!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Владата одлучи патот кај Порој да се исчисти, а земјоделците да се обесштетат


Скопје, 7 јуни, 2017 - 21:05 (META) 

На вечерашната трета владина седница на која се расправаше за штетите во поплавените подрачја во Порој, било истакнато дека Дирекцијата за заштита и спасување и Општината Тетово треба веднаш да почнат постапка за расчистување на наносот на регионалниот пат Тетово – Јажинце, а Владата препорачала да помогне и Армијата.

На патот имало нанос од песок и од земја од околу 70.000 кубни метри и било неопходно бргу да биде исчистен.

„Исто така, на седницата е информирано дека од поплавите во Тетовско, зафатени се 50 хектари земјоделски површини, пред сè овошни и градинарски насади и житни култури. Владата го задолжи Министерството за земјоделство, шумарство и за водостопанство да ја почне постапката на прибирање барања од земјоделците за надомест на штети, по што надлежни комисии ќе излезат на терен за увид на штетите и за утврдување на висината на средствата потребни за нивно обештетување“, се вели во соопштението на Владата.


Германското МНР очекува брзо формирање влада и спроведување на реформите


Берлин, 17 мај, 2017 - 20:08 (META) 

„Добро е што претседателот Иванов попушти и престана да го блокира формирањето на новата влада. Оваа одлука требаше одамна да се случи и конечно го рефлектира исходот од изборите во земјата во декември во 2016 година“, се вели во пишаната изјава на Министерството за надворешни работи на Германија, а по повод давањето на мандатот од страна на претседателот Ѓорге Иванов на лидерот на СДСМ, Зоран Заев.

Во неа исто така се вели дека претседателот на СДСМ, Зоран Заев, сега го има мандатот за формирање влада и тоа може да биде важен прв чекор во насока на надминување на политичката криза во која земјата се наоѓа со месеци.

„Ги повикуваме сите учесници во политичкиот процес во Скопје сега конструктивно да соработуваат, а тоа важи и за претстојните преговори помеѓу коалициските партнери. Граѓаните не заслужуваат политички интриги да се водат врз нивниот грб. Тоа што ѝ е потребно на земјата и тоа што нејзините граѓани со право го очекуваат, е брзо формирање на нова влада, која бргу ќе се зафати со целосно спроведување на Договорот од Пржино и на реформските приоритети. Потребни се длабоки реформи за државата да продолжи по патот кон евроатлантските интеграции. Германија и понатаму ќе ја поддржува земјата на тој пат“, се вели во изјавата на германското МНР.


Дваесетгодишно момче загина во сообраќајна несреќа во Охрид


Охрид, 7 мај, 2017 - 12:35 (META) 

Едно лице го загуби животот во тешката сообраќајна несреќа што рано утрово, во пет часот, се случи на регионалниот пат Свети Наум – Охрид, во близина на Хидро-биолошкиот завод, информира СВР-Охрид.

„Од добиените повреди, на местото на настанот животот го загуби Дејан Т. (20), додека тешки телесни повреди добил Р.Д. (25), двајцата од Охрид. Поради тешките повреди и сериозната здравствена состојба, Р.Д. е префрлен на хируршкото оделение во Општата болница во Охрид каде е задржан на понатамошно лекување. На истото одделение, но со полесни повреди се наоѓа и Ж.П. (22) од Охрид“, велат од СВР-Охрид.

Сега починатиот, заедно со двете повредени лица, се наоѓал во автомобил „опел корса“ и по регионалниот пат се движел од Рача кон Охрид. Р.Д., кој го управувал автомобилот, изгубил контрола врз возилото, излетал на десната страна надвор од коловозот, удрил во ивичник од патот, а потоа и во електричен столб. Од ударот, возилото се извртело и повторно се вратило на коловозната лента.

На местото на сообраќајната несреќа, извршен е увид во присуство на јавен обвинител и полициски екипи од СВР Охрид и подигнати се траги за вештачење. За време на увидот, сообраќајот беше пренасочен и се одвиваше по една сообраќајна лента.


Голем одрон го затрупа патот кон тетовско Бањиче


Тетово, 28 април, 2017 - 13:26 (META) 

Вчера попладне на патот кој води кон рекреативното место Бањиче во Тетовско, наспроти објектот на хидроцентралата на реката Пена, паднал голем одрон од земја и од камења.

Според Секторот за сообраќај и патишта при Општина Тетово, одронот за неколку часа е отстранет, но оттаму апелираат овој патен правец да не се користи, освен во случај на голема потреба, затоа што сè уште постои ризик да се појават свлечишта.

Екипи постојано го контролираат овој патен правец сè додека состојбата не се стабилизира. Во меѓувреме, надлежните вршат проценки и утврдуваат на кој начин и со какви градежни активности би било најдобро и најбрзо да се сопрат ерозивните процеси на земјата над овој патен правец.

Патниот правец кон рекреативното место Бањиче почна да се реконструира како дел од проектот за реконструцкија на горниот тек на реката Пена.


Привремен сообраќаен режим на дел од улицата Никола Карев


Скопје, 13 април, 2017 - 15:09 (META) 

Градот Скопје ги информира граѓаните дека во деновите од претстојниот викенд (15 и 16 април), на дел од улицата Никола Карев, на крстосницата со булеварот Трета македонска бригада, ќе се изведува прекоп за поставување подземни инсталации.

„Поради тоа, во деновите од викендот, на оваа делница ќе се воведе привремен сообраќаен режим, во времетраење од 8 до 18 часот, а на коловозот ќе се постави соодветна сообраќајна сигнализација“, велат од Град Скопје.

Оттаму апелираат до сите учесници во сообраќајот да ги почитуваат поставените сообраќајни знаци и да ја приспособат брзината на движење на условите на патот.


Во сообраќајна несреќа во Шведска загинаа три деца, а 25 се повредени


Стокхолм, 2 април, 2017 - 16:48 (META) 

Aвтобус кој превезувал деца во Шведска се превртел при што во несреќата загинале најмалку три деца, а 25 се повредени, пренесуваат шведските медиуми. Во автобусот се наоѓале 52 ученици и шестмина возрасни.

Несреќата се случила 430 километри северозападно од Стокхолм, а децата патувале кон скијачки центар.

Причината за несреќата сè уште не е позната, а некои медиуми пренесуваат дека автобусот излетал бидејќи патот бил замрзнат.

„Знаеме само дека излетале од патот, не знаеме ништо повеќе во овој момент“, изјавила портпаролката на полицијата, Мари Андерсон.


Девет деца се повредени во сообраќајна несреќа во Романија


Букурешт, 20 март, 2017 - 11:09 (META) 

Mинибус што превезувал ученици во југозападниот дел на Романија излетал од патот, при што најмалку девет деца се повредени, јавуваат романските медиуми.

Повредените деца биле пренесени во болница и сè уште нема информации за нивната здравствена состојба. Во моментот на несреќата во минибусот се наоѓале 18 деца.

Возачот во полиција изјавил дека поради премореност изгубил контрола над возилото и излетал од патот.


Слаб снег и магла на патниот правец кон Попова Шапка


Скопје, 6 март, 2017 - 10:02 (META) 

Сообраќајот на државните патишта се одвива по претежно влажни коловози, информираат од Автомото-сојузот на Македонија.

На Попова Шапка провејува слаб снег и има намалена видливост од 30 до 40 метри поради појава на магла.

Сообраќајот на патниот правец А3, Прилеп – Битола – Ресен, преку обиколницата кај Битола е во прекин поради свлечиште кое е расчистено, но од превентивни причини се пренасочува преку градот Битола.

АМСМ препорачува внимателно возење, прилагодена брзина на движење и почитување на поставената сообраќајна сигнализација.


Пелагониски земјоделци блокираат патишта поради платформата на Албанците


Битола, 1 март, 2017 - 17:40 (META) 

Пелагониските земјоделци од реонот на Могила бараат партиите на Албанците да се откажат од заедничката платформа како услов за формирање на нова влада.

Четириесетина земјоделци со трактори и со приклучна механизација денеска ја блокираа крстосницата на магистралниот пат Битола – Прилеп, која води кон селата Могила и Црно Буки, за да го искажат својот револт кон заедничката платформа на Албанците.

Според организаторот на протестот, земјоделецот Васко Јосифовски, револтот кај нив бил голем од условите и од барањата кои се вметнати во заедничката платформа на Албанците и затоа сакале јавно да ги повикаат партиите од албанскиот блок да се откажат од неа.

– Платформата задира директно во националните интереси на Македонија и сметаме дека Албанците треба да се откажат од неа, зошто таа не е добра ни за самите нив – вели Јосифовски.

Тој за утре најавува нова блокада, исто така на прометна крстосница на магистралниот пат Битола – Прилеп.

– Ги повикувам сите земјоделци да ни се придружат, следниот протест да биде помасовен, сечија поддршка ни е потребна, па дури и таа од Зоран Заев – вели Јосифовски.


Сообраќајот се одвива по суви коловози освен по осојничавите места


Скопје, 15 февруари, 2017 - 18:42 (META) 

Поради штрајк на грчките земјоделци, граничниот премин Евзони и понатаму е затворен за сообраќај за сите видови на возила, а граничните премини Меџитлија и Дојран се отворени, информираат од Автомото-сојузот на Македонија.

Сообраќајот на државните патишта сe одвива по суви коловози, освен на осојничавите места.

Во клисурите и засеците можна е појава на помали одрони, особено на патните правци: Кочани – Македонска Каменица – Делчево, Виница – Берово, Гостивар – Стража, Маврово – Дебар-Струга, Демир Капија – Удово, Катланово-Велес, Крушево – Демир Хисар и Ресен-Буково.