Параглајдерист починал по слетувањето во Гевгелиско


Гевгелија, 10 април, 2018 - 10:28 (META) 

М.Ќ.(47) од село Мрзенци-гевгелиско, кој бил член на Клуб за екстремни спортови, вчера бил пронајден починат над село Сермин-гевгелиско, во близина на манастирот „Свети Илија“.

Како што соопшти МВР, настанот бил пријавен вчера, попладне во 15 часот.

На М.Ќ., по неговото успешно слетување со параглајдер, му се слошило и по кратко време тој починал. Од страна на лекар од Итната медицинска помош била констатирана смрт, наведуваат од МВР.

Увид на местото на настанот извршиле Јавен обвинител и увидна екипа од Полициска станица Гевгелија. По Наредба на Јавен обвинител телото на починатиот било предадено за обдукција


Чешки параглајдерист загина кај Крушево


Крушево, 30 јули, 2017 - 14:30 (META) 

Чешки параглајдерист вчера бил пронајден починат во местото Две чешми, во близина на Крушево.

Како што соопшти МВР, спасувачките екипи во 13.40 часот го пронашле мртвото тело на 51-годишниот Ј.В. (51) од Република Чешка.

Параглајдеристот вчера околу 13 часот полетал од Мечкин камен во Крушево и додека управувал, се закачил на дрво, по што паднал на земја и починал. Ј.В. бил член на чешка аматерска асоцијација за летање. Смртта е констатирана од лекар од итна медицинска помош.


Параглајдерист од Скопје тешко се повредил кај Ќафасан


Охрид, 5 август, 2016 - 16:21 (META) 

Триесет и седумгодишнен скопјанец вчера попладне, околу 13.30 часот, тешко се повредил при пад од паралаглајдер кај местото Три шилки, во близина на граничниот премин Ќафасан на македонско-албанската граница, информира МВР.

Според полициските информации, кај Д.Џ. била констатирана скршеница на клучната коска.

По укажаната лекарска помош во Медицинскиот центар во Струга, тој бил префрлен во Специјалната болница „Свети Еразмо“ во Охрид на понатамошно лекување.

Од полицијата велат дека преземаат мерки за расчистување на случајот.


Прв параглајдерски куп „Прилеп опен 2014“


Прилеп, 31 октомври, 2014 - 11:12 (META) 

Првиот параглајдерски куп во дисциплината прецизно слетување „Прилеп опен  2014“, ќе биде отворен утре во Прилеп, на новоопременото полетувалиште за параглајдери „Трескавец“.

„Натпреварот ќе биде отворен утре (1 ноември, 2014) во 11 часот, на полетувалиштето „Трескавец“, лоцирано веднаш под манастирот Трескавец, од градоначалникот на Општина Прилеп, Марјан Ристески и од амбасадорот на САД во Македонија, Пол Волерс. По отворањето на натпреварот се обезбедени неколку бесплатни летови со тандем-параглајдер за претставници на медиумите. Новинарите кои ќе летаат ќе можат да ги снимаат летовите со камери GoPro, обезбедени од организаторите, а веднаш потоа снимките ќе бидат префрлени на нивни хард-дискови. Тандем-летовите траат околу 15 минути“, се вели во соопштението од УСАИД.