!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Парламентарни избори во Албанија: За 140 места во парламентот се борат 2.666 кандидати


Тирана, 25 јуни, 2017 - 11:29 (META) 

Граѓаните на Албанија денеска гласаат на парламентарни избори, по договорот на двете најголеми партии да се зајакнат напорите за приклучување на земјата во ЕУ.

Одржувањето слободни и фер избори е клучно за пристапните преговори со ЕУ. Албанија е членка на НАТО од 2009 година.

За 140 пратенички места се борат 18 партии со вкупно 2.666 кандидати, а фаворити се Социјалистичката партија на премиерот Еди Рама, опозициската Демократска партија на Љуљзим Баша и Движењето за социјаистичка интеграција на новиот претседател на Албанија, Илир Мета.

Сите поголеми партии во кампањата ги истакнуваа реформските програми, ветувањата за брз економски пораст, отворање на нови работни места и намалување на невработеноста која во моментов изнесува 14 отсто.

Изборите ги набљудуваат 5.351 набљудувач,од кои 896 се од странски набљудувачки мисии.


Со победата на парламентарните избори во Франција, засилен подемот на Макрон


Париз, 19 јуни, 2017 - 12:17 (META) 

Политичкиот подем на младиот француски претседател Емануел Макрон дополнително се засилува по победата на неговата центристичка коалиција на парламентарните избори во Франција, чиј втор круг се одржа вчера.

Со 350 пратенички места од вкупно 577, коалицијата формирана од партијата на Емануел Макрон, Републиката напред (РЕМ), инаку формирана пред отприлика една година, и Демократското движење (Модем) освоија 60,7 отсто пратеници во парламентот.

Во вчерашниот втор круг, 49,1 отсто од гласовите беа дадени за оваа коалиција, чиј триумф зададе горчлив вкус за Социјалистичката партија, која сега има само 29 пратенички места. На изборите во 2012 г., набргу откако нејзиниот кандидат Франсоа Оланд победи на претседателските избори, Социјалистичката партија освои десетпати повеќе – 280 места. Падот, според аналитичарите, се должи на низата непопуларни мерки на Оланд во текот на мандатот, како и поради некои проблеми што го следеа него како личност.

Националниот фронт на ултранационалистката Марин ле Пен, освои само осум пратеници, од кои една е таа, со што оваа партија е деветтата по големина во Националното собрание на Франција.

Коалицијата на Макрон освои пратеници во речиси сите изборни единици во Франција, но најубедлива е победата во Западна Франција, каде припаѓаат градовите Париз, Нант и Тулуз. Покрај тоа, Макрон добро помина и кај гласачите кои живеат во странство, освојувајќи девет од вкупно 11 пратенички места резервирани за дијаспората.

Со излезност од 42 отсто, вчерашниот втор круг на парламентарните избори во Франција постигна негативен рекорд, што можеби е и одраз на заморот на гласачите по седуммесечната изборна кампања.


Прв круг на парламентарни избори се одржува денеска во Франција


Париз, 11 јуни, 2017 - 14:24 (META) 

Прв круг на парламентарни избори денеска се одржува во Франција, каде што 47 милиони Французи ќе излезат на гласање на 66.546 избирачки места. Аналитичарите предвидуваат дека првпат по 60 години може да бидат поразени и левицата и десницата, кои досега беа традиционални партии во оваа држава.

Според досегашните анкети, центристичката партија на новиот претседател на Франција, Емануел Макрон, може да освои 30 отсто од гласовите, десничарските републиканци 22 отсто, а екстремно десничарскиот Национален фронт околу 18 отсто.

За апсолутно мнозинство во парламентот потребно е да се освојат 289 од 577 места во парламентот. Вториот круг на парламентарните избори е закажан за 18 јуни.


Меј најави ревизија на британската стратегија за борба против тероризмот


Лондон, 4 јуни, 2017 - 13:48 (META) 

Премиерката на Велика Британија, Тереза Меј, осудувајќи го терористичкиот напад во кој загинаа седум лица, а 48 беа повредени, рече дека „е време да се каже доста е“, пренесува „Би-би-си“.

Меј, како што наведува британскиот национален сервис, најавила ревизија на стратегијата на земјата за борба против тероризмот.

Терористичкиот напад се случи синоќа, околу 22 часот, кога бело комби прегази пешаци на Лондонскиот мост, по што тројца напаѓачи излегле надвор и со ножеви изболе неколку луѓе во близина на Бороу маркет.

Тројцата напаѓачи, кои носеле лажни појаси за експлозив, се убиени во интервенцијата на полицијата.

Станува збор за трет терористички напад во Велика Британија за три месеци, кој следи по нападот со автомобил и со нож во Вестминистер во март, во кој загинаа пет лица, и бомбашкиот напад за време на концерт во Манчестер, пред околу две недели, кога загинаа 22 лица.

Синоќешниот напад се случува пет дена пред предвремените парламентарни избори во Велика Британија кои треба да се одржат в четврток.

Најголем дел од политичките партии ги прекинаа своите изборни кампањи, по синоќешниот напад. Сепак, премиерката Меј изјави дека кампањите ќе продолжат утре и дека изборите ќе се одржат в четврток, како што е планирано.

„Не смее да му се дозволи на насилството да го наруши демократскиот процес“, истакнала Меј, пренесува „Би-би-си“.


ВМРО-ДПМНЕ бара локални и парламентарни избори за излез од кризата


Скопје, 28 мај, 2017 - 17:15 (META) 

Помина еден месец од незаконскиот обид пратеникот Талат Џафери да биде избран за Претседател на Собранието на Република Македонија. Помина еден месец од флагрантното кршење на Деловникот, законите и Уставот од страна на СДС и нивните партнери, вели Драган Данев од ВМРО-ДПМНЕ на прес-конференција.

-Дали свесно се одеше на провокација и инциденти, кога целата јавност гледа дека веќе еден месец собраниското мнозинство не покажува никаква намера за Собранието да почне да работи. Поминаа две недели откако партиите се согласија локалните избори да се одржат на 15 октомври. Во сето ова време, ниту се одблокираше Собранието, ниту прават чекори за закажување на локалните избори. За жал целиот овој период парламентарното мнозинство се однесува неодговорно и не покажува никаков интерес за деблокирање на процесите во државата – вели Данев.

Од ВМРО-ДПМНЕ бараат локалните избори да се распишат час поскоро, а заедно со нив бараат да се одржат и нови предвремени парламентарни избори за излез од кризата.


ВМРО-ДПМНЕ: СДС единствено што смисли и најави е блокада на отпочнатите проекти


Скопје, 27 мај, 2017 - 10:21 (META) 

ВМРО-ДПМНЕ во изминатиов период работи на реализација на низа капитални инвестиции и проекти, а СДС единствено што смисли и најави е блокада на отпочнатите проекти, велат од ВМРО-ДПМНЕ во нивното редовно утринско соопштение.

„Владата на ВМРО-ДПМНЕ изгради голем број на нови објекти за потребите на јавните и државните институции и со тоа спречи милионски одливи од државната каса на име закупнина за објекти и деловен простор. Додека ВМРО-ДПМНЕ гради и создава за доброто на сите граѓани на Република Македонија, СДС продолжува со своите интриги и манипулации кон граѓаните. Додека ВМРО-ДПМНЕ работи за подобра иднина на сите, партнерите на Заев се пазарат колкав дел од Тиранската Платформа да се реализира, а колкав да остане во следната фаза“, велат од партијата.

Од ВМРО-ДПМНЕ бараат СДСМ да овозможи редовни локални и предвремени парламентарни избори за да се слушне гласот на граѓаните.


Нишани ги закажа парламентарните избори во Албанија за 25 јуни


Тирана, 21 мај, 2017 - 17:48 (META) 

Албанскиот претседател Бујар Нишани денеска официјално ги закажа парламентарните изборите во Албанија за 25 јуни.

Изборите првично требаше да се одржат на 18 јуни, но се одложија за една недела откако албанскиот премиер и лидер на владејачката Социјалистичка партија, Еди Рама и првиот човек на најголемата опозициска сила во земјата, Демократската партија, Љуљзим Баша постигнаа компромис, со посредништво на на американскиот заменик помошник државен секретар Хојт Брајан Ли, тие беа поместени за една недела.

Опозициските партии во Албанија досега одбиваа да учествуваат на изборите, Тие не поднесоа изборни листи до изборната комисија и инсистираа на премиерот Рама да си поднесе оставка и да се формира техничка влада, која според нив, би спровела „фер и демократски изборен процес“.

Опозицијата, која уште од февруари ја бојкотира работата на Парламнетот, ја обвинуваше Владата на Рама дека подготвува манипулации и измами на изборите.


Шефовите на мисијата на ЕУ на Косово ги повикаа партиите да обезбедат фер и коректни избори


Приштина, 19 мај, 2017 - 19:47 (META) 

Шефовите на мисијата на Европската Унија на Косово ги повикаа сите политички партии и учесници на предвремените парламентарни избори, закажани за 11 јуни, оваа година, да обезбедат фер и демократски избори во склад со меѓународните стандарди.

Од мисијата нагласуваат дека предизборните кампањи треба да и им пружат информации на гласачите во атмосфера на мир, толеранција и почитување, за да може конечниот резултат да биде прифатлив за сите.

„Ги повикуваме сите партии да предложат кандидати кои се соодветни за високите позиции кои ќе ги заземат. Косово заслужува претставници со високи морални норми и со авторитет. Во голем дел од нашите земји, поединци кои се осудени за тешки злосторства по автоматизам се исклучени од изборната трка. Косово заслужува кандидати кои ги исполнуваат највисоките стандарди за јавни службеници“, се вели во заедничката порака на шефовите на мисијата на ЕУ на Косово.


Затуроска: Одложувањето на СДСМ да се соочи со народот го зголемува револтот кај граѓаните


Скопје, 16 мај, 2017 - 16:25 (META) 

ВМРО-ДПМНЕ преку пратеничката Лилјана Затуроска денеска повторно го повика парламентарното мнозинство веднаш да обезбеди услови за продолжувањето на мандатот на локалната власт и да не ги одлагаат локалните избори. Тоа, според Затуроска, е неопходно за да се излезе во пресрет на интересите на граѓаните и потребите на општините, да продолжат нормално да функционираат како сервис на народот, кој може да ги решава секојдневните комунални и инфраструктурни барања.

Таа му порача на СДСМ дека „секое одложување да се соочи со народот само дополнително ја продлабочува политичката криза во државата и го зголемува револтот на граѓаните кон нивните незаконски, неуставни и, пред сè, антидржавни чекори кои ги преземаат во континуитет“ и го повтори повикот на нејзината партија заедно со локалните да се организираат и предвремени парламентарни избори.

– ВМРО-ДПМНЕ останува на ставот дека народот заслужува да биде прашан што мисли за постизборната измама преточена во тиранската платформа. Доколку парламентарното мнозинство се охрабри, во истиот термин со локалните избори би можеле да се одржат и нови парламентарни избори, на кои граѓаните не само што ќе ја изберат својата локална власт, туку ќе имаат можност да го кажат својот став и за последните политички случувања и за постизборните измами што СДС им ги приреди – рече Затуроска.


Груевски апелира на 15 октомври да има и локални и парламентарни избори


Скопје, 16 мај, 2017 - 15:34 (META) 

Лидерот на ВМРО-ДПМНЕ, Никола Груевски, денеска потврди дека политичките партии се договориле локалните избори да се одржат на 15 октомври годинава и уште еднаш апелираше заедно со нив да се одржат и нови предвремени парламентарни избори.

– Верувам дека работите ќе се одвиваат во добар правец, 15 октомври е најблискиот рок што СДСМ можеше да го прифати во тие разговори и се надевам дека ВМРО-ДПМНЕ, како победничка партија на овие парламентарни избори, ќе излезе повторно победничка и на овие локални избори. Уште еднаш апелирам за организирање предвремени парламентарни избори истиот ден, на 15 октомври – рече Груевски, одговарајќи на новинарски прашања, за време на денешната посета на Општина Кисела Вода.

Тој истакна оти се надева дека од СДСМ овојпат нема да променат нешто во датумот и да бараат причини за одложување.

– Јас се надевам дека од СДСМ овојпат нема да променат или да отстапат од нешто, како што знаеја тоа често да го прават во минатото, кога ќе видеа дека губат, па да одложуваат, да бараат причини, алиби. Се надевам дека ќе размислат уште еднаш за предвремени парламентарни избори, што беше и останува наше барање, со што ќе се разјаснат многу работи на македонската политичка сцена, што се случија по изборите и со што ќе се даде можност на граѓаните да го кажат својот став за тоа што го правеа и СДСМ и ВМРО-ДПМНЕ во периодот по изборите – изјави лидерот на ВМРО-ДПМНЕ.