!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Исламист со нож нападна војник во Париз


Париз, 15 септември, 2017 - 10:51 (META) 

Маж вооружен со нож, извикувајќи „Господ е голем“ (Алаху акбар), утринава околу 6.30 часот нападна француски војник кој патролирал пред метро-станицата Шателет во Париз, соопшти француското Министерство за одбрана.

Како што јавуваат француските медиуми, напаѓачот му дошол од зад грб на војникот и го нападнал извикувајќи „Господ е голем“. Војникот некако успеал да го совлада напаѓачот и почекал да дојде полицијата, која го привела.

Ова е последен од серијата напади на безбедносните трупи на Франција кои патролираат на места кои се мета на терористички напади. Досега во неколкуте напади на исламистичките терористи во Франција загинаа повеќе од 230 лица.


Мини самит во Париз за мигрантската криза


Париз, 28 август, 2017 - 13:27 (META) 

Лидерите на седум африкански и европски земји се состануваат денеска во Париз на мини самит за да разговараат за предизвиците кои ги носи мигрантската криза во Европската Унија.

Францускиот претседател Емануел Макрон ги повика колегите од Нигер и Чад како и премиерот на либиската влада, односно лидерите на државите кои се на главната транзитна рута за мигранти кои идат кон Европа.

Германската канцеларка Ангела Меркел, шпанскиот и италијанскиот премиер Маријано Рахој и Пауло Џентилони и високата претставничка на ЕУ за надворешна политика и безбедност Федерика Могерини ќе се придружат на денешните преговори.

Европските земји сакаат да понудат развојна помош и финансиски средства на африканските партнери во замена за помош во ограничување на приливот на економски мигранти и баратели на азил.

Според податоците на Обединетите нации, вкупно 125.000 мигранти оваа година го поминале Средоземното море по морски пат, од кои најголем број најпрво пристигнале во Италија по што заминале во други членки на ЕУ.

Се проценува дека 2.400 мигранти го загубиле својот живот на таа рута.


Третото ракување на Трамп и на Макрон – „најчеличното“ досега


Париз, 15 јули, 2017 - 18:05 (META) 

На нивната прва средба, на 25 мај годинава на самитот на НАТО во Брисел, претседателите на САД и на Франција, Доналд Трамп и Емануел Макрон, имаа „двобој“ со две невообичаено долги ракувања.

Во првото, Трамп грубо ја повлече раката на Макрон кон него. Второто, пак, беше цврст стисок од кој побелуваат зглобовите. Ни едниот ни другиот не сакаа да ја отпуштат раката прв.

Но кулминацијата се случи во Париз вчера, кога нивното ракување при заминувањето на Трамп од прославата на Националниот ден на Франција потраја речиси половина минута. Двајцата претседатели ги мафтаа рацете, ги вртеа, цело време држејќи ја дланката на другиот.

И откако Макрон првично „победи“ со тоа што ја постави својата дланка горе, Трамп возврати со познатото „влечење“, кога на кратко го исфрли од рамнотежа својот француски колега. Веднаш потоа, не пуштајќи ја неговата рака, ги изненади сите кога ја гушна и ја бакна првата дама на Франција.


Напаѓачот во Париз извикал: „Ова е за Сирија“


Париз, 6 јуни, 2017 - 20:15 (META) 

Министерот за внатрешни работи на Франција, Жерар Коломб, изјави дека напаѓачот на полицаецот пред катедралата Норт Дам пред нападот извикал „Ова е за Сирија“.

Коломб истакна дека во лични документи на напаѓачот стои дека е студент од Алжир.

Инцидентот се случил пред познатата катедрала кога непознат маж со чекан тргнал да нападне полицаец. Откако не застанал по предупредувањето, другите полицајци отвориле оган и го раниле во пределот на градите.

Во околината на инцидентот веднаш се распоредени безбедносни сили, а полицијата апелира до граѓаните да го избегнуваат овој дел од градот.

„Ситуацијата е под контрола, еден полицаец е полесно повреден, напаѓачот е неутрализиран и е префрлен во болница“, објави полицијата на „Твитер“.


Маж со чекан нападнал полицаец во Париз


Париз, 6 јуни, 2017 - 18:53 (META) 

Засега неидентификувано лице попладнево се обиде со чекан да нападне полицаец на плоштадот пред париската црква Нотр Дам, при што веднаш бил застрелан од друг полицаец.

Француските медиуми јавуваат дека напаѓачот е ранет во пределот на градите, но нема подетални информации за неговата здравствена состојба.

Париските власти ги повикаа жителите и туристите да го избегнуваат овој дел од град.

Одделот за борба против тероризмот при париското јавното обвинитество почна истрага за мотивите за денешниот инцидент во Париз.


Бомбата од Манчестер иста како оние од Париз и Брисел


Вашингтон, 25 мај, 2017 - 10:04 (META) 

Висок претставник на САД изјави дека експлозивот кој е искористен во Манчестер арената е ист со оној кој бил користен за време на нападите во Париз и Брисел, пишува „Гардијан“.

Републиканецот Мајк Мекол кој претседава со Комитетот за национална безбедност на Конгресот изјави дека во сите три напади е користен експлозивот ТАТП.

Тој вели дека бомбата од Манчестер е „класична експлозивна направа која терористите ја користат“, истакнувајќи дека според „нивото на софистицираност“, може да значи дека тој која ја изработил бомбата имал странска обука.

Исто така, тој навел дека доказите кои досега се собрани укажуваат дека Манчестер не е случај на „вол самотник“.

За време на нападот, кој се случи после концертот на Аријана Гранде во Манчестер, загинаа 22 лица, а повредени се 119 лица.


Емануел Макрон застана на чело на Франција


Париз, 14 мај, 2017 - 18:18 (META) 

Новиот француски претседател, Емануел Макрон, со емотивен говор по преземањето на претседателската должност во Елисејската палата вети дека на „Французите ќе им ја врати верата во животот, бидејќи Франција долго беше ослабена“, и оти сака да ја ревитализира Европската Унија.

– Франција ги избра надежите и духот на победата, а јас нема да потклекнам ниту пред едно политичко ветување. Европа, каква што ни е потребна, ќе биде обновена на нови вредности и ревитализирана, бидејќи ни дава заштита. Французинките и Французите кои се чувствуваат заборавени во овој глобализиран свет ќе бидат подобро заштитени. Сакам да работам на помирувањето и на обединувањето – изјави центристот Емануел Макрон, кој е на 39-годишна возраст и најмладиот претседател на Франција досега.

Макрон и неговиот претходник, Франсоа Оланд, се ракуваа на црвениот тепих во претседателската резиденција пред неколку стотини гости и многубројни фотографи и новинари од светските медиуми, како и телевизиски екипи кои присуствуваа на примопредавањето на претседателската должност.

Првата активност на Макрон ќе биде неговата посета на Германија утре, што е уште една потврда за неговата намера да ја обнови француско-германската оска.


Куршумите на терористот не можат да ја убијат предноста на соперникот на Ле Пен


Париз, 21 април, 2017 - 15:25 (META) 

По синоќешниот напад на булеварот Шанзелизе, срцето на Париз, кој, веројатно е терористички напад, куршумите на терористот освен што убија еден полицаец и ранија двајца, можеби и ќе „ја убијат“ предноста на поранешниот министер за економија, Емануел Макрон, кој е на првата позиција на ранг-листите пред десничарката Марин ле Пен, која е втора, шпекулираат некои од светските медиуми.

Нападот во кој „неутрализираниот“, односно убиениот терорист не нападна граѓани, туку пукаше во полицајци, некаде на половина пат помеѓу Триумфалната капија и плоштадот Конкорд, се случи во време кога течеше ТВ-дебата на сите 11 кандидати за функцијата претседател.

Изборите се в недела, а не случајно е избран ваков момент за нападот, оти екстремистите сакале да повлијаат на тонот на дебатата, анализира британскиот весник „Дејли телеграф“.

Доколку тоа било целта, забележан е успех, оти лидерката на крајно десната партија Национален фронт, Марин ле Пен, и конзервативецот Франсоа Фијон ги откажаа своите средби со избирачи на ден пред изборнот молк. Кога веста ги затекна сред дебатата, сите кандидати си ги сменија завршните зборови. „Доволно со лабавоста, доволно со наивноста“, рече Ле Пен.

Нејзиниот соперник Франсоа Фијон, пак, порача дека борбата против тероризмот мора да биде апсолутен приоритет на следниот претседател.

Но, иако најновите анкети сè уште ја позиционираат ултадесничкарката на втората позиција, изгледа дека предноста на Ле Пен полека се топи. Според денеска објавената анкета на „Елаб“, Макрон останува цврсто на 24 отсто, додека Ле Пен има 21,5 отсто поддршка, односно 0,5 проценти помалку отколку пред три дена.

Така, иако денеска некои политички аналитичари велат дека е можно нејзиниот рејтинг да се зголеми, други предупредуваат дека и досегашните терористички напади не создале посериозен напредок на рејтингот на крајната десница.


Вториот напаѓач од Париз ѝ се предал на белгиската полиција


Париз, 21 април, 2017 - 11:06 (META) 

Осомничен за кој трагале француските власти по пукањето во Париз, ѝ се предал на белгиската полиција, соопшти портпаролот на француското Министерство за внатрешни работи. Француските власти приведоа три члена од семејството на напаѓачот, кого синоќа го уби полицијата.

– Мажот за кој белгиските власти распишаа потерница се предал во полициска станица во Антверп – изјави портпаролот на француското МВР, Пјер Анри Бранде.

Претходно Бранде потврди дека белгиските власти го идентификувале вториот напаѓач, за што ги информирале француските власти.

Тој истакна дека двајцата полицајци кои се повредени во нападот се надвор од животна опасност.

Во меѓувреме, на социјалните мрежи се појави снимка од нападот, која трае девет секунди. Снимката е направена во моментот на пресметката на полицијата и на напаѓачите.

На снимката се гледа напаѓач, вооружен со „калашников“, како отвора оган кон полицијата.


Неформален состанок на Оланд, Меркел, Рахој и на Џетилони во Версај


Париз, 6 март, 2017 - 10:50 (META) 

Франција и Германија, со поддршка од Италија и од Шпанија, денеска во Версај кај Париз ќе одржат неформален самит на кој, како што е најавено, ќе се разгледа иднината на Европската Унија, која е разнишана од одлуката на Велика Британија за излегување од неа, како и поради порастот на популизмот.

Самитот го организира францускиот претседател Франсоа Оланд, а на него ќе присуствуваат германската канцеларка Ангела Меркел и премиерите на Шпанија и на Италија, Маријано Рахој и Паоло Џентилони.

Француски дипломатски извори наведуваат дека состанокот се одржува како „политички поттик на четири земји на ЕУ“ во пресрет на самитот во Рим, закажан за 25 март, на кој ќе се обележи 60-годишнината од Римскиот договор, потпишан во 1957 година, со кој е основата Европската економска заедница (ЕЕЗ) и Европската заедница за атомска енергија (Еуратом).