!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Папата повика на дијалог поради насилство во Ерусалим


Ватикан, 23 јули, 2017 - 15:47 (META) 

Папата Франциск изјави дека е вознемирен поради неодамнешните насилства во Ерусалим и повика на дијалог и на умереност за да се воспостави мир.

– Вознемирен ги следам тешките тензии и насилството во последните денови во Ерусалим. Чувствувам потреба да изразам повик на умереност и на дијалог – изјави папата, обраќајќи им се на верниците собрани на плоштадот Свети Петар.

Тој повика на молитва и надеж дека двете страни ќе излезат во пресрет со предлог за помирување.

Во судирот помеѓу Палестинците и израелската полиција во петокот во Ерусалим загинаа тројца Палестинци, а на Западното крајбрежје 19-годишен Палестинец со нож избодел тројца Израелци, по што бил убиен.

Израелската војска соопшти дека извршила големо апсење на Западниот Брег при што биле уапсени 29 лица, вклучувајќи и девет членови на екстремистичката група Хамас.


Папата загрижен поради опасните сојузи формирани на самитот Г20


Ватикан, 8 јули, 2017 - 17:03 (META) 

Папата Франциск изјави дека самитот Г20 во Хамбург загрижува поради потенцијалните „многу опасни сојузи“ помеѓу светските лидери.

-Загрижен сум поради многу опасните сојузи помеѓу силите кои имаат искривена верзија на светот: САД и Русија, Кина и Северна Кореја, Путин и Асад – рече папата во интервју за италијанскиот весник „Република“.

Тој наведе дека миграцијата е голем проблем и дека самитот Г20 посебно го загрижува затоа што најмногу ги погодува мигрантите.

-Опасноста се однесува на имиграцијата. Наш главен и за жал се поголем проблем во светот денеска се сиромашните, слабите, исклучените, меѓу кои се и мигрантите. Затоа ме загрижува Г20 – додаде папата.

Говорејќи за Европа, која се соочи со прилив на стотици илјади мигранти и бегалци од 2015 година, папата ги предупреди нејзините лидери да не паднат на илузијата дека е можно да ги затворат нивните граници.


Трамп се сретна со папата Франциск


Рим, 24 мај, 2017 - 13:25 (META) 

Претседателот на САД, Доналд Трамп и Папата Франциск денеска се сретнаа во Ватикан каде што поразговарале половина час и си размениле подароци.

Папата Франциск на американскиот претседател му подарил три свои главни учења кои генерално ги подарува на шефовите на државите кои го посетуваат.

Дел од главните теми содржани во тие учења жестоко се спротивставуваат на политиките на Трамп и неговите ветувања дадени во предизборната кампања, посебно на полето на заштита на животната средина.

Трамп на папата му подарил книга на Мартин Лутер Кинг и му рекол дека се надева дека ќе ужива во неа. Состанокот помеѓу Трамп и папата е одржан зад затворени врати во Апостолксата палата во Ватикан.

Трамп во Ватикан пристигнал во придружба на сопругата Меланија која за разлика од посетата на Саудиска Арабија носела марама на главата, што е во склад со протоколот на Ватикан.

Во Италија Трамп допатувал со авион веднаш по посетата на Израел и ќе помине помалку од 24 часа, пред да замине во Брисел каде што ќе разговара со лидерите на Европската Унија и НАТО.

Трамп во Италија ќе се врати во четврток за да присуствува на самитот на Г-7.


Папата замоли за прошка поради улогата на Црквата во геноцидот во Руанда


Ватикан, 20 март, 2017 - 20:47 (META) 

Папата Франциск замоли за прошка поради „гревовите и грешките на Црквата и на нејзините членови“ за време на геноцидот во Руанда во 1994 година.

Тој на претседателот на Руанда, Пол Кагаме, му рече дека се надева дека неговото извинување ќе ѝ помогне на земјата да ги залечи раните.

Во изјава по нивниот состанок, Ватикан призна дека некои католички свештеници и чесни сестри „подлегнале на омразата и на насилството, издавајќи ја нивната мисија“ со тоа што учествувале во геноцидот.

За време на геноцидот, кој траел 100 дена, екстремистите Хуту убиле повеќе од 800.000 Тутси.

Според зборовите на преживеаните, многу жртви биле убиени од свештени лица и чесни сестри, а владата на Руанда соопшти дека многумина умреле во црквите во кои барале засолниште.

Ватикан соопшти дека папата ја пренел тагата на Светиот престол и на Црквата поради геноцидот и изразил солидарност со жртвите.


Папата Франциск замрзна 2 милиони евра со сомнително потекло


Ватикан, 19 февруари, 2017 - 12:55 (META) 

Ватикан замрзна повеќе од два милиони евра со сомнително потекло минатата година, во склоп со борбата која папата Франциск ја врши против перењето пари во Светата столица.

Ова го соопшти ватиканскиот главен обвинител Џан Пјеро Милано.

Милано, чија титула гласи „промотер на правдата“ рече дека замрзнатите пари – околу 2,1 милион евра се дел од вкупната сума од околу 13 милиони евра колку што се замрзнати од 2013 до 2016 година.

Според неговите зборови, истрагата се води во 17 случаи за кои има сомневање дека биле финансиски малверзации.

Минатата година, Агенцијата за финансиско информирање на Ватикан соопшти дека затворила скоро 5.000 сомнителни сметки во склоп на тригодишната истрага за работењето на Ватиканската банка.


Папа Франциск: Уште е рано да го оценам Трамп, прво да видам како работи


Рим, 22 јануари, 2017 - 11:31 (META) 

Папата Франциск вели дека првин ќе почека да види како работи новиот претседател на САД, Доналд Трамп, пред да каже што мисли за него, јавуваат светските агенции.

Поглаварот на Римокатоличката црква во интервју за неделното издание на шпанскиот весник „Паис“, рекол дека не сака прерано да суди за луѓето.

„Мораме да почекаме. Ќе видиме како ќе се однесува, што ќе преземе и дури тогаш ќе стекнам мислење за него. Но, човек да се плаши или да се радува за нешто што допрва би можело да се случи, не е мудро“, вели папата Франциск.

Прашан како ја коментира појавата на популистички лидери во САД и во Европа, папата рекол дека во кризни времиња луѓето бараат спасители кои ќе го вратат индентитетот и се бранат со подигнување ѕидови и бодливи жици кон другите луѓе.

Според него, и Адолф Хитлер во 1930-тите години бил избран од страна на луѓе кои барале спасител во време на економска и на политичка криза, а подоцна тој ги уништил.

„Кризите предизвикуваат страв, а мислам дека најочигледниот пример за тоа е популизмот во Германија во 1933 година. Луѓето кои беа во криза бараа идентитет, сè додека не се појави харизматичен лидер (Адолф Хитлер, н.з.) и им вети дека ќе им го врати идентитетот. Сите знаеме што се случи потоа“, вели папата Франциск.


Папа Франциск: Божиќ е заложник на заслепувачкиот материјализам


Рим, 25 декември, 2016 - 11:31 (META) 

Божиќ стана заложник на заслепувачкиот материјализам кој го засени Бога и ги засени потребите на гладните, мигрантите и на загрозените од војна, вели папата Франциск.

Тој за време на мисата за Бадник, кој вчера се славеше според Грегоријанскиот календар, рече дека на светот, кој е опседнат со подароци, прослави и со егоцентризам, му е потребена понизност.

На мисата на која присуствуваа околу 10.000 верници и десетици кардинали и бискупи, папата рече дека многумина богати треба да се потсетат дека пораката на Божиќ е понизност и едноставност.

Папата Франциск рече дека малиот Исус треба да биде потсетник за сите оние кои денеска страдаат, особено малите деца кои се кријат под земја бегајќи од бомби или се наоѓаат на дно на чамец полн со мигранти.

– Дозволете предизвик да ни бидат децата, оние на кои им е оневозможено да се родат, оние кои плачат затоа што немаат кој да им го задоволи нивниот глад, оние кои имаат оружје наместо играчки во рацете – рече папата.


Папата Франциск порача дека не е човечки да се затворат вратите и срцето за мигрантите


Ватикан, 2 ноември, 2016 - 11:27 (META) 

Папата Франциск, кој постојано ја повикува Европа да ги отвори границите за мигрантите, изјави дека владите имаат право внимателно да ги проценат државните капацитети за ефективно да се интегрираат мигрантите. Во разговор со новинари, враќајќи се од дводневна посета на Шведска, тој додал дека не е човечки да се затворат вратите и срцето за мигрантите.

„Владите мораат да бидат отворени и да ги примат, но притоа да ги проценат и своите капацитети, бидејќи мигрантите треба да бидат интегрирани, а не само пуштени да влезат“, изјавил папата Франциск, додавајќи дека гостопримството ќе се исплати на долгорочен план.

Европа се соочи со бран од преку милион побарувачи на азил, најголем по Втората светска војна.


Пораки за мир, единство и за почитување на светата миса во чест на Мајка Тереза


Скопје, 11 септември, 2016 - 14:17 (META) 

Денеска на плоштадот Македонија се одржа светата понтификална миса, крунски настан на „Деновите на Мајка Тереза“, која ја предводеше сараевскиот надбискуп, кардиналот Винко Пуљиќ, кој беше именуван од папата Франциск да го предводи овој настан во Скопје.

– Гордејте се со светата мајка. Вие, верниците, кога ќе ви падне духот и ќе се најдете во опасност да ја изгубите надежта, инспирирајте се од оваа прекрасна мајка, која со своето застапништво ќе ви помогне. Мајките кои го изгубиле мајчинството, вратете го преку почитувањето на оваа света мајка, а Вие кои се плашите од животот, учете од оваа света мајка колкава е силата во верата. Не заборавајте го овој ден и овој настан – порача кардиналот Пуљиќ.

На настанот обраќање имаше и претседателот на државата, Ѓорге Иванов, кој истакна дека единствениот вистински начин да ја покажеме нашата почит кон светата Мајка Тереза е да живееме заедно со сите наши најдлабоки верски, етнички и идеолошки разлики. Иванов нагласи дека наместо истоштувањето со политички битки за докажување на нејзиното потекло и присвојувањето на нејзното име, Мајка Тереза „би нè упатила да се угледаме на нејзиниот пример“.

– Да правиме мали добри дела со голема љубов. А за тоа не мора да одиме на крајот од светот бидејќи, како што таа велеше, почитта и љубовта почнуваат во нашиот дом, во нашето маало, во нашиот град, во нашата држава Македонија. Гледајќи нè политички разединети и поделени, би побарала од нас да не се делиме и караме, туку да си простиме, да се помириме и да се почитуваме… Би нè охрабрила да го чуваме највредното нешто што го имаме, највредното што и таа го понесе со себе во Индија, а тоа е нашиот македонски модел на соживот и почитување и прифаќање на различноста. Затоа што само така ќе научиме да живееме заедно со сите наши најдлабоки верски, етнички и идеолошки разлики – рече Иванов.

Скопскиот бускуп и апостолски егзарх Киро Стојанов ја прогласи капелата во Спомен-куќата на Мајка Тереза за светилиште на света Мајка Тереза.

Светата понтификална миса на плоштадот Македонија ја следеа голем број верници, граѓани, претставници на Католичката црква и на другите верски заедници, како и домашни и странски делегации.

Папата Франциск на 4 септември пред стотици илјади граѓани и верници на плоштадот Свети Петар во Ватикан ја прогласи Мајка Тереза за светица.


Утре голема света миса на скопскиот плоштад за канонизацијата на Мајка Тереза


Скопје, 10 септември, 2016 - 18:09 (META) 

Кардиналот Винко Пуљиќ ќе ја предводи понтификалната света миса во Скопје, која ќе се одржи утре на плоштадот Македонија, а е крунскиот настан од „Деновите на Мајка Тереза“, пренесува „Дојче веле“.

Скопскиот бискуп и апостолски егзарх во Македонија, Киро Стојанов, пред неколку недели соопшти дека папата Франциск на 24 август го именувал сараевскиот надбискуп, кардиналот Винко Пуљиќ, за негов специјален пратеник кој ќе ја предводи понтификалната света миса во Скопје.

Се очекува утре на плоштадот Македонија да се соберат голем број гости, верници и граѓани. Најавени се и високи претставници на Католичката црква и на другите верски заедници, бројни домашни и странски делегации и гости, во чест на светата Мајка Тереза.

На централниот настан во рамките на „татковинската прослава по повод канонизацијата на Мајка Тереза“, кој почнува утре во 10 часот, обраќање ќе има и претседателот на државата, Ѓорге Иванов, соопштија денеска од неговиот кабинет.

Папата Франциск на 4 септември пред стотици илјади граѓани и верници на плоштадот Свети Петар во Ватикан ја прогласи Мајка Тереза за светица.