!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Европа треба да се врати на своите корени, порача папата Франциск


Ватикан, 9 јануари, 2017 - 15:36 (META) 

Папата Франциск денеска повика Европа да го врати својот идентитет во момент кога се соочува со бегалска криза, Брексит и со верски инспирирани насилства.

Својот годишен говор за надворешната политика, папата го посвети на промовирање мир во време на масовни миграции, економска стагнација и на екстремистички терор во светот.

Поглаварот на Римокатоличката црква ги пофали европските земји кои примиле бегалци и истакна дека и другите треба да пружат „достоинствен пречек“ и истовремено да се борат со сиромаштијата и со општествените проблеми кои се последица на верскиот фундаментализам.

Говорејќи пред амбасадорите кои се акредитирани во Ватикан, папата апелираше Европа да ги врати своите идеали во годината кога се обележуваат 60 години од потпишувањето на Римскиот договор.

– Потребно е Европа да се врати на корените за да ја обликува својата иднина – рече папата.


Голем пресврт во Ватикан: Папата им дозволи на свештениците да го простуваат абортусот


Рим, 21 ноември, 2016 - 14:37 (META) 

Папата Франциск им одобри на сите свештеници да го простуваат абортусот. Папата ја објави големата одлука во документот „Апостолско писмо“, по завршување на Светата година на милосрдието.

– Сакам да нагласам дека абортусот е сериозен грев, имајќи предвид дека со него се завршува невин живот. Но, не постои грев до кој божјата милост не може да дојде и да го избрише во моменти кога тој што се покајува ќе одлучи да се смири со Бога – напишал папата Франциск.


Папата Франциск одби да коментира за Трамп


Ватикан, 11 ноември, 2016 - 11:15 (META) 

Римскиот папа Франциск одби да изнесе личен став за доаѓањето на Доналд Трамп на претседателското место со објаснување дека тој е заинтересиран само за влијанието на политичките одлуки врз сиромашната популација, јавува „Ројтерс“.

„Не расудувам карактери на личности и на политичари. Само сакам да знам какви страданија предизвикуваат нивните однесувања врз сиромашните и врз запоставените“, одговори папата Франциск на поставеното прашање од италијанскиот весник „Ла Република“ во врска со неговото мислење за победата на магнатот за недвижности на американските избори.

Папата со аргентинско потекло посочи дека неговата најголема загриженост во овој момент се бегалците и мигрантите и притоа додаде дека мора да се урнат ѕидовите што разделуваат. Во февруари годинава, за време на посетата на Мексико, папата изјави дека личноста што размислува само за градење ѕидови, а не за градење мостови, не е христијанин.


Папата Франциск во ненадејна посета на Аматриче


Аматриче, 4 октомври, 2016 - 10:41 (META) 

Папата Франциск денеска ненадејно го посети Аматриче, гратчето во Централна Италија што најтешко беше погодено во неодамнешниот земјотрес, во кој загинаа речиси 300 лица, објави Ватикан.

Папата во неделата потврди дека ќе посети област погодена од земјотрес, но не прецизираше која. Тој изјави дека посетата сака да биде приватна и таму би заминал за да биде блиску до народот.

По катастрофалниот земјотрес, кој во август ги потресе централните делови на Италија, папата изјави дека ќе ги посети тие места штом ќе биде во можност.


Папата во посета на Кавказ


Тбилиси, 1 октомври, 2016 - 13:08 (META) 

Папата Франциск одржa голема проповед на стадион во Тбилиси, на вториот ден од неговата викенд-посета на Кавказот, која е посветена на промовирање на религиозната толеранција и мирот. Во својата беседа денеска папата побара од католиците да пронајдат утеха во Бог.

Грузиската православна црква одлучи да не прати официјална делегација на собирот, наведувајќи дека православни верници не може да учествуваат на католички служби. Грузија е претежно православна земја, но, според Ватикан, има околу 2,5 отсто католици.

По неговото пристигнување во Тбилиси, Франциск се сретна со грузискиот претседател и побара почитување на меѓународното право и на правото на сувереност на нациите. На неговата изјава се гледа како на изразувањето на критика кон Русија, која има војска во грузиските отцепени региони Абхазија и Јужна Осетија.

Утре папата оди во Баку за да одржи масовна проповед, а потоа ќе го посети споменикот на жртвите загинати за независноста и ќе се сретне со владините лидери. Посетата на Франциск на Азербејџан ќе заврши со серија меѓурелигиски средби, вклучително и со претставник на муслиманите на Кавказот.


Папата Франциск посети поранешни проститутки


Рим, 13 август, 2016 - 12:09 (META) 

Папата Франциск направи ненадејна посета на 20 поранешни проститутки, кои се сместени во „безбедна куќа“ во Рим.

Станува збор за млади жени, сите на возраст од околу 30 години, кои шверцери на луѓе ги присилиле да се занимаваат со проституција. Жените се спасени од нивните поранешни макроа и сега им е дадено засолниште и заштита во апартман на неоткриена локација, со кој управува една католичка хуманитарна организација.

Средбата и разговорот на поглаварот на Римокатоличката црква со жените, кои се дојдени од Африка, но и од разни делови на Европа, траел повеќе од еден час. Папата Франциск повеќепати досега има изјавено дека шверцот со луѓе претставува криминал кон човештвото.

На сите жени им било ветувано дека ќе им биде најдена работа, но трговците со луѓе ги довеле во Италија и во други земји од западна Европа, за да ги принудат да работат како проститутки. Претставник на Ватикан изјавил за медиумите во Рим дека сите овие згрижени жени имаат сериозни психички трауми.


Папата испрати порака за солидарност со бегалците


Атина, 16 април, 2016 - 15:48 (META) 

Силна порака за солидарност со бегалците и за ставање крај на војните испрати папата Франциск денеска од грчкиот остров Лезбос. Папата во придружба на вселенскиот патријарх Вартоломеј и на грчкиот архиепископ Иеронимос, ги посети мигрантскиот центар Морија, во кој се наоѓаат повеќе од 4.000 бегалци, и пристаништето Митилена.

Посетата на кампот беше полна со емоции. Илјадници бегалци од Сирија, Авганистан, Ирак, млади и стари, семејства, но и малолетници кои патуваат сами, полни со надеж извикуваа „слобода“ и со солзи во очите ги замолија папата и верските лидери да им помогнат да се испрати порака да се отворат границите за да може да го продолжат својот пат кон Европа.

–  Дојдов за да бидам со вас и да ги слушнам вашите приказни. Дојдовме за да го свртиме вниманието на светот на оваа сериозна хуманитарна криза и да замолиме за нејзино решавање – истакна папата.

Тројцата верски лидери при посетата на мигрантскиот центар Морија накратко имаа ручек со три семејства бегалци за уште подобро да ја слушнат нивната приказна, искуствата од државите од кои доаѓаат и каков е нивниот третман во бегалските центри.

Верските лидери се обратија до бегалците испраќајќи порака дека стојат солидарно со нив, осудувајќи ги политиките кои водат до војна. При посетата беше потпишана и заедничка декларација за солидарност со бегалците, но и со грчкиот народ, во која тројцата верски лидери истакнаа дека ова е најголемата хуманитарна криза од Втората светска војна наваму и побараа од сите влади да помогнат и да понудат привремен азил и засолниште на сите на кои им е потребен.

– Би сакал од срце да упатам апел за одговорност и за солидарност пред една толку драматична ситуација. Многу бегалци кои се на овој остров и на голем број други места низ Грција живеат во критични услови, во клима на страв и на неизвесност, чувствувајќи очај поради неизвесноста за иднината. Загриженоста на властите тука во Грција и другите европски држави се разбирливи и легални, но и покрај ова не треба да заборавиме дека бегалците и мигрантите пред да станат бројки се луѓе, лица, имиња, приказни. Европа е татковината на човековите права. И секој кој стапнува на европска територија треба да може да ужива во нив – истакна папата, апелирајќи да се најде решение за војните и да се стави крај на неконтролираното производство на оружје во светот.

На крајот на посетата папата и двајцата верски лидери имаа зедничка молитва и фрлија венци за сите што ги загубија животите во патот кон Европа.

Папата си замина од Лезбос со десет бегаци, осум од Сирија и двајца од Авганистан, чекор кој е силна порака до европските лидери за похумано справување со бегалската криза.


Папата Франциск во посета на бегалците на Лезбос


Атина, 16 април, 2016 - 11:12 (META) 

Папата Франциск ја почна својата посета на бегалците на грчкиот остров Лезбос. Неговата посета испраќа силна порака до европските лидери за похумано справување со бегалската криза и силен апел да се помогне да се стави крај на воените состојби, поради кои илјадници луѓе ги напуштаат домовите и ја бараат својата среќа во државите од Европската Унија.

Уште посилна порака е одлуката на папата да земе со себе 10 бегалци од Лезбос во Рим, според процените лица од Сирија и од Авганистан.

Папата се среќава со бегалците во големиот мигрантски центар Морија на Лезбос, во кој се наоѓаат 4.142 бегалци и мигранти, од кои голем дел ќе бидат вратени во Турција. Заедно со патријархот Вартоломеј тој се сретна со голем број од бегалците, разговарајќи накратко.

Покрај семејствата, папата се поздрави и со големиот број малолетни бегалци кои патуваат сами, без родители. Бегалците го дочекаа со голема радост, голем дел од нив бараат да им помогне и да пренесе порака до европските држави дека само бараат подобар живот, а голем дел од децата со него споделија дел од своите цртежи.

Само што слета на Лезбос, папата преку „Твитер“ забележа дека бегалците не се бројки, туку луѓе со лице, име, лична приказна и секој треба да го има тоа предвид и да се однесува кон нив како со луѓе.

По слетувањето, папата имаше куса средба со грчкиот премиер Алексис Ципрас и со вселенскиот партијарх Вартоломеј, со кои на крај на посетата ќе испратат заедничка порака.

Папата во дијалог со премиерот Ципрас истакна дека е горд на грчкиот народ и на начинот на кој хумано се однесуваат кон бегалците. Грчкиот премиер, пак, забележа дека ова е историски важна посета и можност и пред Европа и пред светот да се покаже неопходноста да се стави крај на војната и да се најде начин сите овие луѓе што ги напуштиле своите домови во барање подобра иднина да добијат подостоен живот.

– Посетата е можност да покажеме дека граѓаните од островите и целосно грчкиот народ и покрај големите проблеми, и покрај тоа што страда од мерките за штедење, покажаа хумано лице. Горд сум на народот во моменти кога некои наши партнери кренaа ѕидови и огради за да ги спречат луѓето да имаат подобар живот – истакна Ципрас.

 


Историската средба меѓу папата Франциск и рускиот патријарх Кирил ќе се случи на 12 февруари


Рим, 5 февруари, 2016 - 18:35 (META) 

Поглаварите на Римокатоличката црква и на Руската православна црква ќе се сретнат следната недела на Куба, што би било прва средба на папата и на рускиот патријарх. Во заедничкото соопштение на Ватикан и на Руската православна црква се соопштува дека средбата ќе биде важна фаза во односите меѓу двете цркви.

Портпаролот на Ватикан, Федерико Лобарди, соопшти дека папата Франциск и рускиот патријарх Кирил ќе се сретнат на 12 февруари во Хавана.

Истовремено, Ватикан и Руската црква ги повикаа сите христијани да се молат на Бога и да ја благословат оваа средба, која би можела да има добри резултати.

Папата и патријархот ќе разговараат за потребите од заеднички одговор на прогонот на христијаните на Блискиот Исток. Се предвидува и двајцата поглавари да потпишат заедничка декларација.


Папата Франциск за Божиќ повика на правичност, трезвеност и на сочувство


Ватикан, 25 декември, 2015 - 12:16 (META) 

Прославата на годинешното одбележување на Божиќ во базиликата „Свети Петар“ во Ватикан, папата Франциск ја посвети на барањето трезвеност и сочувство за помалку среќните.

Папата побара од сите, како што рече, „опиени“ од имоти и од површни работи да им се вратат на основните вредности на животот.

Screenshot

Тој рече дека Божиќ е време луѓето да откријат кои се.

„Во општество кое најчесто е затруено од консумеризам, хедонизам, богатство и од екстравагантност, детето Исус нè повикува да дејствуваме разумно, на начин кој е едноставен, доследен и кој овозможува да се види суштинското значење на работите“, изјави тој во својата проповед, при што ги повика верниците на трезвеност и на чувство за правдина во „општеството полно со нарцизам“.

Пред околу 10.000 верници, папата рече дека во светот кој понекогаш е груб спрема грешникот, а мек спрема гревот, неопходно е да се негува чувството на правичност.

Безбедносните мерки во Ватикан вообичаено се зголемени за време на божиќните празници и сите верници што сакаа да влезат во црквата, мораа да минат низ детектори за метал.