!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Илир Мета избран за претседател на Албанија


Тирана, 29 април, 2017 - 13:46 (META) 

Претседателот на албанскиот парламент, Илир Мета, на вчерашната вонредна седница на парламентот, без присуство на опозицијата е избран за нов претседател на Албанија.

За изборот на Мета гласале 89 пратеници, додека двајца биле против.

Во овој четврти круг на гласање потребна била поддршка од 71 пратеник во собранието. Во претходните три круга на гласање никој не беше избран затоа што немаше номинирани кандидати.

Кандидатурата на Мета ја предложија 23 пратеници.

Претседателски кандидат во Албанија предлагаат група од најмалку 20 пратеници во парламентот, во кој има 140 пратеници, а улогата на претседателот е главно церемонијална.

Мета ќе ја извршува функцијата претседател на Албанија до 2022 година.


Парламентот на Црна Гора едногласно ја донесе одлуката за членство во НАТО


Цетиње, 28 април, 2017 - 18:29 (META) 

Сите 46 присутни пратеници во парламентот на Црна Гора денеска едногласно ја донесоа одлуката за влез на Црна Гора во НАТО. Се гласаше за предлог-законот за потврдување на Северноатлантскиот договор, со кој се обезбедуваат условите за пристапување на Црна Гора во НАТО.

Покрај владејачката коалиција, членството на Црна Гора во Алијансата го поддржаа и пратениците на Социјалдемократската партија, кои единствени од опозициските партии присуствуваа на парламентарната седница што се одржа во Цетиње.

Паралелно со одржување на седницата, Демократскиот фронт организираше протести поради одлуката за членство на Црна Гора во Северноатлантската алијанса. Тие нагласија дека нема да ја признаат одлуката на парламентот. Протестите почнаа пред објектот на Општина Цетиње, во кој се одржуваше седницата. Демонстрантите извикуваа „Убијци“, „Арамии“ и „Предавство“, а запалија и знаме на НАТО.


СДСМ: Ќе има одговорност за насилството поттикнато од Груевски, Иванов и од Вељаноски


Скопје, 27 април, 2017 - 21:53 (META) 

По вечерашните настани во Собранието, во кои има голем број повредени пратеници од СДСМ и од албанските партии, СДСМ во соопштение до медиумите вечерва порача дека ќе сносат одговорност нарачателите на насилствата, односно, според партијата, Никола Груевски, Ѓорге Иванов и Трајко Вељаноски.

„Ќе одговараат за загрозување животи сите што учествуваа во вечерашното насилство во Собранието, како и за сите други злодела нарачани и спроведени од раководството на ВМРО-ДПМНЕ.  Крвавото насилство во Собранието е резултат на насилството на кое изминатиот период повикуваше Никола Груевски, како и провокациите, омразата, поделбите поттикнати од Груевски, Ѓорге Иванов, Трајко Велјаноски, пратеничката група на ВМРО-ДПМНЕ и од нивните соработници и поддржувачи“, се вели во соопштението.

Нагласувајќи дека сериозно се повредени пратеници, претставници на граѓаните, СДСМ вели дека овој факт е „врв на нецивилизираниот однос на овие луѓе, кои се подготвени да жртвуваат сè за да се обидат да избегнат одговорност“.

„На очиглед на целата домашна и меѓународна јавност, паднаа маските и режимот е разобличен до крај“, се вели на крајот на соопштението на СДСМ.


Заев: Не би сакале да се повтори 24 декември, не ги кажуваме тактиките на партијата


Скопје, 26 април, 2017 - 19:06 (META) 

„Постојат многу алтернативи, не ги кажуваме тактиките на партијата бидејќи може да предизвикаат чекори од нашиот опонент, па тоа да доведе до несакани состојби. Но, отворено зборувам дека не би сакале да се повтори 24 декември или нешто што е згрозувачко за македонската јавност. Видовме на што се подготвени ВМРО-ДПМНЕ и нивните коалициски партнери“, изјави лидерот на СДСМ, Зоран Заев, за „24 Вести“ на прашањето за можностите за решавање на политичката криза.

Заев смета дека парламентарното мнозинство има право и обврска да си преземе одговорност за водењето на парламентот преку избор на претседател од своите редови.

Лидерот на СДСМ го повтори партискиот став дека нема амнестија на криминалот, ниту нови парламентарни избори и дека Груевски мора да ја предаде власта.

Тој сакал заменик-помошникот државен секретар за Европа и за Евроазија во Стејт департментот, Хојт Брајан Ји, в понеделник да биде пречекан од нов претседател на Собранието.


Бушати се сретна со Габриел и со Кундерс во Тирана


Тирана, 17 април, 2017 - 16:09 (META) 

Министерот за надворешни работи на Албанија, Дитмир Бушати, денеска се сретнал со министерот за надворешни работи на Германија, Зигмар Габриел, како и со министерот за надворешни работи на Холандија, Берт Кундерс, јавува дописничката на „Мета“ од Тирана.

На заедничка прес-конференција Кундерс ја истакнал важноста од спроведување на реформи во судството.

„Сметам дека е важно да се има дијалог, слобода, слободни и фер избори, како и реформи во правосудството“, истакнал Кундерс.

Германскиот министер за надворешни работи, Габриел, пак, бил подиректен во својата порака кон Тирана. Тој посочил дека судските реформи биле блокирани, а Германија не можела да го разбере бојкотот на опозицијата.

Бушати, пак, истакнал дека „тие што го бојкотираат парламентот, ги попречуваат реформите во државата“ и ја повикал опозицијата да го прекине бојкотот.


РТШ снимаше репортажа за Македонците во Мала Преспа


Охрид, 17 април, 2017 - 15:07 (META) 

Националната телевизија на Албанија (РТШ) снимила репортажа во Мала Преспа, за тоа како Македонците во овој дел од Албанија го прославуват големиот христијански празник Велигден.

– Го снимија финалето во фудбал, кое традиционално секоја година се игра пред Велигден. Потоа бевме на Малиот Остров во Преспанско Езеро во делот на Албанија, каде е црквата „Св.Богородица“, која датира уште од 14 век. Снимаа и во Националниот парк Преспа. Екипата направи неколку интервјуа со жителите на Пустец и на други села – изјави за „Мета“ Нико Китани, претставник на македонското малцинство во државниот Комитет на малцинства на Албанија.

Владата на Албанија на 12 април го усвои предлог-законот за малцинства и го испрати во парламентот.

Со него, како национални малцинства во Албанија се прогласуваат Македонците, Грците, Власите, Ромите, Египќаните, Црногорците, Бошњаците и Србите.


Албанската опозиција реши да ги бојкотира парламентарните избори во јуни


Тирана, 11 април, 2017 - 9:32 (META) 

Демократската партија на Албанија, предводено од Љуљзим Баша, заедно со претставници на другите опозициски партии, донесоа конечна одлука опозицијата да не учествува на парламентарните избори закажани за 18 јуни.

„На овој начин потврдуваме дека нема да учествуваме на изборите без реализирање на нашите барања за техничка влада, која ќе спроведе слободни и фер избори“, стои во соопштението од средбата, пренесено од весникот на македонски јазик „Илинден“.

Во соопштението, исто така, се наведува дека шаторите што се поставени пред владата во Тирана по протестниот митинг на 18 февруари и каде секојдневно има по најмалку 1.000 демонстранти, ќе останат таму и понатаму.

На состанокот е решено и опозицијата да организира „масовен сенационален протест“ во Каваја, за да се блокираат делумните локални избори во овој град, кои опозицијата ги бојкотира.

Протестот ќе биде одржан на 7 мај, кога во овој град се одржуваат делумни локални избори, откако градоначалникот на Каваја беше обвинет за криминал.

По протестот во Тирана од 18 февруари, опозицијата најавува дека тој во Каваја ќе биде уште помасовен.

Опозицијата ја бојкотира и работата на парламентот, со што е блокирано донесувањето на важните закони од сферата на правосудството, чие усвојување е услов за почнување на преговорите за членство во ЕУ.


Кукан: Бојкотот на парламентот стана омилен спорт на Балканот


Брисел, 29 март, 2017 - 10:18 (META) 

Бојкотот на парламентот се претвори во спорт во Балканскиот регион, но политичката дебата во земјите треба да се води во парламентот, изјави европратеникот Едвард Кукан, за време на вчерашната дебата во Европскиот парламент, насловена „Криза на демократијата на Западен Балкан“.

Кукан, говорејќи за политичката ситуација во Македонија, Албанија, Црна Гора и во Косово, рече дека никој во ЕУ не го сака бојкотот. Тој го осуди порастот на национализмот во регионот, кој, како што рече, политичарите го користат за привлекување гласачи.

– Сенките од минатото не помагаат, а процесот на проширување со текот на годините ќе стане потежок – додаде Кукан.

Еден од дискутантите беше и специјалниот известувач на Европскиот парламент за Албанија, Кнут Флекенштајн, кој истакна дека демократијата во земјите во Балканот е нарушена, а тоа им овозможува на владите да се однесуваат автократски.


ИД ја презеде одговорноста за нападот во Лондон


Лондон, 23 март, 2017 - 14:32 (META) 

Исламска држава денеска ја презеде одговорноста за вчерашниот напад во Лондон, пренесуваат светските агенции, наведувајќи дека ИД тврди дека напаѓачот бил еден од нејзините „војници“.

Новинската агенција „Амак“, која се смета за блиска до ИД, јави дека нападот е извршен како одговор на повиците на ИД да се удри по државите што учествуваат во борбата против нив.

Коалицијата предводена од САД врши напади врз позициите на ИД во Сирија и во Ирак.

Во меѓувреме, британската премиерка Тереза Меј соопшти дека идентитетот на напаѓачот ѝ е познат на полицијата и дека станува збор за лице кое е родено во Велика Британија.

– Тој работел сам и нема причина да веруваме дека биле планирани и други напади – нагласи Меј во специјална изјава за пратениците во Долниот дом на Парламентот.

Таа истакна дека тој бил „периферна личност“ за која се знае дека еднаш бил испрашуван од оперативците на МИ5 околу насилниот екстремизам.

– Неговиот случај е минато затоа што тој не бил дел од ниту една од актуелните операции на безбедносните служби ниту, пак, има разузнавачки сознанија дека планирал или правел заговор – рече Меј.


Пукање пред британскиот парламент – има и жртви


Лондон, 22 март, 2017 - 16:08 (META) 

Истрели од огнено оружје се слушнати пред британскиот парламент во Вестминстер, Лондон, јавуваат светските медиуми.

Како што јавува британскиот весник „Телеграф“, застрелан маж лежи пред зградата на Парламентот, додека двајца други се повредени.

Според очевидци, автомобил прегазил пет пешаци, пред да се удри во орградата на парламентот. Исто така, одредени медиуми, повикувајќи се на неофицијални извори јавуваат дека маж со нож се шетал на плоштадот пред парламентот.

Поради инцидентот Парламентот е затворен.

Се очекува полицијата да излезе со повеќе детали.

v