!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Охрид денеска како во екот на туристичката сезона 


Охрид, 1 јануари, 2017 - 17:24 (META) 

Невообичаено топлото време за овој период од годината, ги наполни шеталиштето, парковите и кафулињата во Охрид.

Овој продолжен празничен викенд во Охрид донесе голем број гости. Тоа можеше да се забележи по улиците и на паркиралиштата, кои изгледаа како среде туристичка сезона.

Заживеа и бродскиот туризам, така што кајчињата и бродовите ги превозуваа туртистите до Канео, Горица, Св.Стефан и до другите места.

Традиционално, покрај од земјата, најголемиот број од туристите во Охрид и во Струга се од соседните земји, пред сè, Бугарија, Србија, Албанија и во помал број од Грција.

Гости има и од Црна Гора и од Хрватска, а со индивидуални аранжмани, присутни се и одреден број новогодишни славеници и од Велика Британија, Полска и од Израел.

Покрај хотелиерите, задоволни се и приватните станоиздавачи, кои среде зима исполнија добар дел од своите капацитети.


„Рајската градина“, иако недовршена, дење е рај за прошетки, ноќе место за пеколни забави


Скопје, 1 ноември, 2016 - 9:50 (META) 

Недовршената рајска градина во општината Аеродром преку ден е рај за прошетки на родители и на деца, а навечер е место за пеколни забави на младите.

Тендерот за проектот за паркот неодамна беше поништен, а градежните активности се прекинати. Тоа што може да се забележи на локацијата се големи тревници, неколку летниковци, непоплочени патеки, клупи за седење, канти за отпадоци и поставени бандери за улично осветлување без светилки. Преку ден граѓаните честопати го користат недовршениот парк за прошетка, а поради широкото зелено пространство, има и летачи на дронови.

„Она што загрижува е тоа што се случува во паркот навечер. Се собираат млади луѓе, ги користат летниковците како место за дружење и притоа не внимаваат на хигиената. Понекогаш дури и ги паркираат автомобилите во паркот за да слушаат музика. Изгледа тоа е ноќната шема на младите овде“, вели жител на Лисиче, кој живее во непосредна близина на недовршениот парк.

Урбаната опрема во паркот не е оштетена. Клупите и летниковците се во добра состојба, а тревниците се гледа дека се редовно одржувани. Но, она што паѓа в очи се многубројните отпадоци, меѓу кои и празни шишиња од алкохолни пијалоци.

Од Општина Аеродром велат дека сè уште нема информации за конкретни планови за иднината на тој парк.


Авантуристички парк кај Плаошник, нова авантура на локалната власт


Охрид, 31 октомври, 2016 - 10:54 (META) 

Во боровата шума кај Плаошник, над плажата Лабино во заштитеното градско јадро, на површина од околу 500 квадратни метри, Oпштина Охрид сака да гради авантуристички парк со реквизити за забава и за рекреација, пишува порталот „Охрид њуз“.

Надлежните уверуваат дека авантуристичкиот парк нема да го наруши амбиентот бидејќи сите реквизити ќе бидат од природни материјали, за што билe информирани и позитивно мислење дале од  Заводот и музеј во Охрид.

– Сето ова е во соработка со Завод и музеј како надлежна институција и изработени се сите параметри за заштита и на животната средина и на самиот изглед на градското јадро. Одговорно тврдам дека нема да има никакви интервенции врз растителниот свет, односно врз дрвјата, ниту ќе има некоја цврста градба – вели во изјава за порталот Ѓоко Апостолов, раководител на секторот за туризам и за локален економски развој при Општина Охрид.

Вредноста на проектот кој предвидува изградба на авантуристички парк на охридското Кале изнесува 160.000 евра. Средствата планирано е да бидат обезбедени од ИПА-фондововите преку проектот „Вотер eнерџи“ што заеднички го реализираат Македонија и Грција.


Жителите на Тафталиџе со референдум ќе го бранат паркот


Скопје, 21 август, 2016 - 18:05 (META) 

Жителите на Тафталиџе ќе побараат од Советот на општина Карпош одржување на референдум во месна заедница Тафталиџе 1, за да се докаже дека граѓаните не сакаат зграда на местото на паркот.

– Граѓаните мора да се послушаат за нивното уставно право за здрава животна средина. Планираме утре да упатиме повик до Советот на општината, да се направи референдум за месна заедница Тафталиџе 1, па конечно и тие да покажат волја дека може нешто да се реши со луѓето кои треба да одлучуваат за својата иднина – изјави Иван Менкиноски од иницијативата „Зелено Тафталиџе“ за novatv.mk

Жителите на улица Букурешка, во скопската населба Тафталиџе денеска се собраа на целодневно дружење, со цел да му се даде до знаење на, како што велат, узурпаторот на овој простор, дека, како што велат, „паркот нема да падне“.


„Паркот нема да падне“ порачуваат жителите на Тафталиџе кои цел ден ќе се дружат за таа цел


Скопје, 21 август, 2016 - 11:32 (META) 

Жителите на улица Букурешка, во скопската населба Тафталиџе денеска во 12 часот ќе се соберат на целодневно дружење.

Во нивниот повик на социјалните мрежи се вели дека, „дружењето со граѓаните е со цел да му се даде до знаење на узурпаторот на овој простор, дека „Паркот нема да падне“.“

– Зачестеното присуство на багерите и градежните работници се јасен индикатор за намерата која ја имаат за овој простор, затоа наша должност е да ја сочуваме оваа прекрасна зелена површина. Дружбата ќе вклучува дискусија околу константното бетонирање на зелените површини, правење на скара и освежување со некој ладен пијалак – се вели во повикот.

 


В недела целодневна забава за зачувување на паркот во Тафталиџе


Скопје, 18 август, 2016 - 18:16 (META) 

По успешната одбрана на паркот во Тафталиџе ова утро, неколку жители решија да продолжат со дружењата на единствената зелена површина во населбата, пренесе Радио МОФ.

Тие за оваа недела најавија целодневен настан во паркот на улицата „Букурешка“, со почеток во 12 часот. На неа се повикани сите граѓани кои сакаат да помогнат во зачувувањето на паркот.

„Организираме целодневно дружење на граѓаните со цел да му се даде до знаење на узурпаторот на овој простор, дека паркот нема да падне“, велат од иницијативата „Зелено Тефтелиџе“.

Оттаму посочуваат дека зачестеното присуство на багерите и градежните работници се јасен индикатор за намерата која ја имаат за овој простор, затоа како што велат, нивна должност е да ја сочуваат зелената површина.

Дружбата, како што соопштуваат од иницијативата, ќе вклучува дискусија за бетонирањето на зелените површини, правење на скара и освежување со некој ладен пијалак.

„Не дозволувај да фрлат бетон врз твојата иднина. Да се користи паркот како што навистина треба“, порачуваат тие.

Денеска по четврти пат граѓаните ги спречија багерите да го рушат паркот. Последниот обид беше пред една недела, кога градежните активности беа откажани по реакциите на жителите.


Жителите на Тафталиџе спречија парк да се претвори во градилиште


Скопје, 11 август, 2016 - 12:46 (META) 

Граѓани од Тафталиџе повторно спречија обид паркот во нивната населба да се претвори во градилиште, пренесе радио МОФ.

Утрово околу 10 часот жителите на оваа населба алармираа на социјалните мрежи дека градежна механизација и работници повторно се појавиле во паркот. Вознемирени, тие велат дека се користи моментот на национална трагедија да се раскопа паркот и да почне со изградба на зграда.

– Го користат моментот кога младите се на одмор и кога се случува ваква трагедија по поплавите. Наместо таму да одат машините и таму да се помогне, тие го користат тој момент на жалост на Македонија и доаѓаат да прават зграда, да ни го копаат паркот. Ова е навистина нечуено. Сите сме вознемирени, излеговме постарите, бидејќи нашите се млади и се на одмор. И тие тоа го искористуваат – вели Душка Лазовска.

Жителите велат дека по нивната реакција, работниците и механизацијата по кратко време се откажале и заминале од паркот на улицата „Букурешка“.


Во Штип протести за спас на парк


Штип, 1 август, 2016 - 18:37 (META) 

Протести во Штип, што ќе се одржуваат секој среда, во 20 часот, најавува граѓанската иницијатива „За спас на паркот 8 Ноември“.

Преку протестот оваа иницијатива ќе се обиде да ја спречи урбанизацијата на градскиот парк.

Инвеститорот на објектот, кој купи дел од најголемиот рамен парк во Штип, веќе почна да ги копа темелите на деловниот центар, додека граѓанската иницијатива ја спори продажбата.

Иницијативата веќе поднесе две кривични пријави против Oпштината, која го продаде земјишетото, додека на нивното барање привремено да ја сопре урбанизацијата, Управниот суд се прогласи за ненадлежен.

Оттаму велат дека Основното јавно обвинителство и по осум месеци се нема изјаснето по кривичните пријави, а нема одговор ниту од Министерството за транспорт и врски.

Очекуваат и Советот на Општината да закаже расправа по граѓанската иницијатива.

Општината Штип смета дека нема ништо спорно во продажбата и дека активностите на оваа група граѓани се политички инструирани.


Велосипедски полигон за деца во паркот Македонија


Скопје, 8 јуни, 2016 - 14:29 (META) 

Велосипедски полигон за деца беше пуштен во употреба денеска во парк Македонија. Овој полигон е од едукативен карактер и има цел децата во него да ги научат сообраќајните знаци и сообраќајните правила.

– Велосипедскиот полигон за деца е со површина од 660 кавадратни метри, со должина на патека од 270 метри и урбана опрема: рампа, паркиралиште за велосипеди, нишалки, лизгалки, дрвена куќарка, површини исополнети со песок, клупи за седење, пикник-маси и корпи за отпадоци – изјави градоначалникот на Скопје, Коце Трајановски.

Во изградбата на овој едукативен полигон биле користени еколошки материјали, а неговата вредноста изнесува 1.234.000 денари.

Велосипедскиот полигон за деца во паркот Македонија е донација од Стопанска банка.

 


Штипјани со иницијатива за спас на најголемиот парк во градот


Штип, 27 декември, 2015 - 13:26 (META) 

Со јавна трибина, на отворено, во најголемиот рамен парк во Штип, во населбата 8 Ноември, граѓанската иницијатива за спас на паркот ги потсети институциите дека се должни да им одговорат на граѓаните. Пред повеќе од два месеца поднесена е петиција со потписи од десет отсто од жителите на населбата до Општината, со која се бара поништување на продажбата на две парцели, кои, според граѓаните, зафаќаат половина парк.

Досега нема одговор, ниту е закажана седница на Советот на Општината, на која би се разгледала петицијата.

Горан Трајков, кој е еден од иницијатрите, вели дека се обратиле и до Уставниот суд, Инспекторатот за локална самоуправа, а поднеле претставка и до Министерството за транспорт и врски.

– Нема реакција од ниту една од овие институции. Не се откажуваме, бидејќи апсурдно е да се уништува единственото место каде се собираат луѓе од повеќе населби – вели Трајков.

Тој има неофицијални информации дека двете парцели се продадени на двајца локални бизнисмени за вкупно 100.000 евра, што е, според него, смешна цена.

– Ако просечната цена за квадратен метар за парцели надвор од градот е 100 евра, овие две локации во првата градска зона се продадени за 50 евра за еден квадратен метар – вели Трајков.

Неодамнешната реакција на Општина Штип беше дека со продажбата на парцелите не е прекршен законот, а иницијативата ја оценија како партиска.