Тунтев, денеска предложи четири алтернативи за регулирање на патните трошоци на пратениците. Моментално, од 120 пратеници, 71 пратеник го задоволуваат условот да наплаќаат за доаѓање на работa.

– Едно е постоечкото, меѓутоа да се регулира така како што е потребно за да не се злоупотребува. Најголемиот проблем во сегашниот начин во исплата на патните трошоци е злоупотреба на системот. Имало и има пратеници кои не патуваат секој ден, а кои наплаќаат патни трошоци. Со алатки, механизми и активности кои би го спречиле тоа, драстично ќе се намали сумата на патни трошоци што се исплаќаат на месечно ниво. Втората алтернатива е давање станови за користење, службени, државни станови. Третата алтернатива што ја нудиме е со давање надомест за одвоен живот и за изнајмување стан под кирија. Четвртата алтернатива која ја нудиме е хотелско сместување на тендер – вели Тунтев.

Координаторот на пратеничката група на СДСМ рече дека овие алтернативи произлегле по направена сеопфатна обемна анализа и дека овие предлози им ги доставил на координаторите на другите пратенички групи.

Тој побара блиска и плодна дебата меѓу сите пратенички групи за консензуално наоѓање на адекватно решение.


Петер: Инвеститорите не ја напуштија државата во криза, од новата влада очекуваат дијалог


Скопје, 27 февруари, 2017 - 15:53 (META) 

„И покрај тешкотиите со политичкиот систем изминатите две години, бизнисмените имаат добро чувство за иднината. Странските инвеститори се стабилни во работењето, некои од нив бројот на вработени го зголемија двојно,“ одговори претседателот на Советот на странски инвеститори при Стопанска комора, Штефан Петер, на прашањето на „Мета“ за влијанието на политичката криза врз инвеститорите.

– Ниту една странска компанија не се повлече. Бизнимените имаат добро чувство и со новата влада и реформи во образовниот систем, странските инвеститори ќе продолжат да инвестираат – вели Питер.

Тој информираше дека во фокусот на работата на Советот на странски инвеститори ќе биде организација на конференција нарачена „Средно стручно образование по мерка на фирмите“ бидејќи, како што истакна, компаниите се соочуваат со недостиг од стручна квалификувана работна сила. Потребни им се квалификувани стручни работници во сите сектори.

Во однос на напуштањето на високо-стручните кадри на земјата, тој истакна дека во земјите каде што заминуваат не им е лесно и не се збогатуваат, а ако се одвоени од семејството, тоа е дополнително тешко.

– Ако не ги образувате на вистински начин, не очекувајте компаниите да ги вработат. Ако не им се даваат фер и правични плати за да живеат со семејствата, се иселуваат – вели Петер.

За платите на вработените во странските компании, тој истакна дека тоа е индивидуална одлука на секоја компанија, но во тој поглед, како што рече, треба да се земе предвид дека многу од компаниите исплатуваат 13 и 14 плата, патни трошоци, оброци и сл.

Во однос на субвенциите што државата ги дава на странските инвеститори, тој вели дека системот на поттикнување е неопходен за привлекување странски компании, а дека друго прашање е колку треба да изнесуваат субвенциите.

– Факт е дека Македонија се наоѓа во глобален натпревар, а ако нема поволни услови во земјата, инвеститорите ќе отидат во друга земја. Бугарија и Србија се директна конкуренција на Македонија – вели Петер.

Од новата влада, странските инвеститори ќе бараат дијалог. Нивните идеи и предлози ќе бидат објавени во следното издание на т.н. „Бела книга“.

– Нашите идеи ги има во „Белата книга“, тие препораки се бесплатни. Другите држави треба да платат илјадници евра за консултации. Добро е да седнеме на маса и да слушнат што мислиме – вели тој.

Зошто не се исполнети дел од нивните барања, Петер упати да се праша владата, но како што рече, секогаш постои можност за подобрување на дијалогот. Наскоро, како што истакна, ќе објават и документ во кој ќе биде презентирана реалната слика за тоа што е побарано, а што е остварено.

На прашањето што ќе се случи ако новата влада ги укине субвенциите, тој изјави дека „не гледа во иднината, туку во минатото кое е побезбедно за него“.

– Ако не постојат субвенции, немаше инвестициите да бидат на ова ниво, така што ова нека биде одговор на прашањето – додаде Петер.

Странските инвеститори вработуваат 50.000 лица, а соработуваат со повеќе од 5.000 домашни фирми.