!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Заев: Не би сакале да се повтори 24 декември, не ги кажуваме тактиките на партијата


Скопје, 26 април, 2017 - 19:06 (META) 

„Постојат многу алтернативи, не ги кажуваме тактиките на партијата бидејќи може да предизвикаат чекори од нашиот опонент, па тоа да доведе до несакани состојби. Но, отворено зборувам дека не би сакале да се повтори 24 декември или нешто што е згрозувачко за македонската јавност. Видовме на што се подготвени ВМРО-ДПМНЕ и нивните коалициски партнери“, изјави лидерот на СДСМ, Зоран Заев, за „24 Вести“ на прашањето за можностите за решавање на политичката криза.

Заев смета дека парламентарното мнозинство има право и обврска да си преземе одговорност за водењето на парламентот преку избор на претседател од своите редови.

Лидерот на СДСМ го повтори партискиот став дека нема амнестија на криминалот, ниту нови парламентарни избори и дека Груевски мора да ја предаде власта.

Тој сакал заменик-помошникот државен секретар за Европа и за Евроазија во Стејт департментот, Хојт Брајан Ји, в понеделник да биде пречекан од нов претседател на Собранието.


Најчевска: Црвенковски ја отвори вратата и за ДПМНЕ и за владеењето на неправото во Македонија


Скопје, 20 април, 2017 - 15:39 (META) 

Професорката Мирјана Најчевска побара „да не се идеализира ниту една политичка партија или политичка гарнитура или поединец“.

Активистката за човекови права и политички аналитичар со остри зборови повика да се престане да се „идеализира“ Бранко Црвенковски:

„Човекот беше и е маалски мангуп (ни помалку ни повеќе), човек кој ја отвори вратата на владеењето на неправото и кој (меѓу другото) ја нанесе најголемата штета на Македонија – ја отвори вратата на дејствувањето на ДПМНЕ“, пишува Најчевска на својот фејсбук-профил.

Најчевска е конзистентна во ставот кон бившиот лидер на СДСМ.

Точно пред една година, на 18 април 2016 година, на истата тема – Црвенковски – напиша:

„За мене тој е мртов политичар. Човек кој направи премногу грешки, кој го отвори патот на денешното урнисување на владеењето на правото и кој од најлични побуди одби да се воспостават контролните механизми и на независното судство. Мислам дека беше преблаго казнет со тргање од политичката сцена“.


ДУИ размислува за повлекување на своите министри од Владата


Тетово, 31 март, 2017 - 16:33 (META) 

На денешниот состанок на централно претседателство на ДУИ, кое веќе е во тек во седиштето на партијата во Мала Речица, ќе се расправа за повлекување на министрите на ДУИ од Владата, велат партиски извори за „Мета“.

Доколку централното претседателство донесе ваква одлука, актуелната Влада ќе остане без една третина од министрите.

Тоа, според нивните пресметки, би значело дека треба да се формира нова влада под итна постапка.

Лидерот на ДУИ, Али Ахмети, денеска свика итен состанок на централното претседателство на кој ќе се бара излез од блокадата во Собранието, но ќе се расправа и за однесувањето на Беса.


Вучиќ: Не сум земал пари од бугарски олигарх


Скопје, 1 март, 2017 - 21:14 (META) 

Српскиот премиер, Александар Вучиќ, негирал дека добивал пари од бугарскиот олигарх Цветан Василев, јавува дописничката на „Мета“ од Софија.

Вучиќ го демантирал тврдењето дека неговата кампања за претходните парламентарни избори била финансирана од Василев.

„Нашата партија не зела ниту еден динар од олигарсите. Јас дури и не знам кој е овој Васил Цветанов“, одговорил Вучиќ на новинарско прашање.

Според Вучиќ, опозицијата добива пари од олигарсите, а неговата политичка партија се финансира само по легален пат.

Вучиќ ќе се кандидира на претседателските избори во Србија, кои ќе се одржат на 2 април годинава.


Тимоние: Партиите што губат, лесно ја наоѓаат вината во невладините организации


Скопје, 26 февруари, 2017 - 11:49 (META) 

„Кога една партија ги губи изборите или не победува како што посакувала, тогаш се обидува да си најде изговор, а медиумите или невладините организации се цел којашто најлесно се наоѓа. Тоа не е европски начин на размислување“, вели францускиот амбасадор, Кристијан Тимоние, во неделното интервју за „Радио Слободна Европа“.

Прашан за процесот на „десоросоизација“, како начин за пресметка со граѓанскиот сектор, Тимоние, меѓу другото, вели дека станува збор за многу лош збор.

– Навистина многу лош збор, дури имавте и тешкотија да го изговорите. Кога една партија ги губи изборите или не победува на нив како што посакувала, тогаш се обидува да си најде одговорен за тоа. И тоа може да му се случи и на некој политичар и од голема земја, кога го критикуваат. И медиумиге или невладините организации се цел којашто најлесно се наоѓа. Тоа не е размислување коешто е европско. Од друга страна, ќе кажам дека невладините организации треба да се однесуваат со доволна неутралност и особено да ги почитуваат законите во земјата – вели тој.

Во интервјуто додава дека не се чувствува засегнат од критиките и од обвинувањата на ВМРО-ДПМНЕ дека меѓународната заедница се меша во внатрешните работи на земјата.

За работата на Специјалното јавно обвинителство, вели дека било основано поради политичка криза.

– Во таа состојба која беше посебна и единствена, беше навистина неопходно да се основа специјална установа. Ќе напоменам дека тоа беше направено со согласност од сите големи политички партии и под своевидна гаранција на повеќе меѓународни фактори. И доколку СЈО е средство за излез од кризата, тогаш и неговиот мандат треба да биде продолжен со сите механизми што постојат во Собранието. За тоа е неопходно политичките партии да покажат одговорност, но и чувство за генералниот интерес – вели Тимоние.


Централниот одбор на СДСМ напладне ќе одржи состанок


Скопје, 25 февруари, 2017 - 10:35 (META) 

Централниот одбор на СДСМ денеска ќе одржи состанок во седиштето на партијата со почеток во 12 часот, информираат оттаму.

На состанокот ќе одлучуваат кој ќе биде мандаторот за составување на новата влада, откако партијата синоќа ги доби потписите од ДУИ.

Синоќа, портпаролот на ДУИ, Бујар Османи, информираше дека ДУИ ќе им ги даде потписите на СДСМ за состав на нова влада, но дека тие потписи не значат дека партијата ќе коалицира со СДСМ.


Османи: ДУИ вечерва нема да донесе одлука дали ќе му ги даде потписите на СДСМ


Тетово, 22 февруари, 2017 - 19:17 (META) 

Оваа дебата што се одвива на централното претседателство ќе биде маратонска, ќе трае доцна во ноќта и нема да се донесе никаква одлука во однос на тоа дали ќе му се дадат потписите на СДСМ за состав на нова влада или не, изјави портпаролот на ДУИ, Бујар Османи, за време на заседанието на централното претседателство на партијата во Мала Речица.

Тој истакна дека работната група ќе му го достави на претседателството материјалот околу договорените предлози со СДСМ, но и ќе ги достави заклучоците и договореното што произлегло од вчерашната средба на лидерите на ДУИ, Али Ахмети, и на СДСМ, Зоран Заев.

– Не се исклучува можноста, во зависност од текот на дебатата што се одвива во централното претседателство, повторно работната група на ДУИ да почне да преговара со работната група на СДСМ во однос на некои прашања за кои не се надминати разликите – додаде Османи и уште еднаш истакна дека вечерва нема да има никаква одлука.

Централното претседателство на ДУИ почна да заседава во 18.30 часот.


Грците песимисти за брзо економско закрепнување


Атина, 14 февруари, 2017 - 11:03 (META) 

Во Грција владее големо незадоволство од двегодишната работа на коалициската влада на СИРИЗА и Независни Грци, покажува новата анкета на јавното мислење на солунскиот универзитет „Македониа“.

Дури 81 отсто од испитаниците се изјасниле дека според нив, владата не работи добро. Незадоволни се и гласачите на СИРИЗА, од кои 62 отсто изразиле незадоволство од тоа како се покажала партијата на власт.

Според анкетата, десничарите Нова демократија и натаму предничат пред владејачката СИРИЗА. Во прогнозата на гласови, Нова демократија се смета дека ако утре има избори би освоила 33 отсто, а СИРИЗА 16,5 отсто од гласовите.

На трето место и натаму е ултрадесничарската Златна Зора со 7,5 отсто, а по неа е Комунистичката партија со 7 отсто, ПАСОК со 6,5 отсто. Анкетата покажува дека во следниот состав на собранието нема да се најдат коалициската Независни Грци, ниту Река кои имаат само 1,5 отсто.

Во државата и натаму преовладува голем песимизам за тоа како ќе се движат работите во иднина. Мнозинството од испитаниците, 87,5 отсто сметаат дека државата оди во погрешна насока, а повеќе од половина коментираат дека владата има погрешна стратегија.

Граѓаните сметаат дека грчката влада ќе се согласи на новите мерки за кои ја притискаат меѓународните кредитори.

Грчката влада периодов е повторно во теснец, бидејќи кредиторите бараат од нејзе да прифати нови мерки за да може да се затвори втората фаза од проценката на сработеното од договорените реформи.


ДС: Логично е мандатот за составување нова влада да го добие СДСМ


Скопје, 30 јануари, 2017 - 12:03 (META) 

По неуспешниот обид ВМРО-ДПМНЕ да обезбеди парламентарно мнозинство за избор на влада, сосема логично и легитимно е мандатот за состав на нова влада да го добие СДСМ, се вели во соопштението на Демократскиот сојуз.

– И покрај укажувањата на експертите и уставните решенија, мандатот да го даде на партијата или партиите што имаат мнозинство во парламентот, Ѓорге Иванов го даде мандатот на ВМРО-ДПМНЕ, со што го прекрши Уставот и овозможи огромна предност на мандатарот Никола Груевски да формира влада, но обидот остана без резултат – се додава во соопштението од Демократскиот сојуз.

Од партијата велат дека во интерес на стабилноста, националните, државните и интересите на граѓаните е да се избере влада што ќе обезбеди стабилност, владеење на правото и ќе спроведе длабоки реформи.

– Проценките се дека има мнозинство и сосема е извесно дека одговорноста за состав на нова влада ќе биде и на СДСМ, но и на другите партии. Затоа од сите партии се очекува разумно и одговорно однесување и водење сметка за државните интереси – велат од партијата.


ВМРО-ДПМНЕ: Нови избори се зрело решение за надминување на кризата


Скопје, 30 јануари, 2017 - 0:22 (META) 

ВМРО-ДПМНЕ заедно со Коалицијата за подобра Македонија, како победник на последните избори, која доби најголема поддршка од граѓаните и освои најголем број гласови и пратеници, смета дека формирањето влада треба да биде во функција на затворање на политичката криза, а не нејзино продлабочување и смета дека одржувањето на нови избори е зрело решение, а во функција на надминување на кризата и на поставување на реформските приоритети во прв план, се вели во соопштението на партијата откако ДУИ вечерва не донесе одлука за коалиција со оваа партија.

Според нив, секое друго решение само ќе доведе до нова конфликтност и проблеми во и онака поделеното општество и нема да биде во функција на одржливост и на остварување на чии било програмски цели.

– Очигледно некој сака да се занемари волјата на мнозинството граѓани и да ја втурне Македонија во некоја нова неизвесна фаза од нејзиниот развој. ВМРО-ДПМНЕ останува на своите принципиелни позиции по однос на стратешките прашања од државен и национален интерес и прогласот усвоен на 17 декември 2016 година – се вели во соопштението на ВМРО-ДПМНЕ.