Грчките партии кажаа „не“, владата нејасно „можеби“ за Илинденска Македонија


Атина, 19 мај, 2018 - 21:54 (META) 

Сите политички лидери кои телефонски ги информирал и ги консултирал грчкиот премиер Алексис Ципрас изразиле несогласување со предлогот Република Илинденска Македонија како можен компромис за деценискиот спор околу името.

За лидерите на Нова демократија, Пасок, Потами и за другите помали партии, предлогот е неприфатлив и поттикнува иредентизам.

Со кусо и воопштено соопштение се огласи грчката влада.

Во него се вели „го поздравуваме тоа што од страна на БЈРМ е прифатено дека решението на проблемот со името не може да има без ерга омнес, односно употреба на новото име насекаде и од сите“.

Грчката влада повика „да се продолжи со соработка во барањето на заедничко прифатливо име со временска или географска одредница“ и потсети дека секое решение подразбира и промена на Уставот.


Во Атина не се сигурни: Μακεδονία του Ίλιντεν или Δημοκρατία της Ίλιντεν Μακεδονίας


Атина, 18 мај, 2018 - 12:36 (META) 

Грчките медиуми ги преземаат информациите од македонските портали околу новиот предлог за името.

Во грчка транскрипција и превод, првичните верзии се „Македониа ту Илинден“ (Μακεδονία του Ίλιντεν – Илинденска Македонија) или „Димократиа тис Илинден Македониас“ (Δημοκρατία της Ίλιντεν Μακεδονίας – Република Илинденска Македонија).

Информациите се главно околу историјатот на терминот и засега нема коментари колку тоа се вклопува во грчките црвени линии или дали е прифатливо за грчката страна.

Извори од владата само повторуваат дека „Ерга омнес и уставни промени се неопходни за да има договор“, како и дека премиерот Алексис Ципрас утре и в недела ќе ги информираа политичките партиии и претседателот на државата за резултатите од средбите во Софија.


Заев: Никој не ја блокира владината реконструкција


Скопје, 1 мај, 2018 - 15:13 (META) 

Ниту една политичка партија не ја блокира реконструкцијата на Владата, вели премиерот Заев, според кого, сите сакаат соработка. Премиерот потврди дека вчера имал средба со двете крила на БЕСА и ДПА предводена од Мендух Тачи.

-Денеска ќе има дополнителна комуникација. Сакам овие денови да привршуваме со оваа тема. Сите се со очекување на предлозите кои произлегуваат од мене, како премиер. Согласно тоа, потоа ќе се изјаснат и политичките партии. Ако успееме да ги номинираме самите предлози за преземање на одговорноста во одредени ресори, јавни институции и слично, на политичките партии ќе им требаат неколку денови да донесат одлуки на свои органи и тела. Се надевам дека ако не со сите партии, со дел од партиите ќе успееме. Немаме опструкции од никој – рече Заев.

Тој вели дека генерално позитивни се ставовите на коалиционите партнери во Владата, а целта е зголемување на парламентарното мнозинство.

Во однос на средбите меѓу Димитров и Коѕијас, премиерот Заев вели дека секоја средба е нова креативност во функција на доближување на разликите кои ги има меѓу Македонија и Грција.

-Некогаш тоа е со големи, некогаш со микро чекори за отстранување на разликите кои постојат. Се надевам дека секогаш со секоја средба, ќе се помогне во тој правец – вели Заев.


Шпанската влада бара судот да го спречи изборот на Пуџдемон за лидер на Каталонија


Мадрид, 26 јануари, 2018 - 18:44 (META) 

Владата на Шпанија побара од Уставниот суд да го блокира изборот на Карлес Пуџдемон за лидер на Каталонија.

„Владата мора да ги употреби сите сили предвидени со закон и Устав, за да се осигура дека бегалец не може да биде избран за претседател на регионалната влада“, велат од таму.

Пуџдемон ја напушти земјата минатата есен и замина во Белгија, откако Каталонија прогласи независност, што според официјален Мадрид е незаконски. Доколку се врати во земјата, тој се соочува со обвиненија за организирање на бунт.

Во меѓувреме, новиот состав на каталонскиот парламент, во кој, мнозинството го имаат сепаратистичките партии, повторно го предложија да го предводи овој регион. Гласањето е закажано за в вторник.

Пуџдемон и одговори на шпанската влада на неговиот твитер-профил дека „се испаничени поради волјата на народот“.


Поднесени 27 жалби до Управниот суд за одбиените приговори од ДИК


Скопје, 22 октомври, 2017 - 10:18 (META) 

Вкупно 27 жалби се поднесени до Управниот суд од партиите ноќеска против решенијата на Државната изборна комисија (ДИК) за приговорите за првиот круг од локалните избори, што се одржа на 15 октомври, соопшти судот.

Инаку, рокот за за поднесување жалби за одбиените приговори од ДИК истекува денеска во 11 часот.

Најмногу тужби поднела ВМРО-ДПМНЕ, вкупно 24, две жалби се од ТМРО и една од Левица.

Управниот суд има рок од 48 часа во кој треба да донесе одлука по жалбите.

По тужбите ќе одлучуваат пет судечки совети, составени од петмина судии од Управниот суд, избрани со жрепка. Тужбите електронски им се распоредуваат на судиите, а одлучувањето ќе биде на јавни седници.

Управниот суд вчера ја отфрлил тужбата од Ѓорѓи Шарковски против „државната администрација во Кривогаштани“ поради оневозможување на собирање потписи за градоначалник и за членови на совет во Општина Кривогаштани.

Во меѓувреме тече кампањата за вториот круг од локалните изборите. Ноќеска на полноќ заврши рокот за поднесување барања за гласање на болни и изнемоштени лица.

Вториот круг од локалните избори ќе се одржи на 29 октомври.


Жестоки расправи и бавен напредок во ДИК, отфрлени четири приговори на ВМРО-ДПМНЕ


Скопје, 19 октомври, 2017 - 19:17 (META) 

Жестоки расправии помеѓу членовите на Државната изборна комисија од ВМРО-ДПМНЕ и од СДСМ ја обележија денешната седница на ДИК, на која од вкупно 43 поднесени приговори досега беа разгледани седум.

Сите седум приговори, кои беа извлечени со жребување, беа од ВМРО-ДПМНЕ. Од нив Комисијата отфрли четири, а другите три приговори се сè уште во постапка. За разгледување остануваат уште 33 приговори од ВМРО-ДПМНЕ и по еден проговор од ТМРО, од Алијанса за Албаците и од Левица.

За седумте приговори за кои се расправаше досега, членовите на ДИК од СДСМ, Виолета Дума и Игор Милев, но и дел од дргите членови, забележаа дека се со многу технички и суштински грешки, односно погрешно се наведени општините за кои се однесуваат или се наведени непостоечки делови од Изборниот законик.

Со тоа се сложија и претставниците на подносителот на приговорите – ВМРО-ДПМНЕ, но бараа и покрај неуредните приговори, Комисијата сепак да расправа по нив по службена должност.

ДИК ги отфрли приговорите на ВМРО-ДПМНЕ за две избирачки места во Прилеп и за уште три избирачки метса, едно во општините Центар, едно во Ѓорче Петров и едно во општина Чаир.

По паузата за вечера, ДИК треба да ги продолжи со разгледувањето и да одлучи поприговорот на ВМРО-ДПМНЕ за едно гласачко место во општина Чаир, за уште едно едно гласачко место во Прилеп и за избирачко место во Центар.

Според приговорот за изборачкото место 1375 во Прилеп, еден гласач не можел да гласа поради тоа што во избирачкиот список некој се потпишал на неговото место. ДИК побара да дојде избирачкиот одбор од Прилеп за да сведочи, а беше побрано од ВМРО-ДПМНЕ да го донесе и гласачот.

За избирачкото место 2870 во општина Центар, каде што, како што заклучија и членовите на ДИК, едни бројки има во оргиналнот записник, а други во копијата и на веб-страницата на ДИК, беше побарано од службите на Комисијата да утврдат каде настанал проблемот пред да се донесе конечен заклучок.

Инаку, сите приговори за неправилности на избирачките места во Скопје, се однесуваа за гласачките ливчиња за градоначалник и за совет на Град Скопје, а не за гласачките ливчиња за градоначалници и за совети во одделни скопски општини.

За време на дискусиите, членовите на ДИК од ВМРО-ДПМНЕ, Силвана Бонева и Сашо Срцев, им приговараа на Виолета Дума и на Игор Милев од СДСМ дека на парламентарните избори минатата година, кога било во интерес на нивната партија, гласале на еден начин, а сега се произнесуваат сосема спротивно.


Жбогар: Политичките лидери и партиите да ги спроведат изборите без заплашувања и насилство


Скопје, 12 октомври, 2017 - 19:01 (META) 

Амбасадорот на Европската Унија во земјава, Самуел Жбогар, денеска преку видео-обраќање по повод локалните избори в недела ги повика граѓаните да го исполнат своето право на глас, а политичките лидери и партиите да ги спроведат изборите без „заплашувања и насилство“.

Жбогар порака ја испрати на македонски јазик.

– Локалните избори на 15 октовмри се можност за вас граѓаните да ги изразите вашите гледишта за правецот по кој вашите општини треба да се движат во иднина. Ги повикуваме политичките лидери и членовите на партиите да ги спроведат изборите без заплашување и насилство. Потсетуваме на важноста да се направи јасна поделба меѓу државните и партиските активности пред, за време и по изборите. Ние сметаме на државните институциите како што е полицијата, независните институциите, како што е Државната изборна комисија, како и граѓанското општество да го исполнат својот дел од одговорноста за одржување на демократски, слободни и фер избори. И, на крајот, секој глас е важен. Ги повикуваме сите граѓани да го исполнат своето демократско право на глас и на тој начин да ја обликуваат иднината на своите општини – рече Жбогар во обраќањето.

Претходно денеска и Амбасадата на Соединетите Американски Држави во Македонија преку соопштение порача дека претстојните локални избори се важни за иднината на Македонија како просперитетна, стабилна демократија, целосно интегрирана во евроатлантските институции и ги повика граѓаните да излезат и да гласаат.


ДИК ги распредели рекламните паноа и билборди на партиите за локалните избори


Скопје, 16 септември, 2017 - 18:47 (META) 

Државната изборна комисија (ДИК) денеска со жрепка ги распредели локациите на паноата и на билбордите за политичко рекламирање понудени од фирмите што стопанисуваат со нив, за потребите на партиите за претстојните локални избори.

Распределбата на локациите на рекламните паноа и на билбордите беше извршена според принципот – 40 отсто за партиите од власта, 40 отсто за партиите во опозиција во Собранието, 10 отсто за парламентарните партии кои немаат пратеничка група и 10 отсто за вонпарламентарните партии.

Независните кандидати за градоначалници ќе можат да се рекламираат на билбордите и на паноата кои бесплатно ги огласуваат општините.

Партијата која нема да го искористи вкупниот добиен процент за реклама е должна во рок од 48 часа да ја извести ДИК за просторот да се понуди на другите партии.

Државната изборна комисија денеска одржа и седница на која донесе одлука за објавување на описите на избирачките места, а го усвои и извештајот за избирачкиот список по завршениот јавен увид.


Саша Богдановиќ е кандидат на СДСМ за градоначалник на општина Центар


Скопје, 13 септември, 2017 - 21:17 (META) 

Саша Богдановиќ, директорот на Јавното претпријатие „Паркинзи – Општина Центар“, ќе биде кандидат на СДСМ за градоначалник на општина Центар, потврди лидерот на партијата и премиер, Зоран Заев, одговарајќи на новинарско прашање по потпишувањето на договорот со лидерите на 21 партија за предизборна коалиција.

Заев ја потврди кандидатурата на Богдановиќ откако актуелниот градоначалник на Центар, Андреј Жерновски, се повлече од трката за втор градоначалнички мандат и, како што се договорил со премиерот и лидер на СДСМ, ќе добие функција во централната власт.

Инаку, Заев и лидерите на 21 партија вечерва потпишаа договор за заеднички настап на локалните избори под мотото „Живот во Македонија за сите“.

– Формиравме предизборна коaлиција предводена од СДСМ за следните локални избори. Настапуваме отворено, го слушнавме гласот на граѓаните кои избраа заедништво, наспроти поделби. Граѓаните од целото општество имаат шанса да учествуваат во промените и тоа го прават. Затоа сум убеден дека оваа коалиција по промената на централно ниво ќе донесе и промени на локално ниво на изборите на 15 октовмри – рече Заев.


Трет ден ќе се расправа за ребалансот на буџетот, седницата закажана во 11 часот


Скопје, 4 август, 2017 - 9:46 (META) 

Денеска пратениците во Собранието трет ден ќе расправаат за ребалансот на буџетот, а пленарната седница ќе почне во 11 часот.

Опозицијата ја обвинува власта дека со ребалансот на буџетот прави најголеми кратења во образованието и во здравството, дека се кратат капитални инвестиции и дека до крајот на годината не е предвидена реализација на ниту еден проект.

Министерот за финансии, Драган Тевдовски, пак, вели дека ребалансот на буџетот е реален бидејќи секој буџет досега бил лажно проектиран за да се „продава приказната дека има развој“.

Пленарната расправа за буџетот треба да трае пет дена. „Мета“ од извори од партиите дознава дека гласањето за ребалансот на буџетот ќе биде в понеделник. Во текот на викендот, само в сабота се очекува да има собраниска расправа.