!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Велосипедската патека на кеј во Горно Лисиче се продолжува за два километри


Скопје, 15 мај, 2017 - 14:52 (META) 

Екипите на Град Скопје и на ЈП „Улици и патишта“ ја асфалтираат патеката за возење велосипеди и ролерки на реката Вардар во Горно Лисиче, на потегот од големиот парк на булеварот Февруарски поход до железниот мост во Горно Лисиче, од десната страна.

Оваа патека е во должина од 2.000 метри, со ширина од четири метри.

Патека на Кејот на реката Вардар што се протега од големиот парк на булеварот Февруарски поход до железниот мост во Горно Лисиче, односно до крај на регулацијата на реката Вардар, претставува продолжување на патеката што се протегаше од мостот Тодор Александров до паркот на булеварот Февруарски поход.


Тетовецот Симјановски го освои првото место на ултрамаратонот на Фрушка Гора


Тетово, 24 април, 2017 - 15:34 (META) 

Ултрамаратонецот Александар Симјановски од Тетово го освои првото место на ултрамаратонот на Фрушка Гора, Србија, кој се одржа изминатиов викенд.

Се работи за трка по планинска патека долга 107 километри, а вкупната денивелација на патеката изнесува околу 4.200 метри.

Симјановски ја истрчал патеката за 16 часа и 38 минути. На целта заедно со него пристигнал и Србинот Зоран Прегогачиќ, со кој го поделија првото место.

– Поголем дел од трката водев, потоа ми се приближи Зоран Прегогачиќ. Цело време трчавме заедно, бевме многу исцрпени, теренот беше лош и на 18 километри од целта се договоривме да не се натпреваруваме меѓусебно затоа што тоа премногу нè исцрпуваше. Падна договор заедно да влеземе на целта и до таму да трчаме со исто темпо, за да не се преоптоваруваме – рече Симјановски.

Ултрамаратонот на Фрушка Гора е традиционален и првпат почнал да се одржува во 1978 година.


Се уредува патеката покрај каналот Студенчишта


Охрид, 13 август, 2016 - 13:13 (META) 

Општина Охрид, ги привршува подготвителните работи околу изградбата и уредувањето на патеката која ќе го следи каналот Студенчишта, на потегот од бараките на АД „Трудбеник“ до „Билјанини извори“.

Делот од патеката кој се уредува во првата фаза е долг 346 метри, додека целокупната, до ресторанот „Котва“, ќе изнесува 560 метри.

Првиот дел од патеката треба да биде направена до средината на есента, а наредната година планирано е да се прави и делот до мостот.

Исечени се повеќе дрвја, за што реагираат од еколошките асоцијации, но и дел од граѓаните.

Од локалната самоуправа уверуваат дека се сечеле само стари и трули дрва, а брезите и врбите кои се дел од дрворедот на овој потег ќе останат, односно, сите дрва кои можат да се вклопат во проектот ќе останат и нема да се сечат.

Според најавите, патеката ќе биде изградена од природни материјали (камени плочи и дрво), а изведувач е охридската фирма „Бифора инженеринг“, со рок за изведба од 12 месеци.

Вкупниот проект чини околу 20 милиони денари, а ќе биде финансиран со пари од општината.

Предвидено е да се исчисти и малиот канал, а ќе се постават дрвени платформи за пристапување на пловните објекти и неколку видиковци.


Реконструирана планинарската патека на Водно


Скопје, 20 јуни, 2015 - 12:09 (META) 

Град Скопје, во соработка со Федерацијата на планинарски спортови и со Јавното претпријатие „Паркови и зеленило“, ја реконструираше пешачко-планинарската патека Словенска, која се протега од потегот кај полициската станица Водно до Средно Водно.

На патеката се поставени нови 34 дрвени скали, реконструирани и заѕидани се и 30 постојни скали, а за безбедно движење по патеката, на три места е поставена заштитна ограда. Освен тоа, поставени се и седум нови патокази, четири информативни табли, од кои две се на македонски и две на англиски.

„Реконструираната патека почнува на 320 метри надморска височина, а завршува на паркиралиштето на Средно Водно, на 580 метри надморска висина. Висинската разлика од почетокот до крајот на патеката е 260 метри надморска висина, вкупна должина од 2.100 метри и време на минување 40 минути“, информираат од Град Скопје.


Велосипедска патека која наликува на слика на Ван Гог


Брабант, 13 ноември, 2014 - 16:01 (META) 

Холандскиот уметник и дизајнер Дан Розегеарде создаде прекрасна и иновативна велосипедска патека која свети навечер.

Патеката, поради светечките каменчиња и ЛЕД-светилките, потсетува на познатата слика на Ван Гог, „Ѕвездена ноќ“.

Километарската патека, која е направена со посебна технологија на светење во темнина, како и со ЛЕД-светилки на соларна енергија, се наоѓа во холандскиот град Брабант, родното место на Ван Гог.

Светилките на патот ќе им овозможат на велосипедистите без проблем да возат во доцните часови.