!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Трамп најави можност „нешто да се постигне“ околу Парискиот договор


Париз, 13 јули, 2017 - 21:39 (META) 

Американскиот претседател, Доналд Трамп, кој е во посета на Франција, на денешната заедничка прес-конференција со својот домаќин, францускиот претседател Емануел Макрон, најави дека „нешто може да се постигне“ во врска со Парискиот договор за климата, но не прецизираше што.

„Нешто може да се случи во врска со Парискиот договор, но ајде да видиме што ќе биде тоа. За тоа ќе разговараме во престојниот период и ако се случи тоа, ќе биде одлично. Ако не се случи, и тоа ќе биде во ред исто така“, рече Трамп.

Американскиот претседател на почетокот на минатиот месец соопшти дека САД се повлекуваат од Парискиот договор за климатските промени од 2015 година бидејќи, како што рече, договорот е штетен за американската економија и побара нов договор.

Францускиот претседател, Емануел Макрон, на прес-конференцијата изјави дека со Трамп разговарал за ситуацијата во Сирија и во Ирак. Тој наведе дека неговата земја и САД бараат од дипломатите во следните недели да договорат конкретна иницијатива за ставање крај на насилствата во Сирија и за иднината на оваа земја.

Пред состанокот со Трамп, францускиот претседател имаше средба со германската канцеларка Ангела Меркел, на која двајцата констатирале дека е „важно да се одржуваат здрави врски со Трамп“.

Меркел повтори дека Европа мора да ја преземе судбината во свои раце по безбедносните и одбранбените прашања, но во исто време наведе и дека е потребна блиска соработка со САД и покрај сите разлики во ставовите.


ЕУ и Кина ќе го бранат Парискиот договор за климата


Брисел, 1 јуни, 2017 - 12:16 (META) 

ЕУ и Кина се подготвени на дводневниот самит во Брисел, кој почнува денеска, да го бранат Парискиот светски договор за климата и целосно да го поддржат и покрај најавената одлука на американскиот претседател, Доналд Трамп, да се откаже од спогодбата.

За време на поранешниот претседател на САД, Барак Обама, Вашингтон и Пекинг имаа исти ставови и беа главни столбови на договорот, кој беше постигнат во декември 2015 година. Со договорот, 196 земји, под покровителство на Обединетите нации, се обврзаа да го ограничат загадувањето на воздухот за да се намали климатското затоплување.

Трамп најави дека денеска, во 21 часот по централноевропско време, ќе ја објави одлуката за спогодбата. Американските медиуми јавуваат дека Трамп, најверојатно, ќе соопшти дека САД се повлекуваат од Парискиот договор. Кина и ЕУ утре, по самитот во Брисел, ќе објават заедничка декларација во која ќе ги „потврдат своите обврски преземени со историскиот договор од Париз и ќе ја забрзаат соработката со што ќе се подобри неговото спроведување“.

Повлекувањето на САД, кои се еден од најголемите светски загадувачи, би бил тежок удар против климатските промени и тоа само година по потпишувањето на спогодбата, која се смета за историска.

Брисел и Пекинг сметаат дека е „неповратен“ патот за намалување на емисијата на штетни гасови кои предизвикуваат климатски промени.

Претседателот на Европската комисија, Жан-Клод Јункер, вчера во Берлин предупреди дека Париската спогодба е меѓународен договор со правни обврски и дека за тоа ќе бидат потребни повеќе години ако САД сакаат да се откажат од него.

Претставниците на ЕУ наведуваат дека Европската Унија и Кина го задржале местото на лидери во светот во борбата за зачувување на климата и дека ќе го поддржат и ќе го одбранат Парискиот договор.

Пекинг и Брисел веќе една година работат на усогласување на заедничка декларација за климатските промени и за чиста енергија.


Рекорден број земји го потпишаа Парискиот договор за климатски промени


Њујорк, 23 април, 2016 - 13:12 (META) 

Во седиштето на Обединети нации во Њујорк, лидерите и претставниците на 175 земји го потпишаа Парискиот договор за ограничување на порастот на глобалната температура.

Парискиот договор беше усвоен во декември 2015 година и е прв чекор кон обврзување на земјите во реализација на ветувањето за намалување на ефектот од стаклената градина.

Генералниот секретар на Обединетите нации, Бан Ки-мун, ја отвори церемонијата за потпишување на договорот и рече дека ерата на трошење без последици е завршена. Тој ги повика лидерите на светските организации да ја намалат зависноста на нивните економии од јаглеродот и да им пружат помош на земјите во развој во таа транзиција.

Земјите кои го потпишаа парискиот договор учествуваат со повеќе од 93 отсто од вкупната светска емисија на гасови, правејќи го феноменот на стаклена градина.

Американскиот државен секретар Џон Кери, заедно со својата внука, го потпиша договорот во име на САД и рече дека Вашингтон формално ќе се придружи на договорот подоцна оваа година.